Jon 6

Yeso jəyi anóm achuʼ itəŋ

(Mat 14.13-21; Mak 6.30-44; Luk 9.10-17)

1Amaʼazənə amaʼ moʼ chigə, Yeso nə mbə məŋə-anó ma ŋu anji anim zi a Galeli nu umə nibə tiya akə anim Tiberiyas. 2Unoŋ ba kaʼa u yi kyayn mə ŋuw boʼo uŋwən, damugə mbə́ zən uyere unó mbənə yə́ mə́ ighəy igun bə mbənə mbə́ mə́ sɨgə. 3Amaʼazənə mbə́ pey akuŋ, Yeso nə mbə məŋə-anó ma koʼ igun ugum pey yi chomo asey. 4Amaʼazənə ba Jû mi jəg Ufere Izaʼara Chigə Igun si tinə. 5Yeso ney zən unoŋ ba kwaʼa yi kyay nu umə zaʼa aboʼo uŋwən. Yə́ zən nigə ibiri abú Filip kwi, “Mba mə ŋu zon ingəŋ awayn da ijəy ba mbenə awu.” 6Yə ghayn anó zəŋ da izweʼe Filip damugə uŋwən si kyay ma anó zənə umi aghəy.

7Filip ywiri abú uŋwən kwi, “Ka aba ufina achuʼ akɨ bigə cha ami koʼ ma i zon ingəŋ nu amə aghəy wa feyn feyn akaʼa ba mbəŋ jəg kaba ŋwə̂ amben.”

8Aməŋə-anó chini nu umə tiya akə Andrew nu amə unya anóm Sayimon Pita ghayn kwi, 9“Ŋwə̂ anom moʼ yə akəŋ nu umə nə umbimi ingəʼ itəŋ nu u tana akə bali, nə isu bigə. Asɨmə zəŋ ami koʼ ma abú ba mbəŋ ujum?”

10Yeso ghayn abú mbə məŋə-anó ma kwi, “Mbən ghayn abú ba mbəŋ kwi u chomo asey.” Ofoʼ kyayn moʼ mə asin wu. Anigə ba wu uma jum chomo asey. Anom mə awu ka achuʼ itəŋ. 11Amaʼazənə mbə́ chomo, Yeso num umbimi ingəŋ wu, chaʼara Nwiye ghaba abú ba mbənə mbə́ mə́ awu. Yə nibi aghəy ichin ichin akə isu wu. Ba jum num akə inji zənə mbə kabay. 12Amaʼazənə ba jum si jəg ikod, Yeso ghayn abú mbə məŋə-anó ma kwi, “Mbən fere ikəg tənə ibuʼe da ka akəg moʼ nim ma.” 13Amaʼazənə mbə́ fere ikəg wu nu tə buʼe akə umbimi ingəŋ bali wu, tə sugi ungɨŋ usɨŋ ighum cho bigə.

14Amaʼazənə ba mbəŋ zən ayere anó zənə Yeso aghəy, mbə ghayn kwi, “Uŋwən amə kwaʼa wa ukən ŋunə u zaʼa ungɨŋ isəg.” 15Yeso kyay kwi ba wu mbə kaba zaʼa ibiya uŋwən akə ikay boʼo izoʼ uŋwən akə ufon, anigə yi nyaʼa noʼ ŋu igun ugum ma zeʼe.

Yeso yeŋ igun une

(Mat 14.22-23; Mak 6.45-52)

16Amaʼazənə injəʼ si chig, mbə məŋə-anó Yeso swiʼi ŋu iyad anim zənə amə Galeli. 17Usin si fid, asɨmə cha Yeso di si ŋu kuw úŋwən. Anigə mbə́ nyi abaŋ ugwi ni kwene ŋuw Kapenahom. 18Afim kaka mə chigə anigə ghəy une ni noʼo. 19Amaʼazənə mbə si fiy abaŋ ugwi wu ka ukiromata itəŋ kə ukiromata ifəw, mbə́ zən Yeso u mə yeŋ zaʼa igun animini wu. Yə́ mə́ yeŋ ŋuw iyad abaŋ ugwi wu. Amaʼazənə mbə́ zən uŋwən, mbə god kwaʼa azəd. 20Asɨmə Yeso ghayn abú úŋwən kwi, “Ka mbən mə goro ngwən, amə umugə!” 21Mbə́ kaŋa wuʼ kwi nji mbə num uŋwən ungɨŋ abaŋ ugwi wu, asɨmə abaŋ ugwi wu pey asin zənə mbə́ mə́ ŋuw awu aba ighari wu.

