Exodo 22

Imactapis pasapacülul cutiycachinanpämi nin

1“Mayanpis wäcacta, uwishta suwaculcul lanticülulꞌa ütac ćhipicülulꞌa, picha wäcactam cutiycachinꞌa. Uwishcäpïtañatacmi tawa uwishta cutiycachinꞌa.

2“Chay suwacuyaptin talïlul maꞌaśhanćhu wañüchiptinꞌa, chay nunaca, manam nuna wañuchicüpächu licaycuśha canꞌa. 3Sïchuśh muyunpaña wañüchilꞌa nuna wañuchicüpäñam licaycuśha canꞌa. Ñatac suwacuyal chalachicülulꞌa suwacuśhanpa ćhanintam päganꞌa. Maypi pägananpäpis mana captinꞌa quiquinmi lanticüśha canꞌa.

4“Sïchuśh wäca, aśhnu, uwish ütac ima uywacuna suwacuśhanta maquinćhu cawsayätalä talïluptinꞌa, suwacuśhancätawan juc mastalämi päganꞌa.

5“Ñatac mayanpis uywanta michiśhanćhu jucpa talpuyninta, däñupacücá quiquinpa allinnin üba talpuyninpïmi päganꞌa.

6“Chaynütac jaćhacunacta cañaśhanćhu pastu-pastunninpä mallülul trïgu tawäśhacunäman, cusichaycuypäña cäcunäman, talpuycunäman pasäluptinꞌa lluy cañaśhanpïmi päganꞌa.

7“Mayanpis illayta ütac imapis ćhaniyüninta nuna-masinman ćhulapacuptin, chay wasiman suwä yaycüca talichicülulꞌa juc mastalämi cutiycachinꞌa. 8Chay suwäta mana taliptinꞌa wasiyücämi fisman ćhulaycuśha canꞌa; ćhulachicuycäta quiquin chalaśhanta ütac mana chalaśhanta licaycuśha cananpä.

9“Mayanpis aśhnucta, wäcacta, uwishta, müdanacta, ütac imactapis chalacuycul maquinćhu uywayaptin, jucñatac: ‘Cay yaꞌapam’ ninꞌa. Chaynu captinꞌa fismanmi ćhaycachishä canꞌa. Chayćhu mayannintapis juchayu talishancämi juc mastalä päganꞌa.

10“Mayanpis mana licaptin aśhnunta, wäcanta, uwishninta, ütac juc uywa patacuśhanta, maꞌaśhactapis, wañüśhactapis, suwäśhactapis licalipacülulꞌa, 11quiquin mana lulaycuśhanta nunanmanmi limalicunꞌa Tayta Diosta licäpa ćhulaycul. Uywayücäñatacmi chay limalicuśhanman chalapacunꞌa. Jinaptinmi manaña päganꞌachu. 12Suwapacülulmi ichá śhalcachipunꞌa. 13Munti uywacuna wañulcachil micüluptinñatacmi manaña pägaśha cananpä puchünincunacta licachinanpä ćhulaycamunꞌa.

14“Ñatac uywa mañacuśhanta nunan mana licaptin imapis pasäluptinꞌa ütac wañüluptinꞌa päganꞌam. 15Uywa mañacuśhan nunanpa ñawquin imapis pasäluptinmi ichá manaña päganꞌachu. Ñatac lïtacuśha captinꞌa lïtacuyllantañam uycunꞌa.

Nuna-masinwan allin caycunanpämi nin

16“Ñatac manalä umricta lisï, mana limay-masiyu cayä wamlacta ingañalcul pinꞌayman julücá, custumrinmannu yaycapaculmi taytanta pägaycul cuscanꞌa. 17Wamläpa papänin cuscachiyta mana munaptinñatacmi ingañaśhanpïta päganꞌa yaycapacuśhanman tincüta.#Deut 22.28-29.

18“Rüjacunätá jucllactapis cawsayniyüta amam caćhaycapäcunquichu.#Deut 18.10-11.

19“Mayanpis uywacunawan anla lulayta luläcá wañuchisham canꞌa.#Lev 18.23; 20.15-16; Deut 27.21.

20“Mayanpis Tayta Diosta juc läduman ćhulaycul juc taytachacunacta cañaywan uycücunaca wañuchisham canꞌa.#Deut 17.2-7.

21“Mana Israel caśhtacunäta ama supayapachiychu nï uywayniquitanüpis uywaychu. Amcunapis Egiptoćhu pasacüllamari capäculanqui.

22“Mayanpis japanyäśha walmicunätapis, mana taytayücunätapis ama ñacachiychu.#Exo 23.9; Lev 19.33-34; Deut 24.17-18; 27.19. 23Ñacachiptiquiꞌa mañacuyninta uyaliycuśhämi. 24Chaymi piñacuyní walaypa-walayaptin ispädawan wañüchishä. Jinaptïmi walmin japanyäśha quïdacunꞌa; chulincunapis mana taytayu capäcunꞌa.

25“Waccha mayannin malca-masiqui cä nunäta illayta mañalꞌa juc nunacunänu illayniquip milayninta ama mañayalcaychu.#Lev 25.35-38; Deut 15.7-11; 23.19-20. 26Mañaśhayquipi müdananta chalachishuptiquipis inti manalä jiꞌalpuptin cutiycachinqui. 27Chay müdanallanmi ćhulacunanpäpis cayan. Mana cutiycachiptiquiꞌa imawan ćhulacunanpäpis manam capunchu. Chaymi yaꞌacta mañacamaptin llaquipayniyu caśhä-laycu atindiycuśhä.#Deut 24.10-13.

28“Fiscunäta ama jalutacuychu. Malcayquip puydïnintapis ama mana allinpä licaychu.#Hch 23.5.

29“Talpuyniquicunapïta, üba lantayquicunapïta cusichälul-pachalla apapämuy.

“Wamä chuliquitapis yaꞌamanmi uycamanqui. 30Chaynütacmi wäcayquicunap, uwishniquicunap punta wawinwanpis lulaycunqui. Anćhish muyun mamanwan caycachishayquipïtá chay pusä muyuntá uycamanquiñam.

31“Amcuna, yaꞌapä japächäśham capäcunqui. Chaymi munti uywacunap wañüchisha uywap aychancunactá ama micapäcunquichu.#Lev 17.15. Aśhwanpa allꞌucunämanmi alaycälälinqui.

Currently Selected:

Exodo 22: QVW

Highlight

Copy