Matiə 9

Yezu giĩ paǹ tumaa gere-a goon a busu nya

(MAR 2.1-12; LUK 5.17-26)

1Yezu wɔ goo ne, á wusoo á tà kuru, á woo a din a kiwi. 2Minin nə́ daa a li ka giĩ paǹ tumaa gere-a goon ne piì la. Yezu bɛ́ á bɛa minin lɛn goleemali yɛ lɔn, a na á pɛ giĩ paǹ tumaa gere-a lɛ nɛ: «Maa nɛ, n foo taã! N sii baraan nə́ n toa n nɛ!»

3Landa sii-daraalin kɔnɔn nə́ nɔmaa ǹ nə́ pɛ kɔn nɛ: «Giĩ kɛ n sɔ koe Lawa ganaa.»

4Yezu nə́ ǹ taasiɛ dɔ̃, á pɛ ǹ nɛ:

– Wàa na á baa ka tá bɛa taasiɛ naarɛn kɛn we? 5Boo màn paa kɛ bii, ǹ mɛn a pɛ n naanaa? Ma pɛ: «N sii baraan nə́ n toa n nɛ,» hinlaa ma pɛ: «Yoo lon n tɔ wɔ.» 6Sɛnɛ, màn mɛn bɛ́ toɛ, ka dɔ̃ mà pàã tá Min a Nɛgiĩ lon kanaa kɛ gɔ́ɔ̃ nɛ a minin sii baraan toa ǹ nɛ.

Bɛ lɛ na á toa, á tɔ́n pɛ giĩ paǹ tumaa gere-a lɛ nɛ: «Yoo lon, n nə n piì saa, n wo piɛ.»

7Giĩ lɛ yoo á woo piɛ. 8Zaman lɛ bɛ́ á bɛ yɛ lɔn, nyɛ́ɛ nə́ ǹ kũ parsiini. Ǹ nə́ goã Lawa guguru koe, bɛ miã pàã kɛ lɛ a kɔ minbuiinin la taman yii.

Matiə a bíi

(MAR 2.13-17; LUK 5.27-32)

9Yezu soo á n bɔ walan. A bɛ́ kiɛ̃, á giĩ goon yɛ giã tán-a wusuru si ǹ kion, á tɔ n Matiə. Á tɔ́n pɛ nɛ: «Kɔ ma lɛ!»

Matiə yoo gɔrɔ á kɔ lɛ.

10 # LUK 15.1-2. Yezu bɛ́ màn bii Matiə a kion, wusuru-sili gigiã daa giã tán, kun ka min kɔsɔn dɔn nɛ, ǹ tɔ baraa n minin lɛ-n. Ǹ nə́ màn bii kun ni, a laanka a kialandɛnan nɛ. 11*Fariziɛ̃n bɛ́ ǹ nə́ bɛ yɛ, ǹ nə́ tɔ́n pɛ a kialandɛnan lɛn manɛ: «Wàa na á baa kaa Mìinaa lɛ tá màn bii kun ka wusuru-silin ni, ka sii baraa-zɛnaalin gialakunun kɛn nɛ?»

12Yezu bɛ́ á ǹ lɛ ma, á tɔ́n pɛ:

– Min kakan laadoo ba dagòã-dali ganaa wa, busulən laadoo ná a ganaa. 13#MAT 12.7; OZ 6.6. Lawa pɛ a boo ne: «Man giɛ li ka makara bɔ minin ganaa, ma bie giɛ li ka *wúlu mànan kɔ ma la wa.» Ka woo ka n daraa bɛ ganaa, ka a giala ma. A giala, min mɛnɛn bɛ́ n dinin biɛ min peperen lɛa, ma bie má daa bɛn taman yii wa, min mɛnɛn bɛ́ n dinin doɛ̃ sii baraa- zɛnaalin lɛa, man má daa bɛn taman yii.