Unuŋ ba ŋunə yə mə aboʼo Yeso kaba Yeso

22Anəy akuŋ, ba mbənə mbə́ tənə anjim anim wu zən kwi aba abaŋ ugwi feyn yə́ mə́ awu. Mbə́ nibi kyay kwi cha Yeso di nyi ma ungɨŋ abaŋ ugwi wu aba mbə məŋə-anó ma mbə́ ŋu aba uma uma nu cha Yeso awu. 23Abaŋ ugwi moʼ noʼo Tiberiyas ŋu təm iyad anim wu nu Yeso num ingəŋ chaʼara Nwiye naʼ abú akama ba kwi ujəg. 24Amaʼazənə ba wu zən kwi cha Yeso kə mbə məŋə-anó ma awu, mbə nyi ungɨŋ abaŋ ugwi wu iŋu kab uŋwən a Kapenahom.

Yeso mə ingəŋ zənə imə naʼa itəni

25Amaʼazənə ba mbənə mbə́ mə́ kaba Yeso zən uŋwən anjin anim zi, mbə́ biri abú uŋwən kwi, “Ataʼa, ba ngwə zaʼa akəŋ ingiya?”

26Yeso ywiri abú úŋwən kwi, “Ayə ghayn asiʼ inen kwi mbən yə kaba aŋu damugə mbən jəg ingəŋ ikod, akə ma da uyere unó mbənə amə ighəy. 27Ka mbən mə faʼa ngwən aba da imə nə aghəy jəgi zənə amə ibɨy. Mbən faʼa da imə nə umbənə umi tənə. Ughəy wu umbi aghəy mbən jəg itəni nu cha imi noʼo imey. Zəŋ amə ughəy jəgi mbənə ŋwə̂ Wa mi naʼ inen. Nwiye Mbaʼ si naʼ ika abú uŋwən kwi u aghəy nigə.”

28Mbə́ biri abú uŋwən kwi, “Mba aghəy ingiya boʼo ighəy anó zənə Nwiye kaba?”

29Yeso ywiri abú úŋwən kwi, “Anó zənə Nwiye kaba amə kwi mbən beni wa ŋunə uŋwən tomo.”

30Amaʼazənə yə ghayn nigə, mbə́ biri abú uŋwən kwi, “Amə ayere anó ingiya ngwə mi aghəy boʼo mba beni anó zənə ngwə mə ghayn? Amə anó ingiya nu ngwə mi ighəy? 31Umba mbaʼ imbey jəg mana ungɨŋ imbayn zomo. Ayə ungɨŋ aŋwaʼanayn Nwiye kwi, ‘Nwiye naʼ ingəŋ nu inoʼo azobo abú úŋwən kwi u jəg.’”

32Yeso ghayn abú úŋwən kwi, “Ayə ghayn asiʼ inen kwi, cha Mose naʼa ma ingəŋ zənə inoʼo azobo inen. Amə uŋu mbaʼ umə naʼa ingəŋ zənə amə iyi asiʼ nu inoʼo azobo. 33Ingəŋ zənə Nwiye naʼa amə uŋwən ŋunə u swiʼi azobo. Amə uŋwən ŋunə uswiʼi azobo u naʼa itəni abú ba ungɨŋ isəg.” 34Mbə́ ghayn abú uŋwən kwi, “Masa, ni ka naʼa ingəŋ zəŋ ina.”

