Genesis 15
15
Abrampa chulin cananpämi Tayta Dios limalicun
1Caycuna lluy pasäluptinmi Tayta Dios Abramta suyñuyninćhünu nin: “Abram ama manchacuychu; yaꞌami atajaycüniqui cayá; sumä allincätam ćhasquïcunquipis” nil.
2Niptinmi Abram: “Taytallay, Tayta Diosnillay, ¿imapämi imactapis uycamanqui, chulí mana cayaptinꞌa? Cay Damasco lädu Eliezer uywayní nunäpäćha caycunꞌa.
3“Milaynïta mana uyämaptiquiꞌa wasïćhu uyway nunäpäćha lluy tücäní canꞌa” nin.
4Niptinmi Tayta Dios: “Manamá chay nunapächu lluy tücäniqui canꞌa. Sinuꞌa quiquiquip chuliquipämi canꞌa” nin.
5Nilculmi waśhaman jululcul: “Má, sïlüta licay; atipalꞌa ayca uyllur caśhantapis fintäluy. ¡Chaynümi milayniqui caycunꞌa!” nin.#Rom 4.18; Heb 11.12.
6Abramñatacmi Tayta Diosman chalapacuśhanpa tincüninman allinpaña ćhasquiycuśha cala.#Rom 4.3, 9, 22; Gal 3.6; Stg 2.23. 7Jinaman Tayta Dios nin: “Caldeo lädu Ur malcapi julaycamul, cay tücäniqui allpacta maquiquiman uycunacpä limalicü Tayta Diosniquim cayá” nil.
8Niptinmi Abram: “Taytallay, Tayta Diosnillay ¿tücänïña cay allpaca caśhanta imanuypam tantiaycuśhä?” nin.
9Niptinmi Tayta Dios: “Quimsa watayu wäcacta, quimsa watayu capishta, ulu uwishtapis, chaynütac ulpaytapis, mallwantinta apamumay” nin.
10Chay nishantanülla Abram apalcamulmi ćhawpipi-cama uywacunäta cuchulcul licanacuyäta-cama ćhuläla;#Jer 34.18-19. pälïcunätañatacmi jinallacta. 11Chay aychacunämanmi wisculcuna atipacalcämula; jinaptinmi Abramñatac manchachila. 12Ñä inti jiꞌalpuyaptinmi Abramta puñuy aysälun. Chayćhümi manchanaśh sumä tutapay ñiticalpuptin manchälun.
13Chayćhümi Tayta Dios nin: “Milayniquicunam jucpa malcanćhu yaćhapäcunꞌa. Tawa paćhac (400) wata sumä ñacachisha uyway nunam sirbipäcunꞌa.#Exo 1.1-14; Hch 7.6. 14Ñatac chay sirbipacuśhayqui nasyuntapis yaꞌami tincüninman-cama mućhuycachishä. Jinaptïmi milayniquicuna imapis sumä cäniyü-cama chaypi yalapämunꞌa.#Exo 12.40-41; Hch 7.7. 15Amñatacćha allinlla awquishyanqui; taytayquip caśhancämanmi jawca pampaycuśhapis canqui. 16Ñatac cay allpaman tawa milayniqui pasäluptinlämi milayniquicuna cutipämunꞌa. Amhor läducunaca mana allinllaćhu cayalcaptinpis manalämi mućhuycachishächu” nil.
17Ñä aspilpüśha tutaña cayaptinmi juc urnu nina untayä licalïmun. Chaynütac nina walayäpis licalilcamulmi aycha cuchuśhancäpa ćhawpinpa pasäla. 18Chay muyunmi Abramman Tayta Dios limalicula: “Milayniquimanmi cay allpa uycuśhä canꞌa, Egiptop mayunpi Eufrates jatun mayucama.#Hch 7.5. 19Cay allpacunam cayan: Ceneo, Cenez, Cadmon, 20Het, Ferez, Refai, 21Amhor, Canaan, Gerges, Jebus läducunap allpancuna” nil.
Currently Selected:
Genesis 15: QVW
Highlight
Share
Copy
Want to have your highlights saved across all your devices? Sign up or sign in
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
