Matəw 26

Mbə́ tə́ unáŋ da izwere Yeso

(Mak 14.1, 2; Luk 22.1, 2; Jon 11.45-53)

154 Amaʼazənə Yeso si tey unó mbəŋ imara, Yə́ ghayn abú mbə məŋə-anó ma kwi, 2“Mbən kyay kwi asi buʼe uney ubigə ijəg Ufere Izaʼara Chigə Igun, anigə umbi yimə Ŋwə̂ Wa na kwi ukomo azad abaʼara.”

3Amaʼa wu, ba ukyayn ambəŋ Nwiye nə ba ukyayn mbənə umə ungɨŋ abey ŋu bumə ungɨŋ itoʼ Kayifas nu amə atəw kyayn abú ba mbənə umə faʼa ambəŋ Nwiye. 4Mbə́ ŋu bumə nigə ni tana inji zənə umi ibiya Yeso anjim anjim izwere. 5Asɨmə mbə́ ghayn uma uma kwi, “Cha mba mi zwere uŋwən amaʼazənə umə́ jəgə Ufere Izaʼara Chigə Igun, nji ba mbi buw ndum.”

Ayey moʼ zoʼo Yeso a Betani

(Mak 14.3-9; Jon 12.1-8)

6Amaʼazənə Yeso mə́ Betani, ungɨŋ na Sayimon ŋunə yə si zəw ingəʼ akə akyuŋ, 7#Luk 7.37, 38ayey moʼ ŋu abú uŋwən ni ungəd aka unun ungɨŋ ichəŋ alabasta pey yi tu atəw ma nu yə mə jəgə.

8Amaʼazənə mbə məŋə-anó ma zəw anó zəŋ, mbə́ sɨy itəm ibiri kwi, “Ayey ŋunə umə chiŋe ungəd mbəŋ da ngiya? 9Nji mbə mi fənə ungəd mbəŋ akə ukab nanaʼ inaʼ ukab wu abú ba ukwaŋ.”

10Yeso kyay anó zənə mbə́ mə́ ghayn anigə ighayn, abú úŋwən kwi, “Mbən mə naʼa ingəʼ abú ayey ŋunə da ngiya? Yə aghəy anó chuŋ iniŋ. 11Ba ukwaŋ mbi mə injən akaʼa ighari ujum, asɨmə ayi mə cha aŋu injən akaʼa ighari ujum. 12Yə si tu ungəd nyoʼoro nyoʼoro mbəŋ igun iniŋ da itana inyi inyo kwi abə ku u bi si twayn. 13A yə ghayn asiʼ inen kwi, usin ujum mbənə umi ghayn ukən uchuŋ uŋu awu ungɨŋ, u mbi ghayn anó chuŋ zənə ayey ŋunə u aghəy anigə sə kono uŋwən.”

Judas beni ifənə Yeso

(Mak 14.10, 11; Luk 22.3-6)

14Wa moʼ akaʼa mbə́ məŋə-anó Yeso ighum cho bigə nu ukum ma mə Judas Iskariyot ŋu abú ba ukyay ambəŋ Nwiye. 15Yə pey yi biri abú úŋwən kwi, “Mbən mi naʼa ngiya iniŋ ighari abə tey Yeso inen kwi mbən ibiya uŋwən?” Amaʼazənə mbə́ zəw nigə, mbə́ taŋ ukab siriva achuʼ ighumi ta naʼ abú uŋwən. 16Iti akə amaʼa wu imə ŋuw imbey, Judas mə kaba apan ighəy kwi u ibiya Yeso.

Yeso jəg Ufere Izaʼara Chigə Igun ni mbə məŋə-anó ma

(Mak 14.12-21; Luk 22.7-13, 21-23; Jon 13.21-30)

17Akə anəy imbey akə anəy zənə umə jəgə ufere ingəŋ nu chama aforo, mbə məŋə ma anó ŋu abú uŋwən pey yi biri abú uŋwən kwi, “Ngwə mə kaba kwi mba ŋuw tana asin zənə mba mi jəg Ufere Izaʼara Chigə Igun akayn?”

18Yə ghayn abú úŋwən kwi, “Mbən ŋuw abú anom moʼ ungɨŋ asin zənə amə imbey inen pey yi ghayn abú uŋwən kwi, ‘Ataʼa ba ghayn kwi, inyi amaʼ si koʼ ayi jəg Ufere Izaʼara Chigə Igun nə umbəŋ aməŋə-anó ungɨŋ injə na.’” 19Mbə məŋə-anó wu aghəy aba anji zənə Yeso ghayn abú úŋwən. Anigə mbə́ tana ijəg Ufere Izaʼara Chigə Igun.

