Yohane 4

Yesu ni mutthiyana a o Samariya

1Afarisi* yahiiwa wi Yesu annaakopa ni waabatiza oohuddera anchichi omukhwaranya Yohane. 2(Naari Yesu ahimubatizalle arive muthu koma oohudderaaye sika yaabatiza.) 3Sika Yesu iiwalleeye dda Afarisinnddo aavenyawo o echigawo ya Yudeya ahokollweella o echigawo ya Galileya. 4Nave voolendonooyo aphwanenlle wi avirelle o echigawo ya Samariya. 5#Gen 33.19; Yos 24.32Mu Samariyammo aaphiya mu etawoni ya Sikari vakhuviru ni nipuro nenno khallekhalle Yakobo aamuvahilleeye mwanaye Yosefe. 6Wenko waakhalla ehime ya Yakobo nave vawi Yesu aatopa ni olendwaaye aakeraatthi mukhwipi mwa ehimeeyo. Yeella yaari enthawi yaatamenlle 12 koloko otthaana.

7Vano mutthiyana a o Samariya aawa wi arike maaddi nave Yesu aallota wa yooyo wi, “Kivahe maaddi kiwirye.” 8(Oohudderaaye yaari ekelle o etawoni wookulla yoocha.) 9#Eza 4.1-5; Neh 4.1,2Mutthiyanoolle ahaakhulla wi, “Nyu tti Muyuda. Kaambiiwa tini munakivekeenyu maaddi miyaano Musamariya?”* (Vawi Ayuda khenaphariha mutteko makapu ni embale ddimoddamodda ni Asamariya.)#4.9 Vawi…Asamariya: apaalle Vawi Ayuda kheneetellana ni Asamariya.

10Yesu ahaakhulla wi, “Waadduwenlleke emphaso ya Mulluku ni yooyo anuuveka maaddi, waaweromuveka nave aawerowuuvaha maaddi ookumi.”

11Mutthiyanoolle aallota wi, “Nyu, yoorikella maaddi khamunna nave ehimeella tti yoowallamella, munaakuse wuuwi maaddi ookumi? 12Yakobo, nikhollo nahu, sika aanivahille ehime yeella nave aawiryamo, olliye ni anaaye ni eziweto ddaye. Nyuwaano tti oomukhwaranya Yakobo?”

13Yesu ahaakhulla wi, “Arive muthu anawirya maaddi yaalla aneerovolliwattho nthona. 14Koma oyo anaawirye maaddi kinamuvaheemi khavolliwattho nthona. Maaddi yaayo kinamuvaheemi enaakhalle mwa olliyooyo wonanko neetuutu amaaddi ookumi woohimalla.”

15Mutthiyanoolle aallota wi, “Kivaheni maaddi yaayo wi kihivolliwettho nthona navettho kihihokollweelle wuno orika maaddi.” 16Yesu aamulleella wi, “Khawe wamwiithane mamuno nave mwawe attheene wuno.”

17Mutthiyanoolle ahaakhulla wi, “Nginna mamunaka.”

Yesu ahaakhulla wi, “Woollota ddawoona voollotani wi, ‘Nginna mamunaka.’ 18Vawi wookhalla otthelliwaka ni allopwana atthanu nave mullopwana onakhalleewenoolla khe mamuno. Wookilleella ddawoona.”

19Mutthiyanoolle allota wi, “Kohoona wi nyuwaano tti namallotella. 20Makhollwaaka a o Samariya yaamullapella Mulluku vamwaangonoolla koma nyuwaano Ayuda munallota wi o Yerusalemu sika ninaphwanellaahu omullapellawo Mulluku.”

21Yesu aallota wi, “Moowe Kiiwellelleni, enthawi eneerokwakhwana yawi athu khewa yaallapella Attiitthiiwa naari vamwaangonoolla apaalle o Yerusalemu. 22Nyuwaano Asamariya khamunamudduwella oyo munamullapelleenyu koma hiyaano Ayuda ninnamudduwella oyo nnamullapelleehu kaambiiwa ovullusa onavenyera wa Ayuda. 23Nave enthawi enimawa nave yoophiya khalle yawi oollapella mwawoona eneerewaallapella Attiitthiiwa moohoollelliwa ni Munepa Waweella ni mwawoona vawi Attiitthinnya enaapaalla athu awi ddiidda ekhalle oomullapella. 24Mulluku tti Munepa nave ayo enamullapella enaphwanella emullapelleke m'masivani a Munepa Waweella ni mwawoona.” 25Mutthiyanoolle aallota wi, “Kinnadduwella wi Mesiya* animawa oyo aneeriwa Khrisitu. Olliyooyo awa, aneeronilleella ddeko ddittheddene.”

26Yesu aamulleella wi, “Mi kinallota ni weyaano tti meene.”

