Marcos 5
5
Jesus Hitskalajyawaklu Jeji Hixolune Kamtshine Himwatshri Piranapni
1Waneya tujra wnahlu tsru hipowha Gerasa sreta rapokna Jesus rasrukleneyma.
2Waneya kanawa ruptejinixka Jesus satu jeji kamtshine himwatshri yoptotlu. Yomletsh-yehi ruchpajyatka.
3Yomletsh-yehi rawjeta. Hike himukata hosturetlu hi yomuwatsaymako.
4Hixo kata hkachitkamkatka. Yomuwatsamka rostutka himyonota, hihpeji koxamka. Seyni yomuwatsni hiknajromtana hmixkonu tshinanu. Hike himukata himaletletlu.
5Psol-yetshnoko psol-hohneko himriji hiyrun-koxa yomletsh-yehi hsaplewjekananumxya. Rustajixnawa sotluya.
6Waneya rexinixkalu Jesus howukaya rasukamta wale nwaka. Hyoptsojityehitlu.
7Tsru saple rixa waneya wla htshina:
— Jesus, Hoyakalu ten-potu hajeru whene! Kluhe pixannatkano? Nanjityi Hoyakalu hiwaka tshinanu hi psaletpotutanunno.
8Wale wan-tshina klu tshinanu Jesus wan-tshinatkalu:
— Kamtshi, puchpakanutkalu xye jeji.
9Waneya Jesus hepomhalu:
— Klu hiwakyihe?
Waneya ruhitlu. Wane htshina:
— Nhiwakni Hixoluru klu tshinanu hixolurun-potwu.
10Waneya ranjipotutlu Jesus wale tshijne hma yokanaxyawakanupna.
11Wanekananru hixoluru porco hipjitastsi hnikakanaxyana.
12Waneya kamtshine hipokananu ranjitluna Jesus, wla htshinruna:
— Ptowutanwu porco mane wjihlojyawakanapa.
13Waneya Jesus hitshitna. Hiyáhoni ruchpakamtatkana kamtshine. Waneya porco-ne mane hitokote hjihlokamtatkana. Waneya hixolunni porco-nni hepi mil hetkoni hipjita hijrujyanatka. Hipowha rapokanna waneya hipowha rahyejyanna.
14Waneya porco-ne hinotatshine hasukamta. Runkaklewatna tsru poktshiya, hsana hajen-koxa.
Gerasa Poktshi Hajene Hma Yoptoxyawakanuplu Jesus Piranapni
Waneya hixolune yine hinamta retapyawakanapna klu rixanna.
15Waneya rapokluna Jesus nwaka. Retluna kkamtshithixapatshri hixoluru hwakanatanru. Htuplakanata. Kamkatkalu kkamtshithixapatshri, kahchinikanutkalu. Waneya rimyekatkana yine.
16Waneya kkamtshithixapatshri hetakanatjene hinkakna yine kkamtshithixapatshri pirana hiyrun-koxa porco-ne pirana.
17Waneya hipokananu ranjitluna wanna tshijne ruchpajyawakapa Jesus.
18Kanawa hyohrejinixka Jesus, kkamtshithixapatshri hanjitlu:
— Pixaymanapno.
19Seyni Jesus hi hitshitlu. Wane htshinhonuklu:
— Pipji pyanutka pimwanune yehi. Punkakanna yine Tsru Hixikatshriwa Hoyakalu rixa hepixlexyawakyi pirana. Punkakanna retwamonuxyayi pirana.
20Waneya ralimta. Hyinuwaka hinkaklewletatka Decápolis poktshi Jesus hixyawakatkalu. Ptowruneko tsru himyeklu hixa.
Jairo Tshinkaluru Hanjireru Piranapni
21Waneya hkopruhatatnaka Jesus kanawaya. Pa sreta wnahlu hya. Rapatjeyehitluna hixolune yine. Tsru powha wnaha rawa.
