Marki 2
2
Yezu giĩ paǹ tumaa gere-a goon a busu nya
(MAT 9.1-8; LUK 5.17-26)
1Lɛawaa paa bɛ kio, Yezu wusoo á daa Kafaranaamu kiwi. Minin nə́ ma mà a tá piɛ. 2Zaman gigiã daa n lɛ sɔkɔn, kion gɔ́ɔ̃ pã, a kiɛnlɛ-a pã, yǎa min kɔsɔ a wɔ ǹ bǎã banban. Yezu goã ǹ darɛɛ Lawa a boo ganaa. 3Bɛa biikoo li, min sii daa ka giĩ paǹ tumaa gere-a goon ne Yezu li. 4Sɛnɛ, zaman lɛ taman yii, ǹ ba boe la ǹ tá n mɔrɛ a ganaa wa. Yezu bɛ́ kion mɛn nɛ, ǹ nə́ nɔmaa ǹ nə́ dii bɛ lɛ a kala la, ǹ ná a baã bii fɔ̃ Yezu din mìi la. Ǹ bǎã mɛn lɛ fɔ̃, ǹ nə́ giĩ paǹ tumaa gere-a lɛ dia Yezu la ka bɛ lɛ nɛ, a n naa nɛ a piì la. 5Yezu bɛ́ á bɛa minin kɛn lɛn goleemali yɛ, á tɔ́n pɛ giĩ paǹ tumaa gere-a lɛ nɛ: «Maa nɛ, n sii baraan nə́ n toa n nɛ.»
6Zuifun Lawa a landa sii-daraalin mɛnɛn nə goã giã-n tán walan, bɛn man nə́ goã taasɛ ǹ dinin gɔ́ɔ̃ nɛ: 7«Wàa na á baa giĩ kɛ á boo diɛ kɛnɛn? A n sɔ koe Lawa ganaa! Die n boe la a minbuiinin sii baraan toa ǹ nɛ, bɛ̀ á n bɔ Lawa dinsɔɔ̃ nɛ?»
8Yezu bɛ́ á ǹ taasiɛ dɔ̃ a din gɔ́ɔ̃-n gɔrɔ, á tɔ́n pɛ ǹ nɛ: – Wàa na á baa ka á taasiɛ kɛ miã we? 9Boo màn paa kɛ bii, ǹ mɛn a pɛ n naanaa? Ma á boe la ma pɛ giĩ paǹ tumaa gere-a lɛ nɛ: «N sii baraan nə́ n toa n nɛ», hinlaa «Yoo, n nə n piì saa n tɔ wɔ.» 10Sonbore, man li ka dɔ̃, mà pàã tá Min a Nɛgiĩ lon kanaa kɛ gɔ́ɔ̃ nɛ, a minin sii baraan toa ǹ nɛ.
Yezu tɔ́n pɛ giĩ paǹ tumaa gere-a lɛ nɛ: 11«Yoo lon, n nə n piì saa n wo piɛ.»
12Giĩ lɛ yoo, a ná a piì saa gɔrɔ, á soo min tumaa yii ni, á woo. Á kaãbaa da ǹ tumaa ganaa parsiini, ǹ tumaa goã Lawa guguru koe, ǹ nə́ pii: «Wɔsɛn nə tɔn kɛ miã yɛ duduu wa.»
Yezu a Levii bíi
(MAT 9.9-13; LUK 5.27-32)
13Yezu wusoo á woo Galilee tà lɛ-a. Min gigiã daa a li walan, á goã ǹ darɛɛ. 14A bɛ́ kiɛ̃ kiwi gɔ́ɔ̃ nɛ, á Alfee a nɛgiĩ Levii yɛ, giã-n tán wusuru si ǹ kion. Yezu tɔ́n pɛ nɛ: «Kɔ ma lɛ.»
Levii yoo gɔrɔ, á kɔ a kio lɛ.
15Bɛ kio, á màn bii kun ka a kialandɛnan lɛn nɛ Levii a kion. Wusuru-sili gigiã dɔ́ goã màn bii kunun ǹ ni, ka min kɔsɔn dɔn nɛ, ǹ tɔ baraa n minin lɛ-n, a giala, min mɛnɛn bɛ́ ǹ nə́ goã koe Yezu kio lɛ, ǹ gigiã n bɛ miã minin kɛn lɛn tɔrɔ lɛa. 16*Fariziɛ̃n landa sii-daraalin nə́ Yezu yɛ màn bii kun ka sii baraa-zɛnaalin laanka wusuru-silin ni, ǹ nə́ tɔ́n pɛ a kialandɛnan lɛn manɛ: «Wàa na á baa ka á màn bii kun ka wusuru-silin ni ka sii baraa-zɛnaalin gialakunun kɛn nɛ?»
