João 7
7
Jesus Molene Malixlenu Piranapni
1Waneya wane wkatanu Jesus hi Judeia tshijne hyapatka klu tshinanu judeu-ne, wane hajene, haluk-hiylaletlu. Hiyáhoni Galileia tshijne tsonu hyapjeta.
2Himretkaluru hohne judeu-neya, Tabernáculos tshinkaluru hohne hi howukatka.
3Waneya Jesus molene jejine wla tshinru:
— Pyanutka, Judeia tshijne nwaka pyanu. Waneya pimrin-koxa pomkahitjene pkamrure retanutkana.
4Klu tshinanu satu yineru ralujinri retjejpotuxikowaka, hi rumukata yohimletlu hkamhajetanru. Hiyáhoni xyekaka pkamhaleru pkamhajetanru tshinanu, ptowru yineru hetanu pkamhinri rimathexyawakapyina.
5Klu tshinanu hi himoleneko halixatkalu Jesus.
6Waneya Jesus hihitna, wla htshina:
— Nopapkolu hi hapokawa. Seyni hixa ptowru papkoko himukatatka.
7Xye tshijne hajene hi himukata hahnanutlethi hixa, seyni hita rahnanutna klu tshinanu hkamrurna phujewaka nutaklu rimathexikowaka hektutni hkamrurna.
8Hiyáhoni hixa tsru niklu nwaka hyanu. Seyni xawakni hitatshi hi wane nyanu klu tshinanu nopapkolu hi hapokawa.
9Hiyáhoni rali wan-tshinretatka, Galileia tshijne rutukatka.
Jesus Tsru Niklu Yehi Hyiywaka Piranapni
10Seyni rali yalexinixkana Jesus molene waneya wale koxa wane yatka Tsru Niklu nwaka. Halikaka hyohimta wane yaleta hmexikowakanupa.
11Hiyáhoni judeu-ne hijhamkatkalu Tsru Niklu yehiya. Waneya wla htshinatkana:
— Hanutkalhe wale?
12Tsru hihjekaklu hkamhana yine hixolune Jesus tshinanu. Satkaka wla tshina:
— Kihlerni wale.
Seyni pimrine wla tshina:
— Hike, wale halikaka yokwijetna yine.
13Seyni hi hixolune jemanu wane htshinanwakatluna Jesus klu tshinanu hpikna judeu-ne.
Hihjekaklu Hkamhiywakna Judeu-ne Piranapni
14Waneya Tsru Niklu hohnekaka hanikajitetkani Jesus wane yatka. Waneya Hoyakalupji nwaka ratskota waneya hyinuwaka hasruklewleta.
15Waneya judeu-ne himyekpotuta, wla htshinna:
— Hanhe ruchpajya xye rimatkalnu. Klu tshinanu hikeklu ruchtotatatka.
16Jesus hihitatkana, waneya wla htshina:
— Nasruklewaxya hi hitako nohchinikanni wale seyni waleni Hoyakalu nyokanatjeru hchinikanu.
17Satu yineru haluka kamhalexinri Hoyakalu halujyawaka, rimathetanru nasrukle hichpajyawaka pirana, ho Hoyakalu yehi hichpajikatshrira ho hitako ntokanra.
18Klu tshinanu waleko hipirana kochtshekatshri, rujhalu waleko hiwaka hpohixikolupa. Halikaka hanurukta himalwutlu hyokanatjeru, wale halikaka, halikaka pirana hinkakletatshri hiyrun-koxa hi kaweylu.
19Hi he Moisés-ni henekatkahi yonruru pirana seyni hi satuknako hixa homkahitlu. Hiyáhoni klu hikolukle tshinanhe haluk-hiylaletno?
20Waneya yine hixolune hihitlu, wla htshinatkana:
— Pix-hetko kkamtshite. Klu tshinanu kathe haluk-hiylaletanyi?
21Jesus hihitna, wla htshina:
— Nkamhatkalu himyekaklewatatshri hiyáhoni wale tshinanu hixa ptowrunekhi himyekatka.
22Halikakni Moisés-ni henekatkahi jiprojhaptojimtaxikolu pirana (seyni hi Moisés-ni ruchpajya seyni hitsrukatenni ruchpajya halikaka). Hapnanuxikalur-hohneko hjiprojhaptojimtakjixlu jeji.
23Jeji mturu honra hapnanuxikalur-hohne hjiprojhaptojimtakjixa hiyrun-koxa wan-hix-hixa Moisés-ni yonreru pirana hma mayxajyawakanupa. Hiyáhoni kluneru tshinanhe hahkanno hapnanuxikalur-hohne satu jeji mane psoluka nutskalajinixka?
24Hi hikolukanuwnayehlewatanu rohocha tshinanu tsonu seyni halikaka piranayma hikolukanuwnayehlewatanu.
Jesus Hyahot-kachrexyawakna Judeu-ne Piranapni
25Waneya satkaka Jerusalém hajeru wla tshina:
— Hi he xyekni jeji raluk-hiylaletna yine?
26Hetanru. Ptowru yineru hetanu hyanumsata. Seyni hike htshinruna judeu kosekatshine. Hiyáhola rimathetluna xye jeji halikakni Cristo tshinkaluru rixyawaka?
27Seyni hix-yinwu wimatlu xye jeji hichpajyawaka sreta hanurni. Seyni Cristo tshinkaluru hininipa hike yineru himatanru ruchpajyawaka sreta.
28Seyni Jesus Hoyakalupji rasruklewakanaxini tsru tokanuyma wla htshina:
— Hix-yinhi himathetno hiyrunu hi wale tsonu seyni himatkoxlu nuchpajyawaka sreta. Hi nuna hitako nalujyawaka tshinanu. Nyokanatjeru halikaka halikakni, seyni hi himathetlu.
29Seyni hita himathetlu, klu tshinanu wale yehi nuchpajya hiyrunu waleko yokanatno.
30Waneya wannamka haluka kachretlu. Seyni hi satukna yineru yahot-kachretlu klu tshinanu Jesus papkolu hi hapokawa.
31Waneya hixolune yine halixlu Jesus, wla htshinna:
— Cristo tshinkaluru hapojinipa xyekaka himyekaklewatatshri xye jeji kamhaleru yohnikalutlahe hkamhanu wale?
32Seyni fariseu-ne jemlu tokantshi yine hixolune tokanu Jesus piranyehi. Hiyáhoni fariseu-ne hiyrunu tsru hixikatshinwa sacerdote-ne yokanatna Hoyakalupji hinotatshine Jesus-mka hkachixyawakna.
33Waneya Jesus wla tshinna:
— Pchini tsonu nimwanhi waneya wane pnutepa nyokanatjeru nwaka nyanu.
34Hixamka hijhanno seyni hi hikchikanno. Hiyrun-koxa nyiywaka yehi hi himukata yaleta hixa.
35Waneya judeu-ne yinuwaka yanumsaleta wannakakluko, wla htshinatkana:
— Hanhe xawaka hyanu wmukchijyawakanuplu? Judeu-ne hipalatkalune judeu mixkane yehi hwatshine nwaklahe hyanu xawaka? Wanerhe xawaka rasruklewtapini?
36Klu xawaka raluka tshinreta wane htshinini, “Hixamka hijhinno seyni hi hikchikanno. Hiyrun-koxa nyiywakapa hi himukata yaleta hixa”?
Jesus Honha Hiweklu Heneklewatatshri Pixka Hixyawaka Piranapni
37Tsru niklu hijhakaluru hohne potu nikawninixka Jesus palna waneya tsru tokantshiyma wla htshina:
— Yineru hanuruktako honunnahatewatatshri yanwakatanno. Ruranu.
38Nalixjeru, Hoyakalu tokanu yonatkaluru tshinyawaka pixka rixanu: “Raji hitokote ruchpakhaxini honha hiweklu heneklewatatshri.”
39Seyni xye htshinyawaka, Hoyakalu Hiwejikaluru pirana hkochtsheka. Ptowru yineru Jesus halixatshri Hoyakalu Hiwejikaluru renejikowaka piranni wale. Seyni Hoyakalu Hiwejikaluru hi reneklewatawa klu tshinanu Jesus hi hipuktshi yehi riwekkajikawa.
40Waneya yine hixolune xye pirana hjeminiklunna wla htshinna:
— Xye jeji halikakni Hoyakalu tokanu hinkakletatshri potuko wikahwaklu.
41Pimrine wla tshina:
— Xyekni Cristo tshinkaluru.
Seyni pimrine wla tshina:
— Seyni Cristo tshinkaluru hi hetko Galileia tshijne ruchpajini.
42Hi he Hoyakalu tokanu yonatkaluru wla tshinpiranyehitlu Cristo, Messias tshinkaluru Davi klopichapni hiyrunu Belém poktshi, Davi tshinkaluru poktshite hmatuxini Messias?
43Hiyáhoni yine kotspalahchinikankaka Jesus pirana tshinanu.
44Satkaka yine kachpiratlu Jesus seyni hi satukna yineru yahot-kachretlu.
Judeu Kosekatshine Malixyawakanru Jesus Piranapni
45Waneya Hoyakalupji hinotatshine satokanwakatna tsru hixikatshinwa sacerdote-ne hiyrunu fariseu-ne nwaka. Waneya repomhatkana rapokyehitjene, wla htshinna:
— Haklu tshinanhe hi hanikatkalu?
46Waneya Hoyakalupji hinotatshine wla tshinatkana:
— Hikeklu satu yineru hinkaklewata xye jeji pixka.
47Waneya fariseu-ne wla tshinna:
— Hix-koxlahe hyokwitatka?
48Petluhe satu judeu kosekatshri ho satu fariseu-ne halixyawaklu?
49Seyni nyi yine hixolune yonruru pirana mimatkane, Hoyakalu hapnokatkanna wanna.
50Nicodemos tshinkaluru, fariseu-ne hepire, Jesus mitshi hoyetshno yanwakatatshri wale wla tshinna:
51— Yonruru piranrahe hikolukanuwnayehjixlu satu yineru hma jemahchinikanyehitkoklunuwa hkamhalerukaka mimatpotutkonuklunuwa?
52Waneya wanna hihitlu, wla htshinruna:
— Pix-koxlahe Galileia hajeryi? Petjepotutanru Hoyakalu tokanu yonatkaluru klu potu htshina waneya pimatanru satu Hoyakalu tokanu hinkakletatshri wkahwakleru hi Galileia tshijne ruchpajini.
53Waneya satkaka waleko hipji nwaka hyatka.
Currently Selected:
João 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
