Zonaasi 1
1
1 #
KIIN2 14.25. Ǹ kɔn pinaa, Dɛnaa Lawa boo da Amitayii a nɛgiĩ Zonaasi ni, á pɛ nɛ: 2«Yoo, n wo Ninivu kiwi gole kɛ nɛ n paraa ǹ li. A giala, ǹ baraabaa lɛ dɔ yǎa masɛ li.» 3Sɛnɛ Zonaasi yoo, mà a n baa sii woe Tarsisi kiwi, a n bɔ Dɛnaa Lawa yɔrɔ-a. Á daa Zafa tà lɛ-a, á mu la ǹ goo goon yɛ walan die woe Tarsisi. Á goo lɛ a wɔ ǹ giɔ̀mɔ saraa, á n dɔ kun ka minin lɛn nɛ, mà asɛ n woe Tarsisi kiwi sɔsɔɔ kɛ nɛ, a n bɔ Dɛnaa Lawa yɔrɔ-a. 4Sɛnɛ Dɛnaa Lawa piɛ̃ gole yoo Yìsi mu gole lɛ la. Piɛ̃ lɛ gole kɔ á la yii ni yǎa mu n kiɛ goo lɛ nɛ. 5Nyɛ́ɛ bòsonon lɛn kũ parsiini didie nə n lɛ dɛ a dì ganaa. Mànan mɛnɛn nə goã goo lɛ nɛ, ǹ nə́ bɛn waa ǹ nə́ ǹ zũ kɔ̀ mu lɛ li, màn mɛn bɛ́ toɛ goo lɛ puusə kɔ. Zonaasi sɛ gisĩ goo lɛ gɔ́ɔ̃-n tán á waa tán, á goã nyuù we taãn-taãnɛ. 6Goo-dabaali lɛ nə n zɔ̃ á daa a li á pɛ nɛ: «Wàa na á baa n tá nyuù we?» Yoo n nə n lɛ dɛ n dì ganaa, kɔntan bɛa lawa kɛ lɛ tá re n yiri koɛ wɔ li, a re toɛ wɔ bɔ̀n baa wa. 7Ǹ nə́ tɔn pɛ kɔn nɛ mà ǹ daa ǹsɛn nə n pã màn mɛn bɛ́ toɛ, ǹsɛn nə dɔ̃ min mɛn a lɛa bɛ nɛ koe kɛ lɛ n boe ǹsɛn ganaa. Ǹ nə́ n pã, á mɛnaa Zonaasi la. 8Ǹ nə́ tɔn pɛ Zonaasi ni kɛnɛn: «Màn mɛn bɛ́ toɛ koe kɛ lɛ n boe wɔsɛn ganaa, bǐɛ̃ kɔ n nə ǹ dɛnaa pɛ wɔsɛn manɛ. N dí n ka wàa nɛ? Ma n boe maa? Ma n boe gána mɛn nɛ? Ma n tɔrɔ mɛn min lɛa?» 9Á ǹ lɛ si kɛnɛn: «*Ebrəə min ni ka masɛ nɛ. Man Dɛnaa Lawa guguru koe, lon a Lawa kɛ lɛ á yìsi mu laanka tán zɛnaa.» 10Nyɛ́ɛ gole minin lɛ n kũ parsiini. Ǹ nə́ tɔn pɛ nɛ, mà wàa mɛn sii n ke á zɛnaa! A kɔnpɛ ka a din a da ǹ boo ne, minin lɛn nə́ dɔ̃ mà a n baa sii n boe Dɛnaa Lawa yɔrɔ-a. 11Ǹ nə́ pɛ nɛ: «Wɔsɛn man die wàa sii zɛnɛɛ n nɛ, màn mɛn bɛ́ toɛ kɔ mu lɛ waa, a n bɔ wɔsɛn gialaa?» A giala, màn na á goã miɛ̃ kɔ mu lɛ a bìn diɛ li. 12Zonaasi pɛ ǹ nɛ, mà ǹ na asɛ saa ǹ na asɛ zũ kɔ̀ mu lɛ li ń giɛ a tá wɛɛ a n bɔ ǹ gialaa. A giala, mà asɛ á doɛ̃ mà asɛ din a lɛa nɛ piɛ̃ gole kɛ lɛ tá ǹ gialaa. 13Minin lɛn nə́ mu baa mà ǹ dɔ tán gere la, sɛnɛ ǹ goã boe la wa. A giala, kɔ̀ mu lɛ na á goã ǹ gialaa bɛ̀ á n màn diɛ a bìn diɛ li. 14Ǹ nə́ n lɛ dɛ Dɛnaa Lawa ganaa ǹ nə́ pɛ: «E Dɛnaa Lawa, n nyan toa wɔsɛn nə bɔ̀n baa wa. N baran giĩ zɛrɛdɛnaa kɛa gɛ̀ dɔlɔ da wɔsɛn mìi-n wa. A giala, bɛ̀ sii mɛn kɔɔ̃n kɔ n din ganaa, n nə n bɛ zɛnɛɛ.» 15Minin lɛn nə́ Zonaasi saa, ǹ nə́ zũ Yìsi mu gole lɛ li. A din bǎã-n gɔrɔ mu lɛ golee, a bìn diɛ lɛ waa. 16Nyɛ́ɛ golee minin lɛn kũ parsiini Dɛnaa Lawa wɔ paǹ li. Ǹ nə́ *wúlu màn bɔ ǹ nə́ kɔ la, ǹ nə́ n lɛ kɔ la ka màn kɔsɔn dɔn nɛ.
Currently Selected:
Zonaasi 1: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
