Zaŋ 12

1Magəra manah makwa kad fa macunam ta Pak te Zuwef hay. Yesu ke dey a Betani, pa wunam masa Lazaraws nda masa aŋga ta pərkiya dapa maməcay. 2Dərŋga sə, ac ka tana ɗaf, Marta ke vəneceney. Lazaraws, ke dey, ka njah ava Yesu deveŋ ndah mazala kad yaŋ ɗaf ana. 3Maaray ka kəs mal te meŋgeŋgəzey mezel nar masa magaɓa aabay, mal ana e husem bay, e ŋgə pa ɓalaɓala te liter amta, ka cəhan fe sek te Yesu. Ava dəɓa ana, ka təkwaɗan sek te Yesu ana ava ŋgwec ta yaŋ tata, way ana fakwanay e zek ava mal ana. 4Nda amta deveŋ ndah masasəraka jene tata mezel Zudas Iskariyawt, nda ma ta husamda Yesu sə, ke gweɗ, gege: 5«A husamda mal ana nesey fa səlay bakatar temere mahkar, me de vənecen səlay ana kad maslamarga hay bay sə, mafay te mey?» 6E gweɗ sə, mafay ta masa a wulak majan maslamarga hay bay. Amaa, mafay ta masa aŋga makar ana. Aŋga sə, aŋga nda matəhaza səlay, anjəkar a kəriya dapa. 7Amaa Yesu e gweɗ, gege: «Magərda da ŋgaw. E ŋgə sə, a ləmadawa pas ta map taaɗaw pa jəvay kama kama. 8Maslamarga hay sə, ac ta njah ava akwar cəɗem cəɗem, amaa yey sə, ya ta njah ava akwar cəɗem cəɗem ɓasabay.»

9Ndah dapa vavara te Zudey mabay ac ka cəna Yesu aŋga da Betani. Ec ke dey, ece dey ana sə, mafay te Yesu babəla bay, amaa mafay ta mawuzaɗ Lazaraws, nda masa Yesu ta vahan mesfen tata dapa maməcay sə, may. 10Mazlakava hay ta Way ta kwakwas, ac ka jawa ma teceŋ ta makəɗ Lazaraws, 11afa Zuwef hay mabay ac ke gərdeceŋ mafay ta Lazaraws, ac ka kəs ma te Yesu.

Yesu e sehw kad Zeruzelem ara bay

(Mat 21.1-11; Mar 11.1-11; Luk 19.28-40)

12Tedew ana, miya ta ndah medek kad pa macunam te Zuwef hay sə, ac ka cəna Yesu ke dek kad Zeruzelem. 13Ac ka bəzlah gamslak ta təɓa hay, ec ke dey ka ta cə yaŋ ava aŋga, ac ka cə lalaw ava gədaŋ, gege: «Mahahəmakwa Zlavay! A lada Bay Mazlakava da pəsafa ma bay te Isreyel hay masa e dek eve mezel tata nesey!» 14Yesu ka ŋgat wut ta zaŋgwa, ke tepə fətiya ara masa mavinda, 15gege: «Akwa ŋgə zidaw bay, ndah dapa berne ta wudam ta Siyawna! Mawala Bay takwar a daɗay, aŋga matapa fa wut ta zaŋgwa.» 16Dapa macaaca ana sə, ndah masasəraka jene tata aca sən ma da yaŋ ana bay heley, amaa ava dəɓa ana masa Zlav a ta hahəlan yaŋ te Yesu pas te mepərek dapa maməcay sə, ac ka sənafa ma masa mavinda da yaŋ ana. Jə masa ndana hay ta ŋgana ŋgesey sə, ara ma ana te gweɗey. 17Dapa ŋgesey ana, miya ta ndah masa ac ava Yesu dapa masa a zal Lazaraws dapa jəvay, e pərekek dapa maməcay sə, ac faŋga, ac ka tə yaw da yaŋ ana. 18Mafay ana, miya ta ndana hay ec ke kwesek vaw kad vara vaw, afa ac ka cəna cah hay masa aŋga ta ŋgiya. 19Farisa hay, ec ke gweɗ dapa taɓa tec, gege: «Mawala la hwa, jə masa andə ta ŋgakwa sə, ka jənandakwa kwa kusetke aabay, afa ndana hay fakwanay aca cəpiya.»

