Luka 6
6
Nikoho na dda nllapo na Sabata
(Mat 12.1-8; Mrk 2.23-28)
1 #
Deu 23.25
Nllapo nimodda na Sabata Yesu ni oohudderaaye yaheeta variyari va emata ddimodda dda tirigu. Oohudderaaye yahaamba okhoddolla makalla a tirigu, enatikitha ni mattiiwa nave enamucha tirigooyo. 2Nave Afarisi* amodda, yahaakoha oohudderaalle wi, “Kaambiiwa tini muneereenyu ddoohaakhullelliwa ni malamulwaahu voopharani mutteko va nllapo na Sabata vookhoddollani makalla a tirigu?”
3Yesu ahaakhulla wi, “Khamweerengille nnddo Davide enreeye enthawi yeelle olliyooyo ni akhwaaye yavolliwiiwa ettalla? 4#Lev 24.9#1 Sam 21.1-6Davide aavollowa mu enyumba ya Mulluku, amuchamo buledi oovelleelliwa wa Mulluku naari malamulo kheyaakhullelle wi olliyooyo amuche. Allupa mukuthove sika enaakhullelliwa omuchamo buledi yoolla. Nave ahaavahattho akhwaaye.”
5Yesu aamallihella ni ollota wi, “Mi Mwaana a Muthu sika kiri mwaneena a nllapo na Sabata.”
Muthu a nnatta noorakalla
(Mat 12.9-14; Mrk 3.1-6)
6Va nllapo na Sabata nimodda Yesu aavollowa mu enyumba yamavekello aahuddiha. Muthu a nnattanatta noorakalla aarittho mwemmo. 7Ahuddihi a malamulo* amodda ni Afarisi amodda yaamweetellella Yesu wi yoone eeki amuchirihe muthooyo va nllapo na Sabata wi emphwanyelle yoomwiipella mullatu. 8Yesu aadduwella maganizwiiwa nave allota wa muthooyo wi, “Ngawa wiimelle wuno wi arive muthu awooneke.” Sika muthooyo aavenya iimella vaavo. 9Vano Yesu aallota wi, “Kinuukohani nyuwaano, malamulo enanaakhullella weera tini va nllapo na Sabata? Weera ddaphaama apaalle weera ddoonanara? Omvullusa muthu apaalle omwiipha?” 10Ahaaweha attheenaayo, vano aallota#6.10 aallota: apaalle aallota moosha murima. wa muthu oorakalla nnattoolle wi, “Okolla nnatta nawo.” Ahookolla nave naachirihiwa.
11Ahuddihi a malamulo ni Afarisi yaasha murima yaamba okambirana yawi emweerelle Yesu.
Yesu ahaatthoolla amurummwa khumi ni eelli
(Mat 10.1-4; Mrk 3.13-19)
12Nllapo nimodda Yesu aawella m'mwaangoni wi avekelle nave aakhallawo mahiiyu avekellaka wa Mulluku. 13Wasilliiwa, aawiithana oohudderaaye nave aatthoollavo khumi ni eelli, ayo aaromonlleeye wi amurummwa. 14Alla sika amurummwaayo: Simoni, (oyo Yesu amuvahilleeye nnddina nawi Petro) ni mwanamunne Andreya, Yakobo ni Yohane, Filipo* ni Bartolomeyu, 15Mateyu ni Tomasi, Yakobo mwaana a Alifeyu ni Simoni ooromolliwa Zelote,* 16Yudasi mwaana a Yakobo ni Yudasi Isikariyoti oyo amuvelleenlle Yesu.
Ohuddiha ni ochiriha wa Yesu
(Mat 4.23-25)
17Yesu akitthalleeye m'mwaangonimmo ni amurummwaayo, ahiimella muhito mwa mwaango ni mulloko muullupalli wa oohuddera. Mulloko muullupallittho wa athu oovenyera mu Yudeya mutthemwene ni o Yerusalemu ni mukhwipi mwa enyanja mmo mwaari mizinda dda Tiro ni Sidoni yaari vaavo. 18Yawiille wi emwiiwelle ni ochirihiwa ereta ddiwa. Athu ayo yahoosiwa ni minepa ddoonanara yaawattho nave yaachirihiwa. 19Athu attheene yaapaalla wi emuttannye vawi masiva yavenyera mwa olliyooyo yaanamuchiriha arive muthu.
Oodalisiwa ni ootulli
(Mat 5.1-12)
20Yesu ahaaweha oohudderaaye nave allota wi,
“Oodalisiwa tti nyuwaano muri oohoowa,
vawi munnahakallalla ni madaliso a omwene wa Mulluku.
21Oodalisiwa tti nyuwaano munavolliwa ettalla ollello,
vawi muneerovona.
Oodalisiwa tti nyuwaano muninlla ollello,
vawi muneerottheya.
22 #
1 Pet 4.14
“Oodalisiwa tti nyuwaano athu yawiitani, yuukhootani, yuullotellani epewe ni wuullotellani wi tti oonanara, ddittheddenennddo kaambiiwa muri oohuddera a miyaano Mwaana a Muthu. 23#2 Epi 36.16; Mit 7.52Hakallallani ddeko ddenndda ddaaweereyellakani nave mwiine ni ehakallallo kaambiiwa muneerothuviwa wuullupalli oddullu. Vawi makhollo a athu oonanaraayo yaheera ddimoddamoddave ddennddo wa anamallotella.”
24“Koma ootulli tti nyuwaano muri ni eyuuma,
vawi mohaakhella khalle yowuuhakallallihani.
25Ootulli tti nyuwaano murina yoocha ollello,
vawi muneerovolliwa ettalla.
