Luk 4

Inji zənə Satan kwaʼara Yeso

(Mat 4.1-11; Mak 1.12, 13)

1Azugə zayn zayn sugi ungɨŋ inyo Yeso Amaʼazənə yə wene zaʼa ugwi Jodan. Azugə wu num uŋwən iŋú ambayn zomo 2yə chomo akə uney ighumi kyugə Satan kwaʼara uŋwən. Cha yə jəgə ma aghəy moʼ akə uney wu. Amaʼazənə uney wu mey, injəy ti ni zaŋa uŋwən 3Satan ghayn abú uŋwən kwi “Ngwə mbə́ mə́ kwaʼa Ŋwə̂ Nwiye beŋe itey zəŋ akə ingəŋ” 4Yeso ywiri abú uŋwən kwi, “Ayə ungɨŋ Aŋwaʼanayn Nwiye kwi cha wa mə chomo ma ikay aba da ingəŋ” 5Satan num uŋwən koʼ ŋú asin sá moʼ, akə ŋwə̂ amaʼ u tey ubey mbənə umə akə igun isəg ujum abú uŋwən 6ighayn abú uŋwən kwi “A yi naʼ ikay inigə ngwə tumə ubey mbəŋ ujum ijəgə u aghəy chuŋ u mbənə umə awu Nwiye naʼ ikay ujum ineŋ anigə ayi naʼ ikay wu abú wa ŋunə a wuʼi.” 7Anigə ngwə bə wumini aŋu ayi naʼ u ghəy mbəŋ ujum inigə 8Yeso ywiri kwi, ayə ungɨŋ Aŋwaʼanayn Nwiye kwi wumini aba Asɨyisəg ungwə Nwiye sə faʼa aba abú uŋwən 9Satan num uŋwən u ŋu a Yerusanem pey ighəy uŋwən koʼ item idəm imbəŋ Nwiye ayə aneŋ ighayn abú uŋwən kwi ngwə bə mə kwaʼa Ŋwə̂ Nwiye təm indwen akəŋ 10ayə ungɨŋ Aŋwaʼanayn Nwiye kwi Nwiye yi ghayn abú mbə́ angəd ukəŋə ayə. 11Anigə umbi yimə yə aneŋ aneŋ akə ubugə ma kwi ka ngwə tumə yə injə aghəw aki itey. 12Yeso ywiri kwi, ayə ungɨŋ Aŋwaʼanayn Nwiye kwi ikwaʼara yə Asɨyisəg Nwiye ko. 13Amaʼazənə Satan si mara i kwaʼara Yeso, yə sayn uŋwən noʼ ŋúw ma yə ŋú chomo pey Amaʼazənə umi mə nə apan chini.

Yeso ti afaʼa ma ungɨŋ Galeli

(Mat 4.12-17; Mak 1.14, 15)

14Yeso wene ŋú a Galeli anigə Azugə zayn zayn naʼ ikay abú uŋwən. Ukən da uŋwən saŋa ungɨŋ aba abey wu 15yə mə ataʼa ba ungɨŋ ina ibumi ba Jû anigə ba ujum mbənə mbə́ zəw unó wu mbə́ yere uŋwən.

Ba Nazared ton Yeso

(Mat 13.53-58; Mak 6.1-6)

16Yeso ŋú Nazared asin zənə yə́ kwey awu. Aney aku ba Jû yə́ ŋú ana ibumi ba Jû nu mugə yə́ mə́ bə́ ŋúw. Yə́ təm atey ifoŋ inayn Nwiye. 17Anigə mbə num aŋwaʼanayn foyi zənə wa ukən Nwiye Esiya ŋwaʼanayn inaʼ abú uŋwən. Wə́ zá aŋwaʼanayn wu izən asin zənə mbə́ ŋwaʼanayn kwi 18Azugə Nwiye Asɨyisəg ayə inyi igun damugə Asɨyisəg zoʼo aŋu kwi a ghayn ukən uchuŋ abú ba ukwaŋ yə tom aŋu kwi a saʼ kwi Nwiye yi chi ba ndəŋ sayn foro kwi ifəg iti zən usin fori kwi umbi sayn ba mbənə u paʼ úŋwən asey 19i saʼ kwi amaʼ si kəʼ nu Asɨyisəg mi aghəy ichuŋ abú ba ma 20Amaʼazənə yə foŋ nigə, yə gha ifoyi aŋwaʼanayn wu inaʼ abú wa afaʼa ana ibumi ba Jû wu iŋu chomo ma asey. Ba ujum mbənə mbə́ mə́ awu ungɨŋ na ibomo ba Jû wu niŋi aghɨ inyo ma 21Anigə yə ghayn abú uŋwən kwi asin zənə a foŋo akə aŋwaʼanayn zəŋ akə̂choŋ yə du akə asiʼ umugə mbən zəw. 22Ba ujum ghayn aba unó chuŋ da uŋwən anigə ini yere inayn aborobod zənə yə duw uchəw ma. Umugə mbə yere nigə, u biri kwi uŋwən aka ŋwə̂ Josef? 23Yeso ghayn abú uŋwən kwi mə kyay kwi mbən yi ghayn inayn maʼa zəŋ iniŋ kwi wa ifuʼ ghə injigə mi inyo imey. Ghə unó mbənə mba zəw kwi ngwə aghəy á kapenawum ungɨŋ asin zənə ngwə duw awu. 24#Jon 4.44Wə gha ighayn kwi, “Ayə́ ghayn asiʼ inen kwi cha ba mə beni uma wa ukən asin zənə u bə́ uŋwən. 25Amə asiʼ kwi mbə ayey uti nanaʼ mə Israel amaʼazənə Elayija wa ukən Nwiye mə awu yimə amə cha imbəŋ akə ituʼ ta nə aba anigə ajəgə inyi ungɨŋ ubey ujum 26cha Nwiye tom ma Elayija ana ayey uti moʼ Israel yə́ tom uŋwən abəma abú ayey uti moʼ yə́ mə́ chomo Azarephath aba abey sidon. 27Anigə ba nanaʼ mə Israel ni isɨgə akyuŋ amaʼazənə Elisha mə wa ukən Nwiye anigə cha wa moʼ akaʼa uŋwən ni akyuŋ wu məy inyo ma chigə akə Naman nu amə wa Siria.” 28Amaʼazənə ba zəw anó zəŋ, ba ujum mbənə mbə́ mə́ awu ungɨŋ na ibumi ba Jû sɨy itəm 29Anigə mbə noʼ atey itini uŋwən ichi ungɨŋ asin wu mbə́ num uŋwən iŋú pey igun ugum ŋunə mbə́ chimi abey uma wu. Mbə́ mə́ kaba imaʼ uŋwən ubem akəŋ. 30Anigə yə yeŋ chigə ungɨŋ ugha uma iŋú ma.