Membeɗey va hap mazləlawa

20Gərek hay dərziya deveŋ ndah medek kad Zeruzelem ke te kekəred kad Zlavay pas ta macunam ana ɓa. 21Ec ke dey vara Fəlep, nda Baytisayda ana dapa vavara te Gelile, ac ka nəkafa, gege: «Bay taciya, anda wal mawala Yesu.» 22Fəlep ke dey, ka gwaɗa Endəre, ec ke də cuweeney, ac ka gwaɗa Yesu. 23Yesu ke vehecen, gege: «Pas masa Zlav a ta hahəm Wut ta nda sə, ka husakata təlam na cay. 24Ya gwaɗakwar, daha wut te bəley ka kazlata fa vara, ka məc aabay sə, a ta njah sandalaŋ aŋga amta. Amaa daha ka məcata, e te heyek wudiya ana#12.24 E te heyek wudiya ana Da vara Gərek hay, daha hulef de pəcekey sə, say a kuɗapata ɗagay, ava dəɓa ana, ke pəcey. Amaa vara andakwa sə, daha hulef ka kuɗapata e pec ɓasabay. hay. Amaa daha ka məcata, e te heyek wudiya ana hay macəkuma bay. 25Nda masa a wal mesfen tata sə, a zana avəda, amaa nda masa a wal mesfen tata dapa vavara na bay sə, nda ana ŋgesey, a ŋgə sə, a raɓaɗ mesfen tata ha, a ta njah eve ndey da cak ta Zlavay katar ka midakw. 26Daha nda masa a wal meŋgə mezlərey aɗaw, da cəpiyey. Ara nesey, pa slam masa ya ta njah dapa sə, nda maŋga mezlərey aɗaw a ta njah pa may. Nda masa e ŋgə mezlərey aɗaw sə, Papa a ta hahəlan yaŋ.»

27Təlam nesey sə, yaŋ aɗaw ka dəŋgazlata, ye de gweɗ sə, gwagumaw? Papa mbəliyey avəda dapa pas ana na geyey? Amaa ye dek sə, ka ta sə marga dapa pas ana hay nesey. 28Papa, vana mehehəm kad mezel takaa. Uway ke cənek da baymaləvaŋ, gege: «Ya ka hahəma cay, ya ta hahəmiya saya.» 29Miya ta ndah faŋga macəna uway ana sə, ec ke gweɗ, gege: «Merev ta yam.» Ndah mekele, gege: «Maskəla ta gwaɗa.» 30Amaa Yesu gege: «Uway ana e cənek nesey sə, mafay taaɗaw bay, amaa mafay takwar. 31Təlam nesey, pas masa Zlav a ta təɗana ma yaŋ ndah ta vavara sə, ka husakata cay, pas ta makazl bay ta vavara nesey kad a vəda sə, ka husakata təlam na cay. 32Yey sə, pas masa ec ke te beŋgeɗeyey avəda fa vara kad a wudam sə, ndana hay fakwanay ac ta dakata kad vereyey.» 33Yesu e gweɗec nesey da yaŋ maməc wula, masa a ta məcay. 34Miya sə, ac ka gwaɗa, gege: «Andaw ka cəna dapa ma majawa, Kəristi a ta njah katar ka midakw. Naa ka gwaɗa ac ta baŋgaɗa Wut ta nda avəda sə, a ŋgana gwagumaw? Wut ta nda ana sə, wa?» 35Yesu ke vehecen, gege: «Slam mawaɗa aŋga dapa taɓa takwar dapa manjah kusetke ɗagay. Dapa masa slam mawaɗa aŋga varakwar sə, madaɗay dapa, afa ləvaŋ da zlafa macamakwar bay. Nda masa a də dapa ləvaŋ sə, a sən masa e də kad ma bay. 36Dapa masa slam mawaɗa aŋga da varakwar heley sə, makəsaw pa rav takwar, afa akwar da tər ke wudeh ta slam mawaɗa.» Ava dəɓa ta magwaɗ ma ana nesey, ka data, ka raɓata dəreŋ eve eceŋ.

