Genesis 8

Tamya fisyum manalcun

1Chaypïtam Noemanpis lluy chucaru, mansu uywa cäcunämanpis Tayta Dios yalpalcul waywacta waywachimula. Jinaptinmi yacuca mirmatyälun. 2Chayüram chay jillpüśhanu tamya ćhämücäpis, lamarcäpi paćhyamücäpis manalcülun.#8.2 manalcülun ninanta waquincunaćhuꞌa “pasälun” nipäcunmi. 3Chaymi chay yacu punluläca allipi-allipïtá mirmayta allacuycun. Paćhac picha ćhunca (150) muyuntá yacuca allictañam mirmäla. 4Chaymi chay ćhunca anćhish (17) muyun anćhishyänan quilläta, barcuca Ararat nishan ulꞌüman taycüla. 5Chaynu masta-mastaña chaquiyaptinmi, ćhunca quillap allaycuynin muyuncätá altunnin ulꞌucunaca lluy camalämulaña.

6Chaypi tawa ćhunca (40) muyunpïtam Noe barcup bintanan lulaśhanta quićhälun. 7Jinalculmi wisculcäta caćhaycülun. Chaymi mana mayman lataycunanpäpis captin wicman cayman pälicaćhacun yacuca chaquinancama. 8Chaypïtam Noe yacuca chaquishanta yaćhananpä juc ulpaytañatac caćhaycülun. 9Jinaptinmi yacuca jinallala bundulayaptin maycäman lataycunanpäpis mana captin barcüman cuticamula. Chaymi Noe maquinman ulpaycäta lataycachil yaycaycachila.

10Chay anćhish muyunpïtañatacmi ulpaycäta yapa caćhaycülun. 11Chaymi aspilpuyaptinña ulpayca ulïbus jaćhap lapinta amucüśha cutïmun. Jinaptinmi yacuca mastaña mirmalpuśhanta Noe tantiala. 12Chaypi yapa anćhish muyunpïta ulpaycäta caśhan caćhaycüluptinmi manaña cutimulañachu.

13Ñatac Noe süta paćhac jucniyu (601) watanta liyaptinmi yacuca chaquilpuyälaña. Chay allaycuna muyunćhu, allaycuna quillaćhümi barcüpa atacunta Noe julüla. 14Chay ishcay ćhunca anćhishniyu (27) muyun, ishcay quilläćhümi yacuca lluyña chaquilpüla.

15-16Chaymi Tayta Dios Noeta nin: “Walmiquiwan, chuliquicunawanpis, llumchuyniquicunawanpis barcupïta yalapämuy. 17Chaynütac imaymana uywacunätapis, pälïcunätapis, śhullwaypa pulïcunätapis julamuy, jinantin pachäman lipäcul milapäcunanpä” nil.

18Chaymi Noe walmintin, chulintin, llumchuynintin yalapämula. 19Jinaman lluy imaymana uywacuna, śhullwaypa pulïcuna, pälïcuna, cay pachäćhu lluy cawsayniyücunaca masannintin-camam yalapämula.

20Chaypïtam Noe custumrinmannu lumiwan uycuna patacta pilaycula. Chayćhümi lluy chuya uywacunäpi, chuya pälïcunäpi uycuna chuyanninta aclaycul Tayta Diospa cañaycapula. 21Chay tuqui mishqui aśhnayca Tayta Diosman ćhäluptinmi nin: “Nunacunäpa śhunꞌun uchuyllanpi mana allincällaman atipacuyaptinpis cananpïtá jinantin allpäta, cawsäcunäta, uywacunätapis manañam imaypis caynu mućhuycachishächu.

22“Cay pachaca caśhancamá, talpuypis,

cusichapis, alalaypis, achachaypis,

tamya timpupis, usya timpupis,

tutapis, muyunpis canꞌalämi” nil.

Currently Selected:

Genesis 8: QVW

Highlight

Copy