22Runa satu tsru hitakkaluru hanjihohnewakapji hajeru. Jairo hiwakatletatshri. Rexinixkalu hyoptsojityehitlu Jesus jixistsi.
23Waneya ranjitlu Jesus wane htshina:
— Nchítshoni tupnakastsinatkani. Punanu wala hoho putakamyotanu tutskalhiywakapa tiwejyawakapa.
24Waneya Jesus waleyma wane hya. Hixolune yine romkahitjene hipxakjemtlu.
Jesus Hiyrunu Katshinomtalo Piranapni
25Waneya twa sato suxo hihrahawatatshro. Doze hwalapu hima tuhrahawatatka.
26Hixo kpinrewaklerunemka pinixnixkalo hiyrunu tnikatlewatanatka ptowruka twinri. Wanepnawaka hi tuhlewata seyni tallikanatatka.
27Waneya tjempiranyehixinixkalu Jesus, wale tjimne sretako tunya hixolune yehi waneya tkamrukamkatlu.
28klu tshinanu wane tixa hichinikanuwleta: ‘Nkamrukamkachaxiniplu, nutskalhanutka.”
29Waneklukawa potuko tutukahrahatatka. Timaxnawa tomaneya tuhlewaxinrixka t-salewnakanatapinri.
30Waneklukawa Jesus himaxnawa ruchpakamtatka hpixkonu. Ruprotaka hixolune yin-yehi. Waneya repomha, wane htshina:
— Kathe kamrukamkatno?
31Waneya wla htshinruna rasruklene:
— Petna hixolune yine ripxakjexyawakyina wanepnawaka wane ptshina katu kamrukamkatno?
32Seyni Jesus heknojtata rexyawakaplu katukta yotnekamkatlu.
33Waneya suxo pikatka. Tutataka. Timata wane tixyawaka. Waneya Jesus jixistsi tuknojnawa. Tunkaklu tyeyixle pirana ptowruka.
34Waneya Jesus wan-tshinro:
— Chrima, palixle hitskalakyi. Pyanu kihlehchinikanpatkayi. Kihlepatkayi psalewnakanaxinriya.
Jairo Hchitsho Riwekkajyawaka Jesus Piranapni
35Waneya hyanumsakanaxiniwa Jesus, Jairo-pji hichpajikatshine htowrene hapoka. Waneya wane htshinruna:
— Pchítshoni hipnanatka. Klu tshinanhe pkojwakawalu hasruklewatatshri?
36Seyni Jesus jemachatlu xye tokantshi. Waneya wane htshinru Jairo, tsru hitakkaluru hanjihohnewakapji hajeru:
— Hi pimyekanu. Palixachatanu.
37Hi ritshitna pimrine himotsaxyawakaplu. Pedro, Tiago, João, repuru Tiago tsonu ritshitatka.
38Hjihlokapjixinixkaluna Jairo-pji, retlu sejirtshi, tshiyahatatshine saplewjepotutatshine.
39Waneya hjihlokamta. Waneya Jesus hepomhana, wane htshina:
— Klu tshinanhe xye sejirtshi, tshiyahlu? Mturo hi tupna seyni tumkachata.
40Seyni rutsolhitatluna Jesus. Hiyáhoni maleka hyokanatna ptowruneko. Waneya ranikna mturo hiru, tunro, waleymalun-koxa. Hjihlokna mtúroni hwiywaka.
41Waneya Jesus kosemyoxininatkalo mtúroni, wane htshinro:
— Talitá cumi! (Yokakkalurutka waleni: Mturo, ppalna!)
42Waneklutka mturo yotunotatka. Tyanatka klu tshinanu doze mhalerotni. Waneya ptowrunek-yine tsru himyeklu rixna.
43Waneya Jesus hijretna hike hmunkajyawakanupluna wale pirana. Waneya rohlujixlo mturo.
Currently Selected:
Marcos 5: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
