Mak 10
10
Yeso mə ataʼa ba da anó ni ghaba inami
(Mat 19.1-12; Luk 16.18)
1Yeso noʼ kapenawum ikwene iŋu aba abey Judeya anjin ugwi Jodan izi. Ikwiy ba ŋu fere iyad ma. Anigə yə ti ni taʼa úŋwən numugə yə́ mə́ taʼa.
2Ba Farasay moʼ ŋú abú uŋwən da ikwaʼara uŋwən. Anigə mbə biri abú uŋwən kwi “umba unoʼo mə tey kwi anóm saʼa inami nə uyey ma?”
3Wə ywere abú úŋwən kwi “Mose ghayn inen kwi ngiya?”
4 #
Mat 5.31
Mbə ghayn kwi “Mose beni kwi anóm naʼa aŋwaʼanayn itey kwi yə si saʼa inami ni uyey ma ki chi uŋwən ana.” 5Anigə Yeso ghayn abú úŋwən kwi, “Mose ŋwaʼanayn noʼo ŋunə inen damugə itən fiŋ si tu. 6Asɨmə Amaʼazənə isəg ti, Nwiye tana ba anóm nə ayey. 7Akə aton zəŋ, anóm yi noʼ sayn mbaʼ ma ni ingwo ma iŋu bumə nə uyey ma, 8anigə úŋwən umbi bumə si məŋe nyə inyo feyn anigə aki ni bere ma ba ubigə asɨmə mbə si məŋi amə wa ufeyn. 9Anigə ayə tey kwi ghəy zənə Nwiye si bumi ka wa moʼ saʼara ma.”
10Amaʼazənə Yeso nə mbə məŋə-anó ma wene iŋu ana, mbə məŋə-anó gha biri anó ighaba inami abú uŋwən. 11#Mat 5.32; 1Ko 7.10, 11Yə́ ghayn abú úŋwən kwi, “Anom moʼ ŋunə ghaba inami nə uyey ma i nam ayey chini, yə neŋe ayey chini. 12Ayey moʼ ŋunə u ghaba inami nə unóm ma iŋu nam anóm chini, yə neŋe anóm chini.”
Yeso zi aborobod igun boŋ kuŋe
(Mat 19.13-15; Luk 18.15-17)
13Ba moʼ num buŋ kuŋe iŋu abú Yeso kwi ubira úŋwən, asɨmə mə məŋə-anó ma kyayn abú ba wu. 14Amaʼazənə Yeso zən anó zəŋ, yə siy itəm anigə ighayn abú mbə məŋə-anó ma kwi “Mbən sayn buŋ kuŋe mbəŋ zaʼa ineŋ mbən kən ngwen úŋwən damugə amə ba mbənə uchomo ni buŋ kuŋe mbəŋ umi jəg anó ufon Nwiye 15#Mat 18.3Ayə ghayn asiʼ inen kwi, wa ŋunə cha ubeni ma anó ufon Nwiye ni ŋwə̂ kuŋe mi inyi ma ungɨŋ anó fon wu.” 16Amaʼazənə yə ghayn nigə, yə beʼere buŋ kuŋe wu ikwaʼa ubugə ma igun ma, izi aborobod inyo ma.
Wa imbon ŋu izən Yeso
(Mat 19.16-30; Luk 18.18-30)
17Amaʼazənə Yeso mə gha ŋuw igha, anóm moʼ nod ŋu pey zum utəw inwi asey ifigi ma, i ibiri abú uŋwən kwi, “Ataʼa ba chuŋ amə anó ngiya amə aghəy a aghəy boʼo ijəg itəni nu cha imi noʼo imey?”
18Yeso biri abú uŋwən kwi “Aton zənə ngwə tiya aŋu kwi wa chuŋ amə da ngiya?” Cha wa chuŋ moʼ awu ichigə akə Nwiye ma zeʼe. 19Ngwə kyayn ikɨy Nwiye tənə imə ghayn kwi, i zwere yə wa, ineŋe yə uyey kə unóm wa chini, iji yə, izi ayə anó ibuw inyo wa, imə ingwə yə ba, wumini ungwə mba nə ungwə ingwo.
