Matiə 25

Yezu boo giməə mɛn da nɛniɛ fù wɔ paǹ li

1 # LUK 12.35. Bɛ̀ Lawa ná a kiibaa ǹ dí lɛ nya a ná a lɛ pã ǹ mɛn waáraa, a kɔnbɔ ǹ sii n ka kɛ nɛ: Nɛniɛ fù kɔ́n nɛ, ǹ nə́ bólonən goa, mà ǹsɛn man woe n diɛ lɔ tii ǹ zuũ lɛ. 2Ǹ min sooro n baãnaan lɛa, sooro kɛ dɔ n yiridɛnan lɛa. 3Ǹ mɛnɛn bɛ́ baãnaan lɛa bɛn nə́ ǹ bólonən goa, sɛnɛ, ǹ nyɔɔ saa ǹ nə́ koa n gɔn li ǹ nə́ woo-n wa. 4Sɛnɛ, min mɛnɛn bɛ́ yiridɛnan lɛa, bɛn nə́ ǹ bólonən goa, ǹ nə́ nyɔɔ kaa nyɔɔ mànan nɛ, ǹ nə́ woo ne. 5Lɔ tii ǹ zuũ lɛ bɛ́ á belebɔ a ná a die fuu wa, nyuù nɛniɛ fù lɛ yii kũ, ǹ nə́ nyuù wɔ.

6Làan bɛ́ á kɔ, ǹ nə́ n lɛ dɛ: «Lɔ tii ǹ zuũ lɛ á ke! Ka soo ka n da lɛ!» 7Nɛnɛn lɛn tumaa yoo, ǹ nə́ ǹ bólonən yɔrɔ bɔ. 8A baãnaan lɛn nə́ tɔ́n pɛ yiridɛnan lɛn manɛ: «Ka wɔsɛn gɔ ka kaa nyɔɔ lɛ kɔ́n nɛ, wɔsɛn bólonən man die nimi.» 9Yiridɛnan lɛn nə́ tɔ́n pɛ ǹ nɛ: «Aba, nyɔɔ mɛn bɛ́ wɔsɛn lon, a ba wɔsɛn boe, a yɛ a ka dɔn bɔ wa. Á soɛ ka wo nyɔɔ-sãlin li, ka nyɔɔ pii ka dinin wɔ lɛa.» 10Baãnaan lɛn bɛ́ nyɔɔ pii ǹ bǎã nɛ, lɔ tii ǹ zuũ lɛ daa ǹ kio. Nɛniɛ sooro mɛn bɛ́ ǹ nə́ n yii toa koo, bɛn nə́ kaa kun ni kɔn wɔ ǹ kion, ǹ nə́ kiɛnlɛ kũ ǹ nə́ sɔɔ. 11#LUK 13.25. Bɛ kio, baãnaa sooro lɛ dɔ́ daa, ǹ nə́ n lɛ dɛ: «Mìinaa, Mìinaa, kiɛnlɛ bũ wɔsɛn nə wɔ!» 12Lɔ tii ǹ zuũ lɛ tɔ́n pɛ ǹ nɛ: «Aba, sonbore pɛ á pɛsã, masɛ ba ka doɛ̃ wa.»

13Yezu tɔ́n pɛ ǹ nɛ:

– Ka n yii toa koo, a giala, ka a bɛa pinaa doɛ̃ wa, ka ba a biikoo dɔ doɛ̃ wa.

Yezu a boo giməə dí-nyali min sɔɔ wɔ paǹ li

(LUK 19.11-27)

