Yohane 12

Yesu anazoziwa ni makhura o Betaniya

(Mat 26.6-13; Mrk 14.3-9)

1Ehanlle mallapo matthanu ni nimodda Paska ahinaphiye, Yesu aaya o Betaniya owaniwa wa Lazaro, muthu olle Yesu aamuvenyihalleeye wa ookhwa. 2Yaamukhozera yoocha wenko. Marita aarumeyella nave Lazaro aari mmodda a yaayo yachana vamodda ni Yesu. 3#Luk 7.37,38Vano Mariya aakusa makhura a nthuko naphaama oowallamella mutengo oopangiwa ovenyera o ddoomella ddooromolliwa narido ookwakhwana hafu lita. Aazoza manyallo a Yesu ni waapukuta ni meehaaye. Nthuko nawunkhella na makhura yaayo naaddalla mpa mutthemwene. 4Nave Yudasi Isikariyoti, mmodda a oohuddera, oyo anamuvelleella wi iiphiwe aallota wi, 5“Kaambiiwa tini makhura yaalla yahikullihiwiiwa voowallamella mutengo ni waavaha makobiraayo athu oohoowa?” 6Aallotille nndda ohiri kaambiiwa aanaapwatha ohoowa koma kaambiiwa aari mullupaawiiya. Olliye aari oosunga nthumba na makobiri nave aaniiyamo.

7Yesu aallota wi, “Muhiyeni yooyo, aasunga makhura yaalla okhozekella va nllapo na ovitthiwa waka. 8#Deu 15.11Vawi munnakhalla ni athu oohoowa mallapo mattheene koma khamukhalla ni miyaano mallapo mattheene.”

Opangana ddoomwiipha Lazaro

9Vano mulloko muullupalli wa Ayuda wahiiwa wi Yesu aari o Betaniya. Sika yaaya wenko ohiri ekaamba ya Yesuve komattho wi yamoone Lazaro, oyo aavenyihiwe wa ookhwa. 10Sika allupa mukutho uullupalli yahiiwanana wi yamwiiphettho Lazaro. 11Vawi ekaamba ya Lazaro Ayuda anchichi yaanaahiya alliwaayo enakhulupilila mwa Yesu.

Ovollowa wa Yesu mu Yerusalemu

(Mat 21.1-11; Mrk 11.1-11; Luk 19.28-40)

12Osaka wene mulloko muullupalli wa athu ayo yawiille o Ehakallallo ya Paska yahiiwa wi Yesu aamawa o Yerusalemu. 13#Mas 118.25,26 Sika yaakusa enthambi dda miteekho ddakanjeza eya woomuchingamella yooyo, ekhuwaka wi, “Ntitimiho nikhalle wa Mulluku! Oodalisiwa oyo anawa mu nnddina na Apwiya! Oodalisiwa Mwene a o Israele!”

14Nave Yesu aamoona mwaana a bulu awella va yooyo wonanko mmo mwaalembiwe wi,

15 # Zek 9.9 “Muhoove, nyu athu a Ziyoni!

Ngoonani, mwenaanyu animawa wa weyaano,

amuwenlle mwaanabulu.”

16Oohudderaaye kheyaawiiwesesa nndda va enthawi yeeyo koma Yesu aavenyihiweeye mwa ntitimiho, yahuupuwella wi nndda ddaalembiwa dda olliyooyo nave wi yaamweerella nndda.

17Vano athu ayo yaari vamodda ni Yesu, valle aamwiithanneeye Lazaro wi akhume mu mahame ni omuvenyiha wa ookhwa yaanavuwiha ddamweereyelle Lazaro. 18Ella sika ekaambiiwa athwaayo yawiilliiwa woomuchingamella vawi yahiiwa wi olliye aheera yoottikhiniha yeella. 19Vano Afarisi* yaallota mmodda ni mukhwaaye wi, “Munnoona wi noolephela vano! Ngoonani, ellapo yavatthi ettheene enamuthwara olliye.”

Agriki amodda enamwaashaasha Yesu

20Agriki* amodda yaari nimodda ni ayo yawiille o Yerusalemu woomullapella Mulluku va Ehakallallo ya Paska. 21Nave alliwa yaaya wa Filipo* o Betisaida mu Galileya, emulleella wi yapaalla emoone Yesu.

22Filipo aaya amulleella Andreya nave eellaayo yaaya yamulleella Yesu. 23Nave Yesu ahaakhulla wi, “Enthawi yoophiya vano yawi mi Mwaana a Muthu kititimihiwe.” 24Ddawoona, kinimuulleellani wi, mmiddo wa tirigu waahimora muthayani, okhwa, yooyo onakhalla va weekhiiwa. Koma wakhwa onimma ezipaso ddinchichi. 25#Mat 10.39; 16.25; Mrk 8.35; Luk 9.24; 17.33Oyo anakonda okumaaye eneerowutathilla nave oyo aniitana ni okumaaye mu ellapo yavattheella aneerokhalla ni okumi woohimalla. 26Muthu aakirumeyellaka miyaano, akithware miyaano vawi wenko kinaakhalleemi oorumeyellaaka anaakhallettho wenko. Nave Attiitthaaka eneeromuriiha oyo anakirumeyella.

