Jon 8
8
Mbə ibiya ayey u neŋi nə anóm i num ŋú abú Yeso
1Amaʼazənə ba wu jum si ŋú uma, Yeso koʼ iŋu igun Ugum Olif. 2Anəy akuŋ afəfəb nə mbiri yə wənə iŋú ambəŋ Nwiye ba ujum fere iyad ma anigə yə chomo asey ni tey unó abú úŋwən. 3Mbə taʼa ba akə unó nə ba Farasay ibiya ayey nu u niŋe anóm moʼ. Mbə num uŋwən pey yi aghəy u təm imbey uŋwən uma ujum. 4Anigə úŋwən ghayn abú Yeso kwi, “Ataʼa, ba mba ibiya ayey ŋunə u niŋe anóm moʼ. 5Mose ŋwaʼanayn ungɨŋ ita ikɨy kwi mba tum ukudu ayey ŋunə akə atey izwere. Ngwə si ghayn injigə kwi ngiya?” 6Mbə ghayn anó zəŋ ikwaʼara uŋwən da imə nə anó moʼ izi atəw ma. Amaʼazənə mbə́ biri nigə, Yeso guni ma ni ŋwaʼanayn aghəy moʼ asey akə itugi ma.
7Amaʼazənə mbə́ mə́ bə ŋuw imbey imə ibiri unó abú uŋwen, yə́ noʼ item ighayn abú úŋwən kwi, “Wa moʼ bə mi injən kaʼa nu cha u di si gow ma anó u bɨŋi itey imbey itum uŋwən awu.” 8Amaʼazənə yə ghayn nigə, yə gha guni ma ni ŋwaʼanayn ghəy asey ni itugi ma. 9Amaʼazənə mbə zəw anó zəŋ, wa feyn feyn mə nyaʼa tənə noʼo ma iti akə ukyayn ŋú nwi akə ukuŋe. Mbə sayn Yeso ma zeʼe nə ayey wu nu utem aboʼo uŋwən. 10Yə tem atey ighayn abú ayey wu kwi, “Ayey, úŋwən mbayn? Cha wa moʼ u buʼe izi usaʼa igun inigə?”
11Ayey wu ywiri kwi, “Masaʼ, Cha wa moʼ.”
Yeso ghayn abú uŋwən kwi, “Kaba umugə cha a di zi aŋu usaʼa igun inigə. Anigə ŋúw, imə nə aghəy ayə unó iboŋ.”
Yeso mə uzayn zayn abú isəg
12 #
Mat 5.14; Jon 9.5 Yeso inay abú mbə Farasay ighari chini ghayn kwi, “Amə uzayn zayn abú isəg. Ayi naʼ uzayn zayn nibi naʼa itəni abú wa moʼ ŋunə uniŋi inyi jim. Anigə cha uŋwən mi noʼo iyeŋ ma ungɨŋ imbiri.”
13 #
Jon 5.31
Mbə Farasay wu ghayn abú uŋwən kwi, “Ngwə zən ayə, ngwə yə ghayn anó da inji inyo ungwə amboŋ anigə cha anó zənə ngwə ghayn ama anó asiʼ.”
14Yeso ywiri kwi, “Ka nə amə inay aŋu da inyi inyo umbugə amboŋ, anó zənə amə ighayn amə anó asiʼ, damugə mə kyayn asin zənə anóʼo akuŋ nibi kyayn asin zənə amə ŋuw akuŋ. Asɨmə cha mbən kyayn gwen asin zənə anóʼo akuŋ kə asin zənə amə ŋuw akuŋ. 15Mbən yə saʼa ba anji zənə ba akə iguni isəg mə saʼa ba. Asɨmə cha a saʼa ŋu wa moʼ. 16Ka nə mə mi zaʼa saʼa ba, ayi saʼ akə inji zənə ikoʼoro damugə akə ma umugə zeʼe amə saʼa. Ayə saʼa nə mbaʼ ŋunə u tomo aŋu. 17Ayə ungɨŋ umbən unoʼo kwi uzənə ubigə bə ghayn anó, anó zənə u ghayn amə anó asiʼ. 18Ayi ghayn anó da inyi inyo. Mbaʼ ŋunə u tom aŋu yə nibə ghayn anó da aŋu.”
19Mbə́ biri abú uŋwən kwi, “Ngwə mbaʼ mə awayn?”
Yeso wyiri abú úŋwən kwi, “Cha mbən di kyay aŋu kə kyay uŋu Mbaʼ. Mbən di bi kyay aŋu nji mbən mi nibi kyay uŋu Mbaʼ.” 20Yeso ghayn unó mbəŋ jum amaʼazənə yə́ mə́ tey unó ungɨŋ mbəŋ Nwiye, iyad asin zənə mbə́ mə siyə akubi ukab. Cha wa moʼ ibiya uŋwən damugə cha amaʼazənə mbə mi zwere uŋwən di si koʼo ma.
