Mitteko 13

Baranaba ni Saulo ennatthoolliwa nave ennarumiwa

1Mumpingoni wa Antiyokeya* waakhalla anamallotella ni ahuddihi alla: Baranaba, Simiyoni (ooromolliwa Ooripa), Lusiyo (oovenyera o Kurene), Manaene (oyo unnuwelle nimodda ni Herode)*#13.1 Herode: Herode Antipa, oolamulella a o Galileya (onani Luk 3.1). ni Saulo. 2Yaallapelliiwa Apwiya ni ohalla ocha,* Munepa Waweella aallota wi, “Okitthoollelle Baranaba ni Saulo wi yaphare mutteko oyo kawiithanelleemi.”

3Vano yaahalla ocha, yaavekella, yahiiyaatthi mattiiwa va alliwaayo nave yaaruma.

Mu Kupro

4Yarumiwiiwa ni Munepa Waweella, Baranaba ni Saulo yaaya o muzinda wa Seleukiya nave yaheeta vakallawani ovenyera wenko nave yaphiya o echilumba ya Kupro. 5Yaphiyalliiwa o muzinda wa Salamisi, yaallalleya mawu a Mulluku mu enyumba ddamavekello.* Yaarittho ni Yohane Mariko oyo aakavihera mutteko.

6Yaheeta virive veko ophiyera yaaphiya o muzinda wa Pafosi. Wenko yaakumanawo ni amasenga nnddina naye Barayesu, Muyuda oyo ari namallotella awoottha. 7Aari mukhwaaye a oolamulella a o Kupro, nnddina naye Sergio Paulo, oyo aari muthu eezeru. Oolamulellooyo aamwiithana Baranaba ni Saulo wi ewe kaambiiwa apaalla iiwe mawu a Mulluku. 8Koma musing'angoolle (oyo nnddina naye aari Elimasi mu ellotello ya Egriki), aanaavaanyiha Baranaba ni Saulo nave aaneeseesa omweeriha oolamulelloolle wi ahikhulupilile. 9Vano Saulo, (oyottho adduwanyeya ni nnddina nawi Paulo) addalliwe ni Munepa Waweella aamuweha musing'angooyo. 10Nave allota wi, “Mwaana a Satana we! Nave mudani a ddeko ddittheddene dda echilungamo, ooddalliwa ni ddeko ddittheddene ddawoottha. Ethiyo khohiya orukunusa yawoona ya Apwiya wi ekhalle yoolleka? 11Vano Apwiya eneerewuullaka weyaano nave oneerokhalla oohoona sika khawoona nndduwa wa mwaneenthawi.”

Enthawi yeeyo m'mwiitthoni mwa Elamasi mwaawa epiphi nave aamba owaasha athu awi emuhoollelleke. 12Vano oolamulellooyo oonilleeye ddeereyennddo aakhulupilila nave aattikhina ni ehuddiho ya dda Apwiya.

Mu Antiyokeya a mu Pisidiya

13Vano Paulo ni akhwaaye yaheeta vakallawani ovenyera o Pafosi yaphiya o muzinda wa Perga, mu echigawo ya Pamfuliya nave eri wenko Yohane Mariko ahaahiya ahokollweella o Yerusalemu. 14Nave yaavirellella ovenyera o Perga ephiya wa Antiyokeya a mu echigawo ya Pisidiya nave va nllapo na Sabata yaavollowa mu enyumba yamavekello ekeraatthi. 15Yamallihalliiwa weerenga ovenyera mu malamulo a Mose ni ehuddiho ya anamallotella, attekweene a mu enyumba yamavekello yahaarumihella mawu awi, “Akhwiihinyu, hiyaano ni napaalla wi mullote wa athwaalla mwaarina mawu owaallipiha murima.” 16Sika Paulo ahiimella, uuva ni nnatta naye owiithana athu wi ewe vakhuviru nave aamba ollota wi,