27Enthawi yeeyo oohuddera a Yesu yaawa nave yaattikhina wi aanallota ni mutthiyana koma khaavo mmodda aamukohille wi, “Munapaalla tini?” Apaalle “Munallota ni yoolla kaambiiwa tini?”

28Vano mutthiyanoolle aahiya munwaaye, ahokollweella o etawoni wulle nave ahaalleella athu wi, 29“Hankoni mwamoone muthu akilleelle ddittheddene kenreemi. Yoolla khahiyo Mesiya?” 30Sika yaatimulla ovenyera o etawoni wulle oya wa Yesu.

31Va enthawi yeeyo oohudderaalle yaamuveka Yesu wi, “Ahuddihi, chani!”

32Koma ahaakhulla wi, “Kookhalla ni yoochaaka muhinadduwellaanyu.”

33Sika oohudderaalle yahaamba okohana wi, “Ethiyo ookhallavo mmodda awinnyalle yoocha wi eche?”

34Koma Yesu aallota wi, “Yoochaaka tti yawi keere opaalla wa oyo aakirumalle ni omalliha mutteko aakivahilleeye wi keere. 35Khamunallota nyuwaano wi, ‘Vavira miyeri misese enthawi yoohata ennaphiya?’ Nave kinimuulleellani wi, muwehesese m'matani, mmiddo ddoowaraalla khalle wi ddihatiwe! 36Oohata annallivelliwa nave annatthukumaniha ezipaso o okumi woohimalla. Vano awaalla ni oohata eneerohakallalla vamodda. 37Yoollotiwa yeella tti yawoona yawi, ‘Awaalla tti mmodda, oohata tti mmoddattho.’ 38Kahuurumani wi mwahate yeeyo mwahipharelleenyu mutteko. Amoddeene sika yaphanre mutteko wenko nave nyuwaano muphiyere waakhella ddoohata ddiwa.”

39Vano Asamariya anchichi mutawoni mulle yaakhulupilila mwa Yesu ekaamba ya omboni wa mutthiyana wawi, “Aakilleella miyaano ddeko ddittheddene kenreemi.” 40Sika Asamariyaalle yaphiyalliiwa wa olliye, yaamuveka wi akhalle ni alliwaayo nave aakhallawo mallapo meelli.

41Anchichi yaavirellella waanjerereya okhulupilila ekaamba ya mawu a Yesu. 42Yaamulleella mutthiyanoolle wi, “Ninnakhulupilila vano ohiri ekaamba ya mawaawo koma kaambiiwa noomwiiwa weekhiihu nave ninnadduwella wi yoollathi tti Oovullusa a ellapo yavatthi.”

Yesu anamuchiriha mwaana aamullopwana a muttekweene a o boma

43Viviralle mallapo meellaalla, Yesu aatimulla oya o Galileya. 44#Mat 13.57; Mrk 6.4; Luk 4.24Vawi aallota yeekhaaye wi, “Namallotella khanavahiwa olemu mu ellapo yoowaniwa.” 45#Yoh 2.23Aphiyalleeye o Galileya, athu a wenko yaamwaakhella vawi yahoona ddittheddene eerilleeye mu Yerusalemu va Ehakallallo ya Paska vawi alliwattho yaayaawo o ehakallallweeyo.

46 # Yoh 2.1-11 Vano Yesu aahokollweella o Kana mu Galileya nko khalle aatthattusalleeye maaddi okhalla vinyo. Wenko waakhalla muttekweene a o boma o Kaperenao nave mwanaye aamullopwana aanavoriiwa. 47Iiwalleeye wi Yesu aaphiya o Galileya ovenyera o Yudeya, aaya wa olliye amuveka wi aye o Kaperenao amuchirihe mwanaye vawi aari vakhuviru okhwa. 48Yesu aamulleella wi, “Khamuwa mukhulupilila mwaahoona ezizindikiro ni ddoottikhiniha.” 49Muttekweene a o boma aallota wi, “Apwiya, hankoni owaani mwanaka ahinakhwe.”

50Yesu allota wi, “Khaweni, mwaninyu oochira!”

Olliyooyo aakhulupilila nnddo Yesu allotilleeye nave aahokollweella owaniwa. 51Aroweeye owaniwa, aakumana ni allupa muttekwaaye nave yaamulleella wi, “Mwaninyu oochira!”

52Sika ahaakoha enthaweene aambilleeye ochira nave yahaakhulla wi, “Oviha mwiillinko waamalla oddillo enthawi ya 1 koloko otthaana.” 53Attiitthinnyaayo yahuupuwella wi enthaweene yaari yeeyo Yesu aallotilleeye wi, “Mwaninyu oochira.” Sika olliye ni a munibanjani naye attheene yaakhulupilila. 54Ella sika yoottikhiniha yaneepiilli Yesu eerilleeye aphiyalle mu Galileya ovenyera o Yudeya.

Currently Selected:

Yohane 4: MW2019

Highlight

Copy