A Vuhuna 8
8
A Marungulolo i Hoho Puru
1Pali a Vure, i uka ma i longokaburungi e Noa turana a maka kanirau, a sipsip a bulmakau ra ri kapiloho na agarungu. I rudua a vilu i ngalu langa vona a dari, lakea a dari i hoho puru. 2Ngane a Vure i tukari a maka matana naru na bobona malala a hunu, lakea a vala i lobo na niboru valai meli na hunu. 3Pali a naru i vakatubu ni hoho puru na malala. Muri na parava i 150 a naru i hoho puru lobo. 4Na parava i ravulu a polona i polorua, na poloruana keva, a agarungu i koro na mapana lolo e Ararat. 5A dari i hoho puru, lakea na mugana parava na ravuluna keva i lele a maka mapana lolo. 6I lobo a parava i ravulu va, lakea e Noa i talea a matatalana agarungu, 7i vakabebe talea a kokoa, i bebe lae polovavo, i davea a dari ge hoho puru. 8Muri i vakabebe talea a balu ge kasisia a dari i hoho puru pali, o i tabana. 9A balu i uka ma i puruvisi a hini ge toka vona, a vuhuna a naru i tabana ni kavitagua a malala, lakea i bebe mule ne Noa na agarungu. E Noa i toto tala a limana i bole dilia a balu. 10I dava na parava i polorua tabu na agarungu, muri i vakabebe tabua a balu. 11Na tahuna a balu i hamule na malunga, i gogoa a pagana kai a oliv i karaputu karabea. Ngane e Noa i lohoka a dari i hoho puru pali. 12I dava tabu na parava i polorua, muri i vakabebe tabua a balu, pali na tahuna iea a balu i uka ma i hamule.
13Na tahuna e Noa i tahoka a pida i 601, na mugana parava na mugana keva, a naru i hoho puru liu na malala. I kalipidea a hini polomeli na agarungu, i masia a malala i kere. 14Na parava i ravulu rua a polona i polorua (27) na ruana keva, a malala i kere liu. 15Muri a Vure i takia e Noa, 16“Ioe, turana e girihimu, e tumu mai turana e girihine tou, mu pagitala na agarungu. 17O vakalaho tala a maka maki mahuri takutaku, ra ri turamu. A maka kadirovo, a maka kanirau, a maka maki lobo ri karaka na robo, ri gi poda kupo na malala, ri gi vole, ri gi vakavonu a malala, a kabune ria.” 18Muri e Noa i pagitala, turana e girihina, e tuna mai, turana e girihine tou. 19A maka kanirau, a maki lobo ri laho na robo, a kadirovo lobo, a maki legelege lobo ri mahuri na malala ri laho na tete, ri pagitala na agarungu. 20Muri e Noa i kisia a dede-kedo ne BAKOVI DAGI, i bole ranga kanirau kabakaba, a kadirovo kabakaba, i rabalaki i gutu-vuro ria i habi ne Bakovi Dagi. 21Na tahuna e BAKOVI DAGI i burongi a mangina maki nga i huli lakea vona, lakea i taki mulea, “Iau i uka ma ga ruduraha tabua a malala ne vona ni koli a naro hale ne huriki. I muholi a naro hale ne ria i vakatubu na tahuna ri kiroko vona. Pali ngane, i uka ma ga ratapile tabu a maka maki mahuri, ge manga a hini a rata pali.
22“A malala bara i tahoka a parava, a rodo,
a tahuna ni varo a hania, a tahuna ni mirio a hania,
a tahuna na malangia, a tahuna ni kakarongo,
a tahuna na haro, a tahuna na vala.
A maka tahuna nga i uka ma ge lobo, bara ri tabuli vakaroro na malala.”
Currently Selected:
A Vuhuna 8: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.