“Aisraele akhwaaka owaakattho nyu muhiri Aisraele koma munamoova Mulluku, kiiwelleni! 17#Eks 1.7; Eks 12.51Mulluku a Aisraele ahaatthoolla makhollwaahu nave aweera ekhalle mulloko muullupalli wa athu va enthawi yaariiwa alleto mu ellapo ya Iguputo. Ahaakhumiha mu Iguputommo ni masivaaye. 18#Num 14.34; Deu 1.31Nave wa miyakha 40 ahaavillella#13.18 ahaavillella: Ddoolemba ddimodda ddakhalle ddookhalla ni mawu awi ahaapwatha. yeetiiwa mu echipululu. 19#Deu 7.1; Yos 14.1Aheeriha wi mitundu mitthanu ni miilli ddoonongiwe mu Kanani nave aweera athwaaye ekhalla aneena a ellapweeyo. 20#Owe 2.16; 1 Sam 3.20Ddittheddenenndda ddaheereya wa miyakha 450.

“Nave ddimallille ddenndda#13.20 Ddittheddenenndda…ddenndda: apaalle Vimanlle miyakha 450. ahaavaha aweeruza ophiyera enthawi ya namallotella Samuele. 21#1 Sam 8.5; 1 Sam 10.21Vano yaaveka wi evahiwe mwene nave Mulluku ahaavaha Sauli, mwaana a Kishi, muthu a nlloko na Benjamini wi akhalle mweniiwa, wa miyakha 40. 22#1 Sam 13.14; 1 Sam 16.12; Mas 89.20Mulluku amuvenyihalleeye omwene Saulo, ahaavaha Davide wi akhalle mweniiwa. Nndda sika allotille Mulluku dda olliyooyo wi, ‘Koomuphwanya Davide mwaana a Yese, muthu a vamurimani vaka, muthu oyo anaaweere nnddo kinaapaalleemi.’ 23Moollikana ni nnddo alonjezilleeye khalle Mulluku aheeriha edduullu ya Davide, Yesu wi akhalle oowaavullusa a Aisraele. 24#Mrk 1.4; Luk 3.3Yesu ahinaambe muttekwaaye, Yohane aallalleya wa athu attheene a o Israele wi erukunuwe murima nave ebatiziwe. 25#Yoh 1.20; Mat 3.11; Mrk 1.7; Luk 3.16; Yoh 1.27Nave Yohane ahanlleeye vang'ono omalliha muttekwaaye, aallota wa athu wi, ‘Munakeesa miyaano ttaani? Miyaano khe oyo munamutiyeraanyu. Nave ngoonani, Animawa mutulli mwaka nave naari miyaano ngiphwanenlle naari orulla esapato omanyalloni waye.’

26“Aisraele akhwaaka, edduullu dda Abrahamu ni athu attheene ayo ehiri Ayuda koma munamoova Mulluku, othenga woollota dda ovullusa waarumihiwa wa hiyaano! 27Vawi athu enakhalla o Yerusalemu ni attekweeniiwa kheyaadduwenlle wi olliyooyo tti oovullusa naari kheyaawiiwesesille mawu a anamallotella ayo yeerengiwa va nirive nllapo na Sabata. Voomwiipani mullatu Yesu yaakwakhwaniha mawu yallotiwe ni anamallotella. 28#Mat 27.22,23; Mrk 15.13,14; Luk 23.21-23; Yoh 19.15Nave naari yahiphwanyille mullatu woomwiiphella olliye, yaamuveka Pilato wi Yesu iiphiwe. 29#Mat 27.57-61; Mrk 15.42-47; Luk 23.50-56; Yoh 19.38-42Nave yamallihalliiwa weera ddittheddene nnddo mawu a Mulluku enallotiiwa dda olliye, yaamukitthihavo vamutandani nave emuvittha mu mahame. 30Koma Mulluku aamuvenyiha wa ookhwa. 31#Mit 1.3Nave wa mallapo manchichi ahooneya wa ayo yamuthwanre ovenyera o Galileya oya o Yerusalemu. Vano alliwaayo tti amboni wa athu a o Israele. 32#Mas 2.7Nave noollalleya othenga waphaama wa nyuwaano, oyo Mulluku alonjezilleeye khalle wa makhollwaahu wi aneereweera. 33Vano ddookwakhwanihiwa wa hiyaano edduullu ddiwa, Mulluku voomuvenyihani Yesu wa ookhwa. Moollikana ni ddalembiwe mu nchipo naneepiilli wi,

‘Weyaano tti Mwanaka,

ollello kohuuyara weyaano.’