Yezu boo mɛn da lɛ-sɔɔ wɔ paǹ li

(MAR 2.18-22; LUK 5.33-39)

14Ǹ kɔn pinaa, Zaã, *batɛmu da minin ganaa wole a kialandɛnan nə́ n zɔ̃ ǹ nə́ dɔ Yezu li, ǹ nə́ nɔ̀n da la: «Wàa na á baa wɔsɛn laanka Fariziɛ̃n tá nɛn bɛ̀ wɔ n lɛ sɔɔ, nsɛ a kialandɛnan nə́ ǹ ba n lɛ soɛ duduu wa?»

15Yezu tɔ́n boo giməə da ǹ nɛ a din wɔ gɔn la á pɛ: «Lɔ tii ǹ zuũ a giaáran tá boe la ǹ nə n yɔrɔ kɔsɛ n lɔ tii ǹ zuũ din toa kunun ǹ ni ya? Haayii. Sɛnɛ, lɛawaa tá re die, ǹ tá re lɔ tii ǹ zuũ boe ǹ bii, ǹ tá re n lɛ soɛ bɛa biikoo li.»

16Á wusoo á boo giməə kɔsɔ da ǹ nɛ, a daraa wɔ gɔn la, á pɛ: «Min kɔ́n ba mɔnaa zizi koo tiɛ̃ ka mɔnaa dii lɛkoro-n wa. A giala, mɔnaa dii lɛ á die n nyɔsɔkɔn, a mɔnaa zizi lɛ baã, a na a toɛ̃ lɛ gole kɔ doo.»

17Á wusoo doo á boo giməə kɔsɔ da ǹ nɛ, á pɛ: «Ǹ bie duvɛ̃ dii dɔ kiɛ tɔn zizin ni wa. A giala, duvɛ̃ dii lɛ á die yui, a tɔn zizin lɛn yu, n nɔmaa n bɔ̀n baa n yɔ laanka n mànan nɛ. Duvɛ̃ dii nə n kiɛ tɔn diin ni sɛn. A din tumaa n boe la a n koa miɛ̃ sɔnbɔraanɛ.»

Yezu nɛniɛ gere yii kaa

(MAR 5.21-43; LUK 8.40-56)

18Yezu bɛ́ bɛa boon lɛn diɛ, Zuifun goledɛnaa goon nə́ daa kaa tán-a a yɔrɔ-a, á pɛ nɛ: «Maa nɛlɔ na á gã sisia sisia. Sɛnɛ, daa, n nə n gɔn da la, n Lawa nyankɔ nɛ, a yii á die kiɛ.»

19Yezu laanka a kialandɛnan nə́ yoo, ǹ nə́ kɔ lɛ ǹ nə́ woo.

20Lɔ goon ne, a lɛ̀ fulupaa n ke nɔmaa-n lɔn mà kaa ǹ busu gɔn. Á n zɔ̃ á dɔ Yezu li, á n toa a kio, á n gɔn da a mɔnaa lɛkoro ganaa. 21A giala, a na á goã taasɛ a din gɔ́ɔ̃-n kɛnɛn: «Bɛ̀ masɛ n boe la man gɔn da a mɔnaa din ganaa kooro, masɛ a busu kɛ n nyɛɛ.»

22Yezu nə́ n yii bɔyaa á yɛ, á tɔ́n pɛ nɛ: «Maa nɛlɔ lɛ, n foo taã! N din a goleemali na á n kirisibaa.»

A din bǎã-n gɔrɔ lɔ lɛ kakabaa yɛ.

23Yezu bɛ́ á dɔ goledɛnaa lɛ a piɛ, á zaman gole yɛ, kɛn manə n lala diɛ, kɛn man a bĩ ǹ pìi pii. 24Á tɔ́n pɛ ǹ nɛ: «Ka soo ka n bɔ kànaa. A giala, nɛnɛn lɛ bie á gã wa, a n nyuù we.»

