Luk 14

Yeso zwey anóm nu yə mə isɨgə

1Amə aney aku ba Jû Yeso ŋu ijəg ana wa kyayn abú ba Jû moʼ umugə yə chomo awu ungɨŋ, ba mə ney uŋwən kwi uwaʼa ighəy anó moʼ? 2Anom moʼ zaʼa ifigi ma nu ubugə ma nə ughəw ma mə fuw. 3Yeso zən anigə ibiri abú mbə́ taʼa unoʼo foro abú ba Farasay kwi, “Noʼo mə tey kwi ba zwey wa aney aku kə indəʼe?” 4Mbə chuʼ ma izi anigə yə num anóm wu izwey uŋwən ighayn abú uŋwən kwi u ŋuw ma. 5#Mat 12.11Umugə yə ghayn nigə, ughayn abú úŋwən kwi, “Amə ngwa injən akaʼa nu ŋwə̂ ma kə ipoŋ ma bə fwayn ungɨŋ ubəg aney aku nu cha umi chi aba ighari awu?” 6Cha mbə́ di ywiri ma ibiri wu.

Anó ni inum inyo asey nə anó ni inum ba

7Yeso ghayn umugə ba mə kaba ichomo usin mbənə mə́ siy abú ba kyayn anigə yə ghayn inayn maʼa abú ba mbənə mbə́ mə́ awu kwí, 8“Wa moʼ bə kaʼa ayə akə inama i chomo ayə asin zənə u siy abú ba kyayn, ighari moʼ wa wu kaʼa wa chini nu uchigə ma akə ayə, 9Amaʼazənə wa wu yi bə zaʼa, wa ŋunə yə tiya ngwen yi zaʼa ghayn inigə kwi, ‘Noʼo inaʼ asin abú wa uŋu’ ngwə yi mə ni indere atəw anigə ngwə yi ŋu chomo aba kukuŋe. 10Anigə ubə kaʼa yə asin moʼ, ŋuw ichomo igun utən kukuŋe amaʼazənə wa ŋunə yə kaʼa ayə bə zaʼa, u yi pey yi ghayn inigə kwi, ‘Masa, noʼo ŋu chomo asin kyayn zi’ anigə ayi naʼ iwumini inigə ifigi ba jum mbənə umə awu. 11#Mat 23.12; Luk 18.14Mbə́ ghayn kwi ba ujum mbənə umə beʼere inyo Nwiye yi swiʼiri úŋwən asey anigə wa ŋunə u swiʼiri inyo ma asey Nwiye yi beʼere uŋwən.” 12Yeso ghayn abú wa ŋunə yə tiya uŋwən kwi, “Amaʼazənə ngwə naʼa ijəg abú ba kə kaʼa ufire itiya ayə amə umbə uzi, kə umbə ba unebey, kə umbə unya anóm kə ba ukab damugə umbi tiya ayə Amaʼazənə umə kaʼa uyi mə ufire uma anigə umbi aghəy naʼ umbə u aghəy jəgi. 13Anigə aney ngwə mə kaʼa ufire, tiya ba ukwaŋ, itiya ubuʼiri ba, itiya uguʼiri ba, foro nə ifəg. 14Nwiye yi zi aborobod igun nigə damugə cha aney ukudu ba wu mi iwiy aghəy moʼ inigə. Nwiye yi naʼa uneʼe inigə aney zənə ba mbənə u mə aghəy unó mbənə ukəʼərə mi zəmə iwu.”

Inayn maʼa da ufire kyayn

(Mat 22.1-10)

