Génesis 7
7
I'paxanlec na 'laua
1Ca co'na' ime, ca ñi qara'gaxala' 'naaco' queso Noé:
—Quená'ogue na qomyipi quená'maq hueetauguilo nauajo ñaxari ỹaatqajam qaqamite' 'viichi'sac dá'maq sahotaque. Ca vichiguiño' noxoñirougui añi rahichi' naỹoxontashiguim riỹa'isaho naua qachaalaxahi'. 2Coñire'ogalo caua siete louaari chaqai aca siete 'aalo quená'maq iseripi ishit qaỹa'ic, qam 'oonoqui' ca ỹale chaqai 'oono'lli' aca 'aalo quená'maq se qaỹa'ic. 3Chaqai coñireu'alo caua siete 'aalo chaqai ỹale' quená'ogue ná'maq lashic na ỹoipi, qaiyi qaica ca na'laañi quena'maxare quena 'laua. 4Ma' ime'ueque nauajo siete na'xata', ca' so'uet ca ỹaxat ỹoviraxaterauec naua cuarenta na'xata' chaqai naua cuarenta piri. Ca' ¡sapalaxat ma'le quena 'laua ná'ogue ná'maq ỹo'ueenatec 'ue na lacat!
5Ca' so Noé ỹo'uet ná'ogue ná'maq qailarelec quiñi qara'gaxala'.
6Ca so Noé co'na' ỹovite' saua seiscientos ñaxari, na' so ỹaxat i'paxanleco' nqai'en na'le na 'laua. 7Ca' so Noé inoxono caso lahi' naỹoxontashiguim liỹaresaho saua llaalqa, chaqai aso loua chaqai saua latel, 'eetera'piguit so ỹaxat. 8Ca' na iseripi quená'maq qaỹa'ic chaqai quená'maq se qaỹa'ic, ná'maq ỹootegueri' chaqai ná'maq nqai'queetegueri', 9liỹaresaho so Noé na' inoxono caso lahi' dooseta'pe, ỹale chaqai ana 'aalo. Ca ipaquichigui dá'maq lelaataxanaxac ñi qota'olec.
10Ca co'na' ime' saua siete na'xata', ca' nac so ỹaxat i'paxanlec nqai'en na 'laua. 11Co'na' ime so 'auaxaic shiraigo quesaua diecisiete na'xata' queso liỹa shiraigo. Ca' chaqaiso' sojo na'xa'a viichiquio' na' so Noé ỹovite' saua seiscientos ñaxari, na' nachipishiguim na huaxaỹaq pa'aañi, chaqai nauachigui qai'neeta na piguim. 12Ca' queuguilo saua cuarenta na'xata' chaqai cuarenta piri quiyim naquetac so ỹaxat quena 'laua. 13Ca chaqaiso' sojo na'xa'a co'na' so Noé inoxonougui aso lahi', liỹaresaho saua llaalqa Sem, Cam chaqai so Jafet, chaqai aso loua chaqai saua tres latel. 14Liỹaresaho' ná'ogue nanchaqaina iseripi neuec, chaqai na nelo, chaqai ná'ogue nanchaqaina lashic na isecỹac nqai'queetajlec, chaqai na ỹo. 15Quená'ogue na isecỹac dooseta'pe, liỹaresaho so Noé na' inoxono caso lahi' naỹoxontashiguim. 16'Óna ỹale chaqai 'óna 'aalo quená'ogue na lashic na iseripi inoxono. Ca ipaquichigui dá'maq 'naaco' na'le ñi qota'olec queso Noé. Co'na' ime, ca ñi'maxare ỹapogui so lasom.
17Ca' ỹoviraxaterauec saua cuarenta na'xata' quiyim naquetac so ỹaxat. Ca co'na' nqo'ñishiguim so huaxaỹaq, ca' aso nahi' naỹoxonshiguim, ca chi ỹaỹoxontegueri'. 18Ca' so huaxaỹaq lama'xa nqo'neetashiguim, qam aso nahi' queeta quiyim naỹoxontashiguim. 19Ca' so huaxaỹaq chi nqo'neetashiguim, vire'to' na' ỹapolec ná'maq paguec lishicshi'megue qa' quena 'laua. 20Ca co'na' ỹapolec ná'ogue aná'maq paguec lishicshi'megue qa', qam qaiyiita liỹa nqo'ñishiguim siete metros liỹa. 21Co'na'le, ca' ileu ná'ogue na qom quena 'laua, chaqai na ỹoipi, chaqai na neloipi, chaqai na neuec iseripi, chaqai ná'maq nqai'queetegueri' quena 'laua. 22Ca' ileu ná'ogue ná'maq hueetalec na 'laua quená'maq 'ue da lca'laxa chaqai ná'maq ishit nacategaxan, ná'ogue ileu. 23Qaisauate' saua Noé chaqai sauá'maq neesaugui aso nahi' nca'lerec. Ca sá'ogue so liỹaripi qaỹapalaxat: so qomyipi, na nelo iseripi, chaqai na ỹoipi, chaqai na iseripi nqai'queetegueri', 24ma' na 'laua i'paxanejlco' na'le quesaua ciento cincuenta na'xata'.
Currently Selected:
Génesis 7: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.