Málkus 1

Likálo lí Yohánɛs Ǹtíi-nzoɓan

(Mat 3.1-6, 11-12; Lúk 3.1-6, 15-18)

1Miɓotlé mí Pɔ́l M̀ɓɛɛŋ nyí Yésus Kilístus, Mɔɔ́n Ɔlolómɛ̄ mí lɛ́ jā: 2Ákaa yá ciiɓɛ́ á kálati m̀pɔ́tle-a-Ɔlolómɛ̄ Ésáya nɛ́:

«Légɓé sig, mag dúgɛ ǹlɛgɛ-njɛn wama ɔ́sū vɔ́ɔ,

á li saŋa lí wā nzen.»

3Cíŋ ɛg lón á éyāŋ nɛ:

«Miní sáŋā nzen Nyɔ́ŋ-Ɛsáŋɛ́,

miní tɛ́ɛ́yɛ́ milɔ́ŋ mɛ́ɛ́ sim.»

4Váŋ nɛ́, Yohánɛs Ǹtíi-nzoɓan a pámlé á éyāŋ, ag tɛ́ɛ likálo lí nzoɓan ɛ ŋga véŋe bilɛ́m ányúū elaakɛ-miɓé. 5Ɓot bí Yúdēa la ɓá bí tísɔn nyí Yelúsalɛm bísɛ bí ŋgí kɛ ápah Yohánɛs a ɓɛ́ɛ́. Bí ŋgí páha miɓé máɓá, nyɛ́g ag tíi ɓɔ nzoɓan á lɔm lí Yɔ́ldan. 6Yohánɛs a ɓɛ́ɛ́ a jáhɛ mbɔ́tí nyí voŋ ví tít bí ŋga yáŋa nɛ́ kámɛl, elɔŋ la ŋgóli nyí ekogo tít á ŋkuɓá. A ŋgí dí ja átātáŋgá la weé nyú á pɛ́ɛ́. 7A ŋgí lɛgɛ nɛ́: «Nyɔ́ a ŋga sɔ́ á mbúh yáma ag loo ma ŋguu, mih kɔ́ɔ́ ɓé tɔ ma nɛ́ mi úlɓan á li kúhu lí míkɔɔ mí bítāmbí byɛ́ɛ́. 8Ma, mag tíi ɓɛ́nɛ nzoɓan mindím, ndí nyɛ́ ag kɛ ɓɛ́nɛ li tíi lí nzoɓan nyí M̀búl Mpúán.»

Nzoɓan la miceglan mí Yésus

(Mat 3.13-17; Lúk 3.21-22)

9Múŋ á nyúŋ alɔ́, Yésus ɔ sɔ́léné á Názalɛt, ŋkɔŋ á Galiléa, la Yohánɛs ɔ tí nyɛ nzoɓan á lɔm lí Yɔ́ldan. 10Eceg a ŋgí pámle á míndīm, ɔ ɛ́n lóō lú léglan, la M̀búl Mpúán ɔ sūhlé nyɛ ákaa ɔɓeŋ. 11Váŋ nɛ́ cíŋ ya sɔ́le á lóō yú lága nɛ: «Ɔ lɛ edidíŋɛ yáma Mɔɔ́n, nyɔ́ ma pɔ́hɔ.»

(Mat 4.1-11; Lúk 4.1-13)

12Á ékūyá-kúyá M̀búl Mpúán ɔ wɛ́ɛhɛ́ Yésus, tɛɛla á éyāŋ. 13La nyɛ́ ɔ tɔ́ɔ̄ wóŋ muúmínáa mí álɔ̄ ápah Sátan a váá nyɛ́ á sí miceglan. A ɓɛ́ɛ́ á tɔ́ɔ̄ wóŋ elɔŋ la tít pɛ́ɛ́, áŋgɛl ki ɛ́g ɓɔŋle nyɛ́.

Yésus ag lɛgɛ Pɔ́l M̀ɓɛɛŋ á Galiléa

(Mat 4.12-17; Lúk 4.14-15)

14Bí byeléé Yohánɛs, bú vá nyɛ á m̀ɓog, váŋ nɛ́ Yésus a kɛ́ á Galiléa, ɔ lɛ́gɛ Pɔ́l M̀ɓɛɛŋ Ɔlolómɛ̄ wóŋ nɛ́: 15«Eceg yá kɔlan, Likanʼyɛ lí Ɔlolómɛ̄ lá nyɛ́g. Veŋlán bílɛ̄m, yéɓyán Pɔ́l M̀ɓɛɛŋ.»

