Exodo 24

Tayta Dios limalicuśhantam yawarwan tacyalpachin

1Chaypïtam Tayta Dios Moisesta nin: “Cay caśhäcäman ishpipämuy Aaronwan, Nadabwan, Abiuwan, jinaman Israelćhu anćhish ćhunca (70) yaśhancunawanpis. Lluy paycuna unꞌulacuycul calullapïmi alawapämanꞌa. 2Am Moisesllam Yaꞌaman aśhuycamunqui. Puśhamuśhayquicunäpis nïtac jinantin malcäpis manam aśhuycälimunꞌachu” nil.

3Chaymi Moises jinantin malcäman lilcul Tayta Dios lluy nishanta willaycamula. Chaynu willaycuptinmi malcaca chaycuscalla nipäcula: “Tayta Dios niśhannüćha lulaycuśhun” nil.#Exo 19.8; Deut 5.27.

4Ñatac Tayta Dios lluy nishanta Moises isquirbilam. Chay walantinñatacmi wäla wälalla śhalcuculcul chay ulꞌup saytanćhu uycuna patacta śhalcachila. Jinalculmi ćhunca ishcayniyu (12) lumicunacta śhaycaycachila, Israelpa ćhunca ishcayniyu (12) aylluncunacta camalachïninwan. 5Chaypïtam Israelćhu müsunnincunacta caćhala malta wäcacta wañulcachil Tayta Diospä cañaycälinanpä, uycälinanpä. 6Moisesñatacmi chay uywap parti yawarninta tasunman camala. Partictañatacmi uycuna patacman chächuycula.

7Chaypïtam Moises jinantin malcäman Tayta Dios limalicuśhan camachicuyta lïgipäla. Chaymi malcaca nin: “Tayta Dios lluy nimäśhanchiccäta uyalicul lulaycuśhunmi” nil.

8Chayćhu malcäta yawarcäwan chächuyculmi Moises nin: “Cay yawarmi Tayta Dios yaꞌanchicpä lluy limalicuśhancäta tacyalpachin” nil.#Mat 26.28; Mar 14.24; Luc 22.20; 1Cor 11.25; Heb 10.29.

9Chaypïtam Moises Aaronwan Nadabwan, Abiuwan, Israelćhu anćhish ćhunca (70) yaśhancunawan ishpipäcula. 10Chayćhümi Israelpa Tayta Diosninta licälälin. Paypa jaluśhancämi sumä chipyayä janay pachänu, zafiro aläja luminu cacuña. 11Cay Israelpa puydïnin Tayta Diosta licäläliptin manamari wañuchilachu. Aśhwanpam chayćhu micapäcula upyapäcula.

Sinai ulꞌumanmi Moises ishpin

12Chayćhümi Moisesta Tayta Dios nin: “Cay ulꞌu caśhäcäman ishpilcamul alcamay. Cayćhümi lumipi tablachaćhu isquirbïsha camachicuynïta, yaćhachicuynïta uycuśhayqui caminaycälinacpä” nil.

13Chaymi Moises yanapänin Josuewan Tayta Dios caśhan ulꞌüman ishpila. 14Chay yaśhancunactañatacmi nin: “Cayllaćhümi alcapämanqui cutipämunäcama. Aaronwan Hurmi amcunawan canꞌa. Chaymi ima quijayquicunapis captinꞌa paycunacta niycälinqui” nil.

15Nilcul Moises ishpiyaptinmi pucutaylla ñiticalpula. 16Chayćhümi Tayta Diospa sumä caynin Sinai ulꞌüman taycämula. Chaymi süta muyun pucutaylla ñitiläcula. Anćhish muyuncäćhüñatacmi pucutaycäpi Moisesta Tayta Dios ayämun. 17Chay ulꞌup puntanćhu Tayta Diospa sumä caynintam jinantin Israel caśhtacunaca nina sumbaywan walayätanu licälälin. 18Moisesñatacmi chay pucutaycäpa śhunꞌunpa ulꞌüman ishpila. Chayćhümi tawa ćhunca muyun tawa ćhunca (40) tuta camula.#Deut 9.9.

Currently Selected:

Exodo 24: QVW

Highlight

Copy