Ǹ nə́ yaa wɔ Yezu ganaa. 25Ǹ bɛ́ ǹ nə́ zaman lɛ loo ǹ nə́ soo kanaa ǹ mɛn waáraa, Yezu wɔ kion lɛ nɛ, á nɛnɛn lɛ kũ a gɔn-a, nɛnɛn lɛ yoo lon. 26Bɛa boo nə́ n da wɔlɔ la bɛa gána lɛ din tumaa nɛ.

Yezu yii tere-a min paa yii bũ

27Yezu soo á n bɔ walan. A bɛ́ kiɛ̃ bǎã kɔ́n nɛ, yii tere-a min paa yoo, ǹ nə́ kɔ lɛ ka lɛ-dɛ nɛ, ǹ nə́ pii: «Kii Davida tɔrɔ, makara bɔ wɔsɛn ganaa!»

28Yezu bɛ́ á dɔ piɛ, yii tere-an lɛn nə́ n zɔ̃ ǹ nə́ dɔ a li, Yezu nɔ̀n da ǹ la: «Ka waa la mà masɛ á boe la ma ka yiin bũ koɛɛ?»

Ǹ nə́ pɛ Yezu ni: «Taãn-taãnɛ, Mìinaa!»

29Yezu nɔmaa á n gɔn da ǹ yiin ganaa, á pɛ ǹ nɛ: «A n zɛnaa ka nɛ, a kɔnpɛ ka kaa golee masɛ li ni!»

30Ǹ yiin nə́ n bũ. Yezu nə́ n gɔn waa ǹ nɛ, á pɛ ǹ nɛ: «Haya! Ka nyan toa min kɔ́n bɔ a siére-a wa.»

31Sɛnɛ, ǹ nə́ woo ǹ nə́ Yezu boo da bɛa gána lɛ din tumaa nɛ.

Yezu giĩ lɛ tere-a goon a busu nya

32Ǹ bɛ́ woe ǹ mɛn waáraa, minin nə́ daa ka giĩ goon ne Yezu li, a boe boo diɛ la wa, a giala nɔ̀ɔnɔn man nə́ goã a ganaa. 33Yezu bɛ́ á bɛa nɔ̀ɔnɔn lɛn loo lɔn, lɛ tere-a lɛ ná a giala kɔ á boo da. Zaman lɛ nə́ n kaãbaa parsiini, ǹ nə́ pɛ: «Wɔsɛn bin ni kɛ miã yɛ Izirayeli gána-n wa!»

34 # MAT 10.25; 12.24; MAR 3.22; LUK 11.15. Sɛnɛ, Fariziɛ̃n man nə́ goã pii: «Nɔ̀ɔn babaraan goledɛnaa n bɛa nɔ̀ɔnɔn lɛn loo ǹ pàã koe la!»

Zaman mɛn bɛ́ ǹ lɛduə̃li ná a banban

35 # MAT 4.23; MAR 1.39; LUK 4.44. Yezu goã n bibiĩ kiwi dadaran laanka kiwi bisinin ni; a na á goã minin darɛɛ ǹ lɛsɔkɔn kionən ne, bɛ̀ a lon a kiibaa ǹ Boo Tii Kɔɔ̃n pɛ, bɛ̀ a busu tɔrɔ din tumaa nya bɛ̀ a bɔ minin ganaa. 36#MNS 27.17; KIIN1 22.17; KZS2 18.16; EZE 34.5; MAR 6.34. Bɛ̀ á zaman mɛn yɛ, minin lɛn makara n kuĩ, a giala maǹ nɔmaa nɛ, ǹ foo n ziziɛ̃ nɛ, ka sèren mɛnɛn bɛ́ lɛduə̃li ná a ba ǹ la wa. 37#LUK 10.2. Á tɔ́n pɛ a kialandɛnan manɛ: «Kaa-piɛ lɛ lɛ á gole, sɛnɛ, a dí-nyalin manə ǹ ba tɛ wa. 38Lawa mɛn bɛ́ wuru lɛ a dɛnaa lɛa, ka bɛ lɛ nyankɔ, a dí-nyalin dia kaa-piɛ lɛ taman yii.»

Currently Selected:

Matiə 9: SCE2013

Highlight

Copy