Jon 18

Mbə́ ibiya Yeso

(Mat 26.47-56; Mak 14.43-50; Luk 22.47-53)

1Amaʼazənə Yeso si chaʼara Nwiye mara, Yə noʼ ni mbə məŋə-anó ma u kwene ibaray. Mbə́ mə́ itiya ibaray wu kwi Kidron. Imbayn Olif moʼ mə asin wu. Mbə ŋu nyi ungɨŋ imbayn wu. 2Judas ŋunə yə fənə Yeso kyay asin wu damugə Yeso si ŋu awu ighari nanaʼ nə mbə məŋə-anó ma. 3Judas ŋu awu nə unoŋ usogwi foro nə ba mbənə umə nəmə imbəŋ Nwiye. Amə ba kyayn ambəŋ Nwiye foro ba Farasay mbə́ tomo úŋwən. Mbə́ mə́ ŋuw nə unam nə ikiʼi foro nə ughəy berd. 4Yeso kyay unó jum mbənə umi aghəy abú uŋwən, anigə yə ŋu imbey pey yi biri abú úŋwən kwi, “Mbən mə kaba ngwa?”

5Mbə ywiri abú uŋwən kwi, “Mba yə kaba Yeso wa Nazaret.”

Yeso ghayn abú úŋwən kwi, “Amə umugə ŋunə.”

Judas ŋunə yə́ fənə Yeso nibi təm awu aboʼo úŋwən. 6Amaʼazənə Yeso ghayn abú úŋwən kwi, “Amə umugə ŋunə,” Mbə ŋuw anjim anjim gow asəy.

7Yeso gha ibiri abú úŋwən kwi, “Mbən mə kaba ngwa?”

Mbə́ ywiri kwi, “Mba yə kaba Yeso wa Nazaret.”

8Yeso ghayn abú úŋwən kwi, “Mə si ghayn inen kwi amə umugə ŋunə. Mbən bə mə kaba aŋu, mbən sayn kwi mbə məŋə-anó mbəŋ ŋuw uma.” 9Yə ghayn ney boʼo inayn zənə yə ghayn duw akə asiʼ kwi, “Mbaʼ, cha a niy aŋu wa moʼ akaʼa ba mbənə ngwə naʼa iniŋ.”

10Sayimon Pita nu yə yimə ubey uberd choʼ ubey uberd wu ambaʼ figə atoŋ aba abugə jəgi abú isob atəw abú ba mbənə umə faʼa ambəŋ Nwiye. Ukum isob wu amə Makus. 11#Mat 26.39; Mak 14.36; Luk 22.42Yeso ghayn abú Pita kwi, “Gha zi ungwə ubey uberd ambaʼ. Ngwə kono kwi cha ami nugə ungɨŋ itoʼ zənə uŋu Mbaʼ naʼa iniŋ?”

Mbə́ num Yeso ŋu ifigi Anas

12Usogwi wu nə utəw igun usogwi foro ba mbənə umə nəmə imbəŋ Nwiye ibiya Yeso kod. 13Mbə́ num uŋwən ŋu abú Anas. Anas#18.13 Anas si məŋi atəw abú ba mbənə umə faʼa ambəŋ Nwiye. Mbə́ si chi uŋwən zi uchi ma Kayifas asɨmə Anas mə bugə nə ikay akaʼa ba Jû mə uchi Kayifas nu amə atəw abú ba mbənə umə faʼa ambəŋ Nwiye akə utuʼe wu. 14#Jon 11.49, 50Amə Kayifas yə ikɨy ba kyayn ungɨŋ abey ba Jû kwi yə kaŋa boŋ kwi wa feyn ku igun utəw ba jum.

