Kolosi 4

1 # Epe 6:9 Mua e huriki a tahona vora, mua ranga, mu rata a naro kamumu ne huriki a vora, a vuhuna mu lohoka vona, mua ranga mu tahoka a Tahone mua i made na hunu.

A Naro na Nivasileki

2 # Epe 6:18; Pili 4:6 Mu vasileki vakaroro, naha ni malo. Na tahuna mu vasileki, mu matadoko, mu kavurikea a Vure. 3#Rom 15:30; Epe 6:19Mu vasileki na Vure ge tuhori maria, ge kado a dala ne maria, miri gi vakalongo tabu a nita kapiloho ne Kristo. Ngane a made na bavi, a vuhuna a vakalongo e huriki na nita iea. 4Mu vasileki nau ga tovo kavakava e huriki vona ra ngava iea, i manga a hini a Vure i ngaru ga rata. 5#Epe 5:15-16Mu luhoi kamumu, mu rata a naro malamala ne huriki i uka ma ri luhoi torea e Isu Kristo. Na tahuna mu made turane ria, mu taki kunana a maki ne Kristo. 6#Epe 4:29; 1Pe 3:15Mu ta kamumu mai ria, mu tuveve kamumu ria vona a nita muholi. Na tahuna ri nana mua, mu koli kamumu a ninana ne ria.

E Paulus i Rudu e Tikikus e Onesimus

7 # Epe 6:21 E Tikikus bara i vakalongo mua vona iau a made navai. A ngaru hatekea. I rata kamumu a leho lobo e Bakovi Dagi i habia vona, miri leho palupu ne Bakovi Dagi. 8#Epe 6:22A rudu lakenea, ge vakalongo mua vona a leho miri rata koea, ge vakatora a niluhoi ne mua. 9#Pmn 10-12A bakovi na tanga ne mua, e Onesimus, ia tara a rudua ge turane Tikikus. E Onesimus i luhoi torea e Bakovi Dagi, miri ngaru hatekea. Rua varago ru gu vakalongo mua vona a maka maki i bele koea.

E Paulus i Talo e Huriki

10 # Apo 12:12; 13:13; 15:37-39; 2Tim 4:11 E Aristakus i dili turagu na bavi koea, i talo rike a haro kamumu ne mua. E Markus, e tarine Barnabas, ia tara i talo rike ne mua. Hosi a vakalongo mua vona e Markus. Na tahuna ge bele iene, mu tagui ia. 11A bakovi ni gale e Isu, a rana kalale vona e Iustus, ia tara i talo rike a haro kamumu ne mua. Ra bakovi nga, tou kunana a bakovi o Israel, to leho turagu koea ni tovo e huriki na nitana Vure. To vakatora a niluhoi nau.

12 # Kol 1:7; Pmn 23-24 E Epapras ia a bakovi na tanga ne mua, a vora ne Isu Kristo, ia tara i talo mua. I vasileki hateka vakaroro ne mua mu gu pesi tora na ningaru lobo na Vure, mu gu gao ni ramai a Vure, mu gu longo mai a ngavana Vure. 13Iau a taki mua, i leho hateka ni kori mua turane huriki ri made na vuhutanga e Laodisia, e Hirapolis. 14E Lukas, ra dokta si ngaru hatekea, turane Demas rua ranga ru talo rike a haro kamumu ne mua.

15A ngaru mu gu habi a nitalo nau ne huriki a tara na Vure o Laodisia. A haro kamumu na ngatavine e Nimpa, turana e huriki a tara ri vapopo na ruma vona. 16Na tahuna mu gi loboa a raukea iea, mu vakaru lakea ne huriki a tara o Laodisia, ria ranga ri gi gia. Pali ra raukea tara a vakaru lakea o Laodisia, ia tara mu bolea mu gia.

17 # Pmn 2 Mu takia e Arkipus mu ta maea, “Ra leho o bolea ne Bakovi Dagi, o leho kamumu vona o vakaloboa.”

18 # 1Ko 16:21 Iau e Paulus a herea na limagu a ngava nitalo nga, a talo rike a haro kamumu ne mua lobo. Mu luhoi iau, a tabana na nimade na bavi. A Vure ge rata a naro kamumu ne mua.

Currently Selected:

Kolosi 4: bnp

Highlight

Copy