Yohánɛs 19

1Ámbúh náŋ, Piláto ɔ kɛ́la Yésus, la nyɛ́ ɔ ɓɔ̄ŋ nɛ bí lɔ́g nyɛ́ áso. 2Sónja ɛ́ óŋóó ɔ́tot ví ŋkɔɔ á bilɔ, yú jáhɛ́ vɔ Yésus á m̀mú, yú jáhɛ́ ki nyɛ́ evɛɛ́vɛ́ɛ mbɔ́tí ɛ́ káísa. 3Bí ŋgí siŋgle nyɛ́ ɓɛɓɛ bíg laga nyɛ́ nɛ́: «Biíg tama wa, á káísa nyí Elōg-Yúda!» Ámbúh náŋ, bú ɓōtlé nyɛ li ɓom. 4La Piláto ɔ tímān á ápūū, ɔ lága ɓákanʼyɛ bí Élōg-Yúda nɛ́: «Léɓyán, mag óm ɓɛ́nɛ nyɛ́ á ápūū: miníg nyɛɛ hɔ́ lí yí nɛ́ māh sɔm ɓé ma nyɛ́ la njɔm tɔ ya.» 5Váŋ hɔ́ nɛ́ Yésus a pám á ápūū, a jáhɛ ɔtot ví bílɔ la evɛɛ́vɛ́ɛ mbɔ́tí ɛ́ káísa. Piláto aá la ɓɔ́ nɛ́: «Mut waná nyɔ́!» 6Ndí, ɛnɛ́ ɓakanʼyɛ ɓatíi-nsúlé la ɓot ɓáɓá ɓá ɛ́n Yésus, bú ɓōtlé lí lón nɛ́: «Tomó nyɛ́ á mbásá! Tomó nyɛ́ á mbásá!» Piláto aá la ɓɔ́ nɛ́: «Nyɔŋán nyɛ́ ɓɛ́nɛ-mɛ̄n, miní tōmó nyɛ́ á mbásá. Ndí ma, māh sɔm ɓé ma nyɛ́ la njɔm tɔ ya.»

7Ɓakanʼyɛ bí Élōg-Yúda bú tímānɛ̄ nyɛ nɛ́: «Bi byɛ́ɛ́ litiŋ lí mbéndá já, li oŋle la jɔ́, ag nyɛɛ li wú, átɔm nɛ́ a kātɓán nɛ a lɛ̄ Mɔ́ɔ̄n Ɔ́lolómɛ̄!» 8Eceg Piláto a ámblé bíŋ biɓaŋgá, ɔ kɔ̄n woŋ ŋgandag. 9Ɛnɛ́ a níŋgí á ndáá likanʼyɛ, ɔ bíhī Yésus nɛ́: «Ɔg sɔ́léne véé é?» Ndí, Yésus ɔ níí nyɛ. 10Piláto ɔ bíhī hɔ́ nyɛ nɛ́: «Ma nɛ́ ɔ ŋgɔ níi é? Ɔ ŋgɔ́ yí ɓé nɛ mi byɛ́ɛ́ ŋguu nyí li mwahɛ lí wa tɔ nyí li óm nɛ́ bí tōmó wa á mbásá é?» 11Váŋ nɛ́ Yésus a pélē nyɛ nɛ́: «Ɔh byɛ́ɛ́ ɓé ŋguu li ɓɔŋ lí ma tɔ jam, kíyáɓɛ́nɛ yáh sɔ́léné ɓé wa á lóō. Jɔ́ nɛ́ mut a núŋu ma á mɔ mɔ́ɔ, a ɓɔ̄ŋ áɓē wá loó ɛwɔ́ɔ.» 12Ɛnɛ́ Piláto a ámblé náŋ, ɔ sómo nyɛ́ li mwahɛ nɛ́ a kɛ́nɛ́g, ndí ɓakanʼyɛ bí Élōg-Yúda bú ɓōtlé lí lón, bíg laga nɛ́: «Kíyáɓɛ́nɛ wá mwáhɛ́ nyɛ, ɛnɛ wāh wɛɛ ɓé pɛ kaa liwándá lí káísa ecɛ́ŋ! Átɔm nɛ́ tɔ nzáá a ŋga kātɓan nɛ́ a lɛ káísa, ɛnɛ ag tɛ́ŋgánɛ káísa ecɛ́ŋ.»

