Zaŋ 11

Mepərek ta Lazaraws dapa maməcay

1Ndana ɓa mezel Lazaraws, aŋga gwabay, aŋga nda ta wunam ta Betani, wunam masa Maaray va dəmaŋ Marta dapa. 2Maaray ana sə, aŋga ŋgwaz macəha mal te meŋgeŋgəzey fe sek ta Bay Mazlakava, matukwaɗa sek ta Bay Mazlakava eve ŋgwec ta yaŋ tata. Lazaraws masa gwabay ana ŋgesey sə, aŋga malamaŋ. 3Ndah ava dəmaŋ ana cuweeney sə, ac ka zlar ndana kad vara Yesu aca ra gwaɗa: «Bay Mazlakava, nda masa ka waya sə, aŋga gwabay.»

4Masa Yesu a cəna ara nesey sə, e gweɗ, gege: «Meməcey ta Lazaraws nesey sə, ta maməc bay, amaa e te ŋguzdek gədaŋ mazlakava ta Zlavay. Ndana hay ac ta hahəm Wut ta Zlavay sə, jaka pe mehecey tata ana.» 5Yesu sə, e welec Marta, Maaray dəmaŋ va Lazaraws. 6Amaa masa a cəna Lazaraws ana aŋga gwabay sə, ke ŋgə manah ecew ava dəɓa ana dapa slam masa aŋga dərŋga. 7Ava dəɓa ana, ke gweɗec ndah masasəraka jene tata, gege: «Mavahakwa kad pa vavara te Zudey.» 8Ndah masasəraka jene, ac ka vahan, gege: «Raabi, ke ŋgə manjah gaa aabay heley masa mazlakava hay te Zuwef hay dərŋga ac ka yah makalakaa eve kekeŋ ka ta kəɗakaa ka macəhwandaw, naa ka wal meveh kad arŋga saya sə, gwagumaw?» 9Yesu gege: «Da hwaɗ ta pas amta sə, ler kuraw dapa yaŋ ana ecew biba? Eve metehwe ana, daha ndana a ŋgway ta pas sə, mecəhwen a kəɗa aabay, afa a wala meweɗ ta vavara nesey, 10amaa, daha ndana a ŋgway ta vaɗ sə, mecəhwen a kəɗa, afa slam mawaɗa vara vaw aabay.»

11Ava dəɓa ta magwaɗ ma ana hay nesey, gege: «Guula tandakwa Lazaraws ka njata waŋ, amaa ye dey, ye te pərekek avəda.» 12Ndah masasəraka jene ac ka gwaɗa, gege: «Bay Mazlakava, daha ka njata waŋ sə, a ta pərakata.» 13Yesu a wal megweɗ sə, Lazaraws ka məcata, amaa ndah masasəraka jene tata ac ka cəna ma da yaŋ ana aabay, aca wulakiya sə, a njawaŋ tehwe. 14Yesu ke penecen ma ana, gege: «Lazaraws ka məcata, 15ye wesl gaa mafay takwar da yaŋ masa ye ke də vara vaw aabay heley, afa akwar da kəs ma aɗaw sə, mafay ana, təlam nesey, amcakwa vara vaw.» 16Tumas nda masa aca zaliya Mawasay sə, ke gweɗec ndah masasəraka jene dərziya, gege: «Andakwa may, amcakwa, anda da məcakwa ava aŋga.»