Yeso chede ba Jû mbənə cha mbə́ di beni uŋwən
21Yeso gha ghayn abú ba Farasay wu kwi, “Ayi ŋu. Mbən yi kaba aŋu, asɨmə umbən unó iboŋ umbi zwere ngwən. Cha nji amə aghəy mbən zaʼa asin zənə amə ŋu akuŋ.”
22Ba kyayn ungɨŋ abey ba Jû ghayn kwi, “U waʼa kaba izwere inyo ma anji zənə u ghayn, ‘kwi cha nji amə aghəy ba ŋu asin zənə umə ŋuw akuŋ?’”
23Yeso ywiri abú úŋwən kwi, “Mbən noʼ akə igun isəg, mə noʼ azobo. Mbən mə ba akə ungɨŋ isəg, cha amə aŋu wa akə ungɨŋ isəg zəŋ. 24Amə ton zənə a ghayn inen kwi, umbən unó iboŋ umbi zwere gwən. U mbən unó iboŋ umbi zwere gwən ighari mbən bə ki beni gwən kwi amə wa ŋunə a ghayn kwi amə uŋwən.”
25Mbə́ biri abú Yeso kwi, “Ngwə mə ngwa?”
Yeso ywiri abú úŋwən kwi, “Amə wa ŋunə mə si ghayn inen inoʼ akə iti. 26Ayə nə unó nanaʼ ighayn inen. Ayə nibə nə unó nanaʼ izi usaʼa igun inen. Wa ŋunə tom aŋu yə ghayn asiʼ, anigə unó mbənə a zəw abú uŋwən, aba úŋwən amə ghayn abú ba igun isəg.”
27Cha utəw uma di zayn kwi u yə ghayn abú úŋwən da Mbaʼ ma. 28Anigə yə́ ghayn abú úŋwən kwi, “Amaʼazənə mbən si beʼere ŋwə̂ Wa azad abaʼaray, mbən yi si kyay kwi amə wa ŋunə aghayn kwi amə uŋwən, nibi kyay kwi cha amə ghayn anó moʼ akə inyi ghari. A yə ghayn aba anó zənə mbaʼ ghayn iniŋ. 29Uŋwən ŋunə tomo aŋu, uyə aboʼo inyi. Cha u di sayn ma aŋu zeʼe damugə ayə aghəy aba unó mbənə uboŋo abú uŋwən.”
30Amaʼazənə yə́ mə́ ghayn anó zəŋ, ba nanaʼ zi fiŋ igun ma.
Isob nə ba mbənə akə ma isob
31Yeso ghayn abú ba Jû mbənə mbə́ zi fiŋ igun ma kwi, “Mbən bi yimi inyi inayn, anigə mbən yi mə kwaʼa umbəŋ aməŋə-anó asiʼ. 32Mbən yi kyay asiʼ, anigə asiʼ wu yi chi ngwən akə isob.”
33 #
Mat 3.9; Luk 3.8 Mbə́ ywiri abú uŋwən kwi, “Mba mə buŋ akə aghaŋ Abraham, anigə cha mba di si noʼo beni isob abú wa moʼ. Ngwə si ghayn kwi, ‘Umbi chi ngwa akə isob ingiya?’”
34Yeso ywiri abú úŋwən kwi, “Ayə ghayn asiʼ inen kwi, ba jum mbənə u aghəy anó iboŋ amə isob abú unó iboŋ. 35Cha isob mə tənə ma ungɨŋ unebey akə ighari feyn. Amə ŋwə̂ anóm mə tənə ungɨŋ unebey akə ighari feyn. 36Ŋwə̂ Nwiye bə si chi ayə akə isob anigə yə si chi ayə koŋ. 37Mə kyay kwi mbən mə buŋ akə aghaŋ Abraham, asɨmə mbən yə kaba izwere aŋu damugə cha unó mbənə amə ghayn mə nyi uma ungɨŋ umbən utəw. 38Ayə ghayn unó mbənə a zən abú uŋu Mbaʼ, asɨmə mbə yə aghəy amə umbənə mbən zəw abú u gwən mbaʼ.”
39Mbə́ ywiri abú uŋwən kwi, “U ngwa mbaʼ amə Abraham.”
Yeso ghayn abú uŋwən kwi, “Mbən di mə kaŋa buŋ Abraham nji mbən yə aghəy unó mbənə Abraham mə ighəy. 40Mə si ghayn asiʼ ŋunə a zəw abú Nwiye, asɨmə mbən yə bə kaba izwere aŋu. Cha Abraham di aghəy ma ukudu unó ŋunə! 41Mbən yə aghəy aba unó mbənə u gwən mbaʼ mə ighəy.”
