Luka 24

Yesu anavenyihiwa wa ookhwa

(Mat 28.1-10; Mrk 16.1-8; Yoh 20.1-10)

1Ohinase wa Nllapo Namulungu atthiyana yaaya omahame, ekusalle makhura a nthuko naphaama yaakhozilliiwaalle. 2Yaphwanyille nlluku niphikirisiwewo khalle omullakoni wa mahamaayo. 3Vano yaavollowa koma kheyaaphwanyillemo mutembo wa Apwiya Yesooyo. 4Yahiimella ekhwille mullakallaka ni yeella nave moorurumusa allopwana eelli ewanre ddaweellesesa yahiimella vakhuviru ni alliwaayo. 5Atthiyanaayo yahoova nave yaaweha vatthi. Vano allopwanaayo yaallota wi, “Kaambiiwa tini munamwaasheenyu muthu mukumi variyari va ookhwa? 6#Mat 16.21; 17.22,23; 20.18,19; Mrk 8.31; 9.31; 10.33,34; Luk 9.22; 18.31-33Olliye khaamo mmu, oovenyihiwa wa ookhwa. Upuwellani nnddo uulleelleeyeni aariiye ni nyuwaano o Galileya wi, 7‘Miyaano Mwaana a Muthu kinaphwanella wi kivelleelliwe wa athu oochimwa, katthomeyiwe vamutandani nave vavira mallapo mararu kineerovenya wa ookhwa.’ ”

8Vano atthiyanaalle yahuupuwella mawaayaalle. 9Nave yaahokollowa ovenyera omahameni wulle nave yaaya yaalleella ddittheddene oohuddera khumi ni mmodda ni athu attheene. 10Atthiyanaayo yaari Mariya Magadalena, Yohana ni Mariya amennya a Yakobo. Alliwaalla ni atthiyana amodda yaallota ddeko ddittheddenenndda wa amurummwa. 11Koma amurummwaayo kheyaapharihalle mutteko mawaalla nave kheyaakhulupililalle atthiyanaayo. 12Naari ddaari ddiiddo, Petro aavenya athamakella o mahame wulle. Aphiyalleeye aawarama atthurumellamo nave oonillemo ekuwove nndde ddahuruwelliwena mutembo wa Yesoolle. Vano aahokollweella owaniwa attikhinaka ni ddeko ddeereyillennddo.#24.12: Ddoolemba ddimodda ddakhalle khaddinna evesi 12.

Ddooneye va ettilla yo Emawu

(Mrk 16.12-13)

13Nllapo nene nenno athu eelli ayo yamuthwara Yesu yaaya m'muzi wa Emawu, woorekamellana ni Yerusalemu wa makilomita khumi ni nimodda. 14Nave yaamakambirana ddeko ddittheddene ddeereyillennddo. 15Yakambiraniiwa, Yesu aawa awaatamella nave aathaananana. 16Yaamoona koma kheyaamudduwenlle. 17Yesu aallota wi, “Munatakhellana dda tini mweetaka?” Nave yahiimella, yooneyaka ookhumuwa. 18Mmoddooyo nnddina naye Keleopa, aamukoha wi, “Nyu tti mulleto yooyove mu Yerusalemummu ahinadduwella ddeko ddeereyille mallapo yaalla?”

19Yesu ahaakoha wi, “Ddawiidde?”

Yahaakhulla wi, “Ddeko ddeereyille wa Yesu a o Nazareti. Muthu yoolla aari namallotella nave mitteko ddaye ni mawaaye ddaari ddamasiva vamiitthoni va Mulluku ni athu attheene. 20Allupa mukutho uullupalli ni attekweenaahu yaamuvelleella wi iipiwe mullatu ni wiiphiwa nave yaamutthomeya vamutandani. 21Hiyaano natiyera wi tti olliyenooyo anaawoopolle Aisraele. Wawiddiidda, ollello tti nllapo naneeraru waambeella mvo ddeereyilliiwa ddenndda. 22Atthiyana amodda a mullokwaahu yaanittikhiniha. Yapehilliiwa ohinase oya omahame, 23kheyaaphwanyillemo mutembwaaye. Nave voowaani yallotille wi yaawoona angelo ayo yaalleelle ddawi olliyooyo okhallattho mukumi. 24Akhwiihu amodda yaayaawo omahamenko nave yaphwanyille moollikana ni mmo yallotille atthiyanaayo koma kheyaamoonille Yesooyo.”

25Vano Yesu aallota wi, “Athu ookarangeya nyu, mookhalla ni olesi voohikhulupililani ddittheddene yallotille anamallotella! 26Khaphwanenlle Mesiya* wi allakiwe ahinavollowe mu ntitimiho naye?” 27Nave Yesu ahaatthopoollella dda ddittheddene ddalembiwe mu mawu a Mulluku ddayeekha, waamba malamulo a Mose ophiyera ddoolembiwa dda anamallotella attheene.