Yeso chi uzugə iboŋ ungɨŋ inyo anóm moʼ

(Mak 1.21-28)

31Yeso swiʼi iŋú kapenawum nu amə asin moʼ aba abey Galeli. Wə pey ni ataʼa ba mbənə mbə mə awu akə unó aney aku ba Jû 32#Mat 7.28, 29ba mbənə mbə́ zəw unó wu yere umugə yə mə itey damugə yə́ mə́ inayn ni wa ŋunə umə nə ikay ighəy nigə. 33Anom moʼ mə́ awu ungɨŋ na bumi ba Jû wu ni uzugə iboŋ mə ungɨŋ inyo ma. Wə kyáyn akə ikay ghayn kwi 34Ah Yeso wa Nazared amə ngiya ngwə mə kaba ina? Ngwə waʼa zaʼa boʼo mi niy ngwa? Mə kyay wa ŋunə ngwə mə uŋwən ngwə mə wa zayn Zayn ŋunə Nwiye tomo. 35Yeso ghayn abú Azugə wu kwi “Chuʼ izi duw inyo ma.” Anigə Azugə wu tum anóm wu asey ifigi ba ujum yə́ du ni cha aghəy ma anó iboŋ moʼ nə wa wu. 36Ba ujum mbənə mbə́ mə́ awu yere anigə ighayn akaʼa uma kwi amə ukudu inayn ngiya ŋunə? U yə ni ikay ighayn abú uzugə iboŋ u du ungɨŋ inyo wa. 37Anó da Yeso saŋa ungɨŋ usin ujum mbənə mbə́ mə́ awu iyad iyad.

Yeso zwey ba nanaʼ

(Mat 8.14-17; Mak 1.29-34)

38Yeso noʼ ana ibumi ba Jû nə mbə məŋə-anó ma iŋú inyi ungɨŋ na Sayimon nə aməŋə-anó ma ufeyn. Unyuŋ simon mə isɨgə ufəʼ kaka anigə mbə boʼ ubugə abú Yeso kwi uzwey uŋwən 39Yeso ŋú təm iyad ukon ma inayn abú ufəʼ wu kwi sayn uŋwən. Ufəʼ wu sayn uŋwən aba ighara wu, yə noʼ ina aghəy jəgi abú úŋwən 40Amaʼazənə nyama chugi sə ŋú ghaba ba ujum mbənə mbə́ mə́ nə ba isɨgə ni ukudi isɨgə ujum num ba wu iŋú abú Yeso yə kwaʼa ubugə ma igun úŋwən izwey úŋwən 41Uzugə iboŋ du ungɨŋ inyo ba nanaʼ. Mbə́ mə́ kyáyn ighayn kwi, “Ngwə mə Ŋwə̂ Nwiye anigə yə́ inayn abú úŋwən. Cha wə́ di beni ma kwi u nayn damugə mbə kyay kwi uŋwən mə wa ŋunə Nwiye zoʼo.”

Yeso ghayn inayn Nwiye ungɨŋ na ibumi ba Jû

(Mak 1.35-39)

42Amaʼazənə isəg kyiʼi, Yeso du awu ungɨŋ abey iŋú asin zənə amə cha ba awu. Ba wu ti ni kaba uŋwən, Amaʼazənə mbə́ zən uŋwən, mbə́ ŋú ikuw uŋwən. Cha mbə beni uma kwi u gha sayn uŋwən. 43Anigə yə ghayn abú úŋwən kwi, “A yi mə ghayn ukən uchuŋ da anó ufon Nwiye ungɨŋ usin chini damugə amə da anó ufon wu yimə Nwiye cha aŋu.” 44Anigə yə ŋú imə yə́ ghayn inayn Nwiye ungɨŋ na ibumi ba Jû tənə imə Judeya.

Currently Selected:

Luk 4: NGI

Highlight

Copy