Jon 10

Inayn maʼa da anəmə injəg

1Yeso ghayn abú mbə məŋə-anó ma kwi, “Ayə ghayn asiʼ inen kwi wa ŋunə cha u chigə uchəw ukam inyi ungɨŋ ukam injəg, asɨmə u koʼ nyi anji chini amə uji, uji baŋa. 2Wa ŋunə u chigə uchəw ukam nyi ungɨŋ ukam injəg amə wa ŋunə umə nəmə injəg wu. 3Wa ŋunə umə nəmə uchəw ukam yi fiʼi uchəw ukam wu abú iŋwən. Injəg wu tə zəw igəg ma. Uŋwən yə tiya injəg wu akə ukum. Uyə nibə numə injəg wu kwi iŋuw koro ufəʼ. 4Amaʼazənə u si chi injəg ma jum asaŋ, u yə chigə imbey injəg wu si niŋe anjim ma. Itə niŋe damugə ikyay igəg ma. 5Cha imə nigə ma anjim wa isoʼ. Iti noro wa isoʼ damugə cha ikyay uma igəg wa isoʼ.”

6Yeso ghayn inayn maʼa zəŋ abú úŋwən, asɨmə cha utəw uma di zayn da anó zənə yə́ ghayn.

Yeso mə anəmə injəg chuŋ

7Yeso gha ghayn abú mbə məŋə-anó ma kwi, “Ayə ghayn asiʼ inen kwi amə uchəw ukam abú injəg. 8Ba jum mbənə mbə́ zaʼa ki asi zaʼa mə iji, iji baŋa. Asɨmə cha injəg wu mə zwaray uma unó mbənə umə ghayn. 9Amə uchəw ukam, anigə wa moʼ ŋunə u chigə iniŋ nyi ungɨŋ ukam yi du angəʼ. U yi nyi ungɨŋ ukam nibi du ŋu zən ufəʼ chuŋ ikod. 10Uji yə zaʼa aba ni iji, ni zwere foro ni iniy injəg wu. Mə zaʼa kwi injəg wu jəg itəni nu isugi chigə.”

11“Amə anəmə injəg chuŋ. Anəmə injəg chuŋ nu u beni iku da injəg ma. 12Cha wa ŋunə u numi akə afaʼa imə iney injəŋ nu akə ma iyi ma. U bə zən ifuŋ mə zaʼa, u yi sayn injəg wu noro ma. U bə noro, ifuŋ yi zaʼa ibiya injəg moʼ isaŋara moʼ. 13Wa ŋunə u numi akə afaʼa yi nod damugə mbə num uŋwən inumi, anigə cha uzi ma atəw imə iney injəg wu.

14 # Mat 11.27; Luk 10.22 Amə anəmə injəg chuŋ. Mə kyay itiŋ injəg, itiŋ injəg nibi kyay aŋu. 15Aba anji zənə Mbaʼ kyay aŋu, mə nibi kyay Mbaʼ. Mə si beni iku da itiŋ injəg. 16Ayə nə injəg chini nu cha akə unuŋ injəg uŋu. Ayi num injəg wu zaʼa nə iŋwən. Iti zəw inyi igəg anigə injəg wu jum ti bumə akə unoŋ injəg feyn. Anigə anəmə injəg feyn yi mə nəmə injəg wu jum. 17Aton zənə Mbaʼ wuʼi aŋu amə kwi mə si beni iku da igha chomo ikay. 18Akə ma wa moʼ mi num inyi itəni, amə umugə a kaŋa beni kwi ayi ku. Ayə ni ikay iku, ayə nibə nə ikay ichomo ikay. Amə uŋu Mbaʼ ghəy kwi aghəy nigə.”

19Aghaba gha du akaʼa ba Jû wu da unó mbənə Yeso ghayn. 20U nanaʼ mə ghayn kwi, “Azugə iboŋ yə ungɨŋ ma! Yə si bigə! Mbən mə zwaray unó mbənə umə ghayn da ingiya?”

21U moʼ ghayn kwi, “Cha inayn wa ŋunə azugə iboŋ mə ungɨŋ ma mə ma ney. Azugə iboŋ mə fiʼe aghɨ wa nu u fəgə?”