20Anom wu ghayn abú uŋwən kwi, “Ataʼa ba mə si isiy ikɨy təŋ ujum iti Amaʼazənə mə́ mə ngwaʼ wa.”
21Yeso ney uŋwən wuʼ ighayn abú uŋwən kwi, “Ngwə bəw anó feyn, ŋu fənə u aghəy mbənə umə inigə ujum inaʼ ukab wu abú ba ukwaŋ anigə ngwə yi mə nə imbon azobo. Ngwə bə aghəy nigə, ngwə zaʼa niŋe inyi jim.” 22Amaʼazənə anóm wu zəw anó zəŋ, yə fid ifigi anigə inoʼ ni yeŋ ŋuw nə kənə damugə yə mə ni imbon nanaʼ.
23Yeso ney usin ighab anigə ighayn abú mbə məŋə-anó ma kwi, “Amə anó kaka abú ba mbənə umə nə imbon inyi ungɨŋ anó ufon Nwiye!”
24Mbə məŋə-anó zəw inayn zəŋ imeŋere uma anigə Yeso aghəy ghayn abú úŋwən kwi, “Umbuŋ buŋ ayə kaŋa ika inyi ungɨŋ anó ufon Nwiye. 25Ayə zaba abú Kamel ichigə ubəg isaʼ chigə umugə wa imbon mi inyi ungɨŋ anó ufon Nwiye.”
26Mbə məŋə-anó ma meŋere uma kwaʼa azəd anigə ghayn akaʼa uma kwi, “Abə mə ney ji amə ngwa mi du angəʼ?”
27Yeso ney úŋwən ighayn kwi, “Ano zəŋ yə ka amə abú wa akama abú Nwiye damugə cha anó moʼ amə ka abú Nwiye.”
28Pita ghayn abú uŋwən kwi, “Ney! Mba sayn u aghəy ujum iniŋe injə jim.”
29Yeso ghayn abú úŋwən kwi, “Ayə ghayn asiʼ inen kwi cha wa moʼ ŋunə unoʼo sayn unuʼ, kə unya anóm ma kə unya ayey ma kə ingwo ma kə mbaʼ ma kə buŋ ma kə imbayn ma da aŋu foro da ukən uchuŋ, 30nu cha umi mə nə u aghəy chini akə amaʼ zəŋ ikɨ ighari. Uyi mə nə na, unya anóm, unya ayey, ingwo, buŋ nə imbayn. Umbi nwini inya aghəw uma. Anigə, u yi jəg itəni ni cha imi noʼo imey akə Amaʼazənə ami zaʼa. 31#Mat 20.16; Luk 13.30Anigə ba nanaʼ mbənə umə imbey umbi inwi u mbənə nwi sə mə ba imbey.”
Yeso gha ighayn anó da iwu ma iŋu pey akə ighari ta
(Mat 20.17-19; Luk 18.31-34)
32Amaʼazənə Yeso ni mbə məŋə-anó ma mə koʼo ŋuw Yerusanem, Yeso mə yeŋ ŋuw imbey. Mbə məŋə-anó wu mə meŋere uma. Ba mbənə mbə́ niŋe anjim uma mə goro. Wə aghəy num mbə məŋə-anó ighum cho bigə iyad ighayn anó zənə ami aghəy nu uŋwən. 33Wə ghayn abú úŋwən kwi, mbən zəw, mba yə koʼo ŋuw a Yerusanem. Mba bə pey awu, u mbi fənə Ŋwə̂ Wa abú ba kyayn ambəŋ Nwiye foro abú mbə ataʼa ba akə unoʼo. Ba mbəŋ umbi sob usaʼa kwi uzwere uŋwən. Umbi aghəy nigə inaʼ uŋwən abú ba mbənə akama ba Jû, 34ba mbənə ikwiy ba Jû umbi baʼara uŋwən, chad amira inyo ma swayn uŋwən akə ingwad izwere uŋwən. Uney bə chigə uta u yi zəmə iwu.
Jems ni Jon á biri anó moʼ abú Yeso
(Mat 20.20-28)
35Jems ni Jon nu amə buŋ anóm Zebedi ŋu abú Yeso pey yi ghayn abú uŋwən kwi, “Ataʼa ba mba yə kaba kwi ngwə aghəy anó moʼ zənə mba mi biri inigə.”
