Éxodo 8
8
1ca' 'naaco' queso Moisés:
—Mo'e', quirepegue' ñi Faraón. Ma' vichira'a, ca 'ñiraco': 'Neetasa' da la'qaatec ñi qara'gaxala': 'Xañirec quiyim eec na qomyipi ỹalamaxaret, qaiyi nqouagaxainot aỹim. 2Ma' no'm sqai 'xañirec na qomyipi quiyim eec, ca' ỹim ño'xataxajlec ná'ogue na na'laua'e' cana piyiloxoloxo. 3Ana lachiugue ỹaatqajam 'ec ni'ỹam ma'le cana piyiloxoloxo. Ime, ca' chicqochiguiñigui aso lachiugue, ca' ta'oga yi ra'aachi'. Ca inoxonougui ỹovirau'a yi relaqsoqochi' quiyi romalachi', chaqai na la'a' na rotaua'e'ipi, chaqai quena liỹa qauochi' laseripi, chaqai na nqatelaxanaxaqui, chaqai na naqaulatqa' na pan. 4Ma'le, ca' renojlec qami' ana piyiloxoloxo, chaqai na rotaua'e'ipi, chaqai ná'ogue na qauochi' laseripi.
5Ca' ñi qara'gaxala' 'naaco' queso Moisés:
—'Ñirapega ca Aarón quiyim ỹachaxanshiguim aca lashilete, quelec nqai'en na lachiuguellipi, ñaachipi, chaqai qai'imipi, qaiyi chicqochiguiñigui ma'le ana piyiloxoloxo, nenoxonshiguim, ca' taalec ná'ogue na 'laua Egipto.
6Ca' so Aarón quelec nqai'en sá'ogue so huaxaỹaq quiyi Egipto. Ca chicqañigui ana piyiloxoloxo, ca' no'xalec yá'ogue yi 'laua. 7Qam so 'viiquiaxairipi qai'neeta 'ne'tegue dajo queda lo'viiquiaxac. Ca no'xalec yi 'laua Egipto cana piyiloxoloxo. 8Co'na'le, ca so Faraón roỹaxane'ogalo' saua Moisés chaqai so Aarón, ca 'naaco':
—Nqouagaxaiñiỹot ñi ra'gaxalari qota'olec, qaiyi naqat caỹim chaqai quena iuo' laseripi ana piyiloxoloxo. Ca saxanec ma'le na qauori quiyim ỹo'uet aca lachitaxanataxanqate, ca ỹaanot ñi'maxare.
9Ca' so Moisés 'naaco' queso Faraón:
—Hua', nagui 'ñirapiguiỹa' lagui vi'saque quiyim sashiilaxanlec qami', chaqai na rotaua'e'ipi, chaqai na qauochi', qaiyi eec ana piyiloxoloxo quena ra'aachi' chaqai quena rotaua'e'ipi, ca' qanaata ana lachiugue hueetañigui.
10—Ma' nete'e —'naaco' so Faraón.
Ca 'naaco' so Moisés:
—Ca' chaqaida 'neeta ma'le, qaiyi 'yiiñi' quiyim qaica 'nejem ñi qara'gaxala' qota'olec. 11Ca' ana piyiloxoloxo ca'e ma'le ñi qauochi', ca' qanaata ana lachiugue hueetañigui. Ca' tot novira'a qami', na rotaua'e'ipi chaqai na qauochi' laseripi.
12Ca' so Moisés chaqai so Aarón inoxondec quiñi lauo' so Faraón. Ca na' ime, ca' so Moisés ỹashiila ñi qara'gaxala' quiyim loỹoote'oga ana piyiloxoloxo quiyi la'a' so Faraón. 13Ca' ñi qara'gaxala' ỹo'uet cá'maq rashiilaxantaque so Moisés. Ca ileu aná'maq piyiloxoloxo hueeta'ñi ca la'a', nasoxoc chaqai quena no'ueenaxa. 14Ca na qomyipi lapoon ana piyiloxoloxo leuaxai, ỹahota'ahi naua lapoonqa, ỹomaxata' na lahita se no'uen. 15Qam qaiyiita so Faraón, na' no'ueenlec quedajo, ca lotqai se ỹaqamaq chaqai se na'xaỹaxanalo saua Moisés chaqai so Aarón. Ca ipaquichigui dá'maq 'naaco' na'le ñi qara'gaxala'.
Qaro'goxona na ra'gaxan
16Ca' ñi qara'gaxala' 'naaco' queso Moisés:
—'Ñirapega ñi Aarón ỹacona ayi lashilete, ca ỹouaxanñigui na lamoxoỹaxa na 'laua, qaiyi ñigui ra'gaxan, ca no'xalec ná'ogue na 'laua Egipto.
17Ca' chaqaida 'neetetegue. Ca' so Aarón nanojshiguim aso lashilete, ca ỹouaxanñigui na lamoxoỹaxa na 'laua quiyi Egipto. Ca' ñigui ra'gaxan, ca se lo'daxat na qomyipi chaqai na iseripi. 18Ca' so 'viiquiaxairipi qai'neeta ỹahotaque ro'ueenataxana da lo'viiquiaxac quiyim ỹo'uet na ra'gaxan, qam se ishit ỹo'uet. Ca' na ra'gaxan queetalec quiyim sqai ỹaxanac na qomyipi chaqai na iseripi. 19Co'na'le, ca' so 'viiquiaxairipi 'naaco' queso Faraón:
—Chaqaiñi ñi qota'olec ñí'maq ỹo'ueetetac dá'ogue dajo.