13Ɛnɛ́ Piláto a ámblé bíŋ biɓaŋgá, ɔ ɓɔ̄ŋ nɛ bí pámɛ́ Yésus á ápūū, bú tɔ́ɔyɛ́ nyɛ́ á étɔɓé yé ŋ̀kááhɛ, á líɓɛpɛ́ lí ŋgɔg lí ndáá-bikááhɛ́nɛ́ bí ŋga yáŋa la mpɔ́t á Élōg-Hébɛl nɛ́ Gabáta. 14Náŋ a ɓɛ́ɛ́ mam mí kɔsi, á ɔlɔ́ ví m̀ɓoŋhanɛ́ á ŋgand Páska. Piláto ɔ yó ɓɔ́ɔ̄n bí Élōg-Yúda nɛ́: «Káísa yaná nyí!» 15Ndí, ɓɔ́ bú ɓōtlé ja li lón nɛ́: «A nyɛ́ɛ lí wú! A nyɛ́ɛ lí wú! Tomó nyɛ́ á mbásá!» Piláto ɔ bíhī sīg-pɛ ɓɔ́ nɛ́: «Ɓaá, mi tómó káísa yaná á mbásá é?» Ɓakanʼyɛ ɓatíi-nsúlé bú pélē nyɛ nɛ́: «Bih byɛ́ɛ́ ɓé ɓɛ́hɛ káísa etám amáh sig káísa ecɛ́ŋ.» 16Váŋ hɔ́ nɛ Piláto a mwáhlé ɓɔ Yésus nɛ́ bí tōmó nyɛ́ á mbásá.

Yésus ag tomlɛ á mbásá

(Mat 27.32-44; Mlk 15.21-32; Lúk 23.26-43)

Váŋ hɔ́ nɛ ɓá byeé Yésus. 17A ɓɛ́ɛ́ a ɓɛ́gɛ mbásá yɛ́ɛ̄ nyɛ́-mɛ̄n, ɔ pám á tísɔn li kɛ á voóm a ŋga yáŋlɛ nɛ́ Evóghó m̀mú, náŋ a lɛ la mpɔ́t á Élōg-Hébɛl nɛ́ Golgóta. 18Váŋ á nyɔ́ŋ voóm nɛ́ bí tōmléé nyɛ́ á mbásá elɔŋ la ɓot bíɓáa ɓatám; wa á yé epah, nyɔ́ŋɔ́ ki á yéŋé, Yésus ɔ ɓɛ́ á m̀mím. 19Piláto ɔ cíi á puh eɓám, ɔ cɛ́ɛ yɔ á lóō lí mbásá, ɔ cíi muŋ nɛ́: «Yésus nyɔ́ a Názalɛt, káísa nyí Elōg-Yúda.» 20Ŋgandag ɓɔ́ɔ̄n bí Élōg-Yúda yú sɔ́ŋgɔ́ míŋ micila, átɔm nɛ́ voóm bí tōmléé Yésus á mbásá a ɓɛ́ɛ́ ɓɛɓɛ la tísɔn, la ki nɛ́ bíŋ biɓaŋgá bí cíiɓɛ́ɛ la mpɔ́t á Élōg-Hébɛl, la mpɔ́t á Latánis, ndí la mpɔ́t á Gelékia ki. 21Ɓakanʼyɛ ɓatíi-nsúlé bí Élōg-Yúda bú laga Piláto nɛ́: «Ɔh ciíg ɓé nɛ ‹káísa nyí Elōg-Yúda›, ndí cií m̀ɓɛɛŋ nɛ́ ‹nyɔ́ mut a katɓan nɛ́ a lɛ káísa nyí Elōg-Yúda›.» 22Piláto aá la ɓɔ́ nɛ́: «Ma man lí cii lí yé ma cíi.»

