1 Corintios 8

Cá'maq na'ic mashic qanqouagaxainlec quiyim qoỹaanot ca nashiilec nqolac

1Ca' nagui sa'xatema qamiri ca leloxoỹaxac ca na'ic mashic qanqouagaxainlec quiyim qoỹaanot ca nashiilec nqolac. 'Nesa ma' llic quiyim qomá'ogue sa'deenqachigui dajo, qam da qara'deenaxanaxa tai'a nqai'ne' qomi' da nque'guenataxanaxac. Qaidaata da ne'xorenataxanaxa ỹo'uet da qarañaqtaxac. 2No'm 'ue ca pe'taxantaque quiyim 'ue ca ỹa'den, ca' saqa'leca ca ỹa'den quecá'maq 'neeta quet cá'maq ỹaatqajam la'deenaxanaxa. 3Qam cá'maq nqo'ta ñi qota'a, ca' ñi qota'a ỹa'deenta ca'maxare.

4Vichiguiño' quecá'maq na'ic quiyim mashic qanqouagaxainlec quiyim qoỹaanot ca nashiilec nqolac, llic ma' ca nqolac ỹaatqajam qaica ca 'negue quena 'laua, ma' 'oonoqui' ñi qota'olec, qaica ca liỹa. 5'Eno'm 'ue quena piguim chaqai quena 'laua quená'maq qohinac quiyim qota'allipi, ca quedá'maq 'neeta dajo, ca 'xoic na qota'allipi chaqai 'xoic na na'gaxalateripi. 6Qam qomi' sa'deenqata quiyim 'oonoqui' ñi qareta'a, leenaxat qota'olec. Ñi'maxare ỹo'uet ná'ogue nanchaqaina chaqai ỹa'vii qomi', ca' qomi' lalamaxarete'. Chaqai 'oonoqui' so qara'gaxala', leenaxat Jesucristo, só'maq ñi qota'a ỹachigoxochichigui ná'ogue ná'maq hueetalecna, chaqai vire'talo qomi'.

7Qalaxam sqai ná'ogue ỹa'den dajo. Ma' ñaqa 'ue na naỹa'gue quiyim nqouagaxaintacot na nashiilec nqolac, ca' ñaqai queetalec nagui quena' 'ue na ỹa'ic najo na'ic, 'ec 'nejem nqai'en ca mashic qoỹaanot ca nqolac. Ca quedá'maq la'deenataxanaxac quiyim saqa' ra'ñi, ca se no'ueenaxat. 8'Nesa ma' llic quiyim cá'maq na'ic se sachigoxotqagui quiyim qomi' ỹa'maxarente' ñi qota'a. Ma' cá'maq na'ic, no'm sa'guinaq, se ishit quiyim noquigaqchiguita qomi' quiyim no'uen ca qano'ueenataxac; loqo'm quiyim se sa'guinaq, qaiyiita se noquigaqchiguita qomi', ca se no'uen qano'ueenataxac. 9Qalaxam telqataxañiỹo' quedá'maq 'ñiitari', quiyim qamiri a'guii canchaqaica na'ic, 'neeto' lotqai chicqochigui ca lasauaxaset nqai'ñii cá'maq saqa' ra'ñi da lpi'ỹaxac. 10Saloqojnaxana qami' quiyim ỹaatqajam 'yiiñite' dajo, ca no'm nqa'xañiriñi qui'i' quecá'maq hua'ñi ñaqai qaimaqachintac ca nashiilec nqolac, ca no'm 'ue ca qarqaỹa iuaneta'a qami' quená'maq saqa' ra'ñi da lpi'ỹaxac, ca' nahi ỹa'ñaxachigui lauel qui'ỹapogo queca na'ic mashic qoỹaanot ca nqolac. 11Ca' chaqaica quiyim mashic 'ue ca ra'yiinqui' chicqochigui quiyim na'laañi nqai'ñi' ca rqaỹa'e' saqa' ra'ñi ca lpi'ỹaxac quená'maq mashic ileualec qai'neeta so Cristo. 12Ca no'm qamiri sauaxachii ca rqaỹahi saqa' ra'ñi ca lpi'ỹaxac, ca pa'aiuo 'ue ca rasauaxashichii queso Cristo. 13Vichiguiño' no'm aỹim chicqochigui quiyim ca ỹaqaỹa 'ue ca lasauaxaset sauaxat ca na'ic quiyim sa'ic, 'maxaraic quiyim tot sa'ic ca la'at, qaiyi qaica ca 'ue ca lasauaxaset.

Currently Selected:

1 Corintios 8: MCV91

Highlight

Copy