Qam so Faraón qaiyiita se ỹaqamaq chaqai se na'xaỹaxan, ma' chaqaida 'naaco' na'le ñi qara'gaxala'.
Qaro'goxona aso qogo
20Ca' ñi qara'gaxala' 'naaco' queso Moisés:
—Ñi Faraón o'teetaxasom nete'e caso lachiugue. Ca' qami' ma' na'xa'atac, ca' qui', ca 'ñirapega: 'Eda da 'naac ñi qara'gaxala': 'Xañirec na ỹalamqateripi, qaiyi nqouagaxainot aỹim. 21Ma' no'm sqai 'xañirec quiyim eec na ỹalamqateripi, ca' ñilata qami' ma'le aca qogo, chaqai na rotaua'e'ipi, chaqai na qauochi' laseripi, chaqai quiñi qauochi' 'imec. Chaqai ná'ogue na lauo' na Egipto laseripi no'xagui ma'le cana qogo, chaqai vire'ta na 'laua. 22Ca ma' ỹovirelec quiyim ipaquichigui dajo, ca soỹoote'oga ma'le yi 'laua Gosén yí'maq neetalec yi ỹalamqateripi. Ca quiyi'maxare qaca aca 'oonole qogo ma'le, qaiyi qami' 'yiiñi' quiyim ỹim na'gaxala' seuetalec najo 'laua. 23Ca' ỹim soỹoote'oga ma'le na chi ỹalamaxareteripi quená'maq chi qauochi' laseripi. Ca' nete'e ỹovirelec nqaishin dajo.
24Ca' chaqaida 'ne'tegue so qara'gaxala'. Ca' novi' aso ỹaatqajam 'xoic qogo. Ca' taugui ñi lauo' lodegaxat so Faraón, chaqai naua la'aate' so lotauaripi, chaqai yá'ogue yi 'laua Egipto. Ca ma' paguelec ana qogo, ca ná'ogue ná'maq huaalec yi 'laua na'axat.
25Co'na'le, ca' so Faraón roỹaxane'ogalo saua Moisés chaqai so Aarón. Ca 'naaco':
—Mohi, quiipegue' ca qota'olec. Vigaxachii aca rachitaxanataxanqachii, ca 'ỹaañiỹot. Qam sqo quiỹa'e najo 'laua.
26Ca' so Moisés 'naaco':
—'E', se ỹa'maxañi quiyim shinqa'tegue dajo. Ma' ná'maq iseripi saanqot ñi qara'gaxala' qota'olec coqomi' 'ue da lichic, ma' quena Egipto laseripi lashiilec na'maxare. Ca no'm na Egipto laseripi iuanchigui quiyim savigaxataq ca 'óna quena iseripi nqouagaxaintacot na'maxare, caalata'm qaralauat, qarenaq quena qa'. 27Qam qomi' sahoqotaque quiyim qolaqpegue' yi 'laua qaica qom. Yi'maxare sovitaxa quecaua tres na'xata' qolqata. Ca' ma' sovitaxa, ca' savigaxataq aca qarachitaxanataxanqate, ca saanqot ñi qara'gaxala' qota'olec, qaiyi ipaquichigui nqaishinaq dá'maq la'qaatec ñi'maxare.
28Co'na'le, ca 'naaco' so Faraón:
—Hua', ỹim saxanterec qamiri quiyim quiipegue' yi 'laua qaica qom, qaiyi vigaxachii aca rachitaxanataxanqachii, ca 'ỹaañiỹot ñi ra'gaxalari qota'olec. Qam 'neeto' paguec qoỹoqo'teguelo qamiri quenajo, chaqai nqouagaxaiñitalec aỹim qai'neeta.
29Ca' so Moisés 'naaco':
—Ca ma' ỹim shique'e najo, ca' nete'e chaqa'ma' sashiila ñi qara'gaxala' quiyim ỹoỹoote'oga ana qogo caqami', chaqai quena rotaua'e'ipi, chaqai quena qauochi' laseripi, qam no'm sqai queeta qarayiñi'sac chaqai quepaqchi'sac na llaalqaipi so Israel quiyim eec ỹavigaxat aca lachitaxanataxanqate, ca' ỹaanot ñi qara'gaxala'.
30Ca co'na' inoxonec so Moisés quiñi lauo' so Faraón, ca nqouagaxainot ñi qara'gaxala'. 31Ca' ñi qara'gaxala' ỹo'uet dá'maq rashiilaxantaque so Moisés. Ca' aso qogo ca'e so Faraón, chaqai queso lotauaripi, chaqai queso lauo' laseripi. 32Qam so Faraón lotqai ỹa'ñaxat añi le'taxanata. Ca' sqai ỹaxanec quiyim eec so Israel llaalqaipi.
Currently Selected:
Éxodo 8: MCV91
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.