Malakii 2
2
Lawa nə n gɔn wɛɛ Lawa a wúlu-bɔlen manɛ
1Gɔn waa ma n boo á ke masɛ Dɛnaa Lawa Pàãyiidɛnaa n pii ka Lawa a wúlu-bɔlen manɛ: 2Ka n too kɔ ma lon, ka n doa gugurubaa mɛn bɛ́ maa wɔ lɛa ka bɛ kɔ ma la. Bɛ bie wa, ma á re lɛn baraa bíi ka li, ma yii-nyɛɛ mɛn lɛ kɔ ka la ma á re bɔyɛɛ ma baa lɛn baraa lɛa ka ganaa. Hiĩ, a giala kaa sii kɔn kuĩ ka ka parasii-n wa. 3Ma á re n gɔn wɛɛ ka tɔrɔn kɛn ma-n gɔrɔ. Kasɛn kɛn kəni, man die tɔɔn bù kiɛ ka yɔrɔ nɛ, ka tɔɔn mɛnɛn lɛn dɛ kaa zɔ́nɔn kɛn biikoo li. Man die kasɛn lɛ koe kun ka bɛn nɛ. 4#MNS 3.11-13. Ka á re doɛ̃ ka bɛ-n mà masɛ Dɛnaa Lawa Pàãyiidɛnaa n má gɔn waa ǹ boon kɛn da, ma á lɛ kɔ kɔn la kɛ tamɛɛ nɛ ma bii ni ka *Levii tɔrɔn nɛ. 5#MNS 25.12. Bɛa lɛ kɔ kɔn la kɛ lɛ taman yii, ma nyin kɔ la ka yii-nyɛɛ nɛ, man má ǹ kɔ la ma a ma guguru kɔ, a nyɛ́ɛ baa ma yii ni ma tɔ á golebaa taman yii. 6Bɛa minin kɛn lɛn daraa ǹ boo tumaa na á goã pepere, ǹ soɛ boo kɔn da wa. Maǹ nə́ goã giã-n kũ ka masɛ nɛ yii-nyɛɛ gɔ́ɔ̃ nɛ ka peperebaa nɛ, ǹ nə́ min gigiã kurəə sii baraa zɛnaa ganaa. 7Hiĩ, Lawa a wúlu-bɔle a nya ǹ dí n ka Lawa doɛ̃ nɛ, ka a landan tamaa nɛ. Maǹ die nɔ̀n diɛ a din la ka Lawa a dí-pɛn yɔrɔn nɛ. A din ni Dɛnaa Lawa Pàãyiidɛnaa á boo sii á pɛ wole lɛa. 8Sɛnɛ kasɛn Lawa a wúlu bɔlen, ká kanaa ká n bɔ bɛa zii lɛ la. Kaa daraa ǹ boon nə́ min gigiã da sii baraa zɛnaa ganaa, lɛ kɔ kɔn la mɛn bɛ́ wɔ́ wɔ, ká bɛ ziziɛ̃, masɛ Dɛnaa Lawa Pàãyiidɛnaa n pii ka nɛ. 9A bɛ́ miɛ̃, masɛ n die Izirayeli a zaman tumaa kɛ yii soe ka ganaa, ǹ ka pɔpɔsɛ, ǹ sìi da ka-a, a giala ka a ma foo sii zɛnɛɛ wa, ka n kun paǹ goon ne ka paǹ goon toa wolan maa laanda siin wɔ paǹ li.
Lɛ kɔ kɔn la a ziziɛ̃
10Wɔ tumaa bie di goon nɛn lɛa wa? A din Lawa goon kɛ lɛ bie á wɔ tumaa zɛnaa wa? Wàa na á baa wɔ á baraabaa zɛnɛɛ kɔn nɛ. Wɔ bɔlɔgoondɛnan baa ka wɔ digolon lɛ kɔ kɔn la ká Lawa-n kɛ-n wa. 11Taãnɛ, Zudaa minin nə bɔlɔgoondɛnaabaa zɛnaa lɛ kɔ wɔ paǹ li wa, ǹ nə́ sii bɔbɔnɛɛn zɛnaa Zeruzalɛmu ka Izirayeli gɔɔ̃ din tumaa nɛ, ǹ nə́ Lawa a bǎã sonbore lɛ puusə kɔ, ǹ nə́ lɔn wɔ, ǹ mɛnɛn bɛ́ dìn guguru koe. 12Min mɛn bɛ́ sii kɛ zɛnɛɛ miɛ̃, Lawa bɛa dɛnaa bɔ a bɔ a tɔrɔbaa nɛ a laanka a kion minin tumaa nɛ ka min mɛn dɔ bɛ́ re yii Zakɔba tɔrɔn bii, *wúlu màn sii mà a n koe Dɛnaa Lawa Pàãyiidɛnaa la. 13Ka bɛ́ sii mɛn kɔsɔ zɛnɛɛ doo bɛ á ke: Ka yii mu Dɛnaa Lawa a *wúlu bɔ ǹ bǎã si á n kɔ lɛ, wuu pɛ nɛ, ka ginii ni, a giala mà a ba n too koe ka lon doo wa. Ka bɛ́ die wúlu bɔ ǹ mànan mɛnɛn koe la, a ba ǹ sii ka gɔn wa. 14Ka n nɔ́n diɛ ma wàa na a baa a ba ǹ li wa? A giala, Dɛnaa Lawa na á siére baa ka bii ka kaa tɔntɔraabaa waáraa lɔ kɛ nɛ, ka sã ka tii. A din lɛ-n ka gòã li ǹ lɔ lɛa, ka n doa n kɔn nɛ. 15Lawa bie á ka baa gɔ̀nɔn goon lɛa ka lɔ lɛ-n wa, gɔ̀nɔn nɛ, kun ka yiri ni, bɛa gɔ̀nɔn goon kɛ lɛ a taasiɛ n doa-n wàa ganaa? Lawa bɛ́ nɛnyaanan mɛnɛn koe ka la bɛn lɛn manɛ, ǹ na a din a nɛnyaanan baa. 16Dɛnaa Lawa, Izirayeli a Lawa pɛ: «Ma soɛ̃ n ka gòã li ǹ lɔ loo ne, ka min mɛn bɛ́ kakaarɛbaa zɛnɛɛ. Dɛnaa Lawa Pàãyiidɛnaa na á pɛ miɛ̃. Ka yiri bɔ ka dinin li, ka nyan wusoo kaa lɛ kɔn boon kio wa.»
Lawa á re boo gii-dali diɛ
17Ka n Dɛnaa Lawa nɔmɛɛ ka kaa boo gigiãn kɛn nɛ. Sɛnɛ ka n nɔ̀n diɛ: Wɔ n nɔmɛɛ ka yɔrɔ mɛn nɛ? Ka n pii: Min mɛn bɛ́ sii baraa zɛnɛɛ bɛ n siĩni Dɛnaa Lawa yii li, a n bɛ miã minin lɛn narɛ. Ka n pii dɔn: Lawa kɛ lɛ toɛ peperebaa n yii, á maa?
Currently Selected:
Malakii 2: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