17Mahusa te Yesu a Betani, a ta ŋgatafa Lazaraws dapa jəvay, ke ŋgə manah faɗ cay. 18Betani ana sə, aŋga zef eve berne te Zeruzelem, e ŋgə kilewmeeter mbala mahkar, 19Ndana hay gaa dapa vavara te Zudey, ac ke dey kad vara Marta va Maaray ke te təkecen rav, mafay ta maməc ta malamaŋ teceŋ. 20Masa Marta a cəna Yesu e dekey, ka hway ka ta cə yaŋ ava aŋga, ta Maaray sə, aŋga manjaha da wunam. 21Marta ka gwaɗa Yesu, gege: «Bay Mazlakava, daha efes ka fana ta manjəkəlak sə, malama ana ka məc aabay. 22Amaa kwa təlam nesey ana, ya səniya, jə masa ka nəkafa Zlav fakwanay sə, a vakaa.» 23Yesu ka gwaɗa, gege: «Malamakw a ta pərakata dapa maməcay.» 24Marta ka vahan, gege: «Aŋga, ya səniya, a ta pərakata pas te mepərek ta ndah maməca dapa pas te mendəv ta vavara.» 25Yesu ka gwaɗa, gege: «Yey sə, ya nda mapəraka nda dapa maməcay, ya nda mavana mesfeney. Nda masa ka kəs ma aɗaw, kwa ka məcata, a ta njah eve ndey, 26nda masa aŋga eve ndey, ka kəs ma aɗaw sə, kwa a ta məc aabay. Ka kəs ma ana na geyey?» 27Marta ka vahan, gege: «Aŋga, Bay Mazlakava, ya kəsiya, kaa sə, ka Kəristi, Wut ta Zlavay masa anda ɓəliya e de dek kad pa vavara.» 28Ava dəɓa ta masa Marta ka gwaɗa Yesu ara nesey, ke dey vara dəmaŋ Maaray, ka sasəkana ma, gege: «Nda masasəraka nda ke dekey, a zalakaa.» 29Masa Maaray a ta cəna ara nesey sə, ke zleftek zef, ke dey kad vara vaw. 30Yesu ka husa pa wunam ana aabay heley, amaa aŋga faŋga ana heley dapa slam masa ac ta cə yaŋ ava Marta. 31Ndah dapa vavara te Zudey masa ac da way ava Maaray aca təkan rav sə, aca wala Maaray e zleftek paf, e də kad a vəda ava mavas vaw sə, ac ka wulakaw, e zleftek nesey sə, ka ta kuɗa a ma ta jəvay. Ac ka cəpaw. 32Maaray a husa pa slam masa Yesu aŋga dapa, a ta wala sə, kwerjejekw! E kekəred fəma tata, a gwaɗa, gege: «Bay Mazlakava, daha efes ka fana ta manjəkəlak sə, malama ana ka məc aabay pəse.» 33Masa Yesu a wala Maaray va ndah mecəpekey, aca kuɗa, ka ɓəlan rav macəkuma bay. 34E gweɗ, gege: «Akwa paɗ macəhwandaw ana sə, fəla?» Ac ka vahan, gege: «Bay Mazlakava, dek ta wuzaɗa.» 35Yesu ka kuɗa. 36Ndah medek dapa vavara te Zudey sə, ec ke gweɗ, gege: «Mawala masa a wal Lazaraws ana!» 37Amaa ndah dərziya deveŋ eceŋ ec ke gweɗ, gege: «Mawunan ndey ta nda mahazlaw sə, aŋga biba, naa a zlafa maran ma ta maməc ta Lazaraws ana bay ŋgəɗa geyey?» 38Ava dəɓa ana, rav te Yesu ke bəzleŋgeɗ saya. Ke dey a ma ta jəvay ana. Jəvay ana sə, mahwahurkwa dapa kekeŋ mazlakava ana, maɓəzla eve beelem. 39Yesu gege: «Matatalama beelem da ma ana avəda.» Marta dəmaŋ ta nda maməca sə, ka gwaɗa, gege: «Bay Mazlakava, a ta zakafandakwa, afa ke ŋgə manah faɗ pəsna.» 40Amaa Yesu ka vahan, gege: «Ya ka gwaɗakaa aabay geyey? Daha ka kəs ma aɗaw sə, ka ta wala gədaŋ ta Zlavay.» 41Ac ka tatalama beelem sə, avəda. Yesu ka baŋgaɗ ndey kad a wudam, ka cə mbahw, gege: «Papa, ya ŋgakaa wasay, afa ka ka cənawa mbahw aɗaw. 42Ya səniya, ka cənawa mbahw aɗaw cəɗem cəɗem, amaa ye gweɗ ara nesey sə, mafay ta miya da cak taaɗaw nesey, afa aca ra kəsiya kaa sə, ke te zlərekiyey.» 43Ava dəɓa te megweɗ ma ana, ka tal ma ava gədaŋ, gege: «Lazaraws, dek kad a vəda!» 44Lazaraws, nda məcata sə, həmɓak! E zleftek, e dek kad a vəda, sek va ha hay matəkaɗa ava rəkwat, yaŋ tata masərata ava rəkwat. Yesu ke gweɗec kad ndana hay, gege: «Mapəlan avəda, margərda da daɗay.»