15Amaʼazənə anóm moʼ yə chomo ni jəgə inugə nə uŋwən zəw anó zəŋ, yə ghayn abú uŋwən kwi, “Nwiye zi aborobod igun wa ŋunə umi jəg ufire ungɨŋ anó ufon Nwiye!” 16Amaʼazənə yə ghayn nigə Yeso ghayn abú uŋwən kwi, “Wa moʼ kaʼa ufire kyayn anigə itiya ba nanaʼ. 17Amaʼazənə amaʼ akə ufire wu kəʼə, yə tom ŋwə̂ afaʼa ma kwi uŋuw ghayn abú ba mbənə yə́ tiya úŋwən kwi, ‘Mbən zaʼa mə si tana u aghəy ujum!’ 18Anigə úŋwən uma ujum ti ni inayn i naʼ aton zənə cha umi ŋu. Wa imbey ghayn abú ŋwə̂ afaʼa wu kwi, ‘Mə zon imbayn fey anigə ayə ŋu zən imbayn wu. Mə boʼo ubugə inigə kwi cha ami zaʼa.’ 19Uchini ghayn kwi, ‘Mə zon ipoŋ ighum ayə kaba iŋu zweʼe mə boʼo ubugə kwi cha ami zaʼa.’ 20Uchini ghayn kwi, ‘Mə chene nam anigə chama nji iniŋ izaʼa.’ 21Ŋwə̂ afaʼa wu ŋú ghayn anó wu ujum abú mbaʼ afaʼa ma. Mbaʼ faʼa wu zəw ney isɨ itəm anigə ighayn abú ŋwə̂ faʼa wu kwi, ‘U yabi ŋú iyad abey iŋú igun inji tənə imə ungɨŋ abey itiya ba kwaŋ, itiya ba mbənə umə iyeŋ asey, itiya ubuʼiri ba itiya ifəg.’ 22Ŋwə̂ faʼa wu aghəy anó zəŋ anigə ighayn abú uŋwən kwi, ‘Masa anó zənə ngwə ghayn mə si aghəy anigə asin yə bugə awu abú ba chini.’ 23Mbaʼ afaʼa wu ghayn abú uŋwən kwi, ‘duw ŋú igun inji kyayn foro igun inji tənə imə ŋuw ambayn itiya ba kwi u zaʼa akə inji zənə inyi na mi sugi. 24Ayə ghayn inigə kwi cha wa moʼ akaʼa ba mbənə mə́ tiya umi zweʼe inyi aghəy jəgi!’”

Mbə məŋə-anó Yeso umbi zəw ingəʼ

(Mat 10.37, 38)

25Amə aney moʼ, unóŋ ba kyayn mə yeŋ nə Yeso gha ma ighayn abú úŋwən kwi, 26#Mat 10.37“Wa moʼ ŋunə umə zaʼa iniŋ yi cha udi wuʼe ma aŋu chigə akə inji zənə u wuʼi mbaʼ nə ingwo ma, chigə uyey nə buŋ ma, chigə unya anóm nə unya ayey, chigə kaba akə inji zənə u wuʼi inyo ma cha u kəʼ ma iməŋə uŋu aməŋə-anó. 27#Mat 10.38; 16.24; Mak 8.34; Luk 9.23Wa moʼ uŋunə cha u beʼe ma azad abaʼaray ma iniŋe inyi injim cha u di kəʼ ma iməŋə uŋu aməŋə-anó. 28Amə ingwa injən akaʼa nu u sə ŋu chim na kyayn nu cha umi chomo asey ikwaʼara unun ukab ŋunə umə abú uŋwən izən kwi ukab wu kəʼ amə aghəy u chim na wu awu? 29U bi ki ney ma nigə, nji u yi zi ati ghəy cha nji umi mara na wu. Anigə ba mbənə umi zən, umbi sə chiʼe uŋwən. 30Umbi ghayn kwi anóm uŋu chim na chama nji abú uŋwən imara. 31Kə amə ufon ngwa u sə ŋu maʼa bêd nə ufon chini nu cha umi chomo asey ikwaʼara ibə num usogwi ichuʼ ighum umi zoŋ usogwi ichuʼ ighumi bigə? 32Wə bə zən kwi cha imi kyay zoŋ uŋwən, u yi tom ba abú uŋwən kwi u mara anó wu ichomo akə aborobod. 33Yeso nwi ighayn kwi, aba akə nji zəŋ” cha wa moʼ injən akaʼa mi ma uŋu aməŋə-anó ighari ubi ki ton ma u aghəy ujum mbənə umə abú uŋwən.

Ugwaŋ ŋunə u si tu

(Mat 5.13; Mak 9.50)

34“Ugwaŋ yə boŋo asɨmə ubi si tu chama nji amə ghəy ugha ghəy kwi uni nəmə. 35Cha adi boŋ kwi amə ghəy mba zi asey kə amə ghəy mba zi ni manu. Yə boŋ aba kwi mba waʼ. Wa ŋunə umə nə atoŋ u zəw!”

Currently Selected:

Luk 14: NGI

Highlight

Copy