Zuwef hay ac ka kəs Yesu pa rav aabay

37Ava masa Yesu ta ŋgə cah hay gaa meendey teceŋ, kwa Zuwef ana hay aca kəs ma tata aabay jaŋgata. 38Ma masa Izay, nda mehwedek ma zleezle te gweɗey sə, ka ŋgata:

«Bay Mazlakava makəsa ma masa andaw ta bəzadiya sə, wa?

Bay Mazlakava e ŋguzdek gədaŋ tata sə, kad wa?»

39Ndah ana nesey ac ka zlafa makəs ma ana pa rav bay sə, afa Izay ke gweɗ saya, gege:

40«Zlav ke həɗezlecen ndey avəda,

ke seselecen rav tec avəda,

afa aca ra wala jene eve ndey tec sabay,

afa leŋgesl tec da cəna jene sabay,

afa aca ra ŋgwada rav teceŋ,

Zlav de mbəlec avəda sabay.»

41Izay e gweɗ ara nesey sə, afa ka wala mehehəm te Yesu, ke gweɗ da yaŋ ana. 42Dapa ŋgesey ana, kwa deveŋ mazlakava hay te Zuwef ana hay mabay ac ka kəs ma tata. Amaa ec ke ŋguzdek yaŋ tec kad a vəda sə, aabay, aca ŋgə zidaw fa Farisa hay, afa ec te mbesec avəda dapa Way ta macə mbahw te Zuwef hay. 43Ara nesey, aca wal ɗahw sə, ndana hay de hehəmeceŋ da yaŋ masa Zlav te hehəmeceŋ.

44Yesu ke gweɗ ava gədaŋ, gege: «Nda masa a kəs ma taaɗaw, a kəs ŋgesey, ma taaɗaw bay, amaa ma ta nda mezlərekiyey. 45Nda masa e weliyey, ŋgesey, a wal nda mezlərekiyey may. 46Yey sə, ya slam mawaɗa, ye dek kad pa vavara sə, afa ndah makəsa ma aɗaw ac da njah dapa ləvaŋ sabay. 47Daha nda masa a cəna ma aɗaw, amaa a pafa yaŋ aabay sə, ŋgesey, ma ta təɗana ma yaŋ sə, yey sabay, afa ye dek sə, ka ta təɗ ma yaŋ ndah dapa vavara bay, ye dek sə, ke te mbəleceŋ. 48Nda masa e kezldeyey, a gwam ka kəs ma taaɗaw bay sə, jə ma ta təɗana ma yaŋ ɓa: Ma aɗaw masa ye te gweɗey sə, a ta təɗana ma yaŋ pas te mendəv ta vavara. 49Ma masa ya ta gwaɗiya nesey sə, ye gweɗek dapa yaŋ taaɗaw bay, amaa ma ta Papa, nda mezlərekiyey, aŋga te viyey cəvey, aŋga ta ŋguzdawa, afa ya da gwaɗiya va maŋguzdiya kad ndana hay. 50Aŋga, ya səniya ma tata majawa sə, a və manjah katar ka midakw: Ma masa ya gwaɗiya nesey sə, ye gweɗek ara masa Papa te gweɗiyey may.»

Currently Selected:

Zaŋ 12: CUVnt

Highlight

Copy