35Yeso ghayn abú úŋwən kwi, “Amə ingəŋ zənə imə naʼa itəni. Cha injəy mi noʼo zaŋa wa ŋunə u zaʼa aboʼo inyi. Cha adoʼ mi noʼo izom abú wa ŋunə u beni anó zənə amə ighayn. 36Ka di ba nigə, mə si ghayn inen kwi mbən si zən aŋu cha mbən di beni. 37Ba jum mbənə Mbaʼ naʼa iniŋ umbi zaʼa aboʼo inyi. Anigə cha ami noʼo fuw wa moʼ ŋunə u zaʼa aboʼo inyi, 38damugə a swiʼi azobo izaʼa. Cha adi swiʼi zaʼa boʼo ighəy unó mbənə a kabay, mə swiʼi zaʼa da ighəy umbənə wa ŋunə tomo aŋu kabay. 39Anó zənə wa ŋunə u tomo aŋu kaba amə kwi ka aniy aŋu wa moʼ akaʼa ba jum mbənə u naʼa iniŋ. Yə kab amə kwi a zəmə úŋwən anəy zənə isəg mi nwi. 40Anó zənə uŋu Mbaʼ kabay amə kwi, ba jum mbənə u zən Ŋwə̂ ibeni uŋwən, umbi jəg itəni nu cha imi noʼo imey. A yi zəmə uŋwən anəy zənə isəg mi nwi.”

41Amaʼazənə Yeso ghayn ney, ba Jû wu ti ni zuʼe da uŋwən damugə yə ghayn kwi, “Amə ingəŋ zənə iswiʼi azobo.”

42Mbə́ ghayn kwi, “Aka anom ŋunə amə Yeso, ŋwə̂ Josef? Aka mba kyay mbaʼ ma nə ingo ma? U si chigə ingiya akinine ighayn kwi yə swiʼi azobo?”

43Yeso ywiri abú úŋwən kwi, “Ka mbən mə zuʼe ngwən. 44Wa moʼ ŋunə u zaʼa aboʼo inyi kyay kwi amə mbaʼ ŋunə u tomo aŋu ghəw uŋwən kwi u zaʼa aboʼo inyi. A yi zəmə uŋwən anəy zənə isəg mi nwi. 45Ba ukən Nwiye ŋwaʼanayn kwi, ‘Nwiye yi tey unó abú úŋwen uma jum.’ Ba jum mbənə u zəw anó zənə Nwiye ghayn nibi kweme anó abú uŋwən umbi zaʼa aboʼo inyi. 46Cha wa moʼ di si noʼo zən Nwiye Mbaʼ chigə akə Ŋwə̂ ma ŋunə u noʼo aboʼo uŋwən. Aba uŋwən si zən Nwiye Mbaʼ. 47Ayə ghayn asiʼ inen kwi wa moʼ ŋunə u beni anó zənə amə ghayn u yi jəg itəni nu cha imi noʼo imey. 48Amə ingəŋ zənə imə naʼa itəni. 49Umbən mbaʼ imbey jəg mana ungɨŋ imbayn zomo, asɨmə mbə nibi ku. 50Ingəŋ zənə i noʼo azobo, yə nə ikay nu wa moʼ bə jəg cha umi noʼo iku. 51Amə ingəŋ zənə imə naʼa itəni nu iswiʼi azobo. Wa moʼ ŋunə u jəgə ingəŋ zəŋ, uyi tənə akə ighari feyn. Ingəŋ zənə ami na kwi isəg jum jəg itənə amə inyi nyə̂ inyo.”

52Amaʼazənə ba Jû zəw anó zəŋ, mbə́ ti ni taŋa uma uma ghayn kwi, “Anom ŋunə umi chigə ingiya inaʼ nyə̂ inyo ma ina kwi ba koro?”