Ba Jû ton Yeso

22Amaʼa koʼ nu ba Jû ŋu jəg ufere boʼo ikono umugə umə naʼa imbəŋ Nwiye zənə imə Yerusanem abú Nwiye. Amə́ amaʼa ufi mə aghəy azəd. 23Yeso mə yeŋ ungɨŋ imbəŋ Nwiye ungɨŋ aboʼə zənə mbə́ mə́ itiya kwi aboʼə Solomon. 24Ba Jû fere kad uŋwən ibiri abú uŋwən kwi, “Ngwə mə siy ngwa akə abúri akə agha sa da ingiya? Ngwə bə mə wa ŋunə Nwiye zoʼo ghayn ina asaŋ asaŋ.”

25Yeso ywiri abú úŋwən kwi, “Mə si ghayn inen asɨmə cha mbən beni. Unó mbənə amə ighəy akə ukum uŋu Mbaʼ u mbə aghəy kwi mbən kyay wa ŋunə amə uŋwən. 26Cha mbən mi beni damugə cha mbən mə ngwən itəŋ injəg. 27Itəŋ injəg tə zəw anó zənə amə ghayn. Mə kyay itiŋ injəg. Itə́ beni aboʼo inyi. 28A yə naʼa itəni nu cha imi noʼo imey abú iŋwən. Cha imi noʼo iku nim. Cha wa moʼ amə aghəy ufeyn iŋwən iniŋ. 29Uŋu Mbaʼ ŋunə u naʼa injəg itəŋ iniŋ chigə ba jum. Cha wa moʼ amə aghəy ufeyn iŋwən abú uŋu Mbaʼ. 30Uŋu Mbaʼ nə umugə, mba yə akə anó feyn.”

31Amaʼazənə yə ghayn ney, ba Jû bɨŋi atəy boʼo itum uŋwən. 32Yeso ywiri abú úŋwən kwi, “Uŋu Mbaʼ si aghəy kwi a aghəy unó chuŋ nanaʼ akaʼa injən. Amə anó zayn akaʼa unó mbəŋ nu mbən mə kaba itum aŋu da aŋwən?”

33Mbə́ ywiri abú uŋwən kwi, “Akə ma da anó chuŋ moʼ zənə ngwə aghəy nu mba mə kaba itum ayə. Mba yə kaba itum ayə damugə ngwə jimə Nwiye, damugə ngwə mə wa inyoŋ atəw anigə ngwə ghayn kwi imə Nwiye.”

34Yeso ywiri abú úŋwən kwi, “Ka mbən ŋwaʼanayn ungɨŋ umbən unoʼo kwi Nwiye ghayn kwi, ‘Mbən mə unwiye?’ 35Nwiye tiya ba mbənə mbə́ zəw inayn ma kwi amə unwiye, anigə mba kyay kwi aŋwaʼanayn Nwiye yə ghayn asiʼ. 36Mbən bə ghayn da umugə ŋunə mbaʼ zoʼo aŋu icha ungɨŋ isəg kwi mə jimə Nwiye damugə a ghayn kwi, ‘Amə Ŋwə̂ Nwiye?’ 37Abə mə kwi cha amə ighəy unó mbənə Mbaʼ ghayn iniŋ, ka mbən beni ngwən unó mbənə amə ighayn. 38Abə mə ighəy unó wu, kə di ma kwi cha mbən mə beni unó mbənə amə ighəy, asɨmə mbən beni boʼo umbən utəw zayn kwi uŋu Mbaʼ yə akə anó feyn nə umugə, foro kwi ayə akə anó feyn nə uŋu Mbaʼ.”

39Mbə́ gha kaba kwi u ibiya Yeso, asɨmə Yeso soŋoro du ungɨŋ inya ubugə uma.

40 # Jon 1.28 Yeso aghəy nigə gha kwene ŋu anjin ugwi Jodan zi asin zənə Jon mə́ naʼa une. Yə pey yi chomo awu. 41Ba nanaʼ ŋu abú uŋwən. Mbə́ mə́ ghayn akaʼa uma kwi, “Cha Jon ŋunə yə́ mə́ naʼa une aghəy ma ayere anó moʼ. Asɨmə unó jum mbənə yə́ mə́ ghayn da anom ŋunə amə unó asiʼ.” 42Ba nanaʼ asin wu beni Yeso.

Currently Selected:

Jon 10: NGI

Highlight

Copy