Yésus ag pɔhɔ ɓayége ɓɛ́ɛ́ bí ɔ́sū bínáa

(Mat 4.18-22; Lúk 5.1-3, 10-11)

16Kasig Yésus a ŋgí loo á ŋgwáāg ebúle yé Galiléa, ɔ ɛ́n Símɔn la mɔɔ́nyāŋ Andeléas ɓá bí ɓɛ́ɛ́ ɓot bí mísombó bíg léé épéha á ébúle. 17Ɔ lága ɓɔ nɛ́: «Oŋán ma, mag yaanɛ ɓɛ́nɛ ɓalɔ́ɔ́ ɓot.» 18Á ékūyá-kúyá, bú cóó bípéha byáɓá, bú ōŋ nyɛ. 19Ɛnɛ́ a kɛ puh ɔ́sū, ɔ ɛ́n Yákop la mɔɔ́nyāŋ Yohánɛs, ɓɔɔ́n bí Zebedéo bí tɔ́ɔ̄ á m̀ɓoŋgó wáɓá bíg téétɛ bipéha, 20ɔ yáŋa ɓɔ; bú yíg ɛsáŋɛ́ wāɓá á m̀ɓoŋgó la ɓaɓɔŋle, bú ōŋ Yésus.

Yésus ag ɓógtɛ mut m̀búl m̀ɓé á Kafalnáum

(Lúk 4.31-37)

21Eceg Yésus la ɓayége ɓɛ́ɛ́ bí kɛ̄nɛ́ɛ́ á Kafalnáum, á ɔlɔ́ ví évɛɛɓan ví Élōg-Yúda, ɔ níŋgí á ndáá-miɓomán, ɔ ɓōtlé li yéglɛ. 22Ɓot bú nyág la liyéglɛ́gɛ jɛ́ɛ́, átɔm nɛ́ a ŋgí pɔ́t la ekíndo; a ŋgí yéglɛ ɓé ákaa ɓayí-mbéndá. 23Yú sóŋhán nɛ múŋ á ndáá-miɓomán yaɓá, mut wa a ɓɛ́ɛ́ átē nyɔ́ a ɓɛ́ɛ́la m̀búl m̀ɓé, ɔ tɛ́ɛ́ nlón la ŋguu nɛ́: 24«Mɔɔ́ a! Yéé ɔ ŋgɔ sōmle ɓɛ́hɛ á Yésus nyɔ́ á Názalɛt, ɓaá wa sɔ́ ja ɓɛ́hɛ li ɓɔgɔ é? Mag yí nzáá ɔ lɛ: Nyɔ́ Mpúán a Ɔlolómɛ̄.» 25Yésus ɔ kímɛ nyúŋ m̀búl m̀ɓé, a byɛ́la wɔ́ nɛ: «Lēg ányu, ɔ pám átē á nyɔ́ mut.» 26M̀búl m̀ɓé wú pógɛ́ nyɔ́ŋ mut la ŋguu la wɔ́ wú pám ág tɛ́ɛ milón la ŋguu. 27Ɓot bísɛ bú nyág nyaa nyí lɛ nɛ́ bú ɓōtlé lí ɓatan nɛ́: «Yéé yé náŋ é? Náŋ nɛ́ a lɛ hɔ́ eyége ɛ́ péná yé ɛ́ yáhɛ́ la ekanʼyɛ! Nyɔ́ mut ag kímɛ la mimbúl míɓē mísɛ ndí mɔ́g mí ógle nyɛ́!» 28Pɔ́l nyí Yésus yu vóó li caman á Galiléa ɛsɛ̄.

Yésus ag tɔɔyɛ ɓakɔɔ́kɔ̄n mbólí

(Mat 8.14-15; Lúk 4.38-39)

29Á mípām máɓá mí ndáá-miɓomán, bú kɛ́ elɔŋ la Yákop la Yohánɛs á yóg Símɔn la Andeléas. 30Ɛnɛ́ ɓá pám wóŋ, bú kɔ́p nɛ nyaŋɛ́-a-ǹcii a Símɔn a náŋɛ la livɛ́ɛ́. Bú vóó lí yíhɛ lí Yésus náŋ. 31La nyɛ́ ɔ kɛ ápah nyɔ́ŋ a ɓɛ́ɛ́ á náŋɛ, ɔ byée nyɛ á wɔ, ɔ tɛ́ɛ́yɛ́ nyɛ, livɛ́ɛ́ ki lú man. Váŋ nɛ́ a ɓōtlé ɓɔ li ɛɛle.

