Éxodo 10
10
Qaro'goxona aso piñai
1Ca' ñi qara'gaxala' 'naaco' queso Moisés:
—Mo'e', quirepegue' ñi Faraón, ma' ỹim so'uet quiyim ñi'maxare chaqai na lotauaripi ỹa'ñaxat añi le'taxanata, ca' se na'xaỹaxan. Qaiyi seshit sachaxanem quiyim so'uet ná'maq chalego lecaic ỹo'uet ca ne'laxa, 2chaqai qaiyi qami' 'qaataxañita ma'le ca qachaalaxai'pi chaqai ca qauachi'ipi dá'maq shinta'gue quiyim seualaxaintac na Egipto laseripi, chaqai ná'maq chalego lecaic ỹo'uet da ne'laxa iuanchigui nqaishin na'maxare, qaiyi ya'yiiñii qamiri ma'le quiyim aỹim ná'maq ỹim na'gaxala'.
3Ca' so Moisés chaqai so Aarón querepegue' so Faraón, ca 'neraco':
—Ñi qara'gaxala' ñi qota'olec quena hebreoipi 'naac: ¿Chi' laquio' quiyim niñiiquishiñi' caỹim? 'Xañirec na ỹalamaxareteripi, qaiyi nqouagaxainot aỹim. 4Ma' no'm qaiyiita se na'xaỹaxañi', ñaq nolli'sañi, sqai 'xañirec na ỹalamaxareteripi, ca' nete'e ñila' aca piñai, taalec nqaishin ná'ogue na na'laua'e'. 5Ca' ca'maxare ỹapolec ná'ogue ma'le. Ca' se re'xo'ña na 'laua, ca' ỹa'ic ma'le ná'maq no'ueenauec caso qalachi, chaqai qai'neeta ỹa'ic ná'ogue na lo'ualaxa ana qo'paq quena no'ueenaxa. 6Ca no'xataxachigui ma'le na qauochi', chaqai na lauo' na rotaua'e'ipi, chaqai ná'ogue na lauo' na Egipto laseripi. ¡Ca da'maxare ỹaatqajam se qaiuanapega quesaua qata'alli' chaqai quesaua qapirilli' quesá'ogue so ñaxaripi, chi ỹovireta'a nauajo na'xata' seuqatauguilo!
Ca co'na' ime da letaxaỹaxac, ca' so Moisés naqalgoxoñi, ca' eec, ca'e ñi lauo' so Faraón. 7Ca co'na'le, ca' saua lotaua' so Faraón 'neraco':
—¿Chi' laquio' qarayaxanñi sojo ỹale? 'Maxaraic 'xañirec yijo qomyipi, qaiyi eec, quepegue' nqouagaxainot ca chi la'gaxala' qota'olec. ¿Se retañi'o' quiyim na Egipto mashic nqo'neetañi?
8Ca' so Faraón liỹo' roỹaxane'ogalo so Moisés chaqai so Aarón. Ca 'naaco':
—Mohi, quiipegue' nqouagaxaiñiỹot ca ra'gaxalari, cá'maq qota'olec caqamiri. Qam 'au 'ñiỹapiguiỹa' negue' cá'maq eec ma'le.
9Ca' so Moisés 'naaco':
—Qomi' ma' qolaq, ca' qariỹaatac na ñaaqaipioqui' chaqai na qo'xoiquipi, naua qochaalqa chaqai naua qochaale, chaqai ana qolo qagreta chaqai ana huaca, ma' coqomi' ỹaatqajam lemaqachic lodegaxat ñi qara'gaxala'.
10Qam so Faraón 'naaco' queso Moisés:
—¿Ca 'ñiitapego' quiyim ca ra'gaxalari liỹareta'pe qamiri ma'le, chaqai quiyim saseneterec qamiri chaqai naua qachaalaxahi quiyim oquii? ¡Ma' chaqa'ma' re'qoota quiyim se no'uen da ra'deenataxanaxaguii! 11Qam sqai 'ñii'tegue dajo. Qamiri quet nauá'maq quii ná'maq qomyipi mashic ỹi, ca nqouagaxaiñiỹot cá'maq ra'gaxalari, ma' chaqaida dá'maq viitaque.
Ca' so Faraón talaxanque quiyim qaỹo'derauec quiyí'maq neeta'ñi. 12Qam ñi qara'gaxala' 'naaco' queso Moisés:
—Chaxañirishiguim na rqai'laxachi', quelec nqai'ñi' na Egipto, qaiyi nanac ma'le ana piñai, qaiyi ỹa'ic ná'ogue na nanecse quena Egipto, chaqai ná'ogue aná'maq ỹitauec na'le aso qalachi.
