Yohane 16

1“Kohuulleellani nndda wi muhihiye echikhulupilwaanyu. 2Khamwaakhullelliwa ovollowa mu enyumba ddamavekello* nave enthawi eneerophiya yawi arive muthu oyo anaawiipheni nyuwaano anaaganizekeeye wi anamurumeyella Mulluku. 3Athu eneereweera ddeko ddenndda kaambiiwa khanaadduwella Attiitthaaka naari miyaano. 4Nave kohuulleellani ddenndda wi enthaweeyo yaphiya muupuwelle wi kahuulleellani.

Mutteko wa Munepa Waweella

“Ngaallotille nndda vawaambeella kaambiiwa kaari vamodda ni nyuwaano. 5Koma vano kinaya wa oyo aakirumalle miyaano nave khaavo mmodda a nyuwaano anakikoha wi, ‘Munaya wuuwi?’ 6Koma kaambiiwa kohuulleellani nndda, m'murimani mwanyu mooddalla ethakaraka. 7Ddawoona, kinimuulleellani wi tti waphaama wa nyuwaano wi miyaano kinimarowa. Vawi kaahirowa Ookavihera khawa wa nyuwaano. Koma miyaano karowa, kineeromurumiha wa nyuwaano. 8Olliye awa aneerewooniha wa athu a va ellapo yavatthi ddawoona ddiwa dda ochimwa, dda echilungamo ni dda echiweruzo. 9Alliwaayo tti oolakwa va machimo kaambiiwa khenakikhulupilila miyaano. 10Alliwaayo tti oolakwa va dda echilungamo kaambiiwa kinaya wa Attiitthaaka nave khamuwa mukoona. 11Alliwaayo tti oolakwa va dda echiweruzo kaambiiwa oolamulella a va ellapo yavattheella oheeruziwa khalle.

12“Kookhalla ni ddeko ddinchichi ddawi kuulleelleni koma khamuwora oddiiwesesa vano. 13Koma Munepa oodduwelliha yawoona aphiya, aneerewuudduwellihani ddawoona ddittheddene. Vawi khallotaka mwa olamulello wa yeekhaaye koma anaalloteke nnddo aniiwekeeye nave aneerekewuulleellani dda ddeko ddamuhoollo. 14Aneerokititimiha miyaano kaambiiwa anaakuse nnddo kinalloteemi nave aneerekewuulleellani nyuwaano. 15Ddeko ddittheddene dda Attiitthaaka tti ddaaka. Ella sika ekaambiiwa kaallotilleemi wi Munepa Waweella aneerokokusa nnddo kinamulleellekeemi nave aneerekewuulleellani nyuwaano.

Okhupanya oneerotthattuwa ohakallalla

16“Vavira enthawi yooyeva khamuwa mukoona miyaano koma vavira enthawi emodda yooyeva muneerokoonattho.”

17Oohudderaaye amodda yaakohana mmodda ni mukhwaaye wi, “Anaaka tini analloteeye wi, ‘Vavira enthawi yooyeva khamuwa mukoona miyaano koma vavira enthawi emodda yooyeva muneerokoonattho’? Navettho wi, ‘Kineerorowa wa Attiitthaaka.’ 18Ottaphullella wene wa ‘enthawi yooyeva’ tti tini? Khaniniwesesa eyo anaakeeye!”

19Yesu aadduwella wi yapaalla wi emukohe, sika ahaakoha wi, “Ella sika mwakohaneenyu mmodda ni mukhwaaye wi kaallota wi ‘Vavira enthawi yooyeva khamuwa mukoona miyaano koma yavira enthawi emodda yooyeva muneerokoonattho?’ 20Ddawoona, kinimuulleellani wi muneerewinlla ni woopa ekutho koma athu a ellapo yavatthi eneerohakallalla. Nyuwaano muneerokokhupanya koma okhupanya wanyu eneerotthattuwa ehakallallo. 21Mutthiyana akhalla vakhuviru oyara annakhupanya kaambiiwa enthawaaye yawiiwa ovoreya yoophiya. Koma mwaanooyo ayariwa annatiwalla ovoreya wayenko kaambiiwa annahakallalla wi mwaana ooyariwa. 22Vano nyuwaano munnakhupanya koma kineerowoonanittho nave mirima ddanyu ddineeroddalla ni ohakallalla. Nave khaavo anawaakheni ohakallalla wanyunko.

23“Nllapo nenno naphiya khamukivekattho erive ello. Ddawoona, kinimuulleellani wi mwaveka erive ello wa Attiitthaaka mu nnddina naka, eneerewuuvahani.#16.23 mwaveka…eneerewuuvahani: Ddoolemba ddimodda ddakhalle ddookhalla ni mawu awi mwaveka erive ello wa Attiitthaaka, eneerewuuvahani mu nnddina naka. 24Ophiyera vano khamuvekille erive ello mu nnddina naka, sika vano vekani nave muneerewaakhella wi muhakallalle murimaanyu muttheene.

Llipani murima

25“Kohuulleellani ddeko ddenndda mu maphwanaphwaniho. Koma enthawi enimawa yawi ngillota ni nyuwaano mu maphwanaphwaniho koma kinaallote mwawiiweya dda Attiitthaaka. 26Nllapo nenno naphiya, muneerewaaveka Attiitthaaka mu nnddina naka. Nave khokhalla woopaalleya wi kuuvekellekeni wa Attiitthaaka, 27vawi Attiitthaaka weekhiiwa ennuukondani nyuwaano. Ennuukondani kaambiiwa munnakikonda miyaano nave munnakhulupilila wi kavenyenre wa Mulluku. 28Kaavenyera wa Attiitthaaka oya mu ellapo yavatthi nave vano kinimavenyamo mu ellapo yavatthi ohokollweella wa Attiitthaaka.”

29Oohudderaaye yaallota wi, “Vano munnallota mwawiiweya, moohiphariha mutteko maphwanaphwaniho. 30Vano ninnadduwella wi munnadduwella ddittheddene nave khamunapaalla wi mmodda uukoheni makoho. Mwa ella ninnakhulupilila wi mwaavenyenre wa Mulluku.”

31Yesu ahaakoha wi, “Munnakhulupilila vano?” 32Enthawi enimawa nave yoophiya khalle eyo munaapallallesiweenyu, arive muthu owaniwa nave munaakihiye meekhaaka. Koma nginakhalla meekhaaka kaambiiwa Attiitthaaka eri ni miyaano. 33Kohuulleellani ddenndda wi mukhalle ni murendelle ekaamba ya miyaano. Ellapo yavatthi eneerewuuhoosani koma llipani murima vawi miyaano koogonjiha ellapo yavatthi.

Currently Selected:

Yohane 16: MW2019

Highlight

Copy