Kolosi 3

Si Mahuri Mule Pali Turane Kristo

1 # Sng 110:1; Mrk 12:36; 16:19; Epe 1:20 A Vure i vakamahuri mua pali turane Kristo. I mavonga, mu luhoi kunana a maki na hunu. E Kristo i made vonga na limana kanena Vure. 2#Mat 6:33Naha ni luhoi a maki na malala, mu luhoi kunana a maki na hunu. 3Mu luhoi a maki na hunu, a vuhuna mu mate pali, mu kapiloho turane Kristo pololilo na Vure. 4E Kristo i rata hita si mahuri. Na tahuna ge valai tabu, bara mu pesi turana na bagetuanga vona.

5 # Rom 6:6,11; Epe 4:19; 5:3-6 Lakea ngane, mu vakalobo liu a maka naro hale na malala i tabuli na hatene mua. Naha ni rata a rabu na molenga, naha ni gaodeko, naha ni ngutu na bakovi o a ngatavine tara. Naha ni ngutu na maki na viri tara. A viri i ngutu na maki na viri tara i manga kunana i kavurike a vure tebi. 6A naro hale nga kunana ri vakabele a rongova dagi na Vure. 7Hosi mu ramai a maka ningaru hale nga. 8#Epe 4:25-29; 5:4Pali ngane naha ni rata tabu a maka naro hale nga: naha ni hinihate, naha ni mata robo, naha ni marikoi a viri, naha ni padimomo, naha ni harogi a viri, 9#Epe 4:22,25naha ni tami e huriki a turane mua. Naha ni rata tabu a maka vilo nga, a vuhuna mu pe pali a naro hosi, 10#Epe 4:24mu bole pali a vilo karaba. Ra vilo karaba a Vure i ratarikea, i rata karabea vakaroro, ge manga a vilona, lakea bara mu lohoka muholi na Vure. 11#Gal 3:28Na matana Vure e huriki a Iuda, e huriki i uka ma ria a Iuda, e huriki ni pala a kuline ria, e huriki i uka ma ni pala a kuline ria, e huriki a bakovi na robo, e huriki a vora, e huriki i uka ma ria a vora, ria lobo ri palupulupu na matana Vure. E Kristo ia a maki lobo, i made pololilo ne huriki ri luhoi torea.

12 # 1Pe 2:9 A Vure i vulaki mua pali, ge mua e huriki a tara vona, i ngaru hateka mua. Lakea ngane mu dodo e huriki ri tahoka a maregoa, mu tuhori ria. Naha ni kavurike mule mua, mu vakakiroko mua, mu made madoru turane huriki a turane mua. Mu hatenono, naha ni hinihate. 13#Epe 4:2,32Mu made kamumu turana e huriki lobo, mu lohopile a naro hale ri rata virihi mua vona. I manga kunana e Bakovi Dagi i puga vuroki a naro hale ne mua, mua ranga mu lohopile a naro hale ni rata virihi mua vona. 14#Rom 13:8-10Mu ngaru e huriki a turane mua. Ra naro ni vangaru i rangi a naro lobo, i rata e huriki ri vamade palupu.

15 # 1Ko 12:27; Epe 4:4; Pili 4:7 A nivalemu ne Kristo ge matakari a niluhoi ne mua, ge ratea a niluhoi ne mua ge kamumu, a vuhuna a Vure i vulaki mua mu gu made palupu na nivalemu i manga a kabu i taku. Mu kavurike vakaroroa a Vure. 16#Epe 5:19Mu bolea a nitane Kristo ge tabuli kamumu pololilo na hatene mua. Mua takutaku mu tovo mu habi a niluhoi kamumu ne huriki a turane mua. Mu kalolo a maka linge na lotu, a linge vasileki, mu kavurikea a Vure. 17#1Ko 10:31; Epe 5:20A ra maki mu taki, a ra maki mu rata, mu rata na rane Isu a Bakovi Dagi, mu kavurikea a Vure e Tamane hita.

18 # Epe 5:22 Mua o huriki a ngatavine, mu longototo e girihine mua. A naro iea i malamala na matane Bakovi Dagi.

19 # Epe 5:25 Mua o huriki a bakovi, naha ni rata hale e girihine mua. Mu ngaru ria.

20 # Epe 6:1 Mua o huriki a koma mu longototo e tamane mua e kinane mua, a vuhuna e Bakovi Dagi i vivi vona a naro iea.

21 # Epe 6:4 Mua o huriki a tamana koma, naha ni tahate vakaroro e huriki e tune mua. Bara mu tahate vakaroro ria, bara i madihi a hatene ria, ri rihate.

22 # Epe 6:5-8 Mua o huriki a vora, mu longototo a ngavane huriki a bakovi dagi ne mua koea na malala. Naha ni leho kunana na tahuna ri pesi tabukoi ne mua. Naha ni leho ni gi bibi rike a rane mua. Mu leho kamumu a vuhuna mu ngaru ni togo a Vure. 23A ra leho mu rata, mu rata na hatene mua. Naha ni leho manga mu rata a leho na bakovi kunana. Mu leho manga mu rata a leho ne Bakovi Dagi, 24a vuhuna mu lohoka vona, muri ma e Kristo a Bakovi Dagi bara i kona kamumu mua. Bara mu bolea ra mapa i ta muholi vona ge habi ne huriki a tara vona. E Kristo kunana a viri mu vora vona. 25#Rom 2:11Mu longo kamumu. A viri i rata a naro hale, a Vure bara i vakamadihia na naro hale i ratea. A Vure i pelekado a narone huriki lobo na naro i taku kunana.

Currently Selected:

Kolosi 3: bnp

Highlight

Copy