Zakarii 8
8
Dɛnaa Lawa á re barka diɛ Zeruzalɛmu laanka a zaman ganaa
1Dɛnaa Lawa Pàãyiidɛnaa boo da ma nɛ, á pɛ:
2«Dɛnaa Lawa bɛ́ boo mɛn pii á ke:
Maa *Siɔn narɛ ǹ gɔn tá
baraa taãn-taãnɛ.
Bɛa kɔn-narɛɛ kɛ lɛ n kuĩ ma gɔ́ɔ̃ nɛ,
ka tɛ bɛ́ lɔn.»
3Dɛnaa Lawa bɛ́ boo mɛn pii á ke:
«Man wusii die Siɔn,
hiĩ, man wusii giɛ̃ Zeruzalɛmu.
Ǹ tá re Zeruzalɛmu bíi
"kiwi bɔlɔgoondɛnaa",
Dɛnaa Lawa Pàãyiidɛnaa a kele ke,
ǹ tá re bɛ bíi "Kele sonbore".»
4Dɛnaa Lawa Pàãyiidɛnaa n kɛ pii:
«Giĩ zizin laanka lɔ zizin tá re wusii doo
ǹ da giã Zeruzalɛmu a bǎã dadaran nɛ,
ǹ nə́ bàlà doɛ,
ǹ zizi kɔ taman yii.
5Kiwi lɛ a bǎã dadaran
tá re piɛ̃ ka nɛnyaanan nɛ,
nɛgiĩ laanka nɛlɔn lɛa,
sàn koe a nɛ.»
6Dɛnaa Lawa Pàãyiidɛnaa a da ǹ boo á ke:
«Bɛ̀ bɛ á kaãbaa ǹ sii lɛa
Izirayeli minin gialakunun kɛn yii li,
a kaãbaa ǹ sii lɛa
masɛ Dɛnaa Lawa Pàãyiidɛnaa yii li wa.
Dɛnaa Lawa Pàãyiidɛnaa
a da ǹ boo ne.
7«Dɛnaa Lawa bɛ́ boo mɛn pii á ke:
Taãn nɛ, má n pii,
man die maa zaman lɛ kirisibiɛ
ma bɔ-n lɛ̀nyɛɛn
laanka lɛ̀giala gánan nɛ.
8«Man die wusii ma da ǹ nɛ,
màn mɛn bɛ́ toɛ ǹ giã Zeruzalɛmu.
Ǹ tá re maa zaman biɛ,
ma dɔ á re ǹ Lawa biɛ,
Lawa pepere bɔlɔgoondɛnaa lɛa.»
9Dɛnaa Lawa bɛ́ boo mɛn pii á ke:
«Ka n foo taã.
Ka bɛ́ boon mɛnɛn miɛ pelo,
a din boon lɛn manɛ
ka ǹ ma Lawa a boo gii-dalin lɛ-n
Lawa a kion lɛ a gòã daa li
a doe waáraa.
10Lɛlɛ,
saraa goã minbuiin nɛn dí-n wa.
Là goã tɔɔn dí dɔ-n wa.
Zɔ́ɔn taman yii,
yii-nyɛɛ goã zii tɔ wɔ-n wa.
A giala, man má minbuiin nɛ tumaa
yii soo kɔn-a.
11Sɛnɛ, kanna,
Dɛnaa Lawa Pàãyiidɛnaa
a da ǹ boo á ke:
Zaman kɛa min mɛnɛn yii goã koo,
ma á re ǹ kuĩ ka lɛlɛ ǹ bɛ́ lɔn wa.
12Là nyantoro n die goɛ̃ a tan,
*rezɛ̃ dan tá re nɛ koe,
tán kɔsiɛ̃ mànan tá re bǐɛ̃ koe,
pele á re koe.
Maa zaman lɛ a min mɛnɛn yii
goã koo,
man die ǹ koe bɛn la kíɛ̃ lɛa.
13Zudaa laanka Izirayeli zaman,
ka bɛ́ ka goã sii a kɔnboe lɛa,
liɛ baraa we a paǹ li tɔrɔn bii,
kanna kəni, man die ka kirisibiɛ
ma barka da ka ganaa.
Nyɛ́ɛ nyan ka kũ doo wa,
ka n foo taã!»
14Dɛnaa Lawa bɛ́ boo mɛn pii á ke:
«Ka digolon bɛ́ ǹ nə́ ma foo yoo,
má golee goon la máa man
die baraa zɛnɛɛ ka nɛ.
15Sɛnɛ, kanna,
Zeruzalɛmu minin laanka
Zudaa minin lɛn,
má golee li máa man die bǐɛ̃
zɛnɛɛ ka nɛ.
Nyɛ́ɛ nyan ka kũ wa.
16 #
EFƐ 4.25. Ka doamaa bɛ nɛ ka kɔ gɔn
waa ǹ boon mɛnɛn lɛ,
ǹ nə́ ke:
Ka sonbore pɛ kɔn nɛ.
Ka kiri pepere wɔ kiri wɔ ǹ bǎãn nɛ,
ǹ mɛn bɛ́ là nyantoro koe.
17Ka nyan taasiɛ baraa wɔ
kɔn a paǹ li wa.
Ka nyan nə n liɛ soɛ la wa.
Bɛa sii bɔbɔnɛɛn kɛn lɛn
ba ma foo sii wa.
Dɛnaa Lawa a da ǹ boo ne.»
Lɛ-sɔɔ ǹ lɛawaa á re zɔ́n lɛawaa biɛ
18Dɛnaa Lawa Pàãyiidɛnaa pɛ ma-n kɛnɛn: 19Ka bɛ́ nɛn bɛ̀ ka n lɛ sɔɔ lɛ̀ a mui siibaa ǹ wɔ kɛ li, a soorobaa ǹ wɔ nɛ, a sɔbaabaa ǹ wɔ nɛ ka a fùbaa ǹ wɔ nɛ, bɛn tá re n bɔyɛɛ ǹ zɔ́n lɛawaan baa, piɛ̃-n ka nyɛnyaa laanka foo kɔɔ̃n nɛ, Zudaa minin ganaa. «Sɛnɛ, ka sonbore laanka là nyantoro narɛ.»
Tɔrɔ tumaa á re die Zeruzalɛmu
20Dɛnaa Lawa bɛ́ boo mɛn pii á ke:
Taãn nɛ,
tɔrɔ kɔsɔn ka kiwi gigiã minin
tá re wusii doo ǹ da Zeruzalɛmu.
21Kiwi goon a minin tá re pii
kiwi kɔsɔ wɔn manɛ:
«Ka daa,
wɔ n woe Dɛnaa Lawa
Pàãyiidɛnaa nyankoe,
wɔ ga li.»
Ǹ tá re wɔ lɛ sii ǹ pɛ kɛnɛn:
«Wɔ dɔn tá woe.»
22Taãn nɛ,
tɔrɔ gigiã pàãdɛnan tá re die Zeruzalɛmu,
ǹ da ga ma li, ǹ ma nyankɔ.
23Masɛ Dɛnaa Lawa Pàãyiidɛnaa
n kɛ pii ka nɛ:
Bɛa waáraa, tii tɔrɔ fù,
ǹ tumaa n bɔlɔ totoro pii,
bɛn tá re n gɔn parɛɛ
*Zuifu min a mɔnaa lɛkoro ganaa,
ǹ pɛ nɛ:
«Wɔ n li wɔ wo kunun n ni.
A giala,
wɔ ma mà Lawa n kun ka nɛ.»
Currently Selected:
Zakarii 8: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