20Asə anjaʼ anəy wu, Yeso nə mbə məŋə-anó ma ighum cho bigə chomo asəy ijəg. 21Amaʼazənə mbə́ mə́ jəgə, Yeso ghayn kwi, “Ayə ghayn asiʼ inen kwi, wa moʼ injən akaʼa yə fənə aŋu.”

22Mbə məŋə-anó wu kaŋa kənə, anigə wa feyn feyn ni biri abú uŋwən kwi, “Asɨyisəg, awaʼa umugə?”

23Yə ywiri kwi, “Wa nu umə zi abugə ma ungɨŋ akaŋ feyn ni umugə yi fənə aŋu. 24Ŋwə̂ Wa yi ku anji zənə mbə́ ŋwaʼanayn ungɨŋ Aŋwaʼanayn Nwiye da uŋwən. Asɨmə ingəʼ yi nyi igun wa ŋunə umi fənə uŋwən. Adi mə́ kwi cha mbə di ibə́ uma uŋwən nji yə mi boŋ.”

25Judas ŋunə yə́ fənə uŋwən nibi biri kwi, “Ataʼa ba awaʼa umugə.” Yeso ghayn abú uŋwən kwi, “Amə nigə ngwə ghayn.”

Iti akə itari Asɨyisəg

(Mak 14.22-26; Luk 22.14-20; 1Ko 11.23-25)

26Amaʼazənə Yeso nə mbə məŋə-anó ma mə jəgə, Yeso num abimi ingəŋ chaʼara Nwiye igun ibɨʼiri naʼ abú mbə məŋə-anó ma ghayn kwi, “Mbən num jəg, zəŋ amə inyi nyə̂ inyo.”

27Yə nibi num itoʼ unoʼ chaʼara Nwiye naʼ abú úŋwən ghayn kwi, “Mbən nugə umbən ujum. 28Zəŋ amə inyi anəm nu Nwiye num isəŋ usəw fey awu ni umbən. Anəm zəŋ amə zənə yə deŋe da utəw ba nanaʼ boʼo Nwiye waʼa unó iboŋ uma. 29Ayə ghayn inen kwi, cha ami gha nugə unoʼ mbəŋ pey anəy zənə ami gha nugə nə umbən ungɨŋ anó ufon uŋu mbaʼ.”

30Amaʼazənə mbə si kyugə ukyi, mbə́ du iŋu igun Ugum Olif.

Yeso ghayn kwi Pita yi ton ayi

(Mak 14.27-31; Luk 22.31-34; Jon 13.36-38)

31Amaʼazənə Yeso nə mbə məŋə-anó ma pey igun Ugum Olif, yə ghayn abú úŋwən kwi, “Akə afəb mbən yi nod sayn aŋu. Ayə ungɨŋ Aŋwaʼanayn Nwiye kwi,

‘Umbi zwere anəmə injəg,

Anigə unoŋ injəg wu yi saʼa.’

32 # Mat 28.16 Asɨmə Amaʼazənə Nwiye mi zəmə aŋu, ayi ŋu imbey inen a Galeli.”

33Pita ghayn abú uŋwən kwi, “Ka mbə məŋə-anó mbi ujum di nod sayn ayə, cha ami inoʼ ighəy nigə.”

34Yeso ghayn abú Pita kwi, “Ayə ghayn asiʼ inigə kwi, ki unoŋ ighɨ yə sə ŋu toŋ akə afəb, ngwə yi ton aŋu ighari ta.”

35Pita ghayn abú uŋwən kwi, “Kanə udi mə zwere aŋu nə ngwə cha ami noʼo iton ayə. Mbə məŋə-anó mbi ujum nibi ghayn nigə.”

Yeso chaʼara Nwiye a Getsemani

(Mak 14.32-42; Luk 22.39-46)

36Yeso nə mbə məŋə-anó ma noʼ ŋu asin moʼ zənə umə tiya akə Getsemani. Amaʼazənə mbə pey awu, yə ghayn abú úŋwən kwi, “Mbən chomo akəŋ, atinə aŋu iŋu chaʼara Nwiye.” 37Amaʼazənə yə́ ghayn nigə, yə́ num Pita ni buŋ Zebedi ubigə iŋu nə úŋwən. Yə mə kaŋa kənə, fiŋ ma ni toboro uŋwən. 38Anigə yə ghayn abú úŋwən kwi, “Akənə si kwaʼa sugi ungɨŋ nyi fiŋ kaba izwere aŋu. Mbən chomo akəŋ ni ikyiʼi ni chaʼara nu umugə.”

39Amaʼazənə yə ghayn nigə, yə yeŋ ŋu imbey kere pey yi zum ifigi asəy chaʼara Nwiye ghayn kwi, “Uŋu Mbaʼ inji bə mə awu, ngwə ghəy ingəʼ zəŋ chigə igun iniŋ. Asɨmə ghəy amə anoʼ zənə ngwə kaba akə ma zənə a kaba.”

