Matəw 28

Yeso si zəmə

(Mak 16.1-10; Luk 24.1-12; Jon 20.1-10)

1Amaʼazənə anəy aku ba Jû si chigə, asə afəfəb ni imbiri anəy sonde, Meri Magdelen, ni Meri chini ŋu iney isəy wu.

2Umugə mbə́ ŋu nigə, u sə ŋu zən imbayn ti ki nyiʼere kwaʼa akə ikay anigə angəd Asɨyisəg swiʼi zaʼa azobo pey yi ibin itəy wu ichi uchəw isəg wu chomo igun. 3Inyo ma mə məŋərə ni imbəŋ ŋwaʼa. Ndwi ma mə nibə fuw nə asəg. 4Usogwi mbənə mbə́ mə́ nəmə isəy wu gəd kwaʼa akə ingəʼ. Anigə mbə ibó chomo nə uwu ba.

5Asɨmə angəd wu ghayn abú mbə ayey wu kwi, “Mbən mə goro ngwən mə kyayn kwi mbən yə kaba Yeso ŋunə mbə́ komo azad abaʼaray. 6Cha uŋwən akəŋ, yə si zəmə aba anji zənə yə́ ghayn inen. Mbən zaʼa izən asin zənə mbə́ niŋi uŋwən akuŋ. 7Anigə mbən yabi ŋu ghayn abú mbə məŋə-anó ma kwi, ‘Yə si zəmə anigə u yə ŋuw imbey inen a Galeli. Mbən yi zən uŋwən awu.’ Mbəni nyaba ngwən anó zənə aghayn inen.”

8Ayey wu yabi noʼ atəw isəg wu, mbə́ mə́ yeŋ yə goro, asɨmə iwuʼi sugi ungɨŋ fiŋ uma. Mbə́ nod da iŋu ghayn anó zəŋ abú mbə məŋə-anó ma. 9Amaʼazənə mbə́ mə́ noro ŋuw nigə, u sə ŋu zən, Yeso saʼa kuw úŋwən ghayn kwi, “A yə chaʼara ngwən.” Amaʼazənə yə ghayn nigə, mbə ŋu abú uŋwən pey yi yimə ughəw ma iwumini uŋwən. 10Yeso ghayn abú úŋwən kwi, “Mbən mə goro ngwən. Mbən ŋu ghayn abú umbəŋ unya anom kwi uŋuw a Galeli umbi zən aŋu awu.”

Usogwi ghayn anó zənə yə duw

11Amaʼazənə mbə ayey wu mə́ ŋuw, usogwi moʼ akaʼa mbənə mbə́ mə́ nəmə isəy wu ŋu ungɨŋ asin wu. Mbə́ pey yi ghayn unó ujum mbənə mbə duw abú ba ukyayn ambəŋ Nwiye. 12Amaʼazənə ba ukyayn ambəŋ Nwiye nə ba ukyayn ungɨŋ abey mbə fere, mbə́ tana unó mbənə umi ghayn. Mbə tana nigə inaʼ ukab nanaʼ abú usogwi wu. 13Mbə na nigə ighayn abú úŋwən kwi, “Mbən ghayn abú ba kwi, ‘Mbə məŋə-anó ma zaʼa iji awu ma afəb Amaʼazənə mbən mə bune.’ 14Kanə gobono di zəw, mba yi kyayn anó ni ghayn abú uŋwən da ichi ngwən angəʼ.” 15Usogwi wu num ukab awu anigə iŋu aghəy aba anji zənə mbə ghayn abú úŋwən. Zəŋ amə anó zənə amə saŋa akaʼa ba Jû izaʼa pey akə̂choŋ.

Yeso naʼa afaʼa kyayn abú mbə məŋə-anó uma

(Mak 16.14-18; Luk 24.36-49; Jon 20.19-23; Ifa 1.6-8)

16 # Mat 26.32; Mak 14.28 Mbə məŋə-anó Yeso ighum cho feyn ŋu igun ugum a Galeli asin zənə Yeso ghayn abú úŋwən kwi uŋuw. 17Amaʼazənə mbə́ zən uŋwən, mbə́ wumini uŋwən. Asɨmə mbi moʼ məŋərə uma kwi amə kaŋa Yeso. 18Yeso ŋu abú úŋwən pey yi ghayn kwi, “Nwiye si naʼ ikay ujum iniŋ itumə azobo foro isəy. 19#Ifa 1.8Anigə mbən ŋuw abú ba ujum ungɨŋ ubey ujum ighəy kwi úŋwən amə umbəŋ məŋə-anó. Mbən naʼa une abú úŋwən akə ukum Mbaʼ, akə uyi Ŋwə̂ foro akə uyi Azugə zayn zayn. 20Mbən taʼa úŋwən kwi u siy unoʼo ujum mbənə asi naʼ inen. Mbən kyáy kwi ayi mə nə umbən ighari ujum iŋu pey akə Amaʼazənə isəg mi nwi.”

Currently Selected:

Matəw 28: NGI

Highlight

Copy