(Mat 26.1-5; Mar 14.1-2; Luk 22.1-2)

45Ndah dapa vavara te Zudey gaa medek kad vara Maaray sə, ac ka wala jə masa Yesu ta ŋgiya sə, ac ka kəs ma tata. 46Amaa ndah leŋgeɗ hay deveŋ eceŋ, ec ke dey kad vara Farisa hay, ec ke kərecen maɗay da yaŋ jə masa Yesu ta ŋgiya. 47Bay hay ta ndaakwas hay va Farisa hay ac ka cam yaŋ dapa slam ta mamənak tec mazlakava, ec ke gweɗ, gege: «Anda da ŋgakwa gwagumaw? Nda ana na e ŋgə cah hay elehey. 48Daha anda gərakwaɗ a da ŋgaw ara nesey sə, ndana hay fakwanay ac ta kəs ma tata. Ara nesey, mazlakava hay ta Rawma ec te dekey, ac ta pəlahandakwaɗ Way ta kwakwas tandakwa avəda, ac ta bazlandakwa Zuwef hay avəda.» 49Nda amta deveŋ eceŋ ɓa, mezel Kayfas. Aŋga mazlakava ta ndaakwas hay dapa mavay ana ŋgesey, gege: «Akwar na kwa akwa cəna jene bay! 50Akwa sən masa zuwan nda amta ta məc mafay ta miya fakwanay da yaŋ masa andakwa fakwanay te bezl aabay geyey.» 51E gweɗek ara nesey sə, mawulak yaŋ tata bay, amaa ara masa dapa mavay ana ŋgesey sə, aŋga mazlakava ta ndaakwas hay, e gweɗ ara nda mehwedek ma da yaŋ a lada Yesu da məcata mafay te Zuwef hay fakwanay, 52a ta məc sə, mafay te Zuwef hay babəla bay, amaa ke te cemecen yaŋ te wudeh ta Zlavay masa ec ke kwekwececeŋ, ara nesey, ec te cemec ka vaw amta. 53Dəga pəsaŋga ana ŋgesey, ac ka zlac mawulak yaŋ teceŋ ta makəɗiya ka macəhwandaw. 54Ara nesey, Yesu ka ŋgway kad pa taɓa mazlakava hay te Zuwef hay meendey meendey sə, ɓasabay. Ac ka data dapa faŋga kad pe berne, mezel Efərayim, dapa vavara masa aŋga zef ava səɓak, dərŋga ec ke vərendə ava ndah masasəraka jene tata.

Macah mal fa yaŋ da Betani

(Mat 26.6-13; Mar 14.3-9; Luk 7.36-38)

55Dapa ŋgesey ana, macunam te Zuwef hay mezel Pak sə, aŋga hukw cay. Ndana hay gaa dapa wunam hay jaka ma ta səɓak ec ke dey kad Zeruzelem manah amta wagaa macunam ana e te husekey, afa aca ra pana yaŋ tec avəda, ec de tər ka ndah mambəla ana fa yam te ndey ta Zlavay. 56Ac ka yah Yesu, ac ka nəkaw dapa taɓa tec amta amta dapa Way ta kwakwas, gege: «Akwa wulakiya gwagumaw? E dek pa macunam ana aabay geyey?» 57Mazlakava hay ta ndaakwas hay va Farisa hay ec ke və cəv, gege: «Kwa waawa masəna slam masa Yesu aŋga dapa sə, e de dek gwaɗandanay, ara nesey, anda ra te təhezekey.»

Currently Selected:

Zaŋ 11: CUVnt

Highlight

Copy