E Levi 3
3
A Nihabi na Nivalemu Turana Vure
1E BAKOVI DAGI i taki tabua e Moses, “A bakovi bara i habi a nihabi na nivalemu lakea ne BAKOVI DAGI, ge bolea a bulmakau a toga o a bulmakau a kinana ge gavutuvutu, ge habia ne BAKOVI DAGI. 2Ra bakovi iea ge ru langea na gina bulmakau a limana, muri ge rabalakia a bulmakau na matana Kape na Vaponga. E huriki a prister, re huriki e tune Aron, ri gi voro tamali a darana bulmakau na tabeke lobo na dede. 3-4Ra bakovi iea ge bole tala na nihabi na nivalemu maka vina i kavitagu a mahalana bulmakau, a maka vina pololilo na mahalana bulmakau, turana a vuanalipi i rua, turana a vina i rako taho rua, a kinake tara ni riri tala turana a vuanalipi. Ge habi na prister, ge gutu na kanono, ge a nihabi ne BAKOVI DAGI. 5E huriki e tune Aron ri gi gutu na dede a maki nga turana maka nihabi ni gutu-vuro i tabuli na kanono, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.
6“A bakovi bara i habia a tuna sipsip o a meme ge a nihabi na nivalemu lakea ne BAKOVI DAGI, ge bolea a toga o a kinana, ge gavutuvutu. 7Na tahuna i habia a tuna sipsip ge a nihabi, ge rua na matane BAKOVI DAGI. 8Ra bakovi iea ge ru langea a limana na gina sipsip, muri ge rabalakia a sipsip na matana Kape na Vaponga. Muri e huriki e tune Aron, ri gi voro tamali a darana sipsip na tabeke lobo na dede. 9Muri ge bole tala na nihabi na nivalemu a tabekena sipsip ni gi gutu, ge a nihabi ni gutu na kanono ne BAKOVI DAGI. Ge bole a maka vina, a vina i kavitagu a mahalana, a vina na mahalana, a vina na kuna. A kuna sipsip ni gi pala tala tabukoi liu na tuha burena. 10Ge hali tala a vuanalipi i rua turana a vina i rako taho rua, a kinake tara ni riri tala turana a vuanalipi. 11A prister ge gutu langa na dede a maki nga ge a kinani, ge a nihabi ni gutu na kanono ne BAKOVI DAGI.
12“Na tahuna a bakovi ge habi a meme ge a nihabi, ge bole lakea na matane BAKOVI DAGI. 13Ra bakovi iea ge ru langea na gina meme a limana, muri ge rabalakia a meme na matana Kape na Vaponga. Muri e huriki e tune Aron, ri gi voro tamali a darana meme na tabeke lobo na dede. 14Na nihabi iea, a bakovi ge habi a nihabi ni gutu na kanono ne BAKOVI DAGI: ge bole tala a vina i kavitagu a mahalana meme, a maka vina pololilo na mahalana, 15turana a vuanalipi i rua turana a vina i rako taho rua, a kinake tara ni riri tala turana a vuanalipi. 16A prister ge gutu a maki nga na dede ge a kinani, ge a nihabi ni gutu na kanono, i manginoro a mangina. A vina nga ne vona e BAKOVI DAGI.
17“Ra vinara iea ge tabuli turana a hamone mua vakaroro. I vai a tabeke mu made vona, bara mu ramai kunanea: Naha ni kani a vina kanirau o mu gu ninu a darana.”
Currently Selected:
E Levi 3: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.