Genesis 13
13
Abrammi subrinun Lotwan laquinacun
1Chay Egiptopïmi Abram, walmintin jinaman subrinun Lotwanpis lluy ima cänincunawanpis Neguev läduman lipäcula. 2Abram allinpä licaśham cala; sumä-sumämi cacula üruncunapis, illaynincunapis, uywancunapis. 3Chay Neguev lädupïtam allipi-allipiꞌa Bet-el malcäcama ćhäpäcula. Chaypïtam punta yaćhaśhan Bet-elwan Hai malcap ćhawpinman cuticulcäla. 4Chayćhu juc uycuna patacta unay pilaycuśhancäćhümi Tayta Diosta Abram alawaycula.
5Ñatac cusca lishan subrinun Lotpapis uwishnincuna, wäcancuna, chucllancuna yaćhapäcunanpä capulam. 6Chaynu uywayü-cama capäcuptinmi cusca yaćhapäcunanpä, pastucunapis manaña camatityapäculachu. 7Chaymi Abrampa subrinun Lotpa uwish michïnincunawan allinnin läducunacta quitanaculcäla. Ñatac chayćhu Canaan, Ferez läducunäpis yaćhapäculatacmi.
8Chaymi Abram juc muyunćhu Lotta nin: “Juc caśhtallam canchic; amañari chaynu yaꞌanchicpis michïninchiccunapis ruyduyalcächunñachu. 9Cay jinantinćhu allpallá aclacunanchicpä cayanmi. Chayurá ichü läduman lishä niptiquiꞌa, allï lädumanćha yaꞌa lishä; allï läduman liptiquiꞌa ichü lädumanćha yaꞌa lishä” nil.
10Niptinmi Lot licaćhacul jinantin Jordan mayup patanćhu Zoar malcäcama michcayu caśhanta licälun. Chay michcayücämi Tayta Diospa wirtannu cacula,#Gen 2.10. ütac Egipto malcanülämi calapis. Chaynu cala Sodoma, Gomorra malcacta manaläpis fisyuptinmá. 11Chaymi inti ishpimunan jinantin Jordan mayu läduman Lot japächacüla. Chaynüpam Abram subrinun Lotwan laquinacälälila. 12Abrammi Canaan lädućhu quïdacula; Lotñatacmi lluy Jordan pampa malcacunäćhu, aśhta Sodomacama ćhäla. 13Ñatac Sodomaćhu yaćhäcunämi millachicuy mana allincunallaćhu cawsayninwan Tayta Diostapis piñachipäcula.
14Chaynu Lot japächacüluptinmi Abramta Tayta Dios nin: “Chay caśhayquipïta tawan läduman licaćhacuy. 15Cay lluy licaśhayqui allpätam anman milayniquimanpis wiña-wiñaypä uycuśhayqui.#Hch 7.5; Gal 3.16. 16Milayniquitapis awishquictanümi mana camacaycüta milaycachishä. Mayanpis ayca awishqui caśhanta yaćhaycücá milayniqui ayca caśhantapis yaćhaycunꞌaćhá. 17Chayurá maycamapis liyꞌari; cay jinantin allpa licaśhayquita maquiquimanmi ćhulaycamuśhä” nil.
18Chaymi Hebron lädup sircanćhu yaćhä Mamre nunap encinas nishan lantanćhu chucllanta Abram śhalcachila. Chayćhümi Tayta Diosta alawaycunanpäpis juc uycuna patacta lulaycula.
Currently Selected:
Genesis 13: QVW
Highlight
Share
Copy
Want to have your highlights saved across all your devices? Sign up or sign in
© 2022, AMWAN (Old Testament text)
© 2006, Wycliffe Bible Translators, Inc. (New Testament text)
Print copy NT 2006, Liga Bíblica del Perú
