Marcos 4
4
Hitaklu Tataji Jiplaljekleru Piranapni
1Waneya hyinuwaka hasruklewletatnaka Jesus, Galileia powhastsiya. Rapatjeyehitluna hixolune yine hiyáhoni hyohreklo kanawa waneya htuplatatka. Rutneprijyalu ksatu hiyáhoni ptowruneko yine tshiji tsru powha wnaha hwa.
2Waneya hi heppika pirana rasrukna Jesus yapkaklu piranayma. Wane htshina hasrukleta Jesus:
3— Hjemanu. Satu jitaklewakleru hichpakamta rutaklewaxyawakapa.
4Wan-rixa hipalajretlu. Pimriji hatnu hapostsi hapoktatajita. Waneya runna kochitshine hnikloktatajitanruna.
5Pimriji sotlu hoho mteno tshijiwaka rapoktatajita. Waneya ruptshekhapkatamka klu tshinanu mteno tshijiwaka ruptshejya.
6Hiyáhoni ruchpajinixka tkatshi, hjimanatkalu, riprihanatka hitaklukaka hma matskinu tshinanu.
7Pimriji kona yehi hapoktatajita. Waneya konaymakananuko htseruwna hiyáhoni hkakmokanatkalu. Waneya hi kajinatkalu.
8Seyni hitataji kihle tshijiwaka hapokatshinetka hixolewnatka hiyáhoni satkakaji pejnu tshinanu trinta-ji rawatka ho sessenta-ji ho cem-ji rawatka.
9Waneya wane htshinna Jesus:
— Kajnakopnahi hyijnakoxyawakapa, hyijnakotanu.
Jesus Hasruklu Klu Hyapkakleta Hitataji Jiplaljekleru Pirana
10Waneya hyinixkana hixolune yine, doze rasruklene hiyrunu pimrine hitukatshine hepomhalu Jesus:
— Hanhe htshina xye yapkaklu pirana?
11Waneya wane htshinna Jesus:
— Hixamka henekka himaxyawakaplu mimatkotu pirana Hoyakalu pohirewaxyawaka pirana. Seyni pimrine tshinanu yapkaklu nkamhiylu ptowru piranako.
12Rexinna retmakna, hi rapkathojitna; hjeminna, hjemmakna hma mimatjeminixipna; wane hmixkanumka rehchinikanutanumkana, ramtakahchinikanyehitkomkana rektunna.
13Waneya repomhana Jesus:
— Hma mimatkanuklunru xye yapkaklu, hanu hixa himatletanru ptowruko yapkaklu?
14Pnuteko hya hinkakletna:
— Hoyakalu tokanu kkopalhimakleru kopalatlu Hoyakalu tokanu.
15Hatnu hapostsi hapoktatajitatshri yaholni tokantshi jematshine. Seyni runa Satanás kamtshi. Hkonyana tokantshi rajiyna hitakkaluru.
16Sotlu hanikajite hiknokkalune wannani tokantshi jematshine. Tokantshi hjeminixkana hyoptotmakluna tsru rumuwleymana.
17Seyni hi waneyna hitskina wanna. Hiyáhoni pchini tsonu hwatshinepni. Runinipa yahtaletlewlu ramtakanruna tokantshi hjemlerna.
18Kona yehi hapoktatajitatshine, wanna Hoyakalu tokanu jematshine pixkalune.
19Seyni kojwakahchinikanrukaka, ho pohirewnalu, ho poyikowlukaka xye hohne hexikaluru mixkowpotuta waneya xekoyaka hkakmokannatkalu. Hiyáhoni hi hjiwatanatkana.
20Seyni kihle tshijiwaka hapoktatajitatshine wannani Hoyakalu tokanu jematshine, rimatjemluna hiyrun-koxa hjiwatanutkana: satu trinta, satu sessenta, satu cem kata pnute hjiwatna.