28Yaatamelliiwa ophiyera m'muzi yayiiwammo, Yesu ahooniha wonanko aamakhwaranya. 29Koma alliwaayo yaamuwatihera wi, “Mukhalle ni hiyaano wuno vawi nndduwa nimmavollowa nave wohaamba khalle oripa.” Sika aavollowa akhalla ni alliwaayo. 30Akeraatthilleeye voochella wi achena, amukusa buledi, amudalisa, amumeyameya nave aavaha. 31Vano miitthwiiwa yaahulleya nave yaamudduwella koma enthawi yeeyo olliye ahaarimeella. 32Yaallota muthu ni mukhwaaye, “Naahakallalla alloteeye neetaka m'musewuni mulle anilleellaka dda mawu a Mulluku.”

33Enthawi yeeyo yaavenya ehokollweella o Yerusalemu, nko yaaphwanyilliiwa oohuddera khumi ni mmodda etthukumanne ni athu amodda. 34Oohudderaayo yaallota wi, “Ddawoona, Apwiya aavenyihiwa wa ookhwa! Simoni oowoona!”

35Eellaayo ni alliwattho yahaalleella ddeereyillennddo yeetiiwa m'musewuni nave ni wi yaamudduwella Yesu amumeyameyeeye buledi.

Yesu anooneya wa oohudderaaye

(Mat 28.16-20; Mrk 16.14-18; Yoh 20.19-23; Mit 1.6-8)

36Eellaayo yallootiiwa dda nnddo ddeereye, moorurumusa Yesu yeekha ahiimella variyari viwa allota wi, “Murendelle okhalle ni nyuwaano.”#24.36: Ddoolemba ddimodda ddakhalle khaddinna mawu awi allota wi, “Murendelle okhalle ni nyuwaano.”

37Nave yaarurumuwa enoova, yeesa enoona mutthowa. 38Nave allota wi, “Munoovella tini? Munahoowella tini ni makoho m'murimani mwanyu? 39Ngoonani m'mattani ni m'manyalloni mwaka nave moone wi tti miyaano. Kittannyeni nave moone vawi mutthowa khawinna muhehe ni makhuva wonanko kiriiminanndda mmu munakoonelleenyu.”

40Allotilleeye ddenndda aawooniha mattaaye ni manyallwaaye.#24.40: Ddoolemba ddimodda ddakhalle khaddinna evesi 40. 41Koma kheyaakhulupililalleseve ekaamba ya ohakallalla ni ottikhina, vano ahaakoha wi, “Mookhalla ni yawi muche?” 42Yaamuvaha ehomba yaawaarika. 43Ahaakhella ayicha yoonaka.

44Vano aallota wi, “Ddeko ddenndda kaallota khalle kaariimi ni nyuwaano wi ddittheddene ddalembiwe dda miyaano mu malamulo a Mose ni ehuddiho ya anamallotella ni Nibukhu na Masalimo, ddinaphwanella wi ddikwakhwanihiwe.”

45Vano aahulla miru ddiwa wi yiiwesese phaama mawu a Mulluku. 46Nave aallotattho wi, “Ddoolembiwa wi Mesiya anapaalleya wi allakiwe nave avenyettho wa ookhwa nllapo naneeraru. 47Nave mu nnddina naye ollalleyiwe othenga woorukunusa murima ni okhululukiwa wa machimo wa athu attheene, waambeella mu Yerusalemu. 48Nyuwaano sika amboni a ddeko ddenndda. 49#Mit 1.4Nave kineerewuurumihellani yalonjeziwe khalle ni Attiitthaaka. Nave mutiyereke m'muzindanimmu ophiyera mwaakhenlle masiva oovenyera oddullu.”

Yesu anawellihiwa oya oddullu

(Mrk 16.19-20; Mit 1.9-11)

50 # Mit 1.9-11 Yesu ahaahoollella oohudderaaye akhumana m'muzindanimmo aphiyana o Betaniya. Wenko aawelliha mattaaye aadalisa. 51Aadalisalleeye, ahaahiya, awellihiwa oya oddullu.#24.51: Ddoolemba ddimodda ddakhalle khaddinna mawu awi awellihiwa oya oddullu. 52Yaamullapella, ehokollweella o Yerusalemu, ehakallallaka wunchichi. 53Nave mallapo mattheene yaanatthukumana mu enyumba ya Mulluku, emutitimihaka Mulluku.

Currently Selected:

Luka 24: MW2019

Highlight

Copy