Deuteronomio 34
34
Da lelauaxa so Moisés chaqai na' qaishinñi
1So Moisés chicqochi'ñi yi 'laua qaica qom quiyi Moab, ca taashi'megue aso quemaralec ladocai Nebo, ca' taalec ana roto aso qa' ladocai Pisga, só'maq naloota'a yi Jericó. Ca' quiyi, ca ñi qara'gaxala' ỹa'ajan nqai'en yá'ogue yi Galaad ỹovira'oga yi na'laua so Dan, 2chaqai yaua 'lauari quiyi Neftalí, Efraín chaqai yi Manasés, yá'ogue yi na'laua so Judá ỹovira'oga aso huaaxai leenaxat Mediterráneo, 3chaqai yi Néguev, chaqai yi ca'megue quiyi Jordán, chaqai yi quemarelec quiyi Jericó, yí'maq na'a' lodegaxat chaavisat, chi ỹovireta'a yi Zoar. 4Ca' ñi qara'gaxala' 'naaco' queso'maxare:
—Najo ná'maq 'laua ñallitalta' na' sachaxantac queso Abraham, Isaac chaqai so Jacob quiyim saanem ma'le na llaalqaipi. Ca' ỹim sahotaque quiyim huañita quiyim ỹaatqajam 'ajñisac, 'eno'm sqai noxoñira'a ma'le yi'maxare.
5Ca' chaqaida dá'maq 'neeta na'le so Moisés só'maq lelaatec ñi qota'olec ileualec yi 'laua Moab, ma' chaqaida dá'maq 'naaco' na'le ñi qara'gaxala'. 6Ca' qaishinñi queso ca'megue huaugui yi 'laua Moab, naloote'oga yi Bet-peor. Qam vire'ta nagui sqaica ca ỹa'den cá'maq qailla'ñi. 7Ca so'maxare ileu na' ỹovite' saua ciento veinte ñaxari, qam chi ỹovireta'a da lelauaxa, qam ñaq lo'yaxanqa naua nqote' chaqai ñaq quesaxanaxaic.
8Ca' so llaalqaipi so Israel noỹenteguelec so Moisés quesaua treinta na'xata' hua'ñi yi 'laua qaica qom quiyi Moab, ca' qaipacqajanchiguilo saua na'xata' quiyim nasouaxaqui' queso'maxare. 9Ca' so Josué, só'maq llaalec so Nun, chicqo'ot so Moisés da la'deenaxanaxa so'maxare, ma' so Moisés ỹashil-lec na'le so'maxare, ca nqouagaxainlec. Ca vichiguiño' so Israel llaalqaipi ỹaatqajam na'xaỹaxane'ta so'maxare, ca ipacqajanchigui dá'maq 'naaco' na'le ñi qara'gaxala' queso Moisés.
10Qam qaica ma' 'ue quet ca liỹa letaxaỹaxaqui ñi qota'olec 'nejem so Moisés quiyi Israel, quiyim ñi qara'gaxala' reloqota'guit quiyim retaqata'pegue', 11loqo'm quiyim ỹo'uet ná'ogue ná'maq se qaiuanapega, chaqai ná'maq ỹo'uet ca ne'laxa quená'maq qailarelec quiñi qara'gaxala' quiyi Egipto, chaqai queso nashi Faraón chaqai so lotauaripi, chaqai sá'ogue só'maq neetalec yi na'laua, 12loqo'm quiyim nalo'guit da lquesaxanaxa chaqai dá'maq lecaic da ỹo'uet, chaqai qaimaqachin quiyim iuanchigui nqai'en sá'ogue so llaalqaipi so Israel.
Currently Selected:
Deuteronomio 34: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