13Ca' so Moisés ỹachaxanshiguim da lqai'laxat, quelec nqai'en yi Egipto. Ca' ñi qara'gaxala' ỹo'uet quiyim nanac so nonot chicqo'tegue da lqodoigue, ca' quelec nqai'en yi 'laua Egipto sá'ogue so na'xa'a chaqai sá'ogue so pe. Ca' queso liỹa nete'e, ca' so nonot lqodoiguesec noviraxato' aso piñai. 14Ca' ỹaatqajam no'qajlec nqai'en yá'ogue yi 'laua Egipto cana piñai. Se ỹauanapego' quen 'ue chaqai qaca liỹa na'le 'nejem sojo na'xa'a mashic ỹapaguelec aso piñai. 15Ma' mashic ỹapaguelec aso'maxare, ca' tot re'oq nqai'en na 'laua. Ca' ỹa'ic ná'ogue ana nanecse chaqai ná'ogue ana la ana qo'paq caná'maq no'ueenaxaỹo' na'le na' ime'uegue aso qalachi. Qaica ca no'ueenañi lo'ualaxa quiyá'ogue yi Egipto quena no'ueenaxa chaqai cana qo'paq.
16Ca' so Faraón chaqa'ma' roỹaxane'ogalo saua Moisés chaqai so Aarón. Ca 'naaco':
—Ỹim 'ue da ỹasauaxaset quiñi qota'a ñí'maq ra'gaxalari chaqai caqamiri. 17Qam ñi'xoresene'toto qamiri quiyim qainaquita nagui sqo quiỹapeguem da ỹasauaxaset chaqai quiyim nqouagaxaiñiỹot ñi qota'olec ñí'maq ra'gaxalari, quiyim naqata'a aỹim quedajo ñouaxanaxaset ralauataxan.
18Ca co'na' so Moisés inoxonec quiñi lauo' so Faraón, ca' nqouagaxainot ñi qara'gaxala'. 19Co'na'le, ca ñi qara'gaxala' ỹoỹoota'a nqai'en da taigue ca nonot, ca' ñigui nqai'en so nonot quesaxanaxaic, chicqa'gue da lauashiguim. Ca i'xat sá'ogue aso piñai, ca taañigui nqai'en aso huaaxai, leenaxat huaaxai toc. Ca' quiyá'ogue yi Egipto qaca aca piñai no'ueenañi. 20Qam ñi qara'gaxala' ỹo'uet quiyim so Faraón ỹa'ñaxat añi le'taxanata, ca se ỹa'maxaren quiyim eec so Israel llaalqaipi.
Qaro'goxona so napalaxa
21Co'na'le, ca 'naaco' ñi qara'gaxala' queso Moisés:
—Ỹicshiguim nqai'ñi' na rqai'laxachi' quena piguim, qaiyi 'ue ca napalaxa quená'ogue na 'laua Egipto, chi ỹovireta'a quiyim chi qaipootete'era.
22Ca' so Moisés ỹachaxanshiguim da lqai'laxat quena piguim. Ca 'uo' so napalaxa chalego lecaic quiyá'ogue yi Egipto. 23Ca' ỹovirerauec saua tres na'xata' sqaica ca qaiuana quena neuora chaqai sqaican reda quecá'maq neeta'ñi. Qam so Israel llaalqaipi neuanchiguiñi quiyí'maq neeta'ñi.
24Co'na'le, ca' so Faraón relaataxane'ogo' so Moisés, ca 'naaco':
—Mohi, quiipegue' ca ra'gaxalari, ca nqouagaxaiñiỹot. Ca 'xachii naua qachaalaxahi, qam no'ueenaqchiỹañi quenajo ana qalohipi qagreta chaqai ana huaca.
25Qam so Moisés 'naaco' queso'maxare:
—'E', ma' chaqaqami' nañaañirec ma'le cá'maq iseripi, cá'maq savigaxataq ma'le ma' sahoqe ca qarachitaxanataxanaxat quiyim saanqot ñi qara'gaxala' ñí'maq qota'olec. 26Chaqai ná'maq qoloipi se'xataq. Qaica ca ño'ueenaqtaqañi, ma' ma'le, ca' ñica'axagui, ca' 'ue ca seconaxau'a, ca' semaqachinaq ñi qota'olec ñí'maq qara'gaxala'. Ma' quiyim saqa' soviraq, ca saqa' sa'deenaq cá'maq souenaq quiyim semaqachinaq ñi qara'gaxala'.
27Qam ñi qara'gaxala' ỹa'ñaxat añi le'taxanata so Faraón, ca se ỹasenec quiyim eec so qomyipi. 28Chaqai so Faraón 'naac qai'neeta queso Moisés:
—Mo'e', 'ire'oguiyi, chaqai ỹaatqajam rovichisari'o' quiyim liỹa novichiro. Ma' ca na'xa'a quiyim liỹa novichiro quenajo, ca rillivi'.
29Ca' so Moisés 'naaco':
—Ỹa'maqachiguiñi da 'ñirac. Ca nagui tot ñovira'a qami'.
Currently Selected:
Éxodo 10: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