40Yə́ wene ŋu abú mbə məŋə-anó wu pey yi zən uŋwən umə bune. Anigə yə biri abú Pita kwi, “Cha mbən kyay ichomo ikyiʼi nə umugə akə awa? 41Mbən chomo ikyiʼi ni chaʼara Nwiye kwi ka anó moʼ kwaʼara ma ngwən. Fiŋ yə kaba kwi a yə anó zənə akoʼoro, asɨmə nyə̂ nyo yə ibo.”

42Amaʼazənə Yeso aghəy nigə, yə gha ŋu chaʼara Nwiye ghayn kwi, “Uŋu Mbaʼ abə mə kwi cha nji ighəy kwi ingəʼ zəŋ chigə igun iniŋ, aghəy anó zənə ngwə wuʼi.”

43Amaʼazənə yə́ wene ŋu, yə pey yi zən mbə məŋə-anó wu abúni. Amə chama nji abú úŋwən ifiʼi kaba aghɨ. 44Yeso gha noʼ sayn úŋwən ŋu chaʼara Nwiye iŋu pey akə ighari ta. Yə́ mə́ ghayn aba unó mbənə yə́ mə́ bə ghayn.

45Yə́ gha wene ŋu abú mbə məŋə-anó wu pey yi ghayn abú úŋwən kwi, “Mbən mə bugə bune izwere ngwən? Mbən zən kwi amaʼ si koʼ, mbə́ si fənə Ŋwə̂ Wa abú ba mbənə umə aghəy unó iboŋ. 46Mbən noʼo atəy mba ŋuw! Wa ŋunə u fənə aŋu yə sə zaʼa!”

Mbə́ ibiya Yeso

(Mak 14.43-50; Luk 22.47-53; Jon 18.3-12)

47Amaʼazənə Yeso mə bugə inayn, Judas nu amə wa feyn akaʼa mbə məŋə-anó ma ighum cho bigə pey. Yə́ mə́ iyeŋ nə unoŋ ba nu yə́ yimə ibey nə utini imbaŋ. Amə ba ukyayn ambəŋ Nwiye nə ba ukyayn ungɨŋ abey mbə́ tom úŋwən. 48Wa ŋunə yə́ fənə Yeso si tey anwine abú úŋwən kwi, “Wa ŋunə ami soro indəʼ ma, amə uŋwən mbən mə kaba, mbən ibiya uŋwən.”

49Judas ŋu aba abú Yeso pey yi ghayn abú uŋwən kwi, “Ataʼa ba mə chaʼara ayə.” Yə chaʼara nigə isoro indəʼ ma.

50Yeso ghayn abú uŋwən kwi, “Inyi azi, aghəy anó zənə ngwə zaʼa ighəy.” Amaʼazənə Judas aghəy nigə, ba wu ŋu ibiya Yeso akə ikay yimi. 51Anom moʼ akaʼa ba mbənə mbə́ mə́ aboʼo Yeso choʼ ubey ma, yə səg atoŋ abú wa afaʼa atəw ukyay abú ba mbənə umə faʼa ambəŋ Nwiye ichi.

52Yeso ghayn abú wa wu kwi, “Sugə ungwə ubəy ambaʼ. Kyay kwi wa ŋunə umə zoŋo akə ubəy umbə zwere uŋwən akə ubəy. 53Cha ngwə di kyay kwi, mə kyay umugə ighayn abú uŋu Mbaʼ anigə uyi cha unoŋ mbə angəd nu uchigə ma akə inuŋ ighum cho bigə kwi u zaʼa iywere aŋu? 54Asɨmə kwi a bə aghəy nigə, inayn Nwiye zənə ighayn kwi unó mbəŋ umbi aghəy, ami du akə asiʼ ngiya?”

55 # Luk 19.47; 21.37 Yeso ghayn abú unoŋ ba wu kwi, “Mbən sə zaʼa ibiya aŋu, mbən zaʼa nə ibey foro utini imbaŋ ni kwi amə uji? Mə́ mə chomo ungɨŋ imbəŋ Nwiye unəy ujum taʼa ba asɨmə cha mbən ibiya aŋu. 56Unó mbəŋ ujum aghəy da unó mbənə ba ukən Nwiye ŋwaʼanayn umi du akə asiʼ.” Amaʼazənə yə́ ghayn nigə, mbə məŋə-anó wu uma ujum sayn uŋwən inod bugə.