17Yezu bɛ́ á bɛa boo lɛ ma, á tɔ́n pɛ ǹ nɛ: «Min kakan laadoo ba dagòã-dali ganaa wa, yǎa busulən. Min mɛnɛn bɛ́ n dinin biɛ min peperen lɛa, masɛ bie ma daa bɛn taman yii wa. Min mɛnɛn bɛ́ n dinin doɛ̃ sii baraa-zɛnaalin lɛa, man má daa bɛn taman yii.»
Yezu màn mɛn pɛ lɛ-sɔɔ wɔ paǹ li
(MAT 9.14-17; LUK 5.33-39)
18Ǹ kɔ́n pinaa, ZAÃ a kialandɛnan laanka Fariziɛ̃n kialandɛnan man nə n lɛ soɛ. Minin nə́ daa nɔ̀n da Yezu la kɛnɛn: «Wàa na á baa ZAÃ a kialandɛnan laanka Fariziɛ̃n kialandɛnan tá nɛn bɛ̀ ǹ nə n lɛ sɔɔ, nsɛ a kialandɛnan nə́ ǹ ba n lɛ soɛ wa?»
19Yezu tɔ́n boo giməə da ǹ nɛ a din wɔ gɔn la: «Lɔ tii ǹ zuũ a giaáran tá toɛ kunun ǹ ni, ǹ nə n lɛ sɔɔ? Haayii. Bɛ̀ lɔ tii ǹ zuũ lɛ tá kunun ǹ ni, ǹ ba boe la ǹ nə n lɛ sɔɔ wa. 20Sɛnɛ lɛawaan tá re die, ǹ tá re lɔ tii ǹ zuũ boe ǹ bii, bɛ̀ bɛa biikoo lɛ dɔ, ǹ tá re n lɛ soɛ.»
21Á wusoo á boo giməə kɔsɔ da ǹ nɛ a daraa wɔ gɔn la, á pɛ: «Min kɔ́n ba mɔnaa dii siɛ a mɔnaa zizi koo tã-n wa, a giala, mɔnaa dii lɛ á die n nyɔsɔkɔn, a mɔnaa zizi lɛ baã, a na a toɛ̃ lɛ gole kɔ doo.»
22Á wusoo á pɛ doo: «Min kɔ́n dɔ ba duvɛ̃ dii kiɛ màn zizin wa. A giala, duvɛ̃ dii lɛ á die yui, a màn zizin lɛn yu, n nɔmaa n bɔ̀nbaa n duvɛ̃ laanka n mànan nɛ. Sɛnɛ, min doamaa nɛ a duvɛ̃ dii kaa màn diin ni.»
Yezu boo mɛn da susu ǹ pii wɔ paǹ li
(MAT 12.1-8; LUK 6.1-5)
23 #
TDP 23.25. *Susu ǹ pii pinaa, Yezu n kiɛ̃ *belee wurun kɔnɔn nɛ. Beleen mɛnɛn bɛ́ zii la, a kialandɛnan lɛn nə́ kaa la, ǹ nə́ bɛ lɛ tɛn yiyiɛ. 24Fariziɛ̃n nə́ tɔ́n pɛ Yezu ni: «Ga n kialandɛnan lɛn zɛnaa ǹ sii-a, kɛ doamaa bie a n zɛnaa susu ǹ pii pinaa wa.»
25 #
SAM1 21.2-7. Yezu tɔ́n pɛ ǹ nɛ: «Davida sii mɛn zɛnaa, bɛ̀ màn-bii bɛ́ a ba a lon wa, ka bɛ lɛ pɛ sɛ́wɔ-n wa? Ǹ kɔ́n pinaa bɛ̀ bòo bɛ́ a ná a laanka a kialandɛnan kũ, 26a na á wɔ Lawa a Kion, wúlu-bɔlen kiã Abiataara a biikoo li, ǹ bɛ́ buurun mɛnɛn koɛ Lawa yɔrɔ-a wúlu bɔ ǹ màn lɛa, á bɛ lɛ saa á sɔ̃, a ná a kialandɛnan dɔn gɔ nɛ. A da yaa, min kɔ́n doamaa bie a bɛa buuru lɛ sɔ̃ wa, yǎa wúlu-bɔlen dininsɔɔ̃nɔn.»
27Yezu tɔ́n pɛ Fariziɛ̃n lɛn manɛ: «Lawa na á susu ǹ pii lɛ koa minbuiin nɛ a laadoo bǐɛ̃ kɔ taman yii, a bie á minbuiin nɛ zɛnaa susu ǹ pii taman yii wa. 28Bɛ lɛ din taman yii, minin bɛ́ boe la ǹ siin mɛnɛn zɛnaa susu ǹ pii pinaa, masɛ Min a Nɛgiĩ n susu ǹ pii mìi la, pàã á ma lon ma bɛn pɛ.»
Currently Selected:
Marki 2: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