Pita ton Yeso

(Mat 26.69-70; Mak 14.66-68; Luk 22.55-57)

15Sayimon Pita nə aməŋə-anó chini ŋu aboʼo Yeso. Umugə atəw ambəŋ Nwiye kyay aməŋə-anó wu, yə ŋu aboʼo Yeso nibi nyi ŋu ungɨŋ isama atəw ambəŋ Nwiye, 16asɨmə Pita təm isəg anjim uchəw ukam. Aməŋə-anó chini wu nu atəw ambəŋ Nwiye kyay uŋwən, wene ŋu isəg pey yi ghayn abú ŋwə̂ ayey faʼa ŋunə yə́ mə́ nəmə uchəw ukam wu.

17Ŋwə̂ ayey faʼa ŋunə yə́ mə́ nəmə ughəw ukam wu biri abú Pita kwi, “Ka ngwə mə nibə wa moʼ akaʼa mbə məŋə-anó anom uŋu?”

Pita ywiri kwi, “Indəʼ, cha amə aŋu wa moʼ akaʼa mbə məŋə-anó ma.”

18Usin mə zuw, anigə ba faʼa atəw ambəŋ Nwiye nə ba mbənə umə nəmə imbəŋ Nwiye zi ibin uwəd. Mbə zi nigə itəm iyad ni zó. Pita nibi ŋu təm aboʼo úŋwən ni zó.

Anas biri unó abú Yeso

(Mat 26.59-66; Mak 14.55-64; Luk 22.66-71)

19Atəw abú ba faʼa ambəŋ Nwiye wu biri unó abú Yeso da mbə́ məŋə-anó ma nibi biri da unó mbənə yə́ mə́ itey. 20Yeso ywiri abú uŋwən kwi, “Mə́ mə inayn asaŋ asaŋ abú ba jum. Mə́ mə itey unó ungɨŋ ina bumi ba Jû nibə itey ungɨŋ imbəŋ Nwiye akə umaʼ jum nu amə usin mbənə ba Jû mə fere. Cha mə ghayn aŋu anó moʼ anjim anjim. 21Aton zənə ngwə mə ibiri unó iniŋ amə da ingiya? Biri abú ba mbənə mbə́ mə́ zəw unó mbənə mə́ mə ghayn. Biri abú úŋwən kwi mə́ mə ghayn kwi ingiya? Úŋwən kyay anó zənə mə́ mə ghayn.”

22Amaʼazənə Yeso ghayn anó zəŋ, wa moʼ akaʼa ba mbənə mə́ mə nəmə imbəŋ Nwiye nu yə təm iyad, tumə abugə ifigi abú Yeso ibiri abú uŋwən kwi, “Ngwə kono ingiya imə inayn abú atəw ba faʼa ambəŋ Nwiye nigə?”

23Yeso ywiri abú uŋwən kwi, “Abə mə kwi mə ghayn anó iboŋ moʼ ghayn anó wu abú ba jum. Abə mə kwi mə inayn anji chuŋ, nji ngwə fə́ aŋu da ingiya?”

24Anas aghəy nigə ikod uŋwən cha abú Kayifas nu amə atəw abú ba faʼa ambəŋ Nwiye.

Pita gha ton Yeso

(Mat 26.71-75; Mak 14.69-72; Luk 22.58-62)

25Pita bugə təm asin wu mə zuʼe inyo ma. Anigə ba moʼ akaʼa ba mbənə mbə mə awu biri abú uŋwən kwi, “Ka ngwə mə nibə aməŋə-anóm moʼ akaʼa mbə́ məŋə-anó anom uwiy?”

Pita ton ighayn kwi, “indəʼ, cha amə aŋu aməŋə-anó moʼ akaʼa úŋwən.”

26Ŋwə̂ faʼa atəw abú ba faʼa ambəŋ Nwiye moʼ nu amə unya abú wa ŋunə Pita figə atoŋ ma biri kwi, “Ka mə zən ayə nə uŋwən ungɨŋ imbayn olif?”

27Pita ton. Aba ighari wu, unoŋ ingɨ toŋ.