Ootulli tti nyuwaano munattheya ollello,
vawi muneerewinlla ekutho ni omora miitthori.
26“Ootulli tti nyuwaano athu attheene yaallotaka ddaphaama dda nyuwaano vawi makhollwiiwa yaallota ddennddo wa anamallotella awoottha.
Dda waakonda adani
(Mat 5.38-48; 7.12a)
27“Koma kinuulleellani nyuwaano munakiiwa wi, akondeni adanaanyu, muweerelleke ddaphaama ayo enawiitani nyuwaano. 28Adaliseni ayo enuutembelelani nave mwaavekellelleke ayo enuuhoosani nyuwaano. 29Muthu awuukutha vanramani, omwinnyettho nimoddanno apaalle akusa yawiikhuneellaawo, ohinamuwatteellattho malayaawo. 30Muthu uuvekani ello mumvaheke. Nave muthu awaakhani ello, muhinamukohattho wi uuhokolloselleni. 31#Mat 7.12Muweerelleke athu amodda, nnddo munapaalleenyu wi eweerellekeni nyuwaano.
32“Mwaawaakondaka yaayove enuukondani, munaaweerelliwe echifundo kaambiiwa tini? Vawi naari oochimwa enaakonda ayo enaakonda. 33Nave mwaaweerellaka ddaphaama yaayove enaweerellani ddaphaama, munaaweerelliwe echifundo kaambiiwa tini? Vawi naari athu oochimwa eneera ddennddo. 34Nave mwaawaakongolihaka yaayove munaatiyereenyu wi yuuhokolloselleni, munaaweerelliwe echifundo kaambiiwa tini? Vawi naari oochimwa ennaakongolihattho oochimwa akhwiiwa wi yaahokolloselle yakongonleewannddo. 35Akondeni adanaanyu vooweerellani ddaphaama, kongolihani koma muhitiyere waakhella ello. Muneerothuviwa wuullupalli nave muneerokhalla anamwani a Mulluku muullupalli. Vawi tti aphaama wa athu oohithokoza ni oonanareene. 36Mukhalle a echifundo wonanko Attiitthaanyu ayo eri a echifundo.”
Dda oweeruza athu amodda
(Mat 7.1-5)
37“Muhiweeruzeke athu amodda nave Mulluku khaweeruzani, muhinawiipaka mullatu athu amodda nave Mulluku khawa awiipani, mwaakhululukelleke athu amodda nave Mulluku aneerewuukhululukellanittho. 38Avaheni athu amodda nave Mulluku aneerewuuvahani. Mulingo wooddalla, woochinyelleya phaama oneerohiyiwa m'mattani mwanyu. Vawi mulingo munaphariheenyu mutteko wa athu amodda, Mulluku aneeropharihattho mutteko yooyo wa nyuwaano.”
39 #
Mat 15.14
Nave Yesu ahaalleella niphwanaphwaniho nawi, “Muthu oohoona khanamuhoollella oohoona mukhwaaye vawi eneeromorihellana munllitini. 40#Mat 10.24,25; Yoh 13.16; 15.20Oohuddera khanamukhwaranya muhuddihaaye koma ahuddera amalliha, annaphwanaphwana ni muhuddihooyo.”
41“Onamoonella tini mwaneello m'mwiitthoni mwa mukhwaawo koma onahiya woona murinda ori m'mwiitthoni mwawo? 42Onawora ollota wa mukhwaawo wi, ‘Kinapaalla kimuvenyihemo mwaneello ari m'mwiitthoni mwawommo,’ weyaano ohinavenyihemo murinda ori m'mwiitthoni mwawo? Nyu awoottha! Mwaambe ovenyihamo murinda ori m'mwiitthoni mwanyu nave muneerowora woona phaama wi mumuvenyihemo mwaneello ari m'mwiitthoni mwa mukhwiinyu.”
Dda muteekho ni ezipaso ddiwa
(Mat 7.16-20; 12.33-35)
43“Muteekho wawunnuwa phaama khoniimma ezipaso ddoonanara navettho muteekho woonanara khoniimma ezipaso ddaphaama. 44#Mat 12.33Vawi orive muteekho onnadduwanyeya ni ezipaso ddiwa. Vawi namukuyu khanarukulliwa va miteekho ddamiiwa naari mpesa orukulliwa vamuteekhoni wa epullathi. 45#Mat 12.34Muthu aphaama anakhumiha ddeko ddaphaama ovenyera m'murimani mwaye koma muthu oonanara anakhumiha ddeko ddoonanara ovenyera m'murimani mwaye. Vawi eyano enallota ddeko ddiddanlle m'murimani mwa muthu.”
Dda athu eelli oomaka enyumba
(Mat 7.24-27)
46“Munakiithanella tini wi, ‘Apwiya, Apwiya,’ muheeraka kinalloteemi wa nyuwaano? 47Arive muthu anawa wa miyaano nave aniiwa mawaaka nave eeraka ddennddo, kineerowoonihani wi anaphwanaphwana ni tini. 48Anaphwanaphwana ni muthu oyo voomakani enyumbaaye, aakata moowallamella nave atthipella enyumbeeyo vanllukuni. Muhinje waaddalla ni maaddi, ephiya va enyumbeeyo nave kheyaatikheye kaambiiwa yaamakiwa phaama. 49Nave arive muthu aniiwa ni oheera mawaakaalla anaphwanaphwana ni muthu amakille enyumbaaye vamihavani, moohitthipella. Maaddi yaphiyalliiwa va enyumbeeyo, enthawi yeeyo yaakumuwavo nave okumuwanko waari wawoopiha!”
Currently Selected:
Luka 6: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
