Jon 4

Yeso nə ayey Samariya

1Ba Farasay zəw kwi ba nanaʼ mbə beni aboʼo Yeso. Mbə nibi zən kwi uyə naʼa une abú ba nanaʼ chigə Jon. 2Ka di ma kwi cha Yeso naʼa une, aba mbə məŋə abó mə naʼa. 3Amaʼazənə yə zəw unó mbənə mbə́ mə́ ghayn yə noʼ a Judeya swiʼi ŋuw Galeli. 4Amaʼazənə yə́ mə́ ŋuw, yə mi chigə a Samariya. 5Yə yi pey asin moʼ Samariya nu umə tiya akə Sika. Sika wu mə iyad asin zənə Yakob naʼa abú Josef ŋwə̂ ma. 6Ubəg une ŋunə Yakob toŋo mə asin wu. Amaʼazənə unyama ighum cho bigə koʼo, Yeso nu yə si yeŋ ibo pey yi chomo iyad ubəg une wu.

7Ayey Samariya moʼ ŋu awu ituʼ une. Yeso ghayn abú uŋwən kwi, “Naʼa une iniŋ a nugə.” 8Mbə məŋə-anó Yeso sí ŋu ungɨŋ asin wu izon ughəy jəgi.

9Ayey Samariya wu ghayn abú uŋwən kwi, “Ngwə mə Jû amə ayey Samariya, ngwə si ghayn kwi a naʼa une inigə da ingiya?” Yə ghayn ney damugə cha ba Jû mə foro uma aghəy moʼ nə ba Samariya.

10Yeso ywiri abú uŋwən kwi, “Ngwə di bi kyay aghəy zənə Nwiye mə naʼa, nibi kyay wa ŋunə u biri une inigə, nji ngwə mi ghayn kwi u naʼa une mbənə umə naʼa itəni inigə.” 11Ayey wu ghayn abú uŋwən kwi, “Masa cha andunga inigə, ubəg ŋunə yə nibə sa ŋuw ungɨŋ, anigə ngwə mi num une mbənə umə naʼa itəni awayn? 12Ngwə waʼa chigə Yakob ungwa mbaʼ imbey ŋunə yə́ naʼa ubəg ŋunə ina? Uŋwən nə ŋwə̂ ma foro nyə̂ ma nibi nugə une mbəŋ.”

13Yeso ywiri abú uŋwən kwi, “Adoʼ yi ghari zom abú ba jum mbənə u nugə une mbəŋ, 14asɨmə cha adoʼ mi gha zom ma abú wa ŋunə umi nugə une mbənə a naʼa abú uŋwən. Une mbənə ami naʼ abú uŋwən yi du imbuʼ igwi nu imi tənə akə ighari feyn ungɨŋ ma nibi naʼa itəni abú uŋwən.”

15Ayey wu ghayn abú uŋwən kwi, “Masa, naʼa une mbəŋ iniŋ, da ka adoʼ gha zom ma iniŋ foro da ka agha zaʼa aŋu akəŋ ituʼ une.”

16Yeso ghayn abú uŋwən kwi, “Ŋu tiya ungwə unom mbən zaʼa akəŋ.”

17Ayey wu ywiri abú uŋwən kwi, “Cha unom iniŋ.”

Yeso ghayn abú uŋwən kwi, “Yə koʼ inigə ighayn kwi cha unom iniy, 18damugə ngwə si nam anom itəŋ anigə cha anom ŋunə ngwə mə chomo nə uŋwən akinine mə ma ungwə unom. Anó zənə ngwə ghayn amə anó asiʼ.”

19Ayey wu ghayn abú uŋwən kwi, “Masa, mə zən kwi ngwə mə wa ukən Nwiye. 20Umba mbaʼ Samariya imbey mə wumini Nwiye igun igun ŋunə, asɨmə umbən ba Jû mbən yə ghayn kwi Yerusanem amə asin zənə mba mi wumini Nwiye akuŋ.”

21Yeso ghayn abú uŋwən kwi, “Ayey, beni anó zənə amə ghayn inigə. Amaʼ yi zaʼa nu cha ba mi wumini Mbaʼ igun igun ŋunə kə a Yerusanem. 22Cha umbən ba Samariya tana kyay wa ŋunə mbən mə wumini, asɨmə umba ba Jû kyay wa ŋunə mba mə wumini damugə anó ni du angəʼ zaʼa abú ba Jû. 23Amaʼ yi zaʼa, yə si zaʼa nu ba mi wumini Mbaʼ akə inji zənə Azugə zayn zayn tey. Ayi ghəy kwi ba wumini uŋwən akə inji zənə u məŋi. Ba mbi mə ghəy nigə nibə wumini Mbaʼ akə inji zənə ukaba kwi ba wumini uŋwən. 24Nwiye mə Azugə, anigə ba mbənə umə wumini uŋwən umbə wumine akə ikay zənə Azugə naʼa abú úŋwən nibi wumini akə asiʼ.”

25Ayey wu ghayn abú uŋwən kwi, “Mə kyay kwi wa ŋunə Nwiye zoʼo yi zaʼa nu umə tiya akə Kristo. Amaʼazənə umi zaʼa, u yi toʼoro unó jum ina.”

26Yeso ywiri abú úŋwən kwi, “Umugə ŋunə amə nayn, amə uŋwən.”

Ba mbənə umə Samariya beni Yeso

27Aba ighari awu nu Yeso mə bugə inayn nə ayey wu, mbə məŋə-anó ma wene zaʼa yə chigə uŋwən. Asɨmə cha wa moʼ akaʼa úŋwən biri kwi, “Ngwə mə kaba unó ingiya nə ayey, ŋunə” kə kwi, “Ngwə mə nayn nə uŋwən da ingiya.”