23Ɛnɛ́ sónja yá súgɛ́ lí tomo lí Yésus á mbásá, yú kaán mbɔ́tí yɛ́ɛ́ moga mínaa, mut sig ɔ nyɔ̄ŋ joga já. Ntumb á ébuɓá a ŋgí kómɓan á lóō nɛ wú yégle: yéŋ ebuɓá ɛ́ ɓɛ́ɛ́ ŋgíla mbaŋgó, ɛ ɓɛ́ɛ́ épah líɓato yá, ŋóŋɓɛ́gɛ li ɓotle á lóō li pám á sí. 24La sónja yú laglán nɛ: «Bih wáhág ɓé ɓɛ́hɛ yɔ́, bi lɛ́ŋgɛ́ ja mbam á lí yí lí nzáá a ŋga nyɔ̄ŋ yɔ́.» Náŋ nɛ́, Licii-Lipúán lí ŋga yál, jé lí ŋga lága nɛ́: Ɓá kaán mbɔ́tí yáma, bú lɛ̄ŋgɛ́ ki mbam á li yí lí nzáá a ŋga nyɔ̄ŋ ntumb wáma á ebuɓá. Náŋ ki nɛ́ sónja ɛ́ ɓɔŋɔ́ɔ́.

25Nyaŋɛ́ á Yésus, mɔɔ́nyāŋ á nyaŋɛ́ nyɔ́ a mindígá, Malía ŋ̀gáá Kolópas la Malía nyɔ́ a Magdála nɛ́ bí ɓɛ́ɛ́ bí tɛ́ɛ́ ɓɛɓɛ la mbásá Yésus. 26Ɛnɛ́ Yésus a ɛ́n nyaŋɛ́ a tɛ́ɛ, ŋ̀yége ki a ŋgí diŋ a tɛ́ɛ nyɛ́ á ŋgwáāg, ɔ lagá nyaŋɛ́ nɛ: «Á míndīgá, mɔɔ́n wɔ́ɔ nyɔ́!» 27Ámbúh náŋ, ɔ lága nyɔ́ŋ ŋ̀yége nɛ́: «Nyɔŋɛ́ nyɔ́!» Li ɓotle váŋ nɛ́, nyɔ́ŋ ŋ̀yége a nyɔŋɔ́ɔ́ Mālía á yóg yɛ́ɛ̄.

(Mat 27.45-56; Mlk 15.33-41; Lúk 23.44-49)

28Ámbúh náŋ, Ɛnɛ́ Yésus a yí nɛ mam mísɛ má súg, á lí ɓɔŋ nɛ́ Licii-Lipúán jɔ́ lísɛ lí yāl, ɔ lága nɛ: «Evéhé ɛ́ byɛ́ɛ́ ma.» 29Elógá ɛ́ ɓɛ́ɛ́ váŋ, ŋyálāg la eɓámhá-wáany, bú dúū jom lí mbɔɔkɛ átē, bú pagyɛ́ jɔ á lísūg lí mɔɔ́n líkāā bí ŋga yáŋa nɛ́ isópa, la ɓɔ́ bú siŋglɛ́ jɔ Yésus á ányu. 30Ɛnɛ́ a nyú éɓāmhá-wáany, ɔ yó nɛ: «Mɔ́mísɛ má yál!» La nyɛ́ ɔ ɛ́ŋʼyɛ́ m̀mú, ɔ páte.