Yesu anallota dda okhwa waye

27“Vano murimaaka wookatamihiwa. Nave kinaallote tini? Killote wi, ‘Attiitthaaka, muhaakhullelle wi enthawi yookatamiheella ekiphiyere miyaano?’ Koma kaawa ekaamba ya ddookatamiha ddenndda. 28Sika Attiitthaaka onihellani ntitimiho nanyu!” Vano mawu yahiiweya ovenyera oddullu awi, “Kohooniha ntitimiho naka nave kineerewooniha wiilli.”

29Athu yiimenlle vaavo yahiiwa mawaayo nave amodda a yaayo yaallota wi, “Waari ogugudeya,” Amodda yaallota wi, “Mungelo oollota ni olliyooyo.”

30Yesu aallota wi, “Mawu yaalla kheyaawiweyille ekaamba ya miyaano koma ekaamba ya nyuwaano. 31Vano ella sika enthawi yaweeruza ellapo yavattheella nave oolamulella a ellapo yavattheella aneerovokhiwa otte. 32Nave miyaano katthomeyiwa vamutandani, kineerewaatthukumaniha athu attheene wa miyaano.” 33Aallotille nndda wi oonihe mmo anaakhwelleeye.

34 # Mas 110.4; Yes 9.7; Ezk 37.25; Dan 7.14 Athwaalle yaamwaakhulla wi, “Nahiiwa hiyaano m'malamuloni wi Mesiya* aneerokhalla ni okumi woohimalla. Sika kaambiiwa tini nyuwaano munallotelleenyu wi Mwaana a Muthu anaphwanella otthomeyiwa vamutandani? Mwaana a Muthu yoolla ttaani?”

35Yesu ahaakhulla wi, “Owala onaakhalle ni nyuwaano mu enthawi yooyeva. Etani vano muriinyuna owala wi epiphi ehuuphwanyeni. Oyo aneeta mwiipiphini khanadduwella nko anayeeye. 36Khulupililani owala enthawi yeeyo muriinyu mu owala wi mukhalle athu a owala.”

Ohikhulupilila wa athu

Yesu amallihalle ollota ddenndda, aavenyavo iipittha. 37Naari enre ddoottikhiniha ddinchichi wa athwaayo, kheyaamukhulupililalle olliyooyo, 38#Yes 53.1wi ddoollotiwa ni namallotella Yesaya ddakwakhwanihiwe ddawi,

“Apwiya, ttaani aakhulupililalle othengaahu?

Nave masiva a Apwiya yuupullulliwe wa aani?”

39Sika kheyaaworille okhulupilila kaambiiwa Yesaya aallotattho wi,

40 # Yes 6.10 “Mulluku aaweeriha miitthwiiwa okhalla oohoona,

ahummiha mirima ddiwa.

Ddahaariki ddiiddo miitthwiiwa yaweerekowoona,

nave mirima ddiwa ddeerekewiiwesesa,

wi emurukunuwelle olliye

wi aachirihe.”

41Yesaya aallotille ddenndda kaambiiwa ahoona ntitimiho na Yesu nave allotella dda olliyooyo.

42Vano attekweene a Ayuda* anchichi yaamukhulupilila Yesu. Koma ekaamba ya Afarisi khayooniha vaweella woova wi kheyaakhullelliwa ovollowa mu enyumba yamavekello. 43Vawi yaakonda waakhella olemu wa athu ohiyana ni waakhella olemu wa Mulluku.

44Yesu aakhuwa wi, “Oyo anakhulupilila mwa miyaano, khanakhulupilila mwa miyaanove koma mwa oyo aakirumalle. 45Nave oyo anakoona miyaano, anamoona oyo aakirumalle. 46Mi tti owala wawiille mu ellapo yavatthi wi arive muthu anakhulupilila mwa miyaano ahikhalle mu epiphi. 47Mmodda iiwa mawaaka ahaathwara, ngimweeruza. Vawi miyaano ngaawiille wi keeruze ellapo yavatthi koma wi kiyivulluse. 48Oyo anakikhoota miyaano ahinaakhella mawaaka ookhalla ni oomweeruza. Mawu killonteemaalla eneerokhalla aweeruzaaye va nllapo noomallihella! 49Vawi ngillotille mu olamulello wa meekhaaka koma Attiitthaaka yaakirumalle aakilamula miyaano yoollota ni yowaakhulla. 50Nave kinnadduwella wi enalamula nnddo ddinavaha okumi woohimalla. Vano kinalloteemi tti nnddo Attiitthaaka ekilleelliiwa.”

Currently Selected:

Yohane 12: MW2019

Highlight

Copy