14 *Lawa a kiibaa ǹ dí lɛ a kɔnbɔ ǹ sii kɔsɔ n ke: A n goon ka giĩ kɔ́n nɛ, a bɛ́ re woe zii ni, a ná a dí-nyalin bíi, á n gɔn màn koa ǹ li. 15Á sana kuturu#25.15 Sana kuturu goon nə kɔnpii ka min a lɛ̀ fu a dí nya ǹ saraa nɛ. sooro kɔ ǹ goon la, á sana kuturu paa kɔ ǹ goon dɔ la, á sana kuturu goon kɔ ǹ sɔɔbaa ǹ wɔ la. Á didie wɔ kɔ la á kɔnpɛ ka a pàã lɛ dan nɛ. Bɛ kio, á woo zii ni. 16A bɛ́ á sana kuturu sooro kɔ min mɛn la, bɛ kiɛ̃ gɔrɔ á woo pii kɔ ka bɛa sana lɛ nɛ, á wusoo á ǹ miã sana kuturu sooro yɛ. 17A sana kuturu paa kɔ min mɛn la, bɛ dɔ́ woo pii kɔ ka a wɔ-n miɛ̃, á sana kuturu paa kɔsɔ yɛ á tí a ganaa. 18Sɛnɛ, sana kuturu goon dɔ min mɛn ganaa, bɛ́ woo yala fɔ̃ tán, a ná a mìinaa lɛ a sana lɛ duru a nɛ. 19Lɛawaa damata bɛ kio, bɛa dí-nyalin lɛn mìinaa lɛ wusoo á daa piɛ, a ná a sana lɛ a sii yɔrɔ bɔ kun ka a dí-nyalin lɛn nɛ. 20Sana kuturu sooro bɛ́ á dɔ min mɛn ganaa, bɛ nə́ n zɔ̃ á dɔ, a sana kuturu sooro kɔsɔ mɛn yɛ á kaa li, á bɛ nyaa nɛ, á pɛ: «Mìinaa, ń sana kuturu sooro kɔ ma la. Ma á ke má sana kuturu sooro kɔsɔ yɛ.» 21A mìinaa tɔ́n pɛ nɛ: «Á siĩni, dí-nyali sonbore, bɔlɔgoondɛnaa. Ma n nə́ n bɔlɔgoondɛnaa baa sii boɛɛn nɛ, bɛ lɛ taman yii, masɛ á die n koɛ sii gole mìi la. Da n nyɛnyɛɛ kun ka masɛ nɛ.» 22Bɛ kio, sana kuturu paa dɔ min mɛn ganaa, bɛ nə́ n zɔ̃ á dɔ á pɛ: «Mìinaa, ń sana kuturu paa kɔ masɛ la. Ma á ke má sana kuturu paa kɔsɔ yɛ.» 23A mìinaa tɔ́n pɛ nɛ: «Á bǐɛ̃ kɔ, dí-nyali sonbore, bɔlɔgoondɛnaa. Ma n nə́ n bɔlɔgoondɛnaa baa sii boɛɛn nɛ, bɛ lɛ taman yii, ma á die n koɛ sii gole mìi la. Da n nyɛnyɛɛ kun ka masɛ nɛ.» 24Bɛ tumaa kio, sana kuturu goon dɔ min mɛn ganaa, bɛ nə́ n zɔ̃ á dɔ, á pɛ: «Mìinaa, masɛ á doɛ̃ máa n sii á kaka. N bɛ́ n màn tɔrɔ da bǎã mɛn nɛ wa, ma n màn kuri walan. Min kɔsɔn man dí nyɛɛ, nsɛ ná a là boe. 25Nyɛ́ɛ na á masɛ kũ. Bɛ lɛ nɛ, má woo n sana lɛ duru yala-n. Haya, n sana á ke!» 26A mìinaa lɛ tɔ́n pɛ nɛ: «Dí naarɛ nyali, yoonaa! Táa n tá doɛ̃ mà ma bɛ́ ma màn tɔrɔ da bǎã mɛn nɛ wa, mà man màn kuri walan? 27Toa bɛ̀ ma nə́ n woo masɛ a sana lɛ kɔ pii-kɔlen la, bɛ̀ masɛ bɛ́ má n bɔyaa, bɛ̀ ma wo maa sana saa, kun ka a là nɛ. 28Bɛ̀ á miɛ̃, ka sana kuturu goon lɛ si la, ka kɔ sana kuturu sooro dɛnaa lɛ la. 29A giala, màn bɛ́ min mɛn lon, kɔsɔ n die n diɛ bɛa dɛnaa wɔ li a mɔnaa. Sɛnɛ, màn kɔ́n bɛ́ a ba min mɛn lon wa, a boɛɛn mɛn dɔ din bɛ́ a lon, bɛ lɛ dɔ n die n sii la. 30#MAT 8.12; 22.13; LUK 13.28. Dí-nyali là baãnaa ke, ka kũ ka zũ kanaa wɔlɔ tì li, á die wuu pii walan, a sɔ kere bɔ.»

Biɛ̃ ǹ kiri boo

31 # MAT 16.27; 19.28. Bɛ̀ Min a Nɛgiĩ daa ka a kiibaa nɛ, kun ka lon a dia dí-a wolen tumaa nɛ ǹ mɛn pinaa, á die giɛ̃ a kii dankan gole la. 32Kanaa a tɔrɔn tumaa á re n lɛ soekɔn-a a yɔrɔ-a. Á die ǹ gɔgoɛ̃ a ǹ bɔ kɔn li, ka tɔɔn-lɛduə̃li bɛ́ sèren gɔgoɛ̃ a ǹ bɔ kun ka bòen ne lɔn. 33Á die sèren kiɛ a gusin, a bòen kaa a gɔsɛ. 34Kii lɛ á die pii a gusin-dɛnan lɛn manɛ: «Ma Di Lawa barka da kasɛn mɛnɛn ganaa, á kiibaa ǹ bǎã zɛnaa á koa ka nɛ haalɛ kanaa a giala kɔ waáraa, ka da giã kaa bǎã nɛ. 35A giala, bòo na á ma kũ, ka màn-bii kɔ ma la ma bii. Mu boro na á ma kũ, ka mu kɔ ma la má mi. Má goã tii lɛa, ka ma kũ doɛ̃ kaa kion. 36Ma gɔ̀nɔn kooro bɛ́ á goã, ka mɔnaa wɔ ma ganaa. Ma bɛ́ ma goã lon wa, ka ga ma walan. Ma bɛ́ má goã kòso-n, ka daa n yii kɔ ma ganaa.» 37Lawa bɔlɔ-silin lɛn man die pii ni bɛa biikoo li: «Dɛnaa, wɔsɛn man wɔ́ n yɛ biĩ bòo nə́ n ganaa, wɔ́ màn kɔ la n bii, mu boro nə́ n ganaa, wɔ́ mu kɔ n la n mi? 38Wɔsɛn man wɔ́ n yɛ tii lɛa biĩ, wɔ́ n kũ doɛ̃ wɔa kion, n gɔ̀nɔn kooro ne, wɔ́ mɔnaa wɔ n ganaa? 39Wɔsɛn man wɔ́ n yɛ biĩ, n nə́ n ba lon wa, hinlaa n nə́ kòso-n, wɔ́ woo n yii kɔ n ganaa?» 40Kii lɛ á die pii ǹ ni: «Masɛ n pii ka nɛ, sonbore ne: Bɛ̀ ka bɛa sii kɛ lɛ zɛnaa ma dɔɔ̃nɔn kɛn mɛn nɛ, haalɛ ta ǹ dɛnaa n boɛɛn nɛ lɔn, ka ǹ ka zɛnaa masɛ din ni.»

41Bɛ kio, kii lɛ á die pii a gɔsɛdɛnan lɛn manɛ: «Lawa bɛ́ á barka bɔ kasɛn mɛnɛn nɛ, ka n zɔ̃ ka n bɔ masɛ ganaa! Tɛ mɛn bɛ́ a ba nimi wa, Lawa zɛnaa *Sɛtaan laanka a dia dí-a wolen manɛ, ka wo walan. 42A giala, bòo na á masɛ kũ, ka màn-bii kɔ masɛ la ma bii wa. Mu boro ma kũ, ka mu kɔ masɛ la má mi wa. 43Má goã tii lɛa, ka ma bíi kaa piɛ wa. Ma gɔ̀nɔn kooro bɛ́ á goã, ka mɔnaa wɔ ma-a wa. Ma bɛ́ ma goã lon wa, ka bɛ dɔ nɛ, ma bɛ́ má goã kòso-n, ka da ǹ yii kɔ ma-a wa.» 44Bɛa biikoo li, ǹ tá re pii: «Dɛnaa, wɔsɛn man wɔ́ n yɛ biĩ, bòo nə́ n ganaa, mu boro nə́ n ganaa, n nə́ tii lɛa, n gɔ̀nɔn kooro ne, busu nə́ n ganaa, hinlaa n nə́ kòso-n, wɔsɛn nə́ ǹ piã wɔ n dɔ n lɛ wa?» 45Kii lɛ á die ǹ lɛ sii kɛnɛn: «Masɛ n pii ka nɛ, sonbore ne: Bɛ̀ ka bɛa sii kɛ lɛ zɛnaa masɛ dɔɔ̃nɔn kɛn kɔ́n nɛ wa, haalɛ ta ǹ dɛnaa n boɛɛn nɛ lɔn, ka ǹ ka zɛnaa masɛ dinmaa lɛ-n wa.» 46#DAN 12.2. Bǎã mɛn bɛ́ a nɔmaa ná a ba nyɛɛ wa, bɛn tá re woe walan, min peperen tá re nyin nyabaã yii.

Currently Selected:

Matiə 25: SCE2013

Highlight

Copy