Mbə́ num Yeso ŋu ifigi mbə saʼa abey

(Mak 14.53-65; Luk 22.54, 55, 63-71; Jon 18.13, 14, 19-24)

57Ba mbənə mbə́ ibiya Yeso num uŋwən ŋu akuw Kayifas nu amə atəw kyayn abú ba mbənə umə faʼa ambəŋ Nwiye. Mbə taʼa ba akə unoʼo ni ba kyayn ungɨŋ abey si ŋu fere akuw ma. 58Pita mə awu anjim agha sara. Yə yeŋ nigə iŋu pey uchəw ukam atəw kyay abú ba mbənə umə faʼa ambəŋ Nwiye. Yə nyi ungɨŋ ukam wu ŋu chomo aboʼo mbə nəmə imbəŋ Nwiye da izən inwi.

59Ba ukyay ambəŋ Nwiye ni mbə saʼa abey wu uma ujum kaba nji nu umi zi unó figi igun Yeso da umi zwere uŋwən. 60Mbə́ kab nigə asɨmə cha udi zən, kanə ba nanaʼ di du ŋu ghayn anó figi igun ma ifigi uma, a sə ŋu pey akə nwi, anóm moʼ ubigə du ŋu imbey, 61#Jon 2.19Ghayn kwi, “Anom ŋunə ghayn kwi, ayi saʼa imbəŋ Nwiye igha chim akə unəy ta.”

62Amaʼazənə mbə́ ghayn ney, atəw kyayn abú ba mbənə u mə́ faʼa ambəŋ Nwiye noʼ atəy ibiri abú Yeso kwi, “Cha anó moʼ inigə iywiri da unó mbənə umə zi igun inigə?” 63Yeso chuʼ ama izey. Anigə atəw kyay abú ba mbənə umə faʼa ambəŋ Nwiye ghayn abú uŋwən kwi, “Ghayn ungwə asiʼ akə ukum Nwiye ŋunə umə ikay kwi ngwə mə wa ŋunə Nwiye zoʼo nu amə Ŋwə̂ Nwiye.”

64Yeso ywiri abú uŋwən kwi, “Ngwə si ghayn nigə. Asɨmə a yə ghayn inen kwi, inoʼ akinine, mbən yi zən Ŋwə̂ Wa nu uchomo aba bugə jəgi Nwiye ŋunə umə ni ikay ujum, nibi zən uŋwən umə zaʼa ungɨŋ ipaʼ azobo.”

65Amaʼazənə yə ghayn ney, atəw kyayn abú ba mbənə umə faʼa ambəŋ Nwiye yimə ndwi ma pəŋi ghayn kwi, “U yə jimə Nwiye! Mba mə nə kaba uzənə da ngiya? Mba si zəw nu mugə u jimə Nwiye. 66Mbən sob kwi ngiya?”

Mbə́ ywiri kwi, “Yə koʼ kwi uzwere uŋwən.”

67Amaʼazənə mbə́ ghayn nigə, mbə chad amira ifigi ma som uŋwən, umoʼ ufey uŋwən 68Ghayn kwi, “U ngwə wa ŋunə Nwiye zoʼo, ghayn wa ŋunə ufey ayə!”

Pita ton Yeso

(Mak 14.66-72; Luk 22.56-62; Jon 18.15-18, 25-27)

69Pita chomo isəg asama, anigə ŋwə̂ ayey moʼ nu amə wa faʼa Kayifas ŋu abú ŋwən pey yi ghayn kwi, “Ngwə fən, ngwə mə nibə aboʼo Yeso wa Galeli.”

70Pita ton anó zəŋ ifigi ba ujum ghayn kwi, “Cha a di kyayn aŋu ano zənə ngwə mə ghayn.”

71Amaʼazənə yə ghayn nigə, Pita du ŋu uchəw ukam. Ŋwə̂ ayey faʼa chini zən uŋwən anigə ghayn abú ba mbənə mbə́ təm iyad iyad kwi, “Anom ŋunə mə aboʼo Yeso wa Nazared.”

72Pita nibi ton anó zəŋ anigə meʼe ma kwi, “Cha a di kyay aŋu anom ŋunə ngwə mə ghayn da uŋwən!”

73Amaʼazənə asin naʼa, anom mbənə mbə́ təm iyad iyad akuŋ ŋu ghayn abú Pita kwi, “Amə kwaʼa asiʼ kwi ngwə mə wa ufeyn akaʼa úŋwən damugə, inji zənə ngwə mə inayn yə tey kwi ngwə mə wa Galeli.”

74Anigə Pita məʼe ma ghayn kwi, “Akə ukum Nwiye cha adi kyay aŋu anom ŋunə mbən mə ghayn da uŋwən!” Aba ighari wu unoŋ ingɨ toŋ. 75Anigə, Pita kono anó zənə Yeso ghayn abú uŋwən kwi, “Ki unoŋ ingɨ sə ŋu toŋ, ngwə yi ton ighari ta kwi cha ngwə di kyay yə aŋu.” Amaʼazənə yə́ kono nigə, yə du ŋu isəg chwey isɨy kwaʼa akə ingəʼ.

Currently Selected:

Matəw 26: NGI

Highlight

Copy