36Wə biri abú úŋwən kwi “Amə anó ngiya mbən mə kaba kwi a aghəy inen?”
37Mbə ywiri abú uŋwən kwi, Amaʼazənə ngwə mi chomo injə atən ufon, beni kwi mba chomo aboʼo njigə wa feyn aba bugə jəgi wa feyn aba bugə kyabay.
38 #
Luk 12.50
Yeso ghayn abú úŋwən kwi cha mbən kyayn ngwen anó zənə mbən mə biri. Amaʼazənə yə ywiri nigə, yə biri abú úŋwən kwi, mbən mi kyayn izəw ingəʼ zənə ami zəw? Kə mbən mi kyayn inum une akə inji zənə ami inum?
39Mbə ywiri abú uŋwən kwi mba yi ighəy. Yeso ghayn abú úŋwən kwi mbən yi zəw ingəʼ zənə ami zəw nibi inum une numugə ami num. 40Asɨmə akama umugə mi choʼ wa ŋunə umi chomo inyi aba bugə jəgi kə aba abugə ikyabay. Usin mbəŋ umbə abú ba mbənə Nwiye si tana isey abú úŋwən 41Amaʼazənə mbə məŋə-anó mbi ighum zəw anó zəŋ, mbə siy itəm ni Jems foro ni Jon. 42#Luk 22.25, 26Anigə Yeso tiya mbə məŋə-anó wu uma ujum asin feyn ighayn abú úŋwən kwi, mbən kyay kwi ba mbənə umə tumə ba mbənə akama ba Jû umbə ni ikay igun ma mbən nibi kyayn kwi ba kyay akaʼa uma ubə ni ikay itumə úŋwən akə unó ujum. 43#Mat 23.11; Mak 9.35; Luk 22.26Ikwiy nigə ami mə ni umbən, wa ŋunə umə kaba imə wa kyay injə akaʼa yi mə wa faʼa abú ba mbi ujum, 44wa ŋunə u kaba imə wa imbey injən kaʼa, yi mə wa faʼa inen umbən ujum 45damugə kaba Ŋwə̂ Wa cha yə di zaʼa ma kwi ba faʼa abú uŋwən. Wə zaʼa ifa abú ba nibi ku da iziya utəw ba nanaʼ.
Yeso zwey Bartimayus nu yə́ fəgə
(Mat 20.29-34; Luk 18.35-43)
46Yeso nə mbə məŋə-anó ma ŋuw Jeriko. Amaʼazənə úŋwən ni ikwiy ba mə duw á Jeriko, ufəg moʼ nu ukum ma mə Bartimayus ŋwə̂ Timeos chomo iyad inji mə biyə u aghəy 47amaʼazənə yə zəw kwi amə Yeso wa Nazared umə chigə, yə ti ni kyay ghayn kwi “Yeso ŋwə̂ Dafid kənə akə aŋu.”
48Amaʼazənə yə ghayn ney, ba nanaʼ ghayn abú uŋwən kwi kəbərə uchəw. Wə mara kyayn ighayn kwi “ŋwə̂ Dafid diri aŋu.”
49Yeso təm ighayn kwi “Mbən tiya uŋwən.” Amaʼazənə mbə tiya anóm wu mbə ghayn abú uŋwən kwi boro inyo noʼo atey u yə tiya ayə.
50Wə zəw nigə ichi ndwi maʼa ma iwaʼ itəm atey iŋu aboʼo Yeso.
51Yeso biri abú uŋwən “kwi ngwə mə kaba kwi aghəy ngiya inigə?” Ufəg wu ywiri kwi “Ataʼa ba ayə kaba kwi ngwə u aghəy a gha zən usin.”
52Yeso ghayn abú uŋwən kwi, “ŋuw inji beni fiŋ aghəy ngwə boro.” Aba ighari wu, wa wu ti ni zən usin anigə iniŋe anjim Yeso umugə yə mə iyeŋ ŋuw.
Currently Selected:
Mak 10: NGI
Highlight
Share
Copy
Want to have your highlights saved across all your devices? Sign up or sign in
© 2023 CABTAL
