Genesis 7
7
Echigumula
1Apwiya yaamulleella Nowa wi, “Vollowa muchomboni weyaano ni nibanja nawo. Kohoona tti weekhave oolungama variyari va athu attheene a mbadoolla. 2Vano okuse enama ddaweellihiwa dditthanu ni piilli anankhoro ni dditthanu ni piilli ddeetthiyana. Nave okusettho piillipiilli yaamullopwana ni yaamutthiyana ya orive mutundu wa enama ddooripihiwa. 3Okusettho dda erive epallame dditthanu ni piilli ddeellopwana ni dditthanu ni piilli ddaamutthiyana. Weere ddenndda wi enama ni epallame dda mitundu ddittheddene ddisungiwe ni okumi va ellapo yavatthi. 4Vavira mallapo matthanu ni meelli, kineeromurupiha murimu va ellapo yavatthi mallapo 40, otthaana ni mahiiyu wi ddookumi ddittheddene kaddiphatusalleemi dditthollowe.” 5Nave Nowa aheera ddittheddene nnddo Apwiya yalamulalliiwa.
6Nowa aari ni miyakha 600 mvo echigumuleeyo yaphiyalliiwa va ellapo yavatthi. 7#Mat 24.38,39; Luk 17.27Olliye ni mwaariye owaakattho anaaye ni awariwa yaavollowa muchomboni, othawa echigumuleeyo. 8Piillipiilli, yaamullopwana ni yaamutthiyana, dda orive mutundu wa enama ddaweellihiwa ni enama ddooripihiwa ni orive mutundu wa epallame ni wa orive mutundu wa ddawaapadda yaamullopwana ni yaamutthiyana 9ddaawa wa Nowa muchombonimmo moollikana ni mmo Mulluku alamulelleeye. 10Viviralle mallapo matthanu ni meelli, echigumula yaaphiya va ellapo yavatthi ettheene.
11 #
2 Pet 3.6
Nowa ari ni miyakha 600, va nllapo na 17 na mweeri waneepiilli, aneetuutu amaaddi manchichi ookhalla vatthi va ellapo yaatuuwa nave oddullu waahulleyattho wi maaddi manchichi ekhume. 12Sika murimu munchichi aarupa va ellapo yavatthi mallapo 40, otthaana ni mahiiyu. 13Va nllapo nenno, Nowa ni mwaariye ni anaaye aallopwana, Shemu, Hamu ni Yafeti ni awariwa, yaavollowa muchomboni. 14Yaavollowa muchomboni ni orive mutundu wa enama ddamuhakani, eziweto, ddawaapadda ni epallame dda orive mutundu. 15-16Nave ddookumi piillipiilli dda orive mutundu, yaamullopwana ni yaamutthiyana, ddaawa wa Nowa muchombonimmo moollikana ni mmo Mulluku aamulamulalleeye. Nave Apwiya yaawalla mullako wa echombweeyo.
17Nave echigumula yaakhalla va ellapo yavatthi mallapo 40. Maaddi yahaata va ellapo yavatthi nave echombweelle yahaamba obelluwa. 18Maaddaayo yahoonjerereya wunchichi nave echombweeyo yaabelluwa va maaddini. 19Owella wa maaddaayo waavirellella wunchichi va ellapo yavatthi ophiyera miyaango ddoorekama ddaapwina. 20Vano yaavirellella waanjerereya ophiyera okhwaranya wa miyaangonnddo ni mamita matthanu ni meelli. 21Ddookumi ddittheddene ddookhalla va ellapo yavatthi ddaakhwa, monga epallame, eziweto, enama ddamuhakani, mulloko wa ddawaapadda ddoohiyanahiyana ni athu attheene. 22Ddookumi ddittheddene va ellapo yavatthi ddaakhwa. 23Apwiya yahoononga ddookumi ddittheddene dda va ellapo, athu, enama, ddawaapadda ni epallame. Nowa yeekhave aavulluwa ni attheene aariiyena muchomboni. 24Maaddaayo yaakhalla mallapo 150 ehinawelleelle.
Currently Selected:
Genesis 7: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.
