Genesis 25

Abrahammi Cetura walmiwan yapacun

1Cro 1.32-33

1Ñatac Abraham Cetura śhutiyu walmiwanmi yapacüla. 2Payćhümi chulincuna cala: Zimram, Jocsan, Medan, Madian, Isbac, Suapis.

3Jocsanpa chulincunañatacmi Sebawan Dedan.

Dedanpa chulincunañatacmi: Asurim, Letusim, Leumimpis.

4Madianpa milaynincunañatacmi: Efa, Efer, Hanoc, Abida, Eldapis. Lluy paycunamari Ceturap milaynincuna capäcula.

5Ñatac Abraham lluy cäninta chulin Isaacmanmi uycüla. 6Abrahampa uywanacuśhan walminćhu chulincunamanñatacmi rigälucunacta uycula. Paycunactamari cawsaśhancama Isaacpa lädunpïta japächalcul, inti ishpimunan lädućhu yaćhachimula.

Abraham wañucuptinmi pampälälin

7Ñatac Abraham paćhac anćhish ćhunca picha (175) watam cawsala. 8Allin callpan cayaptinlämi Abraham wañucula. Awquilluncuna pampaläśhancämanmi apaśha cala. 9Chulin Isaacwan Ismaelmi Macpela maćhayman pampapäcula. Chay cayan Het lädu nuna Zoharpa chulin Efronpa ćhaclanćhu, Mamre malcap chimpanćhümi. 10Het caśhtapi lantishanmari cala.#Gen 23.3-16. Chayćhümi Abrahamwan walmin Sara pampaculcäla. 11Abraham wañucuptinmi chulin Isaacta Tayta Dios allinpä licaycula. Chay “Licamäní cawsä Tayta Diospa püsun” nishanćhümi Isaac yaćhala.

Ismaelpa milaynincuna

1Cro 1.28-31

12Ñatac Sarap, Egipto lädu uyway nunan Agar walmićhümi Abraham chulicula Ismaelta. 13Ismaelpa milaynincunañatacmi caycuna: wamä chulinmi Nebaiot, atimünincunañatacmi Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis, Cedemapis. 16Caycunam Ismaelpa ćhunca ishcayniyu (12) chulincuna, ćhunca ishcayniyu malcacunap puydïnincuna capäcula. Paycunap śhutintatacmi chay malcacunäpis apapäcun.

17Ismael paćhac quimsa ćhunca anćhish (137) watanta liyalmi wañucula. Chaymi awquilluncuna caśhancäman apaśha cala. 18Paypa milaynincunam yaćhapäcula Havilapïta aśhta Egiptop chimpan Asiria läduman lina Shur nishancama. Lluy wawꞌi-caśhancunap ñawpäninćhümi pay wañucula.

Jacobwan Esau näsishan

19Ñatac Abrahampa chulin Isaacpa milaynincunañatacmi caycuna: Abrahampa chulinmi Isaac. 20Isaac tawa ćhunca (40) watanta liyalmi Rebecawan cuscala. Rebecam Aram caśhta Padan-aramćhu Labanpa wawꞌi-caśhan Betuelpa chulin cala. 21Ñatac Rebeca machüra captinmi Isaac Tayta Diosta mañacula. Pay uyaliycuptinmi patayu licalïla. 22Chay patanćhu cä iñachancuna quiquinpula allicta saytanacuptinmi: “Caynu captinꞌa yanꞌalñaćh cawsäpis” nil Tayta Diosta tapula. 23Chaymi Tayta Dios nin:

“Ishcay malcacunam patayquićhu cayan.

Patayquipïñam ishcay malcacuna

laquinacüśha cayalcan.

Jucninmi sumä callpayu cacunꞌa.

Mayurcämi śhullcäta sirbinꞌa”#Rom 9.12. nil.

24Ishyacunan muyunca ćhämuptinmi awachacta ishyacüla. 25Puntacta näsimücämi pucash ächayu, jinaman jinantin aychanćhüpis wachasapa cacuña. Paytam Esauwan#25.25 Esau ninanꞌa hebreo limayćhuꞌa “śhaplasapa” ninanmi. śhutichäla. 26Ipantañatacmi näsïmun Esaupa ancunman chalapacüśha. Paytam Jacobwan#25.26 Jacob ninanꞌa hebreo limayćhuꞌa “ancunman chalapacun” ütac “ingañacü” ninanmi. śhutichäla. Paycunacta walmin Rebeca ishyacuptinmi Isaac süta ćhunca (60) watanta liyäla.

Wamä chuli caśhantam Esau lanticun

27Walaśhcunaca ñä wiñalälilmi Esau munti uywacunacta chalä caculläla. Jacobñatacmi chucllacunallaćhu jawca yaćhacü cala. 28Chulin Esau uywa apamuśhancunäta miculmi papänin Isaac payta masta cuyala. Rebecañatacmi Jacobta masta cuyala.

29Juc muyunmi Esau muntipïta pishipäśha cutimunanpä, śhätacta Jacob yanucuyäña. 30Chaymi Esau nin: “Jacob, sumämi pishipämú, ama chaynu caychu pucasapa śhätallayquita alaycallämay” nil. (Chaymi Esau, Edom#25.30 Edom ninanꞌa hebreo limayćhu “puca” ninanmi. nishanman śhutichäśha cala.)

31Niptinmi Jacob: “Wamä chuli caśhayquitala puntacta lanticämay” nin.

32Niptinmi Esau: “Micuypïñam wañucuyällá ¿imam ucaman wamä chuli caśhäcäpis?” nin.

33Niptinmi Jacob: “Chayurá canan-pachalla lanticämanayquipä limalicamay” nicuyan.#Heb 12.16. Chaymi Esau limalicuywan wamä chuli cayninta Jacobman lanticüla. 34Chaylämi Jacob tantactawan śhätacta Esauman uycula. Payñatacmi upyacuycul micucuycul pasacula. Chaynüpam wamä chuli cayninta Esau jalutacüla.

Currently Selected:

Genesis 25: QVW

Highlight

Copy