Mbə́ num Yeso ŋu abú Payilet

(Mat 27.1-2, 11-14; Mak 15.1-5; Luk 23.1-5)

28Afəfəb ni imbiri, ba kyayn ungɨŋ abey ba Jû num Yeso akuw Kayifas ŋu nə uŋwən atoʼ Payilet nu amə gobona. Cha mbə di nyi uma ungɨŋ itoʼ wu damugə mbə́ mə́ kaba ichomo akə uzayn boʼo ijəg ufere izaʼara chigə igun. 29Anigə Payilet du ŋu bomo úŋwən isəg, ibiri abú úŋwən kwi, “Usaʼa ŋunə mbən zi igun anom ŋunə amə kwi ingiya?”

30Mbə ywiri abú uŋwən kwi, “Adi mə kwi cha yə gow ma anó moʼ, nji cha mba mi num ngwa uŋwən zaʼa naʼ inigə.”

31Payilet ghayn abú úŋwən kwi, “Mbən num uŋwən umbən umbən ŋu saʼ uŋwən anji zənə umbən unoʼo mə tey.”

Ba kyayn ungɨŋ abey ba Jû ywiri abú uŋwən kwi, “Cha gomen Roman di naʼa ma ikay ina kwi mba saʼa wa moʼ izwere uŋwən.” 32#Jon 3.14; 12.32Anó zəŋ aghəy boʼo anó zənə Yeso ghayn da inji zənə umi iku duw akə asiʼ.

33Payilet wene nyi ungɨŋ itoʼ ghayn kwi mbən num Yeso zaʼa naʼ iniŋ. Amaʼazənə mbə num izaʼa, yə biri abú uŋwən kwi, “Ngwə mə ufon ba Jû?”

34Yeso ywiri abú uŋwən kwi, “Ibiri zəŋ zaʼa inigə kə amə ba chini ghayn anó da aŋu inigə?”

35Payilet ywiri kwi, “Awaʼa wa Jû? Amə umbə ba nə ba kyayn ambəŋ Nwiye naʼa ayə iniŋ. Ngwə gow anó ingiya?”

36Yeso ywiri kwi, “Cha inyi anó ufon mə ma akə ungɨŋ isəg zəŋ, inyi anó ufon di mə akə ungɨŋ isəg, nji ba mbənə umə beni aboʼo inyi mi zoŋ kwi ka ba Jû ubiya ma aŋu. Asɨmə cha inyi anó ufon mə ma akə ungɨŋ isəg zəŋ.”

37Payilet biri abú uŋwən kwi, “Anigə ngwə mə ufon?”

Yeso ywiri kwi, “Ngwə si ghayn kwi amə ufon. Mbə́ bə́ aŋu azaʼa akə ungɨŋ isəg da anó feyn zəŋ. Anó wu amə ighəy kwi ba kyay asiʼ. Wa moʼ ŋunə u beni asiʼ yi zəw anó zənə amə ghayn.”

38Payilet biri abú uŋwən kwi, “Asiʼ amə ingiya?”

Payilet sob kwi u zwere Yeso

(Mat 27.15-31; Mak 15.6-20; Luk 23.13-25)

Amaʼazənə Payilet biri nigə, yə du ŋu abú ba kyayn ungɨŋ abey ba Jû pey yi ghayn abú úŋwən kwi, “Cha adi zən aŋu anó moʼ zənə ugow. 39Asɨmə mbən yə nə umbən unoʼo abey moʼ nu utey kwi ayə chi wa ndəŋ feyn sayn amaʼazənə mbən mə jəgə ufere izaʼara chigə igun. Anigə mbən waʼa kaba kwi a chiyə ufon ba Jû sayn?”

40Mbə kyayn akə ikay ghayn kwi, “Aka ma anom yugə! Mba yə kaba amə Barabas.” Barabas mə uji tən.

Currently Selected:

Jon 18: NGI

Highlight

Copy