(Mat 4.24; 8.16-17; Lúk 4.40-41)

32Ɛnɛ́ ŋgōgó ya vín, ɓot bú ɓōtlé li sɔ́la lí Yésus ɓakɔɔ́kɔ̄n bísɛ la ɓot ɓá bí ɓɛ́ɛ́la mimbúl míɓē. 33Pɛ́m nɛ ɓot bí tísɔn bísɛ nɛ́ bí ɓɛ́ɛ́ bí kómānɛ á ányu-á-mɓɛ́l á ndáá. 34Yésus ɔ tálá ŋgandag ɓakɔɔ́kɔ̄n bí patí ákɔn ɛ́sɛ, ɔ pámɛ́ ki ɓot mimbúl míɓē ŋgandag á nyúū, ndí a ŋgí mwahɛ ɓé mɔ́ nɛ́ mí pɔ́t, átɔm nɛ́ mí ŋgí yí nzáá a lɛ.

Yésus ag ɓógo á Kafalnáum

(Mat 4.23; Lúk 4.42-44)

35Yésus ɔ tɛ́lɛ́ la miyɛ́ mí kítí, ɔ pám, ɔ kɛ́ á liɛ́g; ɔ ɓōtlé lí kánɛ wóŋ. 36Símɔn la elɔŋ yɛ́ɛ́ ɓot bú kɛ nyɛ li somo. 37Ɛnɛ́ ɓá ɛ́n nyɛ, bú lága nyɛ nɛ́: «Ɓot bísɛ bíg somo wa.» 38Yésus ɔ lága ɓɔ nɛ́: «Bi kɛ́nɛ́g épah etám, á míkɔŋ mí lɛ́ ɓɛ́ɓɛ la vá. Ma nyɛ́ɛ ki li lɛgɛ lí Pɔ́l M̀ɓɛɛŋ wóŋ, átɔm nɛ́, ma sɔ́ ja ányúū náŋ.» 39La nyɛ́ ɔ wɛ́ɛ Galiléa ɛsɛ̄, ɔ lɛ́gɛ Pɔ́l M̀ɓɛɛŋ á ndáá-míɓomán yáɓá, ɔ dúhú ki mimbúl míɓē.

Yésus ag manɛ mut a mivɛlɛ

(Mat 8.1-4; Lúk 5.12-16)

40Mut a mivɛlɛ wa ɔ sīŋglé Yésus á ŋgwáāg, ɔ úm míɓɔ̄ŋ á sí ɔ́sū vɛ́ɛ́ a byɛ́la nyɛ́ nɛ́: «Kíyáɓɛ́nɛ ya dīŋ, ɔg la mā lí púɛ́.» 41La ŋgɔ́ɔ́ yu byée Yésus, ɔ sámbá wɔ, ɔ síiɓán nyɛ la li yó nɛ́: «Mag diŋ náŋ, púú!» 42Á ékūyá-kúyá, mivɛlɛ mɛ́ɛ́ mú man, ɔ púú. 43Yésus ɔ vóɛ́ nyɛ li soɛ, 44ɔ ɓéhyɛ́ nyɛ nɛ́: «Wa nyɔ́ŋ, ɔh laglág ɓé tɔ mut náŋ, ndí, kɛ̄n étɛ̄ nyuú yɔ́ɔ, ǹtíi-nsúlé, ámbúh náŋ ɔ tí likaale ányúū mbólí nyuú wa kūh, likɔlɓan la bitɛ́ɛ́yɛ́nɛ́ bí Móse. Náŋ ag kɛ ɓɔ́ li ɓɛ́ lí ndembye.» 45Ndí ɛnɛ́ nyɔ́ŋ mut a kɛ, ɔ ɓōtlé li lɛgɛ lí yé yá loo, ag tɛ́ɛ milón voóm asɛ̄ la nyɛ́ ɔ cámánɛ́ nyíŋ pɔ́l, nyaa nyí lɛ nɛ́ Yésus a ŋgí la ɓé pɛ li níŋgi á tísɔn á miíh mí límut; ɔ ɓōtlé ja li tɔɓene á ápūū, wóŋ á liɛ́g. Ɓot bí ŋgí sɔ́le bipah bísɛ á li ɛ́n lí nyɛ.

Currently Selected:

Málkus 1: NTB

Highlight

Copy