Bíg túú m̀bim á Yésus mbaa

31Kasig náŋ a lolóó á ɔlɔ́ ví m̀ɓoŋhanɛ́ á ŋgand nyí Elōg-Yúda, nyí ɛ sóŋháán la ɔlɔ́ ví évɛɛɓan váɓá, víŋ ɔlɔ́ ví évɛɛɓan ví ɓɛ́ɛ́ tóɓó-tóɓó m̀bya ǹcɛ́ŋ. Bí ŋgí nyɛɛ hɔ́ ɓé lí mwahɛ lí mimbim á lóō lí mbásá. Ákaa Elōg-Yúda ɛ́ ŋgí kɔn woŋ nɛ́ mimbim mí tɔ́ɔ̄ á lóō lí mbásá múŋ á víŋ ɔlɔ́, bú ɓāt hɔ́ Piláto nɛ́ bí búg míkoo mí ɓot ɓá tomó á mbásá, tɔ bíg ɓógtɛ mimbim máɓá. 32Váŋ nɛ́ sónja yá sɔ́, yú búg míkoo mí ntɔnɓa ɔ́sū la mí mí ntɔnɓa wá yáhɛ́ míɓáa, mí mitɔnɓa mí tōmlɛ́ɛ á mbásá á ŋgwáāg Yésus. 33Ɛnɛ́ yá kɔlán á eceg Yésus, kasig bí ɛ́nɛ́ɛ́ nɛ́ a wú, bíh búgúu ɓé pɛ nyɛ́ míkoo. 34Ndí sónja ya, yu túú nyɛ mbaa la likɔŋ, á ékūyá-kúyá, micii la mindím bú pám. 35Mut a ɛ́nɛ́ɛ́ míŋ mam nɛ́ a tí mbóŋ, mbóŋ yɛ́ɛ̄ a ŋga tíi ɛ lɛ mbálɛ. Jɔ́ nɛ́, nyɔ́ŋ mut ag yí nɛ́ a pɔ́t mbálɛ, á lí ɓɔŋ nɛ́ ɓɛ́nɛ ki miní yéɓé. 36La mbálɛ, náŋ a ɓɔ̄ŋɓɛ á lí somo nɛ́ Licii-Lipúán lí yāl, jé lí ŋga lága nɛ́: «Eveh yɛ́ɛ́ tɔ yá ɛ́ ŋgá kɛ ɓé lí búgɓɛ.» 37Epah Lícii-Lipúán etám yɔ́g ɛ́g lága nɛ́: «Bíg kɛ li ɛ́n lí nyɔ́ ɓá túú mbaa.»

Mije mí Yésus

(Mat 27.57-61; Mlk 15.42-47; Lúk 23.50-56)

38Ámbúh míŋ mam mísɛ, Yósɛp mut a tísɔn nyí Alimatéa, kasig a ɓɛ́ɛ́ ŋ̀yége á Yésus á nsɔlɓɛ́, ányúū nɛ a ŋgí kɔn ɓakanʼyɛ bí Élōg-Yúda woŋ, ɔ ɓāt Piláto kundɛ li ɓógtɛ lí m̀bim á Yésus á mbásá. Piláto ɔ yéɓe, la Yósɛp ɔ nyɔ̄ŋ m̀bim á Yésus. 39Nikodɛ̄m, mut a ɓɛ́ɛ́ lí ɛ́n lí Yésus díɓe la díɓe nyɛ́g ɔ sɔ́. A sɔ́ɔ́la jam-kaa muúmíŋháa mí kílo mí m̀byáŋtānɛ́ a ŋ̀gɔ́gɔ a biɓɛɓɛ́la bí ŋga yáŋa nɛ́ míla la alóɛs. 40Yósɛp la Nikodɛ̄m bú nyɔŋ hɔ́ m̀bim á Yésus, bú ɔ́gɛ́ wɔ miŋgɔ́gɔ mí bínumba, bú vúlké wɔ́ á mbɔ́ŋ, li oŋle kaa Elōg-Yúda bí ŋga jé mimbim máɓá. 41Ǹdíí á bíɓɛɓɛ́la a ɓɛ́ɛ́ váŋ ápah bí tōmléé Yésus á mbásá. Ŋkánág á sɔŋ ápah bí ɓɛ́ɛ́ ŋgí lí jé lí tɔ mut wɔ́g á ɓɛ́ɛ́ múŋ á nyúŋ ǹdíí á biɓɛɓɛ́la. 42Kasig náŋ a ɓɛ́ɛ́ ɔlɔ́ ví m̀ɓoŋhanɛ́ a ŋgand nyí Elōg-Yúda, la ki nɛ́ nyíŋ sɔŋ ɛ ɓɛ́ɛ́ ɓɛɓɛ váŋ, náŋ ɔ yíglé Yósɛp la Nikodɛ̄m nɛ́ bí je m̀bim á Yésus átē.

Currently Selected:

Yohánɛs 19: NTB

Highlight

Copy