Luka 16

Niphwanaphwaniho na mullupa mutteko oohiroromelleya

1Yesu aallota wa oohudderaaye wi, “Waakhalla muthu mmodda eeyuuma oyo aari ni mullupa mutteko oowehera eyuumaaye. Mullupa muttekooyo aaphwanyelliwa mullatu wawi aanoononga makobiri a apwinnya, 2Sika apwinnyaayo yaamwiithana ellota wi, ‘Kiniiweeminndda dda weyaano tti ddawoona? Kitthopoollelle dda muttekwaawo muttheene va eyuumaaka vawi khovirellella okhalla mullupa muttekwaaka.’ 3Mullupa muttekoolle aallota m'murimani mwaye wi, ‘Apwiyaaka eneerokichosa mutteko. Kineere tini? Ngiwora ollima nave oveka onnakiwulliha muru. 4Vano koodduwella yawi keere wi mutteko wakimallella kikhallena akhwaaka ayo enaakaakhelle mu enyumba ddiwa.’

5“Vano aawiithana athu attheene yaari ni ekongoli wa apwinnyaalle. Aamukoha muthu awaamba wi, ‘Wakongolille ddikavi?’ 6Olliyooyo aamwaakhulla wi, ‘Mino dda makhura 100.’ Aamulleella muthooyo wi, ‘Kusa epepala vilembiwe ekongolaawo okeraatthi nave mwawaakuva olembevo 50.’ 7Aamukoha mmoddooyo wi, ‘Wakongolille ddikavi?’ Aamwaakhulla wi, ‘Mathumba a tirigu 100.’ Aamulleellattho wi, ‘Kusa epepala vilembiwe ekongolaawo nave olembevo mathumba 80.’

8“Voomallihella apwiya a mullupa mutteko oohiroromelleyooyo yaamuthokoza ekaamba ya weera ello moochenjera mwawi ddiidda. Athu a va ellapo yavatthi tti oochenjera vaweerellana ddeko ddiwa waakhwaranya athu ookhalla mu owala wa Mulluku.”

9Yesu aallotave wi, “Kinimuulleellani wi, mwiiphwanyelle akhwiinyu voopharihani mutteko eyuuma ya va ellapo yavatthi wi yamalla mwaakhelliwa owaani woohimalla, oddullu. 10Athu attheene enaroromelleya va ddeko ddooyeva ennaroromelleya va ddeko ddawaata navettho ayo ehinaroromelleya va ddeko ddooyeva khenaroromelleya va ddeko ddawaata. 11Vano muriinyu oohiroromelleya voopharihani mutteko eyuuma ya va ellapo yavatthi, ttaani anuuvaheni eyuuma yawoona? 12Nave muriinyu oohiroromelleya vooweherani eyuuma ya muthu mmodda, anuuvaheni ttaani nnddo ddiri ddaanyu?

13 # Mat 6.24 “Khaavo mullupa mutteko anawora waarumeyella apwiya eelli vawi aneeromwiita mmoddooyo nave amukonda mmoddooyo apaalle aneeromwiiwellella mmoddooyo nave aneeromuvevulla mmoddooyo. Emoddamoddave yeeyo khamuwora omurumeyella Mulluku ni orumeyella eyuuma.”

Dda malamulo ni omwene wa Mulluku

(Mat 11.12-13; 5.31-32; Mrk 10.11-12)

14Afarisi* yiiwalliiwa ddenndda, yaanyindulla eyano ddiwa wa Yesu vawi alliwaayo yaari ookonda makobiri. 15Koma Yesu aallota wi, “Nyu munaddooniha nyookha wonanko athu oolungama vamiitthoni va athu koma Mulluku annadduwella murimaanyu. Vawi ddeko ddinooneya ddoopaalleya wunchichi vamiitthoni va athu khe ello vamiitthoni va Mulluku.

16 # Mat 11.12,13 “Malamulo a Mose ni ehuddiho ya anamallotella ddaanapharihiwa mutteko ophiyera enthawi ya Yohane Oobatiza. Ovenyera vaavo othenga waphaama wa omwene wa Mulluku onnallalleyiwa nave athu attheene ennawatiheriwa wi evollowemo. 17#Mat 5.18Nave tti ddookhweya wi oddullu ni ellapo yavatthi ddimalle ohiyana wi nlemba ning'onong'ono nimodda namalamulo nivenyihiwe.

18 # Mat 5.32; 1 Ako 7.10,11 “Arive mullopwana amuhiya mwaariye amutthella mmodda animararuwa nave mullopwana anamutthella mutthiyana oohiyiwooyo animararuwattho.

Muthu eeyuuma ni Lazaro

19“Waakhalla muthu mmodda eeyuuma oyo awara ddoowara ddoowallamella mutengo nave nllapo ni nllapo aanakhoza machellello a ddoocha ddinchichi. 20Nave waakhallattho muthu oohoowa nnddina naye Lazaro. Aari amakhwata mwiillaaye muttheene nave aaddollweella okeraatthi vamullakoni va enyumba ya muthu a eyuumooyo nllapo ni nllapo. 21Nave atiyera wi acheke ddoohalla ddoomora ovenyera voochella va muthu a eyuumooyo. Naari anapwa yaanawa enallandda m'makhwatanimmo.

22“Muthu oohoowooyo aakhwa nave angelo yaawa emutukhulla yamukeraatthiha vaari Abrahamu vamachellelloni ooddullu. Nayeenettho muthu a eyuumoolle aakhwa avitthiwa. 23Nave muthu a eyuumoolle ahooweeye o gehena, aaweha oddullu. Wenko aamoonawo Abrahamu ari voorekamella nave Lazaroolle ari vakhwipi ni Abrahamooyo. 24Sika aakhuwa wa Abrahamu wi, ‘Attiitthaaka, mukeerelle echifundo, m'murumihe Lazaro wi atthaveye etthoka ya eyaallaaye m'maaddini nave akiriiryihena ommilloni waka vawi kinimahoowa wunchichi m'munllonimmu!’

25“Koma Abrahamu aallota wi, ‘Mukhwaaka, upuwella wi waavahiwa ddeko ddaphaama mu okumaawo, mvo Lazaro aariiye ni ddeko ddoonanara. Vano olliye animahakallalla wuno koma weyaano onimahoowa. 26Variyari vaahumva vookhalla engalande yoowallamella, wawi oopaalla ollapuwa ovenyera wuno oya muriinyunko apaalle ovenyera muriinyunko owa wuno khawora.’ 27Muthu a eyuumoolle aamulleella Abrahamu wi, ‘Kinimuuvekani wi m'murume Lazaro aye o enyumba ya attiitthaaka, 28wi aachenjeze asinnaka atthanu wi ehiwe onipuroni noohoosanna.’

29“Abrahamu aallota wi, ‘Asinnawo aakhalla ni malamulo a Mose ni ddoolemba dda anamallotella, yiiwellelle ddennddo.’ 30Muthu a eyuumoolle aamwaakhullattho wi, ‘Khe ddookwakhwana koma mmodda oovenyera wa ookhwa aayiillekewo yaaweerorukunuwa murima.’ 31Koma Abrahamu aallota wi, ‘Yaahiiwellella malamulo a Mose ni ddoolemba dda anamallotella kherukunuwa murima naari mmodda avenyille wa ookhwa.’ ”

Currently Selected:

Luka 16: MW2019

Highlight

Copy