Katalu Piranapni
21Wane koxa htshinna Jesus:
— Tanikkahe lamparina hachhaji hpuko tutajikowakapa? Hijeko hpukolahe tutakko? Hi wane tixanu. Seyni hi he lamparina kihle nikotle tixyawaka yehi tutakka?
22Klu tshinanu ptowruka yohimluru ruphujetko. Ptowru tokantshi yohimatkaluru rimathetko, runkakletko.
23Katukta kajnakopnapa hyijnakoxyawakapa, hyijnakotanu.
24Wane koxa htshinna Jesus:
— Hislahinri ptowruko hjemleru. Klu tshinanu yahotapi hixa hyahotapre, walako hyahoxika hiyrunu wala pso yohnika hyahoxika.
25Klu tshinanu katukta himatjemlu, Hoyakalu pnute rimatjemkakanru wale haté rimatjempotuxyawakaplu. Seyni mimatjemkatu haté rimatjemlejiji hkonanu Hoyakalu.
Hitataji Piranapni
26Wane htshina Jesus:
— Hoyakalu pohirewaxyawaka satu jeji jiplaljekleru pixkalutni. Ruplaljetatajita.
27Waneya rumka, hyotunota wanepnawaka hitataji hiptsheka. Htseruwna. Seyni jitaklewakleru hi himata klu tseruwnakaklu.
28Wale nanwaka jiwkajnawa tshiji mixkonu tshinanu. Mitshikananu ruptsheka. Wane pnute hhiwuwata. Wane pnutejiji ralixatka.
29Rali serowlexinixka waneklutka kastakapiya hkastajikatka klu tshinanu rapokatka hipapkolu hjijiroxikolpatka.
Mostarda-tataji Piranapni
30Waneya pnuteko htshina Jesus:
— Kluneru pixka rixa Hoyakalu pohirewaxyawaka? Kluneru nyapkakletanru?
31Mostarda-tataji pixka rixa. Mostarda-tataji honukla pimri tataji kayaho mtsernurut-potu.
32Seyni ttseruwniniklunu wala pot-tseruwnatshroni ptowru hejnuji munaya. Tsruplukaklo. Waneya kochitshine teno yapatshine hina toplukaka hkamhachalexyawakna hisure tshikle hpuko.
Jesus Yapkaklu Pirana Tsonuyma Runkaklewaxyawaka Piranapni
33Jesus Hoyakalu tokanu hinkakna yine hixo xye pixkalutu yapkaklu piranayma. Rumukata hakotlexyawakna pso runkakna.
34Yapkaklu minjeyma hi runkakna Jesus. Seyni rasruklene tsonu runkakpotutatka.
Jesus Kanniphalu Hitukkajyawaka Piranapni
35Waneya wale hohne kayi rixinixka Jesus wan-tshinna rasruklene:
— Tujra sreta wnahlu powha wyanu.
36Hiyáhoni hyokanatkatkana yine hixolune hyiywakapna. Waneya rasruklene yohreklo kanawa Jesus hwakanaxyawaka tlo. Waneya Jesus-ymapna. Hiyrun-koxa pimro kanawkaka waleymapa.
37Waneya hyopyoka tsru kanniphalu. Htsepohjetlo kanawa hiyáhoni katsephatkalo.
38Tostsi rumkakananumta Jesus hyostanojrehohoya. Hiyáhoni rasruklene komyeklu. Waneya wla htshinruna:
— Kasruklewakleru, hikehe pixahota wupniklunupa?
39Waneya Jesus yotunotatka htshihetjetlu kanniphalu hiyrunu tenoplojhal-koxa. Waneya wla htshinru hipowha:
— Potshke. Putukanutka.
Waneya rutukatka kanniphalu. Pokokha rixatka hipowha.
40Waneya repomhana Jesus:
— Klu tshinanhe hpikatka? Hixlahe malixaklenhi?
41Seyni tsru piklu rixna. Waneya wla htshinkakna wannakakluko:
— Hanu hixatshri koxni xye jeji? Klu tshinanu kanniphalu hipowha koxa yijnakotlu.
Currently Selected:
Marcos 4: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