28Amaʼazənə ayey wu zəw inayn Yeso, yə noʼ sayn andunga une wu, ŋu ungɨŋ asin wu pey yi ghayn abú ba kwi, 29“Mbən zaʼa zən anom moʼ nu u ghayn unó jum mbənə asi noʼo ighəy. A waʼa wa ŋunə Nwiye zoʼo?” 30Ba wu zəw nigə, du ungɨŋ asin wu ŋu abú Yeso.

31Amaʼazənə ayey wu ŋu ungɨŋ asin wu, mbə məŋə-anó Yeso boʼo ubugə abú uŋwən ghayn kwi, “Ataʼa ba, jəg aghəy moʼ.”

32Anigə yə́ ywiri abú úŋwən kwi, “Ayə nə itəŋ ijəg nu cha mbən kyay anó moʼ da iŋwən.”

33Amaʼazənə yə ghayn nigə, mbə məŋə-anó wu biri uma uma kwi, “Wa moʼ waʼa si naʼa aghəy jəgi abú uŋwən?”

34Anigə Yeso ghayn abú úŋwən kwi, “Inyi aghəy jəgi amə kwi aghəy unó mbənə wa ŋunə u tom aŋu kabay, foro kwi amara unó mbənə yə naʼa iniŋ. 35Mbən yə nə inayn moʼ nu ighayn kwi, ‘Asi buʼe aməg kyugə u jaŋa ughəy jəgi’ asɨmə ayə ghayn inen kwi mbən tana ney ughəy mbəŋ anji chuŋ zən inji zənə usi tən koʼ kwi u jaŋa. 36U mbə ituwə wa ŋunə umə jaŋa ughəy. Ughəy mbəŋ amə ba nu uŋwən mə fere boʼo umi jəg itəni nu cha imi noʼo mey. Anigə wa ŋunə u kono nə wa ŋunə u jaŋa umbə faʼa unoŋ. 37Inayn zənə amə iyi asiʼ kwi, ‘Wa feyn yi kon wa chini jaŋ.’ 38Mə si tom ngwən kwi mbən jaŋa ughəy ambayn nu cha mbən faʼa ungɨŋ. Ba chini faʼ anigə mbən si jəg anjim afaʼa zənə úŋwən faʼa.”

39Ba Samariya nanaʼ ungɨŋ asin wu beni Yeso damugə ayey wu ghayn abú uŋwən kwi, “Yə ghayn unó jum mbənə mə si noʼo ighəy.” 40Amaʼazənə ba Samariya wu ŋu kuw ŋwən, mbə boʼo ubugə uŋwən kwi u chomo aboʼo úŋwən. Anigə yə chomo awu unəy ubigə. 41Ba nanaʼ chini beni da unó mbənə yə́ mə ighəy.

42Mbə ghayn abú ayey wu kwi, “Ba si beni akinine akə ma da anó zənə ngwə ghayn ina. Mba beni damugə mba si zəw anó zənə u ghayn, anigə mba kyay kwi uŋwən amə wa ŋunə umi chi isəg jum angəʼ.”

Yeso zwey ŋwə̂ anom wa kyayn gobuna

43amaʼazənə uney ubigə wu si chigə, Yeso noʼo asin wu ŋu a Galeli. 44#Mat 13.57; Mak 6.4; Luk 4.24Yə ŋu awu damugə yə si ghayn kwi, “Cha ba mə wumini uma wa ukən Nwiye ungɨŋ abey ma.” 45#Jon 2.23Amaʼazənə yə pey a Galeli, ba mbənə mbə awu num uŋwən anji chuŋ damugə amaʼazənə mbə ŋu akə Ufere izaʼara chigə igun a Yerusanem, mbə pey yi zən unó jum mbənə yə aghəy awu. 46#Jon 2.1-11Yeso noʼo awu wene ŋuw Kana asin zənə yə beŋe une akə unoʼ. Wa kyayn abú gobuna moʼ mə awu nu ŋwə̂ ma mə sɨgə a Kapenahom. 47Amaʼazənə yə zəw kwi Yeso si noʼo a Judeya zaʼa Galeli, yə ŋu boʼo ubugə abú uŋwən kwi u swiʼi ŋu zwey ŋwə̂ ma nu umə sə baʼa iku.

48Yeso ghayn abú uŋwən kwi, “Cha wa moʼ akaʼa injən mi noʼo ibeni, inigə kwi u zən unwini unó foro uyere unó.” 49Wa kyay wu ghayn abú uŋwən kwi, “Masa, mba swiʼi ŋu boʼo uŋu ŋwə̂ si ku.”

50Yeso ghayn abú uŋwən kwi, “Ŋuw, ungwə ŋwə yi tənə.”

Wa kyayn wu beni anó zənə Yeso ghayn abú uŋwən anigə yə noʼ iŋu. 51Amaʼazənə yə́ mə́ swiʼi ŋuw ba faʼa ma bomo nə uŋwən ghayn abú uŋwən kwi, “Ungwə ŋwə̂ yə ikay.”

52Amaʼazənə yə zəw ney, yə biri ama zənə ŋwə̂ wu ti mə boro. Mbə́ ghayn abú uŋwən kwi, “Amə ka akə nyama feyn iyugə nu ufi wu sayn uŋwən.” 53Mba ŋwə̂ wu zəw ney kyay kwi amə akə amaʼa wu nu Yeso ghayn kwi, “Ungwa ŋwə̂ yi tənə.” Zigə ghəy uŋwən nə unebey ma jum u beni Yeso. 54Zəŋ amə ayere anó nu u pey akə ubigə nu Yeso aghəy amaʼazənə yə noʼo Judeya ŋuw Galeli.

Currently Selected:

Jon 4: NGI

Highlight

Copy