34 # Yes 55.3 Dda omuvenyiha olliye wa ookhwa nave ohimuhiya wi untellettho mu mahame, Mulluku aallota khalle wi,

‘Kineerewuuvaha madaliso aweella ni oororomelleya

ayo kalonjezilleemi khalle wa Davide.’

35 # Mas 16.10 Ollikana ni ddalembiwe mu machipo mamodda wi,

‘Khamumuhiya oororomelleyaanyu aweella wi untelle mu mahame.’

36Vawi Davide amallihalle orumeyella ddoopaalla dda Mulluku mu mallapwaaye aakhwa. Nave aavitthiwa vamodda ni makhollwaaye nave mwiillaaye wahuntella mu mahame. 37Nave yeella kheyaawereyille wa oyo Mulluku amuvenyihalleeye wa ookhwa. 38Dduwellani nndda Aisraele akhwaakanyu wi oweella mwa Yesu, othenga wookhululukelliwa machimo onnallalleyiwa wa nyuwaano. Oweella mu malamulo a Mose khamwaawore ottaphulliwa o machimwaanyu mattheene, 39Koma oweella mwa Yesu arive muthu oyo anakhulupilila aneerottaphulliwa. 40Vano chenjerani wi ddallotiwe ni anamallotella ddiheereye wa nyuwaano#13.40: Ddoolemba ddimodda ddakhalle khaddinna mawu awi wa nyuwaano. ddawi,

41 # Hab 1.5 ‘Nyu athu oovevulla! Ttikhinani nave moonongeye!

Vawi ollello kineereweera ello emodda

yawi khamukhulupilila vawiiwani!’ ”

42Paulo ni Baranaba yakhumiiwa mu enyumba yamavekello, athu yaawiithana wi yawe va nllapo na Sabata noothwarellellanno wi yaalleellettho dda ddeko ddenndda. 43Athu yapallalleyiiwa va mutthukumanooyo, Ayuda anchichi ni athu ayo yahaari Ayuda koma yathwara echikhulupililo ya Ayuda yahaathwara Paulo ni Baranaba. Amurummwa eellaalla yahaalleella athwaayo ni waallipiha murima wi evirellelle okhulupilila echisomo ya Mulluku.

44Sika nllapo na Sabata noothwarellellanno, vakhuviru athu attheene a m'muzindanimmo yaawa wi yiiwelle mawu a dda Apwiya. 45Ayuda yoonilliiwa mulloko wa athwaayo yaaddalliwa ni ehache, enavaanyiha allotille Paulonnddo navettho enamullotella epewe. 46Koma Paulo ni Baranaba yaallota moollipa murima wi, “Waari woophwanella wi mawu a Mulluku ellotiwe wa nyuwaano vawaamba. Ekaamba yawi mohaakhoota, mohooniha wi khamunaphwanella okumi woohimalla, nineerewuuhiyani niye wa athu ayo ehiri Ayuda. 47#Yes 42.6; 49.6Vawi ella sika Apwiya yanilamulliiwa wi,

‘Kooweerani wi mukhalle owala wa athu ayo ehiri Ayuda,

wi ovullusa waka ophiye o makomello a ellapo yavatthi.’ ”

48Athu ayo ehiri Ayudaayo yiiwalliiwa ddenndda, yaahakallalla nave etitimiha mawu a Apwiya nave ayo yatthoolliwe wi yaakhelle okumi woohimalla, yaakhalla ookhulupilila.

49Mawu a Apwiya yaavuwa echigawo ettheeneeyo. 50Nave Ayuda yaaweeriha atthiyana oovuwa ni allopwana oolamulella ayo yahiri Ayuda koma oomullapella Mulluku wi yaambihe waahoosa Paulo ni Baranaba nave owiikarihawo o echigawonko. 51#Mat 10.14; Mrk 6.11; Luk 9.5; 10.11Amurummwa eellaalla yaattattha nthupi omanyalloni wiwa mowaavaanyiha nave evirellella olendwiiwa oya o Ikonio. 52Ookhulupilila a mu Antiyokeya yaaddalliwa ni ehakallallo owaaka Munepa Waweella.

Currently Selected:

Mitteko 13: MW2019

Highlight

Copy