Mitteko 6

Athu atthanu ni eelli ookavihera mpingo

1Mallapo yaayo ookhulupilila yaatiiwa, Ayuda oollota Egriki yaanakangana ni Ayuda oollota Eheberi kaambiiwa anaamukhwelliiwa kheyaavahiwa ddookawiwa dda nllapo ni nllapo. 2Vano amurummwa khumi ni eellaayo yahiithaniha mulloko wookhulupilila muttheenooyo vamodda ellota wi, “Khe ddaphaama wi hiyaano nihiye ollalleya mawu a Mulluku wi niwehereke okawiwa wa ddoocha. 3Sika, asinnaka ni arokoraka, atthoolleni mwa nyuwaano athu atthanu ni eelli oodduwanyeya wi tti oohoollelliwa ni Munepa Waweella ni eezeru nave naavahe mutteko yoolla. 4Hiyaano nineerollipihella ovekella ni ollalleya mawu a Mulluku.”

5Athu attheene yaahakallalla ni nnddo yallotille amurummwa, sika yaamutthoolla Sitefano, muthu ooddalla ni echikhulupililo ni Munepa Waweella. Navettho yahaatthoolla Filipo,* Prokoro, Nikanore, Timoni, Parmenasi ni Nikolasi a o Antiyokeya* oyottho ahaari Muyuda koma athwara echikhulupililo ya Ayuda. 6Mullokooyo wahaavelleella athwaayo wa amurummwa, ayo yaavekenlle navettho yaadalisalle vawiiyaatthini mattiiwa va miru ddiwa.

7Mawu a Mulluku yaavirellella ovuwa. Nave ookhulupilila a mu Yerusalemu yahaata nave allupa mukutho anchichi yahaakhullella echikhulupililweeyo.

Ayuda enammaka Sitefano

8Sitefanooyo aaddalla ni echisomo ni masiva ddoovenyera wa Mulluku wawi aheera ddoottikhiniha dduullupalli ni ezizindikiro ddinchichi variyari va athu. 9Nave aavaanyihiwa ni Ayuda amodda oovenyera o Kurene ni Alekizandriya ayo yavenyera o enyumba yamavekello yooromolliwa wi enyumba yamavekello ya athu oottaphulliwa okaporo. Aanavaanyihiwattho ni Ayuda oovenyera o ezigawo dda Silisiya ni Asiya.* Attheenaalla yahaamba ovaanyihana ni Sitefano. 10Koma kheyaaworille ollipana ni ezeru nnddo Sitefano avahiweeye ni Munepa Waweella mu ddoollota ddaye. 11Vano yahaaphwanya athu amodda yaavaha makobiri wi yalloteke wi, “Naamwiiwa amullotellaka epewe Mose ni wa Mulluku!” 12Sika Ayuda, attekweeniiwa ni ahuddihi a malamulo* yaamushella murima Sitefano. Yaamuphara Sitefano emukusella vanthatoni namillatu. 13Nave yaawaana amboni awoottha ayo yallota wi, “Muthu yoolla khahiyalle ollota ddoovaanyiha nipuro noopatuleya ni malamulo a Mose. 14Naamwiiwa allotaka wi Yesu a o Nazareti aneerokumulla enyumba ya Mulluku navettho aneerowaakakhaniha malamulo mattheene a makhollwaahu ayo Mose aavahilleeye makhollwaahu!” 15Attheene ayo yakeraatthille va nthato na millatunno yaamuwehesesa Sitefano nave yahoona ekhovaaye yooneyaka wonanko ya mungelo a Mulluku.

Currently Selected:

Mitteko 6: MW2019

Highlight

Copy