53Amaʼazənə Yeso zəw ney, yə́ ghayn abú úŋwən kwi, “Ayə ghayn asiʼ inen, abə mə kwi cha mbən koro nyə̂ inyo ŋwə̂ Wa nibi nugə anəm ma, cha mbən mi jəg itəni. 54Ba jum mbənə u kod inyi nyə̂ inyo nibi nugə inyi anəm umbi jəg itəni nu cha imi noʼo imey. Ayi zəmə úŋwən anəy zənə isəg mi nwi, 55damugə inyi nyə̂ inyo amə ingəŋ asiʼ, inyi anəm mə nibə unoʼ asiʼ. 56Ba jum mbənə u kod inyi nyə̂ inyo nibi nugə inyi anəm umbə akə anó feyn nə umugə, anigə ayə nibə akə anó feyn nə úŋwən. 57Anji zənə Mbaʼ ŋunə umə ikay tom aŋu, anigə ayə ikay da uŋwən. Zəŋ tey kwi wa ŋunə u kod inyi nyə̂ inyo u yi mə ikay da aŋu. 58Zəŋ amə ingəŋ zənə iswiʼi azobo, cha ichomo ma ni ingəŋ zənə umbən umbaʼ imbey koro asɨmə mbə́ nibi ku. Wa ŋunə u jəgə ingəŋ zəŋ uyi tənə akə ighari feyn.”

59Yeso ghayn anó zəŋ anəy zənə yə́ mə́ tey unó ungɨŋ na bumi ba Jû a Kapenahom.

Mbə məŋə-anó nanaʼ noʼ sayn Yeso

60Amaʼazənə mbə məŋə-anó Yeso nanaʼ zəw anó zəŋ, mbə ghayn kwi, “Inayn zəŋ kaŋa ika, amə ngwə amə aghəy u beni?”

61Cha wa moʼ ghayn ma anó moʼ abú uŋwən asɨmə yə kyay ungɨŋ fiŋ kwi mbə məŋə-anó wu umbə wuʼe. Anigə yə ghayn abú úŋwən kwi, “Inayn zəŋ waʼa ighəy mbən sə itəm? 62Mbən mi gheni ingiya amaʼazənə mbən zən ŋwə̂ Wa amaʼazənə umə ŋuw azobo asin zənə yə dey mə awu? 63Amə Azugə Nwiye amə naʼa itəni. Cha wa inyoŋ atəw mə naʼa ma itəni. Inayn zənə a si nayn inen iyə nə Azugə Nwiye, iyə nibə naʼa itəni. 64Anigə cha ba moʼ akaʼa injən di beni.” Yeso ghayn ney damugə yə si kyay ba mbənə cha umi beni. Yə si nibi kyay wa mbənə umi fənə uŋwən. 65Anigə yə́ ghayn kwi, “Zəŋ amə aton zənə mə ghayn kwi cha wa moʼ amə ghəy u zaʼa iniŋ nu akə ma Mbaʼ u beni kwi u zaʼa.”

66Akə amaʼa wu, mbə məŋə-anó nanaʼ sayn uŋwən. Cha mbə di gha ŋu aboʼo uŋwən. 67Yeso si biri abú mbə məŋə-anó mbi ighum cho bigə kwi, “Mbən waʼa nibə kabay iŋu ngwən?”

68 # Mat 16.16; Mak 8.29; Luk 9.20 Sayimon Pita ywiri abú uŋwən kwi, “Asɨyisəg, mba mi ŋu abú ingwa? Aba ugwə mə nə inayn zənə imə naʼa itəni. 69Mba si beni nibi kyay kwi ngwə mə Wa zayn zayn ŋunə Nwiye tomo.”

70Yeso ywiri abú uŋwən kwi, “Aka mə́ choʼo ngwən umbən mbənə ighum cho bigə? Asɨmə wa feyn injən akaʼa amə debere.” 71Yə́ mə́ ghayn da Judas ŋunə amə ŋwə̂ Sayimon Iskoriyod. Judas wu mə wa moʼ akaʼa mbə məŋə-anó wu ighum cho bigə. Amə uŋwən yə fənə Yeso.

Currently Selected:

Jon 6: NGI

Highlight

Copy