Mbə ywiri kwi, “Cha mba mə buŋ nu mbə ibə́ isəg. Mbaʼ ŋunə umə ina amə Nwiye ma ambuŋ.”
42Yeso ghayn abú uŋwən kwi, “Nwiye di mə kwaʼa u gwən Mbaʼ nji mbən mi wuʼi aŋu, damugə mə zaʼa abú Nwiye. Cha adi zaʼa akə inyi ighari. Amə uŋwən cha aŋu. 43Cha umbən utəw mə zayn uma akə unó mbənə amə ghayn da ingiya? Amə da mugə cha unó mbəŋ di si nyi uma ungɨŋ umbən utəw. 44Mbən mə buŋ debere ŋunə amə ungwən mbaʼ. Mbən yə kaba ighəy aba unó mbənə mbaʼ mə kaba. Uŋwən mə́ zwere ba inoʼ amaʼazənə akə isəg ti. Cha anó moʼ abú uŋwən ighəy nə asiʼ. Amaʼazənə uŋwən ghayn unó figi, u yə ghayn aba anó zənə amə ungɨŋ fiŋ ima damugə uŋwən amə wa figə unó foro mbaʼ unó figi. 45Anigə cha mbən beni anó zənə amə ghayn damugə amə ghayn asiʼ! 46Amə ngwa akaʼa injən nu amə aghəy u tey anó iboŋ moʼ zənə aghəy? A bə́ mə́ ghayn asiʼ nji aton zənə cha mbən mə beni anó zənə amə ghayn amə da ingiya? 47Wa ŋunə amə wa Nwiye yə zəw anó zənə Nwiye ghayn. Aton zənə cha mbən mə zəw amə damugə cha mbən mə ba Nwiye.”
Yeso mə́ awu ki usə ibə́ Abraham
48Ba Jû wu biri abú Yeso kwi, “Yə waʼa ki koʼ ma ina ighayn kwi ngwə mə wa Samariya foro kwi azugə iboŋ yə ungɨŋ inigə?”
49Yeso ywiri kwi, “Cha azugə iboŋ ungɨŋ iniŋ. Ayə wumini Mbaʼ asɨmə mbən yə tebe aŋu. 50Cha amə kaba aŋu kwi ba wumini aŋu. Asɨmə wa moʼ yə awu umə kaba kwi ba wumini aŋu. Amə uŋwən umi sobo uŋu usaʼa. 51Ayə ghayn asiʼ inen kwi, wa moʼ bə aghəy unó mbənə amə ghayn, nji cha uŋwən mi noʼo iku.”
52Ba Jû wu ghayn abú uŋwən kwi, “Mba si kaŋa kyay akinine kwi azugə iboŋ yə ungɨŋ inigə. Abraham ku, ba ukən Nwiye nibi ku, asɨmə ngwə ghayn kwi cha wa ŋunə u beni anó zənə ngwə mə ghayn mi noʼo ikuw 53Ngwə chigə Abraham ŋunə yə́ kuw? Ba ukən Nwiye bə ku anigə ngwə mə kaba ighayn kwi ngwə mə ngwa?”
54Yeso ywiri kwi, “Mə di mə kaba iwumini inyi inyo, nji iwumini wu amə ibuw. Ayə nə Mbaʼ ŋunə mbən ghayn kwi amə ungwən Nwiye, amə uŋwən ughəy kwi ba wumini aŋu. 55Cha mbən kyay aŋu. Asɨmə mə kyay uŋwən. Abə ghayn kwi cha adi kyay uŋwən amə wa figə unó. Mə kyay uŋwən, anigə ayə aghəy unó mbənə uŋwən ghayn. 56Ungwən mbaʼ Abraham wuʼi kwi nji yə zən amaʼazənə ami zaʼa. Yə nibi zən anigə yə wuʼ kwaʼa azəd.”
57Ba Jû wu ghayn abú uŋwən kwi, “Cha ngwə di si koʼ ayə ighum ituʼ itəŋ anigə ngwə zən Abraham?”
58Yeso ghayn abú úŋwən kwi, “Ayə ghayn asiʼ inen kwi, ki mbə sə ŋu ibə́ Abraham, mə si məŋi awu!”
59Amaʼazənə yə́ ghayn nigə, mbə bɨŋe atəy kwi u tom uŋwən awu, asɨmə Yeso paʼa anigə du ungɨŋ imbəŋ Nwiye.
Currently Selected:
Jon 8: NGI
Highlight
Share
Copy
Want to have your highlights saved across all your devices? Sign up or sign in
© 2023 CABTAL
