1 Corintios 16
16
Qaỹo'uet aso notauanqate ná'maq mashic icoñiguit da na'qaatec neeta'ñi yi Jerusalén
1Qam quiyim 'viichii aca rotaanaxanqachii queca qarqaỹaripi qarpi'ỹaxauaripi, ca qaỹadenaxachichigui da ỹapaxaguinataxanaxac na' saanem ná'maq mashic icoñiguit da na'qaatec neeta'ñi yi' 'laua, leenaxat Galacia. 2Ca quena' ỹovire'oga ca 'auaxaic na'xa'a cayi semana, ca' quiñi 'óna caqamiri ỹa'ue aca ỹoỹoote'oga cacá'maq chi nalootau'a. Ca' ỹa'maxat, qaiyi se qaỹo'uet quiyim 'ue aca qalapon notaanaxanqate ma' sovitalo qamiri. 3Ca ma' sovitalo qamiri, ca' sa'vii caua qomi' selajtegue da Jerusalén quecauá'maq qomi' qanca'au'alo caqamiri. Ca' sa'ue aca ỹerecse, ca' i'xate' aca rotaanaxanqachii quiyi qarqaỹaripi neeta'anyi. 4Chaqai no'm qaỹouen quiyim ashic, ca' ñauequetecto ma'le caua'maxare.
Ỹaqatqajantari' da 'neeta da llicyaxac so Pablo
5Queda ỹicyaxac sahotaque shiquejlec ma'le yi 'laua, leenaxat Macedonia, ca ma' ime, ca saigue ma'le da Corinto. 6Sqoue sa'vii na'xata' sentauguilo qamiri, loqo'm ná'ogue na no'oomaxa sentauguilo qamiri. Ca ma' ime, ca' qamiri shichii yotauañii caca yinotaxaqui quecá'maq saigue ma'le. 7Ma' ỹim se sa'maxaren quiyim 'eco' chaqai sajalgoto qamiri. Ta'ta'a quiyim sa'vii caua na'xata' sentauguilo qamiri, no'm ỹasene'tem aỹim da ỹicyaxac ñi qara'gaxala'. 8Qam sahotaque sena'ñi na Efeso ỹovireta'oga ca na'xa'a, leenaxat Pentecostés. 9Ma' quena'maxare qaica ca yo'taxat quiyim so'ueenataxan, qaiyi 'xoic ca huelec so qara'gaxala', qam 'xoic na npa'guentac.
10Ca no'm ỹovitalo qamiri ca Timoteo, nquipichiỹa'pegue' quiyim ỹa'maqachiguiñi nqai'ñii quiyim neetauguilo qamiri. Qaica ca huapigui lauel nqai'ñii, ma' ca'maxare qai'neeta ro'ueenataxantac queda lo'ueenataxanaxac so qara'gaxala', 'nejem aỹim. 11Vichiguiño' 'maxaraic quiyim qaica ca liỹoqa'piguit ca'maxare. Ta'ta'a quiyim otauañii queda llicyaxac, qaiyi qaicanqaida, ma' ỹim ñauaantaque ma' liỹareta'pe caua liỹa' qarqaỹa', qaiyi ñauañiguita.
12Qam so qarqaỹa Apolos ỹaatqajam yipaca'a quiyim queguelo saua liỹa' qarqaỹa' quepegueto qamiri, qam sqai eec nagui. Qam eeco' ma' 'ue ca ledaaqa'.
Dá'maq co'uaataxanta niquinaxanaxaquipi
13Ỹaatqajam nelohitec, chaqai na'ñaxachii'tegue da rpi'ỹaxaguii. Na'maxachita, 'ñiitari' ca ỹale quesaxanaxaic. 14Quená'ogue ná'maq 'viichii ỹaatqajam quiichigui nqai'ñii da re'xorenataxanaxahi.
15Ca' nagui qamiri ỹaqaỹa', mashic 'yiiñita na llaalqaipi ca Estéfanas ná'maq 'auaxaic icoñiguit da na'qaatec quená'maq na'ñi yi 'laua, leenaxat Acaya, chaqai mashic ỹaanec da la'qaatec quiyim ỹotauan na qarqaỹaripi ná'maq mashic icoñiguit da na'qaatec. 16Qam sahotaque quiyim qamiri na'xaỹaxañii'ta ca qom 'neete'm saua'maxare, chaqai ná'ogue ná'maq rotaanaxantac chaqai ro'ueenataxantac. 17Qam nagui ñitoontac, ma' novite' yaua Estéfanas, Fortunato chaqai ñi Acaico. Ma' yaua'maxare ỹo'ueete' ná'maq sqai shichii 'viichii, ma' sqaicaua qamiri. 18Ỹaatqajam nqo'naxatec da na'ñaaqataxac da ñachaalataxac, chaqai qamiri qai'neeta. Ca' qaỹa'deena'alo caua qomi' 'neete'm saua'maxare.
19Na mashic icoñiguit da na'qaatec neeta'ñi na Asia ilatalo qamiri da liquinaxanaxac. Aquila chaqai Priscila chaqai na mashic icoñiguit da na'qaatec lapooqo' yi la'a' saua'maxare, caua'maxare ỹaatqajam 'xoic da liquinaxanaxac nelatalo qamiri, ma' qamiri lpi'ỹaxaua'. 20Ná'ogue na qarqaỹaripi ilatalo qamiri da liquinaxanaxac. Ca' ñi 'óna nqo'goq ma'le ca liỹa quiyim niquine'e', chaqai ỹaatqajam ne'xorenta'.
21Aỹim Pablo selatalo qamiri da iquinaxanaxac, sahote'e ana chi ñapoquena quiyim shiriñi.
22Ca no'm 'ue ca se nqo'ta so qara'gaxala' Jesucristo, ca ca'maxare hueetalec da chalego lecaic nouaxanaxaset. ¡Qami' qara'gaxala', ma'le sqaỹaloq rapilli'!
23Ca' so qara'gaxala' Jesucristo ỹaanema qamiri ma'le ca no'uen qayicyaxaguii. 24Qamiá'ogue qamiri selatalo da i'xorenataxanaxa chicqo'ot so Cristo Jesús. Ajá'a, ca' chaqaida 'neeta dajo.
Currently Selected:
1 Corintios 16: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.