Matiə 11

ZAÃ minin dia ǹ nə́ woo nɔ̀n mɛn da Yezu la

(LUK 7.18-35)

1Yezu bɛ́ á bɛa doroon lɛn kɔ a kialandɛnaa fulupaa lɛ la á nya ǹ mɛn waáraa, á soo á n bɔ walan á woo minin daraa bɛa gána lɛ a kiwin ni, á Lawa a boo pɛ ǹ nɛ.

2Zaã, *batɛmu-dali bɛ́ kòso-n ǹ mɛn waáraa, á Yezu a nya ǹ dín lɛn boo ma. ZAÃ tɔ́n a kialandɛnan kɔnɔn dia, 3mà ǹ wo nɔ̀n da la: «Wɔsɛn bɛ́ n yii diɛ Minin Nyin-sili mɛn la, a din lɛ-n hinlaa, wɔ doamaa nɛ wɔ n yii da kɔsɔ la?»

4Yezu tɔ́n pɛ ǹ nɛ: «Ka too bɛ́ á màn mɛn ma, ka yii yɛ, ka wo bɛ lɛ laakalaa ZAÃ nɛ. 5#IZA 35.5-6; 61.1. Yii tere-an yii n wɔlɔ yii, bɔlɔkan man tɔ we, gɔ̀nɔn busu babaraa dɛnan busu n nyɛɛ, too tere-an man boo miɛ, geren yii n kiɛ, Boo Tii Kɔɔ̃n nə n pii doobaan manɛ. 6Masɛ a sii bɛ́ a re min mɛn gù dii wa, bɛa dɛnaa foo á re kɔɔ̃n koe.»

7ZAÃ a kialandɛnan bɛ́ ǹ nə́ n bɔyaa ǹ nə́ woo, Yezu ná a giala kɔ á ZAÃ boo da zaman nɛ, á pɛ:

– Ka n ka woo ga wàa mɛn-a diə gole ne? Buu mɛn bɛ́ piɛ̃ n bìn diɛ a ganaa? 8Bɛ̀ bɛ bie wa, ka n ka woo ga wàa ganaa? Dɔnkɛ sonbore wɔle ne ká woo ga a ganaa? Sɛnɛ, dɔnkɛ sonbore wɔlen man kiin kion. 9Ka n ka woo ga wàa ganaa kəni? Lawa a boo gii-dali ni? Paɛ! Masɛ n pii ka nɛ, máa la Lawa a boo gii-dali din ni. 10#MAL 3.1. A giala Lawa a boo na á pɛ a dia dí-a wole ZAÃ wɔ paǹ li kɛnɛn: «Á ke, masɛ Dɛnaa Lawa n maa dia dí-a wole diɛ n nyɛɛnɛ, a n zii zɛnaa n nyɛɛnɛ.» 11Masɛ n pii ka nɛ, sonbore: minbuiin nɛn bii, min kɔ́n tɔn yɛ bɔrɔ, bɛ n gole á la ZAÃ -n wa. Ka bɛ lɛ din tumaa dɔ nɛ, min mɛn bɛ́ re goɛ̃ min tumaa a boɛɛn lɛa lon a kiibaa ǹ bǎã kɛ-n biɛ̃, bɛ á gole á la ZAÃ nɛ. 12#LUK 16.16. A kũ ZAÃ a Boo Tii Kɔɔ̃n pɛ biikoo kɛ ganaa a da pelo yaa, lon a kiibaa ǹ bǎã lɛ a wɔ n minbuiinin la kakaɛ̃, min mɛnɛn bɛ́ doa boe, bɛn man yii. 13Lawa a boo gii-dalin tumaa laanka Muizu a landa boo da kiibaa ǹ bǎã lɛ wɔ paǹ li, yǎa á daa dɔ ZAÃ a biikoo ganaa. 14#MAL 3.23; MAT 17.10-13; MAR 9.11-13. Ǹ tumaa pɛ mà Yilii á re die, ta ka lɛ kɔ woo, ta ka lɛ kɔ wa, a din ZAÃ kɛ lɛ nɛ, ǹ ná a boo da. 15Toon bɛ́ ka lon, ka n too kɔ koe!

16Man die pelo minbuiinin kɛn zoɛ̃ kɔn ka dien ne kəni? Maǹ kɔnboe ka nɛnyaanan nɛ, giã-n tán zaman paã ǹ bǎã nɛ, n lɛ didii kɔn ganaa ǹ nə́ pii:

17«Wɔ́ pìi pɛ ka nɛ, ka bɛ̀ baa wa!

Wɔ́ gɛ̀ loe lɔ ka nɛ, ka wuu dɔ pɛ wa!»

18A giala ZAÃ na á daa, á goã n lɛ soɛ parsiini a ba màn bii wa, a ba màn mii wa, minin man a gialaa pii mà nɔ̀ɔnɔn man a ganaa! 19Min a Nɛgiĩ dɔ na á daa, asɛ n màn bii, a n màn mii, minin man a gialaa pii: «Ka ga, giĩ kɛ-a, nàndɛnaa nɛ, a ba kiɛ̃ ka duvɛ̃ dɔ-n wa, wusuru-silin man a giaáran lɛa ka sii baraa-zɛnaali kɔsɔn dɔn nɛ!» Sii bǐɛ̃ mɛn nə yɛ wɔsɛn nya ǹ dín gɔ́ɔ̃ nɛ, bɛ lɛ n Lawa a yiridɛnaabaa nyɛɛ.

Kiwin mɛnɛn bɛ́ ǹ nə́ n piã ka Lawa a boo ne

(LUK 10.13-15)

20Bɛ kio, Yezu bɛ́ á na a kaãbaa ǹ sii lɛ a gigiã zɛnaa kiwin mɛnɛn nɛ, a ná a giala kɔ á yoo bɛn gialaa, a giala ǹ minin nə ǹ tɔ wɔ ǹ gɔn bɔyaa wa. Á pɛ: 21#IZA 23.1-18; EZE 26.1—28.26; ZOW 4.4-8; AMƆ 1.9-10; ZAK 9.2-4. «Kasɛn Koraazɛn minin kɛn, bɔ̀n nə kaa wɔ lɛa! Kasɛn Bɛtsayidaa minin kɛn, bɔ̀n nə kaa wɔ lɛa! A giala kaãbaa ǹ siin mɛnɛn bɛ́ ǹ nə́ n zɛnaa kaa piɛ, bɛ̀ bɛn man nə́ n zɛnaa Tiiri kiwi laanka Sidɔn kiwi babaraan kɛn nɛ, bɛ̀ ǹ nə́ boroon wɔ ǹ dinin ganaa, ǹ nə́ ton kaa ǹ dinin ganaa haalɛ bibi, ǹ nə́ nyaa mà ǹsɛn nə́ n taasɛ ǹ nə́ wusoo ǹ sii baraan kio. 22Bɛ lɛ taman yii, masɛ n pii ka nɛ, kiri kurii pinaa, kaa dɔlɔ á die gole koe á la Tiiri minin laanka Sidɔn minin wɔ nɛ. 23#IZA 14.13-15; SGK 19.24-28. Kasɛn Kafaranaamu minin kɛn man taasɛ mà ka n die gole koe yǎa Lawa ganaa? Ka n die gisĩ yǎa bɔ̀nbaa ǹ tɛ gole kɛ nɛ. A giala kaãbaa ǹ siin mɛnɛn bɛ́ ǹ nə́ n zɛnaa kaa piɛ, bɛ̀ bɛn man nə́ n zɛnaa Sodɔmu, kiwi kɛ lɛ Lawa ziziɛ̃ ka tɛ nɛ, bɛ̀ a tá tɔn a tan haalɛ pelo. 24#MAT 10.15.Bɛ lɛ taman yii, masɛ n pii ka nɛ, kiri kurii pinaa, kaa dɔlɔ á die gole koe á la Sodɔmu minin wɔ nɛ.»

Yezu bɛ́ susui mɛn koe

(LUK 10.21-22)

25A din waáraa kɛ lɛ nɛ, Yezu pɛ: «Ma Di Lawa ganaa, lon laanka tán a Dɛnaa, masɛ n barka diɛ n nɛ. A giala n din ni ń siin kɛn duru sii-dɔ̃lin laanka yiridɛnan la, ń nyaa baãnaanan manɛ. 26Hiĩ, maa Díi ganaa, a zɛnaa miɛ̃ kɛ na á kɔɔ̃n kɔ n din ganaa. 27Maa Díi Lawa na á màn din tumaa sii toa ma gɔn. Min kɔ́n ba Nɛgiĩ doɛ̃ wa, bɛ̀ á n bɔ Díi dinsɔɔ̃ nɛ, min kɔ́n ba Díi doɛ̃ wa, bɛ̀ á n bɔ a Nɛgiĩ lɛ dinsɔɔ̃ laanka Nɛgiĩ lɛ bɛ́ li a nyaa min mɛn nɛ.

28«Ka mɛnɛn tumaa bɛ́ nɔmaa nɛ guĩ giulun, ka da ma li, ma á die susui koe ka la. 29Ma a kakaarɛ wa, ma a min puusə koe wa. Ma bɛ́ guĩ mɛn koe ka la ka bɛ lɛ si, ka maa doroo ma, piɛ̃ á re kiɛ ka ganaa. 30Masɛ bɛ́ guĩ mɛn koe ka la á puusə, a guĩ a kaka wa.»

Currently Selected:

Matiə 11: SCE2013

Highlight

Copy