Génesis 9
9
Da na'maqataxac ñi qota'olec queso Noé
1Ñi qota'olec ỹaaneco' da no'uen la'qaatec queso Noé chaqai quesaua llaalqa, 'naaco':
—Ỹaatqajam 'xoico' nqai'ñii ca qachaalguii, no'xataxachijlco' na 'laua. 2Ná'ogue na isecỹac quena 'laua i'loxoltari' ma'le quena lqolonaxa caqamiri. Ná'ogue na ỹoipi chaqai na hueetalec na 'laua, chaqai cana huaaxai, ná'ogue saanema qamiri quiyim 'viiquiñitac. 3Chaqai shichii a'guii na iseripi, chaqai ana la ana qo'paq quecá'maq rishiỹa. Ỹim saanema qamiri. 4Qam 'uo' na 'oonoqui', ca' sqa 'guii: na la'at saqa' nague' naua leuo'. Ma' naua leuo' chaqainaua naua hueetauguilo da nca'laxa. 5Ca ỹim silliitalec ca lasauaxaset ca 'óna qom chaqai quiñi 'óna isecỹac caua leuo' caqamiri. Chaqai quiñi 'óna qom silliitalec ca lasauaxaset quiyim naqat ca nachaalataxac ca 'nejemalam.
6Chaqai no'm 'ue ca ỹalauat ca liỹa qom,
ca cá'maq liỹa qom ỹalauat ma'le ca'maxare;
ma' na qom co'na' qaỹo'uet,
ỹaatqajam 'nejem chi lashiquiaxaua ñi qota'olec.
7Qam qamiri 'xoico' nqai'ñii ca qachaalguii,
ca' no'xataxachilec na 'laua.
8Ñi qota'olec 'naapega qai'neeta so Noé chaqai saua llaalqa:
9—Hua' nagui, ca' sa'yiñi ca ña'maqataxac caqamiri chaqai quenaua qachaalaxahi', 10chaqai quená'ogue ná'maq iseripi riỹahitac chicqaugui añi rahiri huaxaỹaqse: na ỹoipi, chaqai na iseripi neloipi chaqai na neuequipi, chaqai ná'ogue na iseripi hueetalec ana 'laua. 11Ca dá'maq ña'deenaxac nagui caqamiri, ca' tot sadalaxat: ca' tot ñalauajñi na qom chaqai na iseripi, sodoota'a ca huaxaỹaq. Chaqai tot so'uet ca liỹa ỹaxat quiyim i'paxanlec quet nqai'en na 'laua. 12Dajo dá'maq itanec quedá'maq ña'maqataxac sqaica lqodoc so'uet caqamiri chaqai quená'ogue na iseripi: 13Nagui, ca' sillo'ot na naueguelec so qoñi'gue, ca' chaqaiso' só'maq itanec quedá'maq ña'maqataxac quena 'laua. 14Ca ỹim ma' naguelec nqaishin na 'laua ca naueguelec, ca' so qoñi'gue re'oq ma'le hueetalec na'maxare. 15Ma'le, ca' so'leente'te dá'maq ña'maqataxac so'uet na'le caqamiri chaqai quená'ogue na iseripi, quiyim tot qaica ca ỹaxat i'paxanlec nqai'en na 'laua, ca ralauataxan. 16Ca ma' so qoñi'gue re'oq, ca ỹim so'leente'te ma'le dá'maq ña'deenaxac sqaica lqodoc so'uet na'le quená'ogue na qom chaqai quená'ogue na isecỹac hueetalec ana 'laua. 17Ca' chaqaida dajo dá'maq itanec queda ña'maqataxac so'uet na'le quená'ogue na qom chaqai quena isecỹac quena 'laua.
Ca' chaqaida dá'maq la'qaatco' na'le ñi qota'olec queso Noé.
So Noé chaqai saua llaalqa
18So Sem, Cam chaqai so Jafet llaalqa so Noé, nenoxondec, chicqoraugui aso nahi'. Ca' so Cam chaqaiso' so leta'a so Canaán. 19Ca' chaqaisaua saua tres llaalqa so Noé. Ca' queso llaalqaipi saua'maxare, ca lotqai liỹa no'xalec na 'laua.
20So Noé ro'ueenataxantac quena 'laua, ca chaqaiso' só'maq 'auaxaic ỹanñi ana 'úva. 21'Uo' so na'xa'a, ca' so Noé ne'eto' queso lataxa, ca' quiñiugueto'. Ca' yí, neetauco' hueetauquio' ca lauo' na'daañi. 22Ca' so Cam só'maq leta'a so Canaán co'na' iuane'ta so leta'a Noé neetauec, ca' quepegueto saua dos lqaỹa', ca ra'qaataxanalo. 23Ca' so Sem chaqai so Jafet ỹacoonta aso nepooto, ca ipeguenlgoto naua lallaaco napoosa'ña, ca' ỹapoorelec so leta'a', qoshiisauo, ỹoqa'a ca ra'iisa'gue, qaiyi se iuanta so'maxare quiyim neetauec.
24Ca' so Noé co'na' ime'uegue so lquiñiuquichi, ca nelouec. Ca ỹa'deeno' dá'maq 'neeto' na'le so llaalec na'aasa. 25Ca 'naaco' queso'maxare:
¡Ỹaatqajam nishiuenec ma'le ñi Canaán!
¡Ca ñi'maxare chi na'ac ma'le quenaua dos lqaỹa'!
26Ca na' ime, ca 'naaco' qai'neeta:
Ñi ỹa'gaxala' qota'olec no'ueenaxat ca llicyaxac da Sem,
ca' da Canaán, ca' chi la'ac.
27Chaqai ñi qota'olec ỹaanem quiyim noquiiguec nqai'en da Jafet;
chaqai lauora nqai'en da Sem,
ca' da Canaán, ca' chi na'ac.
28Ca co'na' ime'uegue so nqodoc, ca' so Noé qaiyiita ỹovi' trescientos cincuenta ñaxari nca'leetauec. 29Ca co'na'le, ca ileu, qala' ỹovi' novecientos cincuenta ñaxari.
